1. Wai na yumi mas daun long Jehova?

YUMI mas daun * long Jehova bikos em i Krieta bilong yumi. Em i gat rait long putim ol lo yumi mas bihainim. (Rev. 4:11) Yumi gat narapela risen tu long bihainim tok bilong em—wei bilong em long mekim wok bos i nambawan tru. Long bipo yet na i kam inap long nau, planti man i gat strong na namba long bosim ol narapela. Maski i olsem, wok bos bilong Jehova i winim tru wok bos bilong ol—em wanpela tasol i gat olgeta savetingting, bikpela pasin marimari, na bikpela pasin sori.—Kis. 34:6; Rom 16:27; 1 Jon 4:8.

2. Hibru 12:9-11 i kolim wanem ol risen bilong yumi long daun long Jehova?

² Jehova i laik bai yumi bihainim tok bilong em bikos yumi laikim em na tingim em olsem gutpela Papa, na i no olsem yumi pret long em. Long pas Pol i raitim long ol Kristen long Hibru, Pol i tok yumi mas “redi long daun long Papa” bikos em i trenim yumi “bilong helpim yumi.”—Ritim Hibru 12:9-11.

3. (a) Hau bai yumi inap soim olsem yumi daun long Jehova? (b) Yumi bai skelim wanem ol askim?

³ Yumi daun long Jehova taim yumi givim bel tru long bihainim olgeta tok bilong em na sakim pasin bilong bihainim save bilong yumi yet. (Prov. 3:5) Yumi bai amamas long daun long Jehova taim yumi save gut long ol naispela pasin bilong em. Wai? Bikos ol dispela pasin i stap ples klia long  olgeta samting em i mekim. (Sng. 145:9) Taim yumi kisim sampela save moa long Jehova, dispela bai strongim moa yet pasin bilong yumi long laikim em. Olsem na yumi no nidim longpela lista bilong ol lo i kolim ol samting yumi mas mekim na ol samting yumi no ken mekim. Yumi bai skulim bel na tingting bilong yumi long laikim ol samting i stret na heitim ol samting nogut. (Sng. 97:10) Tasol sampela taim yumi inap pilim hatwok long bihainim tok bilong Jehova. Wai? Ol elda, ol papa, na ol mama inap kisim wanem skul long eksampel bilong Gavana Nehemia; King Devit; na Maria, mama bilong Jisas? Dispela atikol bai bekim ol dispela askim.

4-5. Olsem Rom 7:21-23 i kamapim, wai na yumi inap pilim hatwok long daun long Jehova?

⁴ Yumi olgeta i gat sin, olsem na yumi no gutpela olgeta. Dispela i mekim na yumi inap pilim hatwok long daun long Jehova. Olsem na sampela taim yumi save mekim pasin bikhet. Taim Adam na Iv i mekim pasin bikhet na kaikai prut em God i tambuim ol long kisim, i olsem tupela yet i kamapim ol lo ol bai bihainim. (Stt. 3:22) Long nau, planti manmeri i sakim tok bilong Jehova na ol yet i makim wanem pasin i stret na wanem pasin i no stret.

⁵ Ol manmeri husat i save long Jehova na laikim em, ol tu inap pilim hatwok long daun olgeta long em. Aposel Pol i bin pilim olsem. (Ritim Rom 7:21-23.) Olsem Pol, yumi laik bihainim pasin i stret long ai bilong Jehova. Tasol oltaim yumi mas daunim laik bilong yumi long mekim pasin i no stret.

6-7. Wanem narapela risen na yumi inap pilim hatwok long daun long Jehova? Stori long wanpela eksampel.

⁶ Narapela risen na yumi inap pilim hatwok long daun long Jehova em olsem: Pasin bilong ples yumi kamap bikpela long en i save stiaim yumi. Ol man i kamapim kain kain tingting we i pait wantaim laik bilong Jehova, olsem na oltaim yumi mas wok hat long sakim ol dispela tingting. Yumi ken skelim wanpela eksampel.

