1. Jisas i mekim wanem tok promis olsem i stap long Matyu 11:28-30?

JISAS i mekim naispela promis long ol manmeri husat i putim yau long em. Em i tok: “Yupela kam long mi na bai mi givim nupela strong long yupela.” (Ritim Matyu 11:28-30.) Dispela i no wanpela tok nating. Tingim samting em i mekim long wanpela meri i gat bikpela sik.

2. Jisas i mekim wanem bilong helpim wanpela meri?

² Wanpela meri i nidim tru helpim. Em i go long planti dokta na bai ol inap oraitim em. Tasol 12-pela yia i lus na i no gat man inap oraitim em. Long Lo Bilong Moses, dispela meri i stap doti. (Wkp. 15:25) Em i harim olsem Jisas inap oraitim ol manmeri, olsem na em i go bilong painim Jisas. Taim em i lukim Jisas, em i tatsim arere bilong klos bilong Jisas, na wantu em i kamap orait! Jisas i givim biknem long dispela meri. Em i toktok wantaim dispela meri na kolim em “pikinini”—dispela i makim pasin rispek. Tru tumas, dispela tok i givim nupela strong long meri!—Luk 8:43-48.

3. Yumi bai kisim bekim bilong wanem ol askim?

³ Tingim, meri i go long Jisas. Meri yet i mekim dispela disisen. Yumi tu i mas mekim disisen long “kam long” Jisas. Long nau, Jisas i no inap wokim mirakel na oraitim sik bilong ol lain i “kam long” em. Tasol em i wok yet long invaitim yumi na tok: “Yupela kam long mi na bai mi givim nupela strong long yupela.” Long dispela atikol, yumi bai kisim bekim bilong 5-pela askim: Hau bai yumi inap “kam long” Jisas? Hau bai yumi inap “karim hap plang” bilong em? Yumi inap kisim wanem  skul long Jisas? Wai na yumi inap kisim nupela strong long wok em i givim long yumi? Hau bai yumi inap wok yet long kisim nupela strong taim yumi karim hap plang bilong Jisas?

4-5. Wanem sampela rot bilong “kam long” Jisas?

⁴ Wanpela rot bilong “kam long” Jisas em long kisim sampela save moa long ol tok em i autim na ol samting em i mekim. (Luk 1:1-4) Yumi yet i mas stadi long ol dispela samting. Na tu, yumi “kam long” Jisas taim yumi mekim disisen long kisim baptais na kamap disaipel bilong em.

⁵ Narapela rot bilong “kam long” Jisas em olsem: Yumi ken i go lukim ol elda sapos yumi nidim helpim. Ol elda i “olsem ol presen,” na Jisas i yusim ol long lukautim ol sipsip bilong em. (Efe. 4:7, 8, 11; Jon 21:16; 1 Pita 5:1-3) Yumi yet i mas askim ol long helpim yumi. Ol elda i no inap save long tingting bilong yumi na ol samting yumi nidim. Tingim stori bilong wanpela brata, nem bilong em Julian. Em i tok: “Mi mas lusim Betel bikos helt bilong mi i no orait, na wanpela pren i kirapim mi long askim ol elda long mekim sepeding visit long mi. Pastaim, mi ting mi no nidim tok bilong strongim mi. Tasol bihain mi askim ol elda long mekim sepeding visit, na dispela visit i bin strongim mi.” Wankain olsem dispela 2-pela elda husat i visitim Julian, ol elda inap helpim yumi long save long “tingting bilong Krais,” olsem kliagut long en na bihainim long laip bilong yumi. (1 Kor. 2:16; 1 Pita 2:21) Taim ol elda i mekim olsem, dispela em nambawan gutpela presen ol inap givim long yumi.

6. Wanem mining bilong tok bilong Jisas: “Karim hap plang bilong mi”?

⁶ Taim Jisas i tok: “Karim hap plang bilong mi,” tok bilong em inap makim olsem “Daun long wok bos bilong mi.” Na tu, em inap makim olsem “Kam aninit long hap plang wantaim mi, na yumi bai wok wantaim long mekim wok bilong Jehova.” Dispela tupela tok i soim olsem yumi mas mekim wok.

