1, 2. (a) Olsem wanem pasin bilong Jehova i narapela kain long pasin bilong ol man? (b) Yumi bai skelim wanem ol samting long dispela stadi?

PLANTI man i gat biknem na namba i save “strong tumas long bosim ol manmeri” na mekim hatpela pasin long ol. (Mat. 20:25; Sav. 8:9) Tasol Jehova i no save mekim kain pasin olsem! Maski em God i Gat Olgeta Strong, em i tingim gut yumi ol manmeri i gat sin. Em i save pilim hevi bilong yumi na mekim gutpela pasin. Em i kamapim klia olsem em i tingim filings bilong yumi, na em i redi long helpim yumi long ol samting yumi nidim. “Em i tingim yumi i olsem das tasol,” olsem na em i save long skel bilong yumi wan wan.—Sng. 103:13, 14.

² Baibel i stori long planti samting Jehova i mekim bilong soim olsem em i tingim tru ol wokman bilong em. Yumi ken stori long 3-pela eksampel. Namba 1, gutpela pasin God i bihainim long helpim yangpela Samuel long givim tok bilong kotim Hetpris Eli. Namba 2, pasin bilong Jehova long i no les kwik taim Moses i gat tupela tingting long lidim lain Israel. Namba 3, pasin bilong God long tingim gut lain Israel taim em i helpim ol long lusim Isip. Taim yumi skelim ol dispela eksampel, tingim ol skul yumi kisim long  pasin bilong Jehova na olsem wanem yumi inap bihainim pasin bilong Em.

3. (a) Long wanpela nait, wanem narakain samting i kamap long yangpela Samuel? (b) Yumi laik save long bekim bilong wanem askim? (Lukim piksa long kirap bilong stadi.)

³ Samuel i kirap “mekim wok bilong Bikpela” long haus lotu sel taim em i mangi yet. (1 Sml. 3:1) Wanpela nait taim Samuel i slip, narakain samting i kamap. * (Ritim 1 Samuel 3:2-10.) Em i harim wanpela nek i kolim nem bilong em. Samuel i ting olsem Hetpris Eli i singautim em, olsem na em i kirap na ran i go long Eli na tok: “Mi harim yu singautim mi, olsem na mi kam.” Tasol Eli i tok em i no singautim Samuel. Wankain samting i kamap 2-pela taim moa, na nau Eli i luksave olsem God i wok long singaut long Samuel. Olsem na Eli i tokim Samuel long tok em i mas mekim, na Samuel i bihainim tok bilong em. Taim Jehova i kolim nem bilong Samuel long namba 1 taim, bilong wanem long rot bilong ensel Em i no tokaut long em i husat? Baibel i no stori long dispela samting, tasol ol samting i kamap long dispela stori inap helpim yumi long ting olsem God i tingim gut Samuel bikos em i liklik mangi yet. Bilong wanem yumi tok olsem?

4, 5. (a) Samuel i pilim olsem wanem long kamapim tok bilong God long Eli? (b) Eli i tokim Samuel long mekim wanem? (c) Stori bilong Samuel i skulim yumi long wanem pasin bilong Jehova?

⁴ Ritim 1 Samuel 3:11-18. Lo Bilong Jehova i tok ol pikinini i mas rispektim ol lapun, na moa yet ol hetman. (Kis. 22:28; Wkp. 19:32) Olsem wanem? Yu ting Samuel i no pret long i go lukim Eli long bikmoning na tokim em long strongpela tok God i mekim bilong kotim em? Nogat! Baibel i tok Samuel i “pret long tokim Eli long em i bin lukim dispela samting olsem driman.” Tasol God i kamapim klia long Eli olsem Em i wok long singautim Samuel. Olsem na Eli i tokim Samuel: “Yu no ken haitim wanpela tok long mi.” Olsem na Samuel i “tokim em long olgeta tok bilong Bikpela.”

⁵ Ating Eli i no kirap nogut long harim dispela tok bikos “wanpela profet” bilong God i bin autim wankain tok long Eli long pastaim.(1 Sml. 2:27-36) Dispela stori i soim olsem Jehova i save tingim gut yumi na em i gat savetingting.

6. Yumi kisim wanem skul long pasin God i bihainim long helpim yangpela Samuel?

⁶ Olsem wanem? Yu wanpela yangpela? Sapos olsem, stori bilong Samuel i soim olsem Jehova i kliagut long ol hevi bilong yu na em i save long filings bilong yu. Ating yu pilim sem long autim tok long ol manmeri i gat bikpela krismas, o yu sem long stap narapela kain long ol wanlain. Yu ken bilip tru olsem Jehova i laik helpim yu. Olsem na yu mas beten na kamapim olgeta tingting bilong yu long God. (Sng. 62:8) Yu ken tingim tingim eksampel bilong ol yangpela em Baibel i stori long ol, kain olsem Samuel. Na tu, yu ken toktok wantaim ol narapela insait long kongrigesen, maski ol i yangpela o lapun. Ating ol i bin karim ol wankain hevi em yu bungim. Ating ol bai stori long yu long olsem wanem Jehova i bin helpim ol long ol rot we ol i no bin tingim.

7, 8. Olsem wanem Jehova i soim olsem em i tingim gut Moses?

⁷ Taim Moses i gat 80 krismas, Jehova i givim em wanpela bikpela asainmen—em i mas lidim lain Israel long lusim kalabus long Isip. (Kis. 3:10) Moses i mekim wok olsem wasman bilong sipsip long kantri Midia inap 40 yia, olsem na em i tingting planti long mekim dispela asainmen. Moses i tok: “Mi wanem kain man na bai mi inap i go long king bilong Isip na kisim ol Israel na bringim ol i kam lusim  Isip?” God i tok: “Mi bai mi stap wantaim yu.” (Kis. 3:11, 12) Na tu, God i tokim em: Ol hetman bilong Israel “bai i harim tok bilong yu na bihainim.” Tasol Moses i tok: “Ol i no inap harim tok mi autim.” (Kis. 3:18; 4:1) I olsem Moses i tok samting God i toktok long en i no inap kamap tru! Tasol Jehova i no les kwik long Moses. Em i mekim sampela samting bilong strongim Moses. God i givim strong long Moses long wokim ol mirakel. Olsem na em i namba 1 man long graun em Baibel i stori long en long i gat strong long wokim mirakel.—Kis. 4:2-9, 21.

⁸ Tasol Moses i tokim God olsem em i no man bilong toktok gut long ai bilong planti manmeri. God i tokim em: “Bai mi helpim yu long toktok na bai mi tokim yu long olgeta tok yu mas mekim.” Yu ting dispela i senisim tingting bilong Moses? Nogat. Moses i daunim em yet na askim God long salim narapela man. Dispela i mekim na i stret Jehova i kros long Moses. Tasol em i redi long bihainim tingting bilong Moses. God i tingim gut filings bilong Moses na em i makim Aron long kamap mausman bilong Moses.—Kis. 4:10-16.

9. Olsem wanem pasin bilong Jehova long i no les kwik na tingim gut Moses i helpim em long asainmen bilong em?

⁹ Stori bilong Moses i skulim yumi long wanem pasin bilong Jehova? Em God i Gat Olgeta Strong, olsem na em inap long pretim Moses na bai Moses i redi tasol long bihainim tok bilong em. Tasol Jehova i gat gutpela pasin na em i no les kwik. Em i strongim Moses, em gutpela wokman bilong em husat i gat pasin daun. God i soim olsem em i tingim gut Moses. Yu ting dispela i strongim Moses? Yes! Moses i kamap wanpela gutpela lida husat i mekim pasin isi long olgeta manmeri wankain olsem Jehova i bin mekim long em.—Nam. 12:3.

10. Taim yumi bihainim pasin bilong Jehova long tingim gut ol narapela, olsem wanem dispela inap helpim yumi?

¹⁰ Yumi inap kisim gutpela skul long pasin bilong God. Olsem wanem? Yu wanpela man marit, papa o mama, o elda? Sapos olsem, yu gat wok long lukautim na stiaim ol narapela. Olsem na em i bikpela samting long yu mas bihainim pasin bilong Jehova long tingim gut ol narapela, mekim gutpela pasin, na no ken les kwik! (Kol. 3:19-21; 1 Pita 5:1-3) Taim yu  wok strong long bihainim pasin bilong Jehova na Jisas, em Man i Winim Moses, ol narapela bai amamas long toktok wantaim yu na yu bai strongim ol. (Mat. 11:28, 29) Na tu, yu bai stap gutpela eksampel long ol narapela i ken bihainim.—Hib. 13:7.

11, 12. Taim Jehova i lidim lain Israel long lusim Isip, olsem wanem em i lukautim ol?

¹¹ Taim lain Israel i lusim Isip long 1513 B.C.E., ating namba bilong ol manmeri i winim 3 milion. Namel long dispela bikpela lain manmeri, i gat ol lain em ol i bilong namba 3 o namba 4 lain tumbuna. I gat ol pikinini, ol lapun, ol lain i sik, na ol lain i paralais. Olsem na ol i nidim gutpela Lida husat i kliagut long hevi bilong ol bambai em i ken lidim dispela bikpela lain manmeri long lusim Isip. Long rot bilong Moses, Jehova i stap gutpela Lida bilong lain Israel. Olsem na ol i no pret long lusim Isip, em ples we ol i stap long en inap longpela taim.—Sng. 78:52, 53.

¹² Olsem wanem Jehova i lukautim gut lain Israel na ol i no pret long wanpela samting? Wanpela rot em olsem, taim em i lidim ol long lusim Isip, em i oganaisim ol gut na ol i “wokabaut i go olsem wanpela lain ami.” (Kis. 13:18, NW ) God i oganaisim gut lain Israel na dispela i helpim ol long bilip tru olsem em i go pas long ol. Na tu, Jehova i kamapim klia olsem em i stap wantaim ol. “Long san em i stap long klaut . . . na long nait em i stap long lait bilong paia.” (Sng. 78:14) I olsem Jehova i tokim ol: “No ken pret. Mi stap wantaim yupela na bai mi stiaim na lukautim yupela.” Dispela samting God i mekim i strongim lain Israel bihain long ol i lusim Isip na ol birua i pait long ol!

13, 14. (a) Jehova i mekim wanem long solwara Retsi bilong soim olsem em i tingim lain Israel? (b) Olsem wanem Jehova i soim strong bilong em long lain Isip?

¹³ Ritim Kisim Bek 14:19-22. Piksaim long tingting olsem yu stap long dispela taim. Ami bilong Fero i ronim yupela na nau yupela i kam kamap long solwara Retsi. Nau God i wokim wanpela mirakel. Wanpela klaut i sanap baksait long yupela na i pasim ami bilong ol Isip na ol i stap long tudak. Tasol klaut i givim lait long yupela! Nau yu lukim Moses i apim han bilong em na makim solwara, na strongpela win long hap sankamap i mekim na solwara i bruk tupela hap. Orait nau yu na famili bilong yu wantaim ol animal na olgeta manmeri i wokabaut i go long narapela sait. Wantu yu luksave long narakain samting tru. Graun i no malumalum o i kamap ais; graun i drai na strong na isi long yupela i wokabaut. Dispela i helpim ol lain husat i no inap wokabaut hariap long i go kamap gut long hapsait.

¹⁴ Ritim Kisim Bek 14:23, 26-30. Fero i gat pasin antap na em i no gat gutpela tingting, olsem na kwiktaim em wantaim ami bilong em i bihainim yupela i go namel long solwara. Nau Moses i apim gen han bilong em na i makim solwara. Taim em i mekim olsem, wara i sanap long sait sait i kam bek na karamapim graun. I kain olsem tupela sunami i kam long narapela narapela sait na i bung na mekim bikpela pairap. Fero na ol ami bilong em i bagarap na pinis olgeta!—Kis. 15:8-10.

15. Stori bilong lain Israel i skulim yumi olsem wanem long pasin bilong Jehova?

¹⁵ Stori bilong lain Israel i helpim yumi long save olsem Jehova em God husat i no save mekim ol samting i paul nabaut—dispela pasin i helpim yumi long pilim olsem yumi stap gut. (1 Kor. 14:33) Na tu, Jehova i soim olsem em i gutpela wasman husat i save lukautim gut lain bilong em. Em i laikim ol na stap klostu long ol, na em i was long ol taim ol birua i laik pait long ol. Ol dispela tok i strongim tru bilip bilong yumi bikos yumi wok long i go klostu long pinis bilong haptaim nogut bilong nau!—Snd. 1:33.

16. Taim yumi skelim ol samting Jehova i mekim bilong kisim bek lain Israel, olsem wanem dispela i helpim yumi?

 ¹⁶ Long nau tu, Jehova i lukautim lain bilong em long sait bilong bilip na long kaikai na klos samting. Em bai mekim olsem tu long taim bilong traipela hevi tru em klostu nau bai kamap. (Rev. 7:9, 10) Long dispela taim, lain bilong God—ol yangpela, ol lapun, ol lain i gat sik, na ol lain i paralais—i no inap pret o guria. * Ol bai strongim bel na amamas! Ol bai tingim tok Jisas Krais i mekim, em i tok: “Yupela i mas sanap na litimapim het bilong yupela, long wanem, taim bilong God long kisim bek yupela i kam klostu.” (Luk 21:28) Ol bai sanap strong taim Gok bilong Magok, em ol kantri i bung wantaim, i pait long ol. Gok bilong Magok bai gat bikpela strong moa winim Fero bilong pastaim. (Ese. 38:2, 14-16) Bilong wanem ol manmeri bilong God bai sanap strong? Ol i save olsem Jehova i no save senis. Em bai mekim gen samting bilong soim olsem Em i save tingim gut lain bilong em, na em Man Bilong Kisim Bek ol long han bilong ol birua.—Ais. 26:3, 20.

17. (a) Olsem wanem ol stori bilong Baibel long pasin bilong Jehova long lukautim lain bilong em inap helpim yumi? (b) Yumi bai skelim wanem samting long neks stadi?

¹⁷ Baibel i stori long planti eksampel i soim klia gutpela pasin na pasin bilong Jehova long tingim gut lain bilong em, na pasin bilong Em long stiaim na kisim bek ol. Dispela stadi i stori long sampela eksampel. Taim yu tingim tingim ol dispela kain stori, luksave long ol samting i kamap na i soim klia ol pasin bilong Jehova i stap hait. Taim yu mekim olsem, ol dispela naispela pasin bilong God bai pas strong long tingting na bel bilong yu, na strongim bilip na pasin laikim bilong yu long God. Neks stadi bai stori long olsem wanem yumi inap bihainim pasin bilong Jehova long tingim gut ol narapela insait long famili, kongrigesen Kristen, na long wok autim tok.