⁷ Long sampela kantri, ol narapela i save putim presa long ol yangpela long yusim laip olgeta bilong ol long mekim wok mani. Dispela samting i bin kamap long wanpela sista, nem bilong em Mary. * Paslain long em i kisim save long Jehova, em i go long nambawan gutpela skul long kantri em i stap long en. Famili bilong Mary i presaim em long kisim wok mani i gat bikpela pe na namba. Mary tu i laik mekim olsem. Tasol taim em i kisim save long Jehova na laikim em, em i senisim plen bilong em. Mary i tok: “Sampela taim mi gat rot long mekim wok bilong kisim planti mani, tasol dispela inap pasim mi long mekim wok bilong God. Pasin bilong ples i mekim na mi pilim hatwok yet long sakim dispela tingting. Mi mas askim Jehova long helpim mi long daunim laik bilong kisim wok mani we inap stopim mi long mekim wok bilong em.”—Mat. 6:24.

8. Yumi bai skelim wanem samting?

⁸ Yumi helpim yumi yet taim yumi daun long Jehova. Tasol i gat narapela risen na ol elda, ol papa, na ol mama i mas daun long God—ol i gat rot long helpim ol narapela. Yumi ken skelim sampela eksampel long Baibel long wei bilong mekim wok bos long pasin i stret long ai bilong Jehova.

9. Nehemia i bungim wanem ol hevi?

⁹ Jehova i givim bikpela wok long ol  elda—ol i stap olsem ol wasman bilong lukautim ol sipsip bilong God. (1 Pita 5:2) Ol elda inap kisim planti skul long pasin Nehemia i mekim long ol manmeri bilong Jehova. Nehemia em gavana bilong Juda, olsem na em i gat namba bilong mekim wok bos. (Neh. 1:11; 2:7, 8; 5:14) Tingim sampela hevi i painim Nehemia. Em i lukim olsem ol manmeri i mekim pasin doti insait long tempel na ol i no helpim lain Livai long sait bilong mani samting olsem Lo i makim. Ol Juda i brukim lo bilong Sabat, na sampela man i maritim ol meri bilong ol narapela kantri. Gavana Nehemia i mas mekim sampela samting bilong stretim ol dispela hevi.—Neh. 13:4-30.

10. Nehemia i mekim wanem bilong stretim ol hevi?

¹⁰ Maski Nehemia i mekim wok bos, em i no putim ol lo bilong em yet na bai lain bilong God i ken bihainim, nogat. Em i beten strong na askim Jehova long stiaim em, na em i skulim ol manmeri long Lo Bilong Jehova. (Neh. 1:4-10; 13:1-3) Na tu, Nehemia i daunim em yet na wok wantaim ol manmeri long sanapim gen ol banis bilong Jerusalem.—Neh. 4:15.

11. Olsem 1 Tesalonaika 2:7, 8 i kamapim, ol elda i mas mekim wanem kain pasin long ol bratasista?

¹¹ Ating ol elda i no inap bungim wankain hevi olsem Nehemia, tasol ol inap bihainim eksampel bilong em long sampela samting. Ol i wok strong long helpim ol bratasista. Maski ol i gat namba long mekim wok bos, ol i no pilim olsem ol i winim ol narapela. Ol i lukautim gut kongrigesen. (Ritim 1 Tesalonaika 2:7, 8.) Ol i gat bikpela pasin laikim na pasin daun, na dispela i kirapim ol long mekim ol gutpela tok long ol narapela. Andrew i mekim wok elda inap planti yia, na em i tok: “Mi luksave olsem ol bratasista i save amamas taim ol elda i mekim gutpela pasin na pasin isi. Dispela i kirapim ol long wok gut wantaim ol elda.” Tony em narapela brata husat i mekim  wok elda inap planti yia, na em i tok: “Mi traim long bihainim tok bilong Filipai 2:3 na oltaim mi wok hat long tingim olsem ol narapela i winim mi. Dispela i helpim mi long abrusim pasin bilong fosim ol narapela long rispektim mi.”