7. (a) Olsem Matyu 28:18-20 i kamapim, Jisas i givim wanem wok long yumi? (b) Yumi ken bilip tru long wanem samting?

⁷ Yumi bihainim invatesen bilong Jisas taim yumi dediket long Jehova na kisim baptais. Jisas i invaitim olgeta kain manmeri long kam long em, na em i no inap sakim ol sapos tru tru ol i laik mekim wok bilong God. (Jon 6:37, 38) Olgeta disaipel bilong Krais inap mekim wok em Jehova i bin askim Jisas long mekim. Yumi ken bilip tru olsem oltaim Jisas bai sambai long yumi taim yumi mekim dispela wok.—Ritim Matyu 28:18-20.

8-9. (a) Wai na ol manmeri nating i amamas long go long Jisas? (b) Yumi mas givim wanem ol askim long yumi yet?

⁸ Ol manmeri nating i amamas long go long Jisas. (Mat. 19:13, 14; Luk 7:37, 38) Bilong wanem? Pasin bilong Jisas i no wankain long pasin bilong ol Farisi. Ol dispela lida bilong lotu i gat pasin antap na ol i no gat pasin laikim. (Mat. 12:9-14) Tasol Jisas i gat pasin laikim na pasin daun. Ol Farisi i gat pasin antap na ol i laik bai ol manmeri i save long bikpela namba ol i holim. Tasol Jisas i kirapim ol disaipel long sakim pasin antap, na daunim ol yet, na mekim wok bilong helpim ol narapela. (Mat. 23:2, 6-11) Ol Farisi i yusim namba bilong ol long pretim ol manmeri na fosim ol long bihainim tok. (Jon 9:13, 22) Tasol ol gutpela tok na pasin bilong Jisas i kirapim ol manmeri long pilim olsem em i laikim ol, na dispela i givim nupela strong long ol.

⁹ Yu bin kisim ol dispela skul long Jisas?  Askim yu yet: ‘Ol narapela i tingim mi olsem man o meri bilong mekim pasin isi na pasin daun? Mi save redi long mekim ol wok i no gat nem bilong helpim ol narapela? Mi save mekim gutpela pasin long ol narapela?’

12-14. Wai na yumi inap kisim nupela strong long wok Jisas i tokim yumi long mekim?

¹² Wanem ol samting i mekim na yumi inap kisim nupela strong long wok Jisas i tokim yumi long mekim? I gat planti samting, tasol yumi bai skelim sampela.

¹³ Yumi gat ol nambawan gutpela ovasia. Jehova em Nambawan Ovasia bilong yumi, na em i no gat hatpela pasin. Em i gat pasin bilong tok tenkyu na em i pilim tru ol wok yumi mekim. (Hib. 6:10) Em i givim strong yumi nidim long mekim wok em i tokim yumi long mekim. (2 Kor. 4:7; Gal. 6:5) Jisas, King bilong yumi, i soim pasin yumi inap bihainim. (Jon 13:15) Ol elda husat i lukautim yumi, ol i traim long bihainim pasin bilong Jisas, em “bikpela wasman bilong ol sipsip.” (Hib. 13:20; 1 Pita 5:2) Ol i wok strong long soim gutpela pasin, strongim yumi, na strongim bel taim ol i mekim wok bilong skulim na lukautim yumi.

¹⁴ Yumi gat ol nambawan gutpela pren. I no gat narapela lain i gat ol gutpela pren na gutpela wok olsem yumi. Tingim: Yumi wok wantaim ol manmeri husat i wok strong long bihainim ol stretpela pasin, na ol i no holim tingting olsem ol i winim ol narapela. Ol i gat bikpela save, tasol ol i no hambak long save bilong ol, na ol i holim tingting olsem ol narapela i winim ol. Ol i tingim yumi olsem ol wanwok na ol pren. Ol i laikim yumi tru na ol i redi long lusim laip bilong ol long helpim yumi!

