1. Wanem taim i hatwok long mekim wok bilong Jehova?

YU TING wanem taim i hatwok moa long mekim wok bilong Jehova? Long taim bilong hevi o long taim yu no gat hevi na yu stap bel isi? Long taim bilong hevi, kwiktaim yumi save trastim Jehova long helpim yumi. Tasol yumi save mekim wanem taim yumi stap gut na i no gat hevi? Ating yumi inap lusim tingting long mekim wok bilong God? Jehova i bin givim tok lukaut long lain Israel olsem dispela samting inap kamap.—Lo 6:10-12.

2. King Asa i stap gutpela piksa long wanem samting?

² King Asa i stap gutpela piksa tru long pasin bilong bihainim savetingting na wet long Jehova i helpim em. Em i mekim wok bilong Jehova long taim bilong hevi na long gutpela taim tu. Kirap long taim em i likik yet, “Asa i givim bel olgeta long lotuim Jehova long laip olgeta bilong em.” (1 Kin. 15:14) Asa i soim olsem em i givim bel tru long Jehova taim em i rausim na pinisim lotu giaman long Juda. Baibel i tok: “Em i rausim ol alta bilong ol arapela god na ol ples lotu, na em i brukim ol pos ston bilong lotu, na katim ol pos bilong lotu.” (2 Sto. 14:3, 5) Em i rausim tu tumbuna mama bilong em Maka long namba em i holim olsem kwin mama insait long kingdom. Bilong wanem? Long wanem, Maka i kirapim ol man long lotuim imis.—1 Kin. 15:11-13.

3. Bai yumi stori long wanem samting long dispela atikol?

³ Asa i pinisim lotu giaman na em i mekim sampela samting moa. Em i strongim lotu i tru na em i helpim ol manmeri bilong Juda long kirap gen long lotuim Jehova. Jehova i blesim Asa na lain Juda na inap sampela haptaim ol i stap  bel isi. * Inap 10-pela yia long taim Asa i stap king, “kantri i stap gut.” (2 Sto. 14:1, 4, 6) Long dispela atikol, yumi bai stori long Asa i mekim wanem ol wok long haptaim bilong bel isi. Bihain yumi bai stori long pasin bilong ol Kristen long taim bilong ol aposel long ol gutpela wok ol i mekim long taim bilong bel isi, olsem Asa i bin mekim. Bihain long dispela, bai yumi bekim dispela askim: Sapos yu stap long kantri we yu stap fri long lotu, olsem wanem yu ken mekim gutpela wok long dispela haptaim bilong bel isi?

4. Olsem 2 Stori 14:2, 6, 7 i kamapim, Asa i mekim wanem wok long haptaim bilong bel isi?

⁴ Ritim 2 Stori 14:2, 6, 7. Asa i tokim ol manmeri olsem Jehova i “givim malolo long yumi na ol birua i stap klostu i no kam pait long yumi.” Asa i no pilim olsem dispela haptaim bilong bel isi em i taim bilong malolo tasol. Nogat. Em i kirap long wokim ol taun, ol banis bilong taun, ol taua, na ol geit. Em i tokim lain Juda: “Graun i stap long han bilong yumi.” Wanem mining bilong dispela tok? Em i minim olsem ol manmeri i stap fri long raun long graun God i givim long ol na wokim ol haus samting na i no gat birua bilong stopim ol. Em i tokim ol manmeri long mekim gutpela wok long dispela haptaim ol i stap bel isi.

5. Bilong wanem Asa i strongim ami bilong em?

⁵ Asa i yusim dispela haptaim bilong bel isi long strongim ami bilong em. (2 Sto. 14:8) Yu ting dispela i makim olsem em i no trastim Jehova? Nogat. Asa i save olsem em wok bilong em long redim ol manmeri long ol hevi bai kamap bihain. Asa i save olsem dispela haptaim bilong bel isi long Juda bai i no stap oltaim, na dispela em i tru.