12. Wai na ol elda i mas bihainim pasin daun?

¹² Jehova i gat pasin daun, olsem na ol elda tu i mas bihainim pasin daun. Maski Jehova em i King bilong heven na graun, em i save “lindaun” na litimapim ol “man i no gat nem [em ol] i stap long das.” (Sng. 18:35; 113:6, 7) Jehova i heitim ol man i hambak na ol i gat pasin antap.—Prov. 16:5.

13. Wai na elda i mas “bosim gut maus bilong em”?

¹³ Sapos elda i gat pasin bilong stap daun long Jehova, em bai “bosim gut maus bilong em.” Sapos em i no bosim gut maus, em inap kros taim wanpela i no rispektim em. (Jems 1:26; Gal. 5:14, 15) Andrew, yumi stori pinis long em, em i tok: “Sampela taim, mi laik krosim ol wanbilip bikos mi pilim olsem ol i no rispektim mi. Tasol mi tingim tingim eksampel bilong ol bilipman long Baibel, na dispela i helpim mi long luksave olsem em i bikpela samting long mi mas daunim mi yet.” Taim ol elda i toktok gut wantaim olgeta insait long kongrigesen na toktok bilong ol i kamapim pasin laikim, dispela i soim olsem ol i stap daun long Jehova.—Kol. 4:6.

14. (a) Jehova i makim ol papa long mekim wanem wok? (b) God i ekspektim ol papa long mekim wanem?

¹⁴ Jehova i makim ol papa long stap olsem het bilong famili, na God i ekspektim ol long trenim na stretim ol pikinini. (1 Kor. 11:3; Efe. 6:4) Tasol ol papa i no ken mekim nabaut long namba ol i holim—Jehova yet i bin kamapim ol famili, olsem na em bai skelim pasin ol papa i mekim long famili bilong ol. (Efe. 3:14, 15) Ol papa i soim olsem ol i daun long Jehova taim ol i mekim wok bos long pasin i stret long ai bilong God. Ol inap kisim gutpela skul long stori bilong King Devit.

15. Wai na stori bilong King Devit inap givim gutpela skul long ol papa?

¹⁵ Jehova i makim Devit long stap het bilong famili bilong em na het bilong kantri Israel. Devit i gat bikpela namba. Sampela taim, em i no mekim gutpela wok long namba bilong em na em i mekim ol bikpela rong. (2 Sml. 11:14, 15) Tasol em i redi long kisim tok bilong stretim em na dispela i soim olsem em i daun long Jehova. Em i beten long Jehova na autim olgeta wari bilong em. Na em i traim bes  long bihainim tok kaunsel i kam long Jehova. (Sng. 51:1-4) Na tu, em i daunim em yet na redi long bihainim edvais ol meri i givim. (1 Sml. 19:11, 12; 25:32, 33) Devit i kisim skul long ol popaia bilong em yet na em i putim wok bilong Jehova i stap nambawan bikpela samting long laip bilong em.

16. Ol papa inap kisim wanem skul long stori bilong Devit?

¹⁶ Skelim sampela skul em ol papa inap lainim long stori bilong King Devit: Mekim gutpela wok long namba Jehova i givim long yu. Tokaut long ol popaia bilong yu, na bihainim edvais bilong Baibel em ol narapela i givim. Sapos yu mekim olsem, famili bai luksave olsem yu bihainim pasin daun na ol bai rispektim yu. Taim yu beten wantaim famili, autim olgeta wari bilong yu long Jehova—larim famili i luksave olsem yu laik tru long kisim helpim i kam long God. Na bikpela samting moa, tingim wok bilong Jehova olsem nambawan bikpela samting. (Lo 6:6-9) Sapos pasin bilong yu i stap olsem gutpela eksampel, dispela em gutpela presen tru yu inap givim long famili.

