1. Ol manmeri bilong God i kamapim pasin laikim long wanem rot?

OL MANMERI bilong God i stap olsem wanpela famili long sait bilong bilip, na pasin laikim i stap namel long ol. (1 Jon 4:16, 21) Oltaim ol i kamapim dispela pasin taim ol i mekim ol gutpela tok na gutpela pasin long narapela narapela. Ol i no kamapim pasin laikim wan wan taim tasol bambai ol i kisim biknem. Taim yumi mekim gutpela pasin long ol narapela na soim olsem yumi tingim gut ol, yumi “bihainim pasin bilong God, em i laikim [yumi] tumas na [yumi] stap olsem ol pikinini bilong em.”—Efe. 5:1.

2. Olsem wanem Jisas i kamapim pasin bilong God long laikim ol narapela?

² Jisas i bihainim gut tru pasin bilong Papa bilong em. Em i tok: “Yupela ol man i save hatwok nating na karim ol bikpela hevi, yupela kam long mi na bai mi givim nupela strong long yupela . . . , long wanem, mi man bilong pasin isi na pasin daun.” (Mat. 11:28, 29) Taim yumi bihainim eksampel bilong Krais long ‘tingim ol rabisman na helpim ol,’ Papa bilong yumi long heven bai orait long yumi na yumi bai stap amamas tru. (Sng. 41:1) Yumi ken stori long olsem wanem yumi inap soim pasin  bilong tingim gut ol narapela insait long famili, kongrigesen, na long taim yumi autim tok.

3. Olsem wanem man marit inap kliagut long filings bilong meri bilong em na soim olsem em i tingim meri? (Lukim piksa long kirap bilong stadi.)

³ Ol man marit i mas i go pas long soim pasin bilong tingim gut ol narapela insait long famili. (Efe. 5:25; 6:4) Olsem, Baibel i kirapim ol man marit long ol i mas “kliagut long tingting i stap long bel bilong ol” meri bilong ol. (1 Pita 3:7) Man i mas kliagut long tingting bilong meri bambai em inap mekim samting bilong soim olsem em i tingim gut meri. Olsem, gutpela man marit i save olsem meri bilong em i stap olsem helpim bilong em, na tingting bilong tupela i no wankain. Tasol dispela i no makim olsem man i mas luk daun long meri. (Stt. 2:18) Olsem na man marit bai tingim gut filings bilong meri bilong em na soim pasin rispek na onarim meri. Wanpela meri marit long Kanada i stori long pasin bilong man bilong em olsem: “Taim mi kamapim filings bilong mi, em i no save daunim mi na tok, ‘Yu mas rausim kain tingting olsem.’ Na tu, em man bilong putim gut yau. Em i bihainim gutpela pasin taim em i helpim mi long senisim tingting mi gat long wanpela samting.”

4. Taim man marit i toktok wantaim ol narapela meri, olsem wanem em inap soim olsem em i tingim gut meri bilong em?

⁴ Gutpela man marit i save tingim filings bilong meri bilong em taim em i toktok wantaim ol narapela meri. Em i no inap tru long tok gris wantaim narapela meri o mekim ol samting bilong soim olsem em i gat laik long em. Na tu, em i no save tok gris wantaim ol meri taim em i yusim sosel netwok na Intenet. (Jop 31:1) Long olgeta samting em i mekim, em i stap gut long meri bilong em bikos em i laikim em, na tu, em i laikim God na em i heitim ol pasin nogut.—Ritim Song 19:14; 97:10.

5. Olsem wanem meri marit inap soim olsem em i tingim gut man bilong em?

⁵ Taim man marit i bihainim pasin bilong Jisas Krais, em het bilong man, em i helpim meri bilong em long kisim pasin bilong soim “bikpela rispek” long em. (Efe. 5:22-25, 33) Taim meri marit i soim kain pasin rispek olsem, dispela bai kirapim em long tingim gut man bilong em. Olsem, ating em bai tingim gut man taim man i mas lusim bikpela haptaim long mekim ol wok tiokratik, o taim man i tingting planti long sampela samting. Wanpela man marit long Briten i tok: “Sampela taim meri bilong mi i lukim olsem pasin bilong mi i senis na em i save olsem mi wok long tingting planti long wanpela samting. Nau em bai bihainim stiatok i stap long Sindaun 20:5. Em bai wet i go inap long gutpela taim bambai em i ken ‘pulim’ dispela tingting mi gat long en i kam antap, sapos em samting mitupela inap stori long en.”

