1. Jehova i pilim olsem wanem long ol manmeri i gat pasin daun?

JEHOVA i laikim tru ol manmeri i gat pasin daun. Ol tasol inap pas gut wantaim em. Tasol “ol man i gat pasin antap, em i save stap longwe long ol.” (Sng. 138:6) Yumi olgeta i laik mekim Jehova i belgut na bai em i ken laikim yumi, olsem na mobeta yumi kisim pasin daun.

2. Long dispela atikol, yumi bai skelim wanem ol askim?

² Long dispela atikol, yumi bai skelim bekim bilong 3-pela askim: (1) Pasin daun em wanem kain pasin? (2) Wai na yumi mas kisim dispela pasin? (3) Wanem ol samting inap kamap na traim pasin daun bilong yumi? Taim yumi kisim pasin daun, yumi bai mekim Jehova i amamas, na tu, yumi bai helpim yumi yet.—Prov. 27:11; Ais. 48:17.

3. Pasin daun em wanem kain pasin?

³ Taim man i gat pasin daun, em i save holim tingting olsem ol narapela i winim em na em i no apim nem bilong em yet. Baibel i soim olsem pasin daun i save kirapim man long holim stretpela tingting long pasin bilong em long pas gut wantaim God Jehova na ol narapela. Em i holim tingting olsem olgeta narapela lain i gutpela moa na ol i winim em long sampela samting.—Fili. 2:3, 4.

4-5. Yumi inap ting sampela man i gat pasin daun, tasol tru tru wai na i no olsem?

⁴ Yumi inap ting sampela man i gat pasin daun, tasol tru  tru i no olsem. Ating ol i gat pasin bilong sem na ol i no save toktok tumas. O ol i soim pasin rispek bikos em pasin bilong ples o papamama i skulim ol long mekim olsem. Tasol insait tru long bel, ol i gat pasin antap. I no longtaim, pasin tru bilong ol bai kamap ples klia.—Luk 6:45.

⁵ Sampela manmeri i gat pasin bilong toktok na ol i no save pret, tasol dispela i no makim olsem ol i gat pasin antap. (Jon 1:46, 47) Maski i olsem, ol i no ken bilip tumas long save bilong ol yet. Olsem na maski yumi gat pasin bilong toktok o nogat, yumi olgeta i mas wok hat long kisim pasin daun.

6. Olsem 1 Korin 15:10 i kamapim, yumi inap kisim wanem skul long eksampel bilong aposel Pol?

⁶ Tingim eksampel bilong aposel Pol. Jehova i bin yusim em long kirapim ol nupela kongrigesen long planti taun em i visitim. I luk olsem em i bin mekim bikpela wok moa long autim tok winim ol narapela aposel bilong Jisas Krais. Tasol Pol i no apim nem bilong em yet. Em i daunim em yet na tok: “Ol arapela aposel i winim mi. Mi no gutpela man inap long ol i kolim mi wanpela aposel, long wanem, mi bin mekim nogut long kongrigesen bilong God.” (1 Kor. 15:9) Pol i tok em i pas gut wantaim Jehova bikos Jehova i soim bikpela pasin helpim long em, na i no olsem em i gutpela moa o em i bin mekim planti wok. (Ritim 1 Korin 15:10.) Long pas em i raitim long ol Kristen long Korin, em i stap gutpela eksampel long pasin daun. Em i no litimapim nem bilong em yet maski sampela long kongrigesen i sutim tok long em!—2 Kor. 10:10.

7. Olsem wanem sampela brata i mekim ol bikpela wok i soim olsem ol i gat pasin daun? Stori long wanpela eksampel.

⁷ Planti manmeri long lain bilong Jehova i bin kisim strong taim ol i ritim laip  stori bilong Brata Karl F. Klein, husat i bin stap memba bilong Gavening Bodi. Long laip stori bilong em, Brata Klein i tokaut long sampela popaia bilong em. Long ol yia bihain long 1920, em i pilim olsem i hatwok tru long raun long ol haus na autim tok. Olsem na wanpela taim tasol em i autim tok na em i lusim dispela wok inap 2-pela yia. Taim em i go wok long Betel, em i kisim tok kaunsel na dispela i mekim em i bel kros inap sampela haptaim. Bel hevi i daunim em olgeta, tasol bihain em i kamap orait. Maski i olsem, em i bin mekim sampela bikpela wok. Tingim! Planti manmeri tru i save long dispela brata, tasol em i no surik long tokaut long ol popaia bilong em! Planti bratasista i tingim yet Brata Klein na naispela laip stori bilong em. *

