Dispela ves i tok: “Sapos yu lukim wanpela ofisa i gat namba i daunim ol rabisman na i no bihainim stret lo bilong kot na stretpela pasin long distrik bilong yu, no ken kirap nogut long dispela samting. Bikos narapela man i gat bikpela namba moa i putim was long dispela ofisa, tasol i gat ol narapela i gat bikpela namba moa winim ol.”—Ekl. 5:8.

Long tingting bilong ol man, dispela ves i stori long wok bos bilong ol man insait long gavman. Tasol dispela ves i kamapim wanpela tok i tru long Jehova, we i ken mekim isi bel bilong yumi na strongim yumi.

Eklisiastis 5:8 i stori long wanpela bosman i daunim ol rabisman na i no mekim stretpela kot long ol. Dispela bosman i mas save olsem narapela man i gat bikpela namba moa o bikpela namba insait long gavman i putim was long em. Na, ating i gat sampela em ol i gat bikpela namba moa long em. Sori tru, long ol gavman bilong graun, olgeta dispela bosman inap mekim pasin korapsen, na ol man nating i mas karim hevi long dispela.

Maski yumi lukim olsem i no gat gutpela samting inap kamap, yumi ken kisim bel isi long save olsem Jehova i ‘putim was long ol dispela ofisa’ bilong ol gavman bilong graun. Yumi ken kamapim hevi bilong yumi long God na askim em long helpim yumi. (Sng. 55:22; Fili. 4:6, 7) Yumi save olsem “ai bilong Jehova i save lukluk raun long olgeta hap bilong graun bilong em i ken soim strong bilong em long helpim ol man husat i givim bel olgeta long em.”—2 Sto. 16:9.

Eklisiastis 5:8 i kamapim klia wanpela samting long wok bos bilong ol man insait long gavman; oltaim i gat wanpela man i gat bikpela namba moa long ol. Bikpela samting moa, dispela ves i ken helpim yumi long tingim olsem Jehova i gat bikpela namba moa long ol, yes, em i Nambawan Bos. Nau em i mekim wok bos long rot bilong Pikinini bilong em, Jisas Krais, King bilong Kingdom. God i Gat Olgeta Strong, i wok long putim was long olgeta—em i gat stretpela pasin na pasin fea, na wankain long Pikinini bilong em.