6. (a) Olsem wanem yumi olgeta inap skulim ol pikinini long tingim gut ol narapela? (b) Olsem wanem dispela i helpim ol pikinini?

⁶ Taim ol papamama i tingim gut narapela narapela, ol i stap gutpela piksa long ol pikinini i ken bihainim. Em wok bilong papamama long skulim pikinini bilong ol long samting ol i mas mekim bilong soim olsem ol i tingim gut ol narapela. Olsem, papamama i ken skulim ol pikinini long no ken ran insait long Haus Kingdom. Taim ol i mekim ol bung bilong amamas, ating papamama i ken tokim pikinini long larim ol lain i gat bikpela krismas i go pas long kisim kaikai. Olgeta insait long kongrigesen i ken helpim ol papamama long skulim ol pikinini. Olsem, taim pikinini i mekim gutpela pasin na em i opim dua long yumi, orait yumi ken tok amamas long em. Long dispela rot yumi helpim dispela pikinini long luksave olsem, “amamas bilong givim samting i winim amamas bilong kisim samting.”—Apo. 20:35.

7. (a) Olsem wanem Jisas i soim olsem em i tingim wanpela man i yaupas? (b) Yumi kisim wanem skul long eksampel bilong Jisas?

⁷ Wanpela taim Jisas i raun long hap bilong Dekapolis, na ol manmeri i “bringim wanpela  man i kam long em, em i yaupas na maus i hevi.” (Mak 7:31-35) Jisas i no oraitim em long ai bilong ol manmeri, nogat. Em i “kisim [em] i go longwe” na oraitim em. Bilong wanem Jisas i mekim olsem? Ating dispela man i tingim olsem em i yaupas na em i no inap toktok gut, na em i pilim sem long i stap namel long bikpela lain manmeri. I luk olsem Jisas i luksave long filings bilong dispela man, olsem na em i kisim em i go longwe na oraitim em. Yumi no inap wokim ol mirakel na oraitim ol sikman. Tasol yumi mas tingim filings bilong ol wanbilip bilong yumi, na ol samting yumi inap mekim bilong mekim isi bel bilong ol. Aposel Pol i tok: “Yumi wan wan i mas tingim ol arapela namel long yumi, na kirapim ol long mekim pasin laikim na mekim ol gutpela wok.” (Hib. 10:24) Jisas i pilim tru tingting bilong dispela yaupas man na em i mekim samting bilong soim olsem em i tingim gut em. Jisas i stap gutpela eksampel yumi ken bihainim!

8, 9. Olsem wanem yumi inap soim olsem yumi tingim ol bratasista i lapun na ol bratasista i sik? (Stori long ol eksampel.)

⁸ Tingim gut ol lapun na ol lain i sik. Taim yumi soim pasin laikim long narapela narapela, dispela i soim olsem yumi disaipel bilong Krais. (Jon 13:34, 35) Dispela pasin laikim i kirapim yumi long helpim ol lapun na ol lain i paralais bambai ol i ken kam long ol miting Kristen na insait long wok bilong autim gutnius. Yumi inap helpim ol maski ol i no inap lusim bikpela taim na strong long mekim ol wok lotu. (Mat. 13:23) Michael i save sindaun tasol long wilsia. Tasol em i amamas tru olsem famili bilong em na ol bratasista long grup bilong em long autim tok i save helpim em. Em i tok: “Ol i save helpim mi, olsem na mi save go long klostu olgeta miting na oltaim mi save autim tok. Mi laikim tru wok bilong autim tok long pablik ples.”

⁹ Planti Betel i gat ol bratasista i lapun na ol bratasista i sik. Ol gutpela ovasia i soim olsem ol i tingim gut ol dispela gutpela wokman na ol i stretim rot bambai ol inap autim tok long rot bilong raitim pas o autim tok long telefon. Bill i gat 86 krismas na em i save raitim pas i go long ol lain i stap long ol longwe ples. Em i tok: “Mipela i amamas tru long raitim ol pas.” Nancy em klostu nau em bai i gat 90 krismas, em i tok: “Mi no tingim dispela wok olsem pasin bilong raitim tasol pas na putim insait long envelop, nogat. Dispela em wok autim tok. Ol man i mas save long tok i tru!” Ethel i bon long 1921, na em i tok: “Mi save pilim pen long olgeta de. Sampela taim mi pilim hatwok tru long werim klos.” Maski i olsem, em i amamas tru long autim tok long telefon, na em i gat ol gutpela gobek. Barbara i gat 85 krismas i tok: “Helt bilong mi i no gutpela, olsem na mi save hatwok long i go autim tok. Tasol mi inap toktok wantaim ol narapela taim mi autim tok long telefon. Tenkyu Jehova!” Insait long klostu wanpela yia samting, sampela lapun bratasista i givim bel tru na ol i lusim 1,228 aua long autim tok, ol i raitim 6,265 pas, ol i toktok wantaim winim 2,000 manmeri long telefon, na tilim 6,315 pablikesen! Gutpela wok bilong ol i mekim Jehova i bel gut tru!—Snd. 27:11.