8. Olsem wanem 1 Pita 5:6 i soim olsem Jehova i laikim tru man i gat pasin daun?

⁸ Jehova i laikim tru man i gat pasin daun—dispela em nambawan bikpela risen bilong yumi long kisim pasin daun. Aposel Pita i strongim dispela tok. (Ritim 1 Pita 5:6.) Buk “Come Be My Follower” i stori long tok bilong Pita na em i tok: “Pasin antap i olsem posin. Em inap kamapim bikpela hevi. Maski man i gat gutpela save tru long mekim wok, God i no inap yusim em sapos em i gat pasin antap. Tasol Jehova inap yusim man i gat pasin daun long mekim planti samting. . . . [God] bai . . . amamas tru long givim gutpela pe long yu sapos yu gat pasin daun.” * Nambawan gutpela samting yumi inap mekim em long amamasim Jehova!—Prov. 23:15.

9. Olsem wanem pasin daun i kirapim ol narapela long bung wantaim yumi?

⁹ Taim yumi kisim pasin daun, yumi bai amamasim Jehova na kisim planti blesing. Ol narapela bai amamas long bung wantaim yumi. Tingim pasin bilong ol manmeri yu save amamas long bung wantaim ol. (Mat. 7:12) Yumi no save amamas long bung wantaim ol man em oltaim ol i strong long bihainim laik bilong ol yet na ol i no laik kisim tingting bilong ol narapela. Yumi save amamas long bung wantaim ol wanbilip taim ol i “pilim hevi bilong narapela, laikim tumas ol brata, sori tru long ol, na mekim pasin daun.” (1 Pita 3:8) Sapos yumi  amamas long bung wantaim ol kain lain olsem, ol tu bai amamas long bung wantaim yumi sapos yumi gat pasin daun.

10. Olsem wanem pasin daun i helpim yumi long abrusim ol hevi?

¹⁰ Pasin daun i helpim yumi long abrusim ol hevi. Sampela taim yumi pilim olsem ol man i no bihainim stretpela pasin. King Solomon i tok: “Mi bin lukim ol wokman i sindaun long ol hos, tasol ol prins i wokabaut long lek wankain olsem ol wokman.” (Ekl. 10:7) Sampela taim ol manmeri i no givim biknem long ol lain i gat bikpela save. Ol i givim biknem long ol man i gat liklik save tasol. Solomon i tok yumi mas amamas long ol samting yumi gat pinis, na yumi no ken bel hevi sapos yumi no kisim yet ol samting yumi laikim. (Ekl. 6:9) Sapos yumi gat pasin daun, yumi bai stap belgut na yumi no inap tingting planti.

11. Yumi mas bihainim wanem pasin taim yumi kisim tok kaunsel?

¹¹ Long olgeta de, yumi gat planti rot bilong soim olsem yumi gat pasin daun. Skelim sampela eksampel. Taim yumi kisim tok kaunsel. Taim wanpela i kaunselim yumi, dispela inap makim olsem yumi bin mekim bikpela popaia na yumi yet i no luksave. Ating pastaim yumi inap tingting long sakim dispela tok kaunsel. Yumi inap sutim tok long man i givim kaunsel o wei bilong em long givim tok kaunsel. Tasol sapos yumi gat pasin daun, yumi bai wok hat long holim stretpela tingting.

12. Olsem Provep 27:5, 6 i kamapim, wai na yumi mas pilim tru gutpela pasin bilong wanpela husat i kaunselim yumi? Stori long tok piksa.

¹² Man i gat pasin daun i save amamas long kisim tok kaunsel. Tingim olsem yu stap long wanpela miting Kristen. Bihain long yu toktok wantaim sampela wanbilip, wanpela i kisim yu go long sait na long gutpela pasin em i tokim yu olsem liklik hap kaikai i pas long tit bilong yu. Ating yu bai pilim sem. Tasol yu bai amamas olsem em i tokim yu! Ating yu bai pilim olsem i gutpela moa sapos pastaim yet wanpela i bin tokim yu! Olsem tasol, yumi mas daunim yumi yet na pilim tru gutpela pasin bilong wanbilip husat i strongim bel na givim tok kaunsel yumi nidim. Tingim em olsem pren, na i no birua.—Ritim Provep 27:5, 6; Gal. 4:16.