6. Ol Kristen long taim bilong ol aposel i bin mekim wanem wok long taim bilong bel isi?

⁶ Maski planti taim gavman i save kalabusim ol Kristen long taim bilong ol aposel, i gat sampela haptaim we ol i stap bel isi. Ol i bin mekim wanem wok long dispela haptaim? Ol dispela bilip man na meri i bin wok strong tru long autim gutnius. Buk Aposel i stori olsem ol i “wokabaut long pasin bilong pret long Jehova.” Ol i wok yet long autim tok, na gutpela samting i kamap em ol i “wok long kamap bikpela moa.” I klia tru olsem Jehova i blesim wok autim tok bilong ol long taim bilong bel isi.—Apo. 9:26-31.

7-8. Pol na ol narapela i mekim wanem taim rot i op? Stori long dispela.

⁷ Ol Kristen long taim bilong ol aposel i save autim gutnius long olgeta kain taim. Wanpela eksampel em, taim aposel Pol i luksave olsem rot i op long em taim em i stap long Efesus, em i mekim gutpela wok long dispela haptaim long autim tok na kamapim ol disaipel long dispela taun.—1 Kor. 16:8, 9.

⁸ Narapela rot i op long Pol na ol narapela Kristen long yia 49 C.E. taim ol aposel na ol narapela hetman long Jerusalem i wokim disisen long pasin bilong katim skin. (Apo. 15:23-29) Bihain long ol i salim tok i go pinis long ol kongrigesen long dispela disisen, ol disaipel i wok strong tru long “autim gutnius bilong tok bilong Jehova.” (Apo. 15:30-35) Wanem samting i kamap? Baibel i tok: “Ol kongrigesen i kamap strong moa long bilip, na long olgeta de ol i wok long i go bikpela.”—Apo. 16:4, 5.

9. (a) Wanem samting i kamap long planti kantri long nau? (b) Yumi ken givim wanem askim long yumi yet?

⁹ Long planti kantri long nau, yumi ken autim tok na i no gat samting i pasim yumi. Yu stap long kantri we yu stap fri long mekim lotu? Sapos olsem, askim yu yet, ‘Mi mekim wanem wok long dispela pasin bilong stap fri?’ Long dispela taim bilong las de, lain bilong Jehova i bisi tru long autim tok na skulim ol man—bipo i no gat kain wok olsem i bin kamap. (Mak 13:10) I gat planti samting yumi ken mekim insait long dispela wok bilong autim tok.

10. Tok bilong 2 Timoti 4:2 i kirapim yumi long mekim wanem?

¹⁰ Olsem wanem yu ken mekim gutpela wok long taim bilong bel isi? (Ritim 2 Timoti 4:2.) I gutpela yu skelim sindaun bilong yu na bai yu o wanpela long famili bilong yu i ken mekim bikpela wok moa bilong autim tok, olsem mekim wok painia. Nau em i no taim bilong bungim ol gutpela samting na mani kago—em ol samting bai i no abrusim bagarap wantaim yumi long taim bilong traipela hevi tru.—Prov. 11:4; Mat. 6:31-33; 1 Jon 2:15-17.

11. Sampela i bin mekim wanem bilong autim gutnius long planti manmeri?

¹¹ Planti pablisa i bin lainim nupela tokples bambai ol i ken yusim long autim tok na skulim ol man. Oganaisesen bilong God i bin sapotim ol long rot bilong wokim planti buk na nius bilong Baibel long planti tokples. Olsem, long 2010, ol i bin wokim ol buk na nius bilong yumi long 500 tokples. Long nau, ol buk na nius bilong yumi i stap long winim 1,000 tokples!

12. Ol manmeri i save pilim olsem wanem taim ol i harim gutnius bilong Kingdom long tokples bilong ol yet? Stori long wanpela eksampel.

¹² Ol man i pilim olsem wanem taim ol i harim tok i tru bilong God long tokples tru bilong ol? Skelim samting wanpela sista i bin pilim taim em i kam kibung long Memphis, Tennessee, Amerika. Program bilong  kibung i kamap long tokples Kinyarwanda, em tokples ol i save mekim long Ruanda, Kongo (Kinshasa), na Uganda. Bihain long kibung, dispela sista i save mekim tokples Kinyarwanda i tok: “Insait long 17 yia mi bin stap long Amerika, dispela em fes taim mi kliagut long ol tok bilong kibung.” I klia tru olsem dispela sista i pilim tru long bel ol tok i kamap long tokples bilong em. Sapos em orait long sindaun bilong yu, inap yu lainim narapela tokples bilong helpim ol man i stap long hap bilong yu? Yu ting yu inap mekim olsem bikos sampela man long hap bilong yu i amamas long mekim narapela tokples? Gutpela samting bai kamap long hatwok bilong yu.