10. Olsem wanem yumi inap helpim ol bratasista long harim gut ol tok i kamap long ol miting?

¹⁰ Tingim ol narapela long ol miting Kristen. Yumi laik bai ol bratasista i harim gut ol tok i kamap long ol miting. Yumi inap mekim olsem taim yumi soim olsem yumi tingim gut ol. Hau bai yumi mekim olsem? Wanpela rot em long kamap long Haus Kingdom paslain long miting i kirap bambai yumi no pulim ai bilong ol narapela. Em tru olsem sampela samting inap kamap na yumi kam leit long miting. Tasol sapos pasin bilong leit i kamap olsem pasin bilong yumi, orait yumi mas skelim olsem wanem yumi inap soim olsem yumi tingim gut ol narapela. Tingim tu olsem Jehova na Pikinini bilong em i go pas long dispela bung. (Mat. 18:20) Olsem na yumi mas soim bikpela rispek long tupela!

11. Bilong wanem ol brata i gat hap long miting i mas bihainim tok i stap long 1 Korin 14:40?

¹¹ Pasin bilong tingim gut ol bratasista i makim tu olsem yumi mas bihainim dispela tok: “Olgeta samting yupela i mekim, yupela i mas  mekim long gutpela pasin na ol samting i mas ron gut.” (1 Kor. 14:40) Ol brata i gat hap bilong miting i mas bihainim dispela tok na pinisim ol tok bilong ol insait long taim stret ol i makim. Sapos ol i bihainim gut taim, ol i soim olsem ol i tingim brata husat bai mekim tok bihain long ol, na ol i tingim tu ol bratasista. Ating haus bilong sampela bratasista i stap longwe. Sampela i mas kisim PMV o teksi na go bek long haus. Na tu, ating sampela bratasista i gat poroman marit husat i no wanbilip na ol i laik bai poroman marit bilong ol i mas go bek kwik long haus.

12. Bilong wanem yumi mas ‘mekim pasin laikim na tingim tru ol’ elda? (Lukim blok “Tingim Gut Ol Brata i Go Pas.”)

¹² Ol wasman insait long kongrigesen i mekim ol gutpela wok na ol i givim bel tru long wok autim tok, olsem na yumi mas soim olsem yumi tingim gut ol. (Ritim 1 Tesalonaika 5:12, 13.) Tru tumas, yumi olgeta i amamas long ol wok ol elda i mekim bilong helpim yumi. Olsem na yumi laik kamapim klia tenkyu bilong yumi taim yumi wok gut wantaim ol na sapotim ol. Dispela em i bikpela samting bikos “oltaim ol i was long [yumi], na bihain ol i mas bekim tok long God long dispela wok ol i bin mekim.”—Hib. 13:7, 17.

13. Yumi kisim wanem skul long pasin Jisas i mekim long ol narapela?

¹³ Aisaia i tok profet olsem long Jisas: “Pitpit i no gat strong na i laik bruk, em bai i no brukim olgeta. Na em bai i no mekim i dai lam i no lait gut.” (Ais. 42:3) Pasin bilong Jisas long laikim ol manmeri i kirapim em long pilim tru hevi bilong ol. Em i kliagut long filings bilong ol manmeri husat i olsem pitpit i no gat strong na i laik bruk o lam i no lait gut. Olsem na em i tingim gut ol, mekim gutpela pasin, na em i no les kwik long ol. Ol liklik pikinini tu i laikim Jisas. (Mak 10:14) Em tru olsem yumi no inap save gut long tingting bilong narapela na skulim man wankain stret olsem Jisas i mekim! Tasol yumi mas tingim gut ol manmeri  long teritori bilong yumi. Yumi mekim olsem long pasin bilong yumi long toktok wantaim ol, wanem taim yumi toktok wantaim ol, na hamas taim yumi lusim long toktok wantaim ol.