17. Jehova i givim wanem wok long ol mama?

¹⁷ Jehova i givim wanpela bikpela wok long ol mama, na ol tu i mekim wok bos long stiaim ol pikinini. (Prov. 6:20) Taim ol pikinini i liklik yet na i go inap long ol i kamap bikpela, ol inap tingim yet skul ol i kisim long toktok na pasin bilong mama. (Prov. 22:6) Tingim skul ol mama inap kisim long stori bilong Maria, mama bilong Jisas.

18-19. Ol mama inap kisim wanem skul long stori bilong Maria?

¹⁸ Maria i save gut long ol tok i stap long Rait Holi. Em i rispektim tru Jehova na pas gut wantaim em. Maria i redi long daun long Jehova, maski em i mas mekim ol bikpela senis long laip bilong em.—Luk 1:35-38, 46-55.

¹⁹ Ol mama, yupela inap bihainim pasin bilong Maria. Namba 1: Strongim pasin bilong yu long pas gut wantaim Jehova long rot bilong pesenel stadi na beten oltaim. Namba 2: Redi long mekim ol senis long laip bilong yu na bai yu inap amamasim Jehova. Ating yu kamap bikpela long famili we oltaim papamama i kros na mekim hatpela tok long ol pikinini. Olsem na yu inap pilim olsem i no gat rong long mekim hatpela pasin long ol pikinini. Maski yu kisim save pinis long ol lo bilong Jehova, yu inap pilim hatwok long soim pasin isi long pikinini, moa yet sapos yu taiet na pikinini i sakim tok. (Efe. 4:31) Long kain taim olsem,  yu mas beten askim Jehova long helpim yu. Lydia em wanpela mama na em i tok: “Sampela taim, mi mas beten strong na bai mi no ken kros taim pikinini man bilong mi i sakim tok. Sampela taim mi kirap pinis long toktok, na mi mas stopim mi yet, na long tingting mi beten askim Jehova long helpim mi. Beten i save helpim mi long daunim belhat.”—Sng. 37:5.

20. (a) Sampela mama inap pilim hatwok long mekim wanem? (b) Hau bai ol inap daunim dispela hevi?

²⁰ Sampela mama inap pilim hatwok long tokim pikinini olsem ol i laikim ol. (Tai. 2:3, 4) Sampela meri i kamap bikpela long ol famili we papamama i no pas gut wantaim ol pikinini. Sapos yu bin kamap bikpela long kain famili olsem, yu no ken mekim wankain pasin olsem papamama i bin mekim. Taim mama i daun long Jehova, em inap lain long pasin bilong tokim ol pikinini olsem em i laikim ol. Em inap pilim hatwok long senisim wei bilong em long tingting na mekim ol samting. Tasol em inap mekim ol dispela senis, na ol dispela senis bai helpim em na famili bilong em.

21-22. Olsem Aisaia 65:13, 14 i kamapim, yumi kisim wanem ol blesing taim yumi daun long Jehova?

²¹ King Devit i save olsem ol manmeri bai stap gut sapos ol i daun long Jehova. Em i tok: “Tok bilong Jehova i stret tru na i save mekim man i belgut; lo bilong Jehova i gutpela tru na i mekim ai bilong man i lait. Na long rot bilong ol, wokman bilong yu i kisim tok lukaut; man i bihainim ol, em bai kisim gutpela pe tru.” (Sng. 19:8, 11) Long nau, yumi inap luksave olsem taim ol manmeri i daun long Jehova, laip bilong ol i gutpela moa winim laip bilong ol manmeri i sakim tok bilong em. Ol manmeri i daun long Jehova i “amamas na singaut bikos bel bilong ol i stap gut.”—Ritim Aisaia 65:13, 14.

²² Taim ol elda, ol papa, na ol mama i redi long daun long Jehova, laip bilong ol i kamap gutpela moa, famili i stap amamas tru, na kongrigesen olgeta i stap wanbel. Bikpela samting moa, ol i mekim Jehova i amamas. (Prov. 27:11) Dispela em nambawan gutpela samting yumi inap mekim bilong i stap amamas!