13. Ol brata long Rasia i bin mekim wanem wok long taim bilong bel isi?

¹³ I no olgeta bratasista bilong yumi i stap fri long autim tok. Long sampela kantri, ol brata i no stap fri long autim tok bikos gavman i putim tambu long wok bilong yumi. Olsem, tingim ol brata bilong yumi long Rasia. Inap planti yia gavman i bin mekim nogut tru long ol, tasol long Mas 1991, gavman i tok orait long ol i ken stap fri long mekim lotu. Long dispela taim, i gat 16,000 pablisa bilong Kingdom. Insait long 20 yia, dispela namba i go bikpela tru winim 160,000 pablisa! I klia tru olsem ol bratasista i bin bihainim savetingting taim ol i stap fri long autim tok. Tasol dispela taim bilong bel isi i no stap longpela taim. Maski ol samting i senis, dispela i no daunim laik bilong ol long mekim lotu i tru. Ol i mekim yet olgeta samting ol inap mekim bilong mekim yet wok bilong Jehova.

14-15. Olsem wanem Jehova i yusim strong bilong em long helpim Asa?

¹⁴ Long taim bilong Asa, bel isi i bin pinis sampela haptaim bihain. Wanpela  strongpela ami i gat winim 1 milion soldia bilong Itiopia i kam. Komanda bilong en Sera i bilip strong olsem em wantaim ami bilong em bai daunim Juda. Tasol King Asa i no bilip long bikpela lain ami, nogat, em i bilip long God bilong em Jehova. Asa i beten olsem: “Helpim mipela, O Jehova, God bilong mipela, long wanem, mipela i trastim yu, na long nem bilong yu, mipela i kam pait long ol dispela bikpela lain.”—2 Sto. 14:11.

¹⁵ Maski ami bilong Itiopia i gat planti soldia tru, Asa i save olsem Jehova i gat strong na em inap tru long helpim lain bilong Em. Na Jehova i bin helpim lain bilong em na ol i pait na daunim ami bilong Itiopia.—2 Sto. 14:8-13.

16. Olsem wanem yumi ken save olsem haptaim bilong bel isi bai pinis?

¹⁶ Yumi no save long wanem samting bai painim yumi wan wan long bihain, tasol yumi save olsem dispela haptaim bilong bel isi em lain bilong Jehova i stap long en bai i no stap longpela taim. Jisas i tok long ol disaipel bilong em olsem long taim bilong las de, “olgeta lain bai heitim yupela.” (Mat. 24:9) Na aposel Pol tu i tok olsem, “olgeta man husat i laik bihainim pasin bilong givim bel tru long God olsem ol disaipel bilong Krais Jisas, ol man bai mekim nogut long ol tu.” (2 Tim. 3:12) Satan i “belhat nogut tru,” na yumi bai giamanim yumi yet sapos yumi ting olsem yumi ken abrusim belhat bilong em.—Rev. 12:12.

17. Wanem samting inap kamap na traim bilip bilong yumi?

¹⁷ Liklik taim bihain, ol samting bai kamap na i traim tru bilip bilong yumi wan wan. Na klostu nau “traipela hevi tru” bai kamap long graun olgeta. “Kirap long taim God i wokim graun na i kam inap long nau, kain hevi olsem i no bin kamap.” (Mat. 24:21) Long dispela taim, ating ol wanfamili bai birua long yumi na ating gavman bai putim tambu long wok bilong yumi. (Mat. 10:35, 36) Olsem wanem? Yumi wan wan bai trastim Jehova long helpim na lukautim yumi olsem Asa i bin mekim?

18. Olsem Hibru 10:38, 39 i tok, wanem samting bai helpim yumi long redi long taim we bel isi i pinis?

¹⁸ Jehova i redim yumi nau bambai bilip bilong yumi i ken kamap strong. Em  i stiaim “gutpela wokboi i gat savetingting” long “givim kaikai long [yumi] long taim stret” bilong helpim yumi long sanap strong. (Mat. 24:45) Tasol yumi yet i mas wok