14. Bilong wanem yumi mas skelim gut pasin yumi bihainim taim yumi toktok long ol narapela?

¹⁴ Yumi mas mekim wanem kain pasin taim yumi toktok long ol narapela? Long nau, ol bikpela kampani, lain politik, na ol bikman bilong lotu i “mekim nogut” long planti milion manmeri na “ol i stap nogut tru.” (Mat. 9:36) Olsem na planti manmeri i no trastim ol narapela na ol i ting olsem i no gat gutpela samting bai kamap bihain. Toktok bilong yumi i mas soim olsem yumi tingim gut ol na sori long ol. Yumi soim dispela tu long krai bilong nek bilong yumi! Tru tumas, planti man i amamas long putim yau long tok yumi autim bikos yumi save gut long tok bilong Baibel, na tu, yumi tingim gut ol na mekim gutpela pasin long ol.

15. Olsem wanem yumi inap tingim gut ol lain yumi autim tok long ol?

¹⁵ Yumi inap bihainim planti gutpela rot bilong soim olsem yumi tingim ol lain yumi autim tok long ol. Wanpela gutpela rot em long givim ol askim. Long gutpela pasin na pasin rispek, yumi inap kamapim ol askim. Wanpela painia i autim tok long teritori we planti manmeri i save pilim sem, na ol i no gat pasin bilong toktok, olsem na em i no save givim ol askim we inap mekim ol i pilim hatwok long bekim. Em ol askim ol man i no save long bekim bilong en o ating ol i no inap bekim stret. Em i no save givim ol kain askim olsem, ‘Yu save long nem bilong God?’ o ‘Kingdom Bilong God em wanem samting?’ Em i save tok, “Mi kisim save long Baibel olsem God i gat nem bilong em yet. Inap mi soim yu dispela nem?” Yumi ol man i no wankain, na tu, kastam bilong yumi i narapela narapela. Olsem na yumi no inap bihainim wanpela lo long pasin bilong toktok. Tasol oltaim yumi mas tingim gut narapela na rispektim ol. Dispela i makim tu olsem yumi mas save gut long ol asples lain.

16, 17. Sapos yumi tingim gut ol lain yumi autim tok long ol, olsem wanem dispela i stiaim (a) taim yumi makim bilong autim tok long ol haus? (b) hamas taim yumi lusim long toktok wantaim ol?

¹⁶ Wanem taim yumi mas autim tok long ol manmeri? Taim yumi autim tok long ol haus, tingim olsem ol i no invaitim yumi. Olsem na i gutpela sapos yumi autim tok long wanpela taim we ol manmeri bai amamas long putim yau! (Mat. 7:12) Olsem, ol lain long teritori i gat laik long slip longpela taim long ol wiken? Sapos olsem, yu ken tilim ol nius long ol man i wokabaut long rot, autim tok long pablik ples, o mekim gobek long ol lain em yu save olsem ol i kirap pinis.

¹⁷ Yumi mas lusim hamas taim long toktok? Planti manmeri i bisi tru, olsem na i gutpela long mekim sotpela tok long namba 1 taim yu bungim man. Mobeta yu sotim tok, na no ken pulim bikpela haptaim bilong man bilong haus. (1 Kor. 9:20-23) Taim ol i luksave olsem yu tingim ol na ol wok ol i mas mekim, orait ol bai amamas long yu kam bek na lukim ol. Yumi mas kamapim ol pasin em holi spirit i as bilong en taim yumi autim tok. Taim yumi mekim olsem, yumi stap “ol wanwok bilong God”—dispela i opim rot long Jehova inap kirapim man long i kam insait long tok i tru.—1 Kor. 3:6, 7, 9.

18. Taim yumi tingim gut ol narapela, yumi inap bilip na wet long kisim wanem ol blesing?

¹⁸ Yumi mas wok strong long tingim gut ol narapela insait long famili, kongrigesen, na taim yumi autim tok. Dispela bai opim rot long yumi inap kisim ol blesing long nau na long bihain. Song 41:1, 2 i tok: “Man i save tingim ol rabisman na i helpim ol, dispela man i ken amamas. Bikpela bai i helpim em long taim hevi i kamap long em. . . . Bikpela bai i mekim em i stap gut long ples bilong em.”