15. Yumi mas pilim olsem wanem long wok yumi mekim?

¹⁵ Yumi gat nambawan gutpela wok. Yumi helpim ol manmeri long kisim stretpela save long Jehova na luksave long ol tok giaman bilong Satan. (Jon 8:44) Satan i kamapim kain kain tok giaman we i daunim tru ol manmeri. Em i laik bai yumi ting olsem Jehova i no laikim yumi na em i no inap fogivim ol rong bilong yumi. Dispela em wanpela bikpela tok giaman na i bagarapim tru bel bilong ol manmeri! Taim yumi “kam long” Krais, dispela i opim rot long God inap fogivim ol rong bilong yumi. Tok tru em olsem: Jehova i laikim tru yumi olgeta. (Rom 8:32, 38, 39) Yumi inap kisim bikpela amamas taim yumi stiaim ol manmeri long bilip long Jehova na laip bilong ol i kamap gutpela moa!

16. Hau na wok Jisas i tokim yumi long mekim i no wankain long ol narapela wok?

¹⁶ Wok Jisas i tokim yumi long mekim i no wankain long ol narapela wok. Long olgeta wan wan de, taim ol man i pinis long wok na go bek long haus, planti bilong ol i save pilim taiet na ol i no amamas. Tasol yumi no save pilim olsem; yumi save amamas tru taim yumi lusim bikpela haptaim long mekim wok bilong Jehova na Krais. Ating yumi bisi long ples wok long de olgeta na yumi pilim taiet, na yumi fosim yumi yet long go long ol miting namel long wik. Tasol taim yumi pinis long miting na go bek long haus, yumi save pilim olsem yumi kisim nupela strong. Wankain samting i save kamap taim yumi wok strong long autim tok na mekim pesenel Baibel stadi—amamas yumi kisim i save winim tru olgeta hatwok bilong yumi!

17. Wai na yumi mas luksave long mak bilong strong bilong yumi na skelim gut ol wok yumi laik mekim?

¹⁷ Yumi mas luksave olsem strong bilong yumi olgeta wan wan i gat mak bilong en. Olsem na yumi mas skelim gut ol wok yumi laik mekim. Nogut yumi pinisim nating strong bilong yumi long bungim mani kago. Tingim tok Jisas i mekim long yangpela maniman husat i askim olsem: “Mi mas mekim wanem bilong kisim laip oltaim?” Dispela yangpela man i save bihainim Lo. Ating em i gutpela man bikos Gutnius Bilong Mak i tokaut stret olsem Jisas “i laikim em.” Jisas i invaitim dispela yangpela man long kamap disaipel bilong em. Jisas i tokim em: “Go na salim ol samting bilong yu . . . na kam bihainim mi.” Dispela man “i gat planti samting tru,” na i luk olsem em i no laik lusim ol dispela samting. (Mak 10:17-22) Olsem na em i sakim invatesen bilong Jisas na stap yet olsem wokboi bilong “Mani.” (Mat. 6:24) Yu bai mekim wanem sapos dispela samting i bin kamap long yu?

18. Yumi mas makim taim long mekim wanem? Bilong wanem?

¹⁸ Yumi mas makim taim long skelim gen ol samting i stap olsem bikpela samting long laip bilong yumi. Bilong wanem? Dispela bai helpim yumi long luksave olsem yumi yusim strong bilong yumi long mekim gutpela wok. Tingim tok bilong wanpela yangpela man, nem bilong em Mark. Em i tok: “Inap planti yia, mi ting mi holim liklik kago tasol. Mi mekim wok painia, tasol oltaim mi save tingting long mani na tingim ol rot bilong mekim sindaun bilong mi i kamap gutpela moa. Mi laik save long wai na laip bilong mi i pulap long hevi. Mi luksave olsem mi tingting moa long inapim ol laik bilong mi yet, na mi givim liklik haptaim tasol na mi no wok strong tumas long mekim wok bilong Jehova.” Mark i mekim sampela senis long tingting na laip bilong em bambai em inap mekim planti samting moa long wok bilong Jehova. Em i tok: “Sampela taim mi tingting planti, tasol Jehova na Jisas i sambai long mi na mi inap winim ol dispela hevi.”

19. Wai na em i bikpela samting long yumi mas holim stretpela tingting?

¹⁹ Yumi bai kisim yet nupela strong aninit long plang bilong Jisas sapos yumi mekim 3-pela samting. Namba 1: Holim stretpela tingting. Yumi mekim wok bilong Jehova, olsem na yumi mas bihainim rot em i makim. Yumi ol wokman, na Jehova em Bosman. (Luk 17:10) Sapos yumi laik bihainim tingting bilong yumi yet, i olsem yumi sakim hap plang na dispela bai givim hevi long yumi. Maski wanpela bulmakau i gat bikpela strong, em inap kisim bagarap na strong bilong en bai pinis sapos oltaim em i laik bihainim daireksen bilong em yet na sakim hap plang em bosman i kontrolim. Tasol sapos yumi bihainim rot Jehova i makim,  yumi inap mekim ol bikpela wok na yumi inap daunim olgeta kain hevi. Tingim, i no gat man inap stopim Jehova long inapim ol samting em i tingting pinis long mekim!—Rom 8:31; 1 Jon 4:4.

20. Yumi mas i gat wanem stretpela risen long mekim wok Jisas i givim long yumi?

²⁰ Namba 2: Mekim wok wantaim stretpela risen. Bikpela laik bilong yumi em long litimapim nem bilong Papa bilong yumi, Jehova. Long taim bilong Jisas, sampela manmeri i gat pasin gridi na ol i tingim laik bilong ol yet, olsem na ol i bel hevi na ol i no laik stap disaipel bilong Jisas. (Jon 6:25-27, 51, 60, 66; Fili. 3:18, 19) Tasol ol lain husat i laikim tru God na ol narapela, ol i amamas yet long mekim wok Jisas i givim long ol, na ol i gat hop long wok wantaim Krais long heven. Yumi tu bai stap amamas sapos yumi gat stretpela risen long mekim wok Jisas i givim long yumi.

21. Olsem Matyu 6:31-33 i kamapim, yumi ken bilip olsem Jehova inap mekim wanem?

²¹ Namba 3: Holim stretpela bilip. Yumi bin mekim disisen long daunim ol laik bilong yumi yet na taitim bun long mekim wok. Jisas i tok lukaut olsem ol man bai mekim nogut tru long yumi. Tasol yumi ken bilip olsem Jehova bai strongim yumi long karim olgeta kain hevi. Sapos yumi sanap strong oltaim na karim ol hevi, bilip bilong yumi bai kamap strong moa yet. (Jems 1:2-4) Yumi ken bilip tu olsem Jehova bai givim ol samting yumi nidim, na Jisas bai stiaim yumi, na ol bratasista bai strongim yumi. (Ritim Matyu 6:31-33; Jon 10:14; 1 Tes. 5:11) Yumi gat olgeta samting yumi nidim bilong helpim yumi long sanap strong na karim hevi!

22. Yumi ken tenkyu tru long wanem samting?

²² Taim Jisas i oraitim meri i gat bikpela sik, meri i kisim nupela strong long dispela de. Tasol oltaim meri inap kisim nupela strong sapos em i kamap disaipel bilong Krais. Yu ting dispela meri i mekim wanem? Sapos em i karim hap plang bilong Jisas, tingim blesing em inap kisim—em bai wok wantaim Jisas long heven! Maski meri i lusim wanem ol samting na bihainim Krais, ol dispela samting i olsem samting nating taim yumi skelim blesing em inap kisim. Maski yumi gat hop bilong kisim laip oltaim long heven o long graun, yumi ken tenkyu tru olsem yumi harim na bihainim invatesen bilong Jisas: “Kam long mi”!