LONG olgeta hap bilong graun, ol elda i amamas long wok ol i mekim namel long lain bilong God. Ol i stap gutpela blesing insait long kongrigesen! I no longtaim i go pinis, oganaisesen i bin mekim sampela senis. Ol i askim ol lapun elda long givim sampela wok em ol i mekim i go long ol yangpela elda. Ol lapun brata i mas givim wanem ol wok i go long ol yangpela brata?

Nupela senis em olsem, ol brata i mekim wok sekit na ol brata husat i mekim wok tisa long ol skul tiokratik bai no inap mekim moa ol dispela wok taim ol i gat 70 krismas. Na tu, ol elda husat i gat 80 krismas i mas larim ol yangpela brata long mekim ol narapela narapela asainmen. Kain olsem mekim wok olsem kodineta bilong Brens Komiti o kodineta bilong lain elda long kongrigesen. Ol lapun elda i pilim olsem wanem long ol dispela senis? Ol i soim olsem ol i stap gut long Jehova na oganaisesen bilong em!

Ken i mekim wok olsem kodineta bilong wanpela Brens Komiti klostu 49 yia, na em i tok: “Mi wanbel tru long dispela disisen. Long moning paslain long mi kisim dispela toksave, mi beten long Jehova olsem i mas i gat yangpela brata long mekim wok olsem kodineta.” Tok em i mekim i kamapim klia tingting bilong planti lapun brata em ol i stap long ol narapela kantri.  Pastaim, ol dispela brata i bel hevi bikos ol i amamas long mekim wok bilong ol long helpim ol bratasista.

Esperandio i mekim wok olsem kodineta bilong lain elda long kongrigesen bilong em, na em i tok: “Mi bin bel hevi liklik.” Tasol em i tok moa: “Mi luksave olsem mi mas i gat taim long lukautim helt bilong mi.” Esperandio i mekim yet wok bilong Jehova na em i stap olsem gutpela blesing long kongrigesen bilong em.

Olsem wanem long ol brata i mekim wok olsem wasman raun longpela taim na ol i mas lusim dispela wok na mekim ol narapela asainmen? Allan i mekim wok olsem wasman raun inap 38 yia, na em i tok: “Taim mi harim olsem senis i kamap, mi kirap nogut stret.” Tasol em i luksave olsem gutpela samting i kamap taim ol i trenim ol yangpela brata long mekim ol wok, na em i stap gut yet long God na mekim wok bilong em.

Russell i mekim wok olsem wasman raun na tisa bilong ol skul tiokratik inap 40 yia. Pastaim em na meri bilong em i no amamas. Em i tok: “Mipela i amamas tru long wok mipela i mekim, na mipela i pilim olsem mipela i gat strong yet long mekim dispela wok.” Russell na meri bilong em i yusim trening ol i kisim na ol ekspiriens bilong ol long helpim ol bratasista long kongrigesen bilong ol, na ol pablisa i wok wantaim tupela i amamas tru.

Sapos yu no gat wankain ekspiriens olsem bilong ol lain em yumi stori pinis long ol, orait stori i stap long 2 Samuel inap helpim yu long kliagut long ol samting i kamap long ol.

Tingim samting i bin kamap taim Apsalom, pikinini man bilong King Devit, i bikhet na em i laik kisim ples bilong papa bilong em. Devit i ranawe lusim Jerusalem na i go long Mahanaim, em ples i stap long hap is bilong Wara Jordan. Long dispela hap, Devit na ol lain i stap wantaim em i nidim kaikai na wara samting. Yu tingim samting i kamap?

Tripela man i stap long Mahanaim i bringim ol bet, kain kain kaikai, na ol narapela samting ol i nidim. Barsilai em wanpela bilong ol dispela man. (2 Sml. 17:27-29) Plen bilong Apsalom i no kamap gut, olsem na Devit inap go bek long Jerusalem, na Barsilai i go wantaim em na lusim em long Jordan. Devit i tokim em long kam long Jerusalem. Devit i tok long em bai givim ol kaikai long Barsilai maski em “i gat planti mani samting” na em i no sot long kaikai. (2 Sml. 19:31-33) Yumi ken ting olsem Devit i laikim tru ol gutpela pasin bilong Barsilai, na em bai amamas sapos Barsilai i stap wantaim em na givim em ol gutpela edvais. Tru tumas, Barsilai inap amamas tru long stap long haus king na mekim wok long dispela hap!

Barsilai i gat pasin daun na em i skelim gut ol samting, na em i tok em i gat 80 krismas. Em i tok: “Mi no moa save long wanpela samting i gutpela o nogat.” (2 Sml. 19:35) Wanem mining bilong tok bilong Barsilai? Em i stap laip longpela taim na em i gat gutpela savetingting. Wankain olsem “ol lapun ofisa” i save  givim gutpela tingting long King Rehoboam, Barsilai inap givim gutpela tingting long Devit. (1 Kin. 12:6, 7; Sng. 92:12-14; Snd. 16:31) Taim Barsilai i tok em i no save long wanem samting i gutpela o nogat. Dispela inap makim olsem hevi bilong i go lapun i painim em, olsem em i no inap harim gut nois o pilim swit bilong kaikai. (Sav. 12:4, 5) Olsem na Barsilai i tokim Devit long kisim yangpela man, Kimham, i go wantaim em long Jerusalem. Ating Kimham em pikinini man bilong Barsilai.—2 Sml. 19:36-40.

Yumi bin stori long oganaisesen i bin mekim sampela senis long ol lapun brata long givim wok long ol yangpela brata, na wankain samting i bin kamap long Barsilai. Long taim bilong yumi, oganaisesen i skelim sindaun na save bilong ol brata, na i gat sampela samting moa ol i skelim, olsem long stori bilong Barsilai. Oganaisesen i luksave olsem ol i mas skelim gut olgeta samting bambai ol inap mekim ol gutpela disisen bilong helpim ol elda long olgeta hap bilong graun.

Ol lapun brata i gat pasin daun i luksave olsem sapos ol yangpela brata i kisim trening na mekim ol wok em pastaim ol lapun brata i save mekim, orait dispela bai redim oganaisesen long ol samting bai kamap bihain. Planti taim, ol brata i gat bikpela krismas i trenim ol yangpela brata, wankain olsem Barsilai i trenim pikinini man bilong em na aposel Pol i trenim Timoti. (1 Kor. 4:17; Fili. 2:20-22) Ol yangpela brata long nau i soim olsem ol i stap “olsem ol presen,” na ol i helpim wok bilong “strongim bodi bilong Krais.”—Efe. 4:8-12; Skelim Namba 11:16, 17, 29.

Long ol kongrigesen long olgeta hap bilong graun, ol brata husat i givim wok bilong ol i go long ol yangpela brata, nau rot i op long ol inap mekim bikpela wok moa bilong sapotim wok bilong Jehova.

Marco i mekim wok olsem wasman raun inap 19 yia, na em i tok: “Long kongrigesen bilong mipela i gat sampela sista em man bilong ol i no Witnes. Olsem na taim senis i kamap, dispela i opim rot long mi inap helpim ol man bilong ol dispela sista.”

Geraldo i mekim wok sekit inap 28 yia, na em i tok: “Nupela mak mipela i putim em long helpim ol lain i slek long bilip, na kirapim planti Baibel stadi.” Em i tok em na meri bilong em i gat 15 Baibel stadi, na planti bratasista husat i slek long bilip i wok long kam long ol miting.

Allan em yumi stori pinis long en, em i tok: “Nau rot i op long mipela inap lusim bikpela haptaim moa long autim tok long kain kain taim na ples. Mipela i amamas long autim tok long pablik ples, ol bisnis teritori, na autim tok long ol neiba bilong mipela. Tupela bilong ol i kam long Haus Kingdom pinis.”

Sapos yu wanpela lapun brata na yu gat strong yet, na yu kisim nupela asainmen, orait i gat narapela rot yu inap sapotim wok bilong Jehova. Yu ken trenim ol yangpela brata insait long kongrigesen. Russell em yumi stori pinis long en, em i tok: “Jehova i trenim ol yangpela husat i gat strong, save, na ol i gat ol gutpela pasin. Ol bratasista long olgeta hap i kisim gutpela helpim long ol dispela brata husat i mekim gut wok bilong skulim na stiaim ol narapela!”—Lukim blok “ Helpim Ol Yangpela Brata Long Winim Tru Mak.”

Sapos yu kisim wanpela nupela asainmen i no longtaim i go pinis, yu ken amamas. Yu bin givim bel long mekim gut ol wok na yu helpim planti manmeri, olsem na yu inap mekim olsem yet. God i laikim yu na yu ken bilip olsem oltaim em bai laikim yu.

Bikpela samting moa, yu mekim bel bilong Jehova i amamas. Em i no inap “lusim tingting long ol wok yupela i bin mekim na pasin bilong yupela long laikim tru nem bilong em. Yupela i bin helpim ol manmeri holi, na yupela  i wok yet long mekim olsem.” (Hib. 6:10) Dispela ves i strongim yumi olsem God i save tingim ol gutpela wok yumi mekim, dispela i makim tu ol wok yumi mekim long bipo. Jehova i tingim yu olsem samting i dia tumas, na em i no inap lusim tingting long ol gutpela wok yu mekim long bipo na pasin bilong yu long wok yet long mekim ol wok bilong amamasim em!

Olsem wanem sapos yu no kisim yet wanpela nupela asainmen olsem ol lain em dispela atikol i stori long en? Yu inap kisim gutpela skul long ol tok i stap hia. Bilong wanem yumi tok olsem?

Sapos yu save long wanpela lapun brata na em i kisim nupela asainmen, yu inap kisim helpim long save na ekspiriens bilong em long ol wok em i bin mekim inap planti yia. Yu mas kisim skultok long em na kisim tingting bilong em long sampela samting. Na tu, skelim gut olsem wanem em i stap gut long nupela asainmen bilong em.

Maski sapos yu wanpela lapun brata na yu mekim nupela asainmen, o yu wanpela brata o sista husat inap kisim trening long ol lain i gat ekspiriens, yu mas tingim olsem Jehova i amamas tru long ol lain i stap gut long em na ol i wok yet long mekim olsem.