13. Olsem wanem yumi inap soim pasin daun taim ol narapela i kisim nupela asainmen?

¹³ Taim ol narapela i kisim nupela  asainmen. Jason em wanpela elda, na em i tok: “Taim mi lukim ol narapela i kisim ol asainmen, mi save tingting planti long wai na ol i no makim mi.” Sampela taim yu save pilim olsem? Em gutpela sapos yumi laik mekim planti samting moa long wok bilong Jehova. (1 Tim. 3:1) Tasol yumi mas skelim gut ol samting yumi tingting long en. Nogut yumi kisim pasin antap. Wanpela brata inap ting olsem em i winim tru mak bilong mekim wanpela wok insait long kongrigesen. O wanpela sista inap ting olsem, ‘Man bilong mi i gat bikpela save moa long mekim dispela wok!’ Tasol sapos yumi gat pasin daun, yumi no inap holim kain tingting olsem.

14. Yumi inap kisim wanem skul long pasin Moses i bihainim taim ol narapela i kisim ol asainmen?

¹⁴ Yumi inap kisim skul long pasin Moses i bihainim taim ol narapela i kisim ol asainmen. Moses i tingim tru wok bilong em long lidim lain Israel. Tasol em i pilim olsem wanem taim Jehova i makim sampela man long wok bung wantaim em? Moses i no jeles. (Nam. 11:24-29) Em i daunim em yet na larim ol narapela i helpim em long mekim wok jas. (Kis. 18:13-24) Dispela i helpim tru lain Israel. Moses i tingting moa long helpim ol narapela, na em i no tingting long biknem em yet inap kisim long wok bilong em. Pasin bilong em i stap gutpela eksampel tru long yumi! Yumi mas tingim olsem maski yumi gat bikpela save, Jehova i no inap yusim yumi sapos yumi no gat pasin daun. “Maski Jehova i stap antap tru, em i save tingim ol man i gat pasin daun.”—Sng. 138:6.

15. Wanem ol senis i kamap long asainmen bilong planti bratasista?

¹⁵ Taim sindaun i senis. I no longtaim i go pinis, senis i kamap long asainmen bilong  planti bratasista husat i mekim wok bilong Jehova inap longpela taim. Long 2014, ol wasman distrik na ol meri bilong ol i kisim ol nupela asainmen long fultaim sevis. Stat long seim yia, ol wasman sekit i stop long mekim wok sekit taim ol i winim 70 krismas. Ol brata i winim 80 krismas i no inap mekim wok olsem kodineta bilong lain elda. Na tu, insait long ol yia i go pinis, planti Betelait i kisim nupela asainmen long mekim wok painia. Ol narapela i lusim spesel fultaim sevis bikos ol i gat hevi long sait bilong helt, ol i mas lukautim ol wanfamili, o ol i gat sampela narapela risen.

16. Ol bratasista em sindaun bilong ol i senis, olsem wanem ol i daunim ol yet na lain long nupela sindaun?

¹⁶ Ol dispela bratasista i pilim hatwok long lain long ol dispela senis. Ol i laikim tru asainmen ol i bin mekim inap planti yia. Olsem na ol i bel hevi taim ol i lusim ol dispela asainmen. Tasol bihain ol i lain long nupela sindaun bilong ol. Wanem samting i helpim ol long daunim bel hevi? Ol i laikim tru Jehova. Ol i save olsem ol i bin dediketim laip bilong ol long God—ol i no dediket long wok, namba o biknem, na asainmen. (Kol. 3:23) Ol i amamas long daunim ol yet na mekim olgeta kain wok bilong Jehova. Ol i “putim olgeta hevi bilong [ol]” long han bilong God bikos ol i save olsem em i save wari long ol.—1 Pita 5:6, 7.

17. Wai na yumi amamas olsem Tok Bilong God i kirapim yumi long kisim pasin daun?

¹⁷ Yumi amamas olsem Tok Bilong God i kirapim yumi long kisim pasin daun. Taim yumi kisim dispela pasin, yumi bai helpim yumi yet na ol narapela. Yumi inap karim ol hevi. Na bikpela samting moa, yumi go klostu tru long Papa bilong yumi long heven. Maski em “Man husat i stap Antap Tru,” em i laikim na tingim tru ol wokman bilong em husat i gat pasin daun!—Ais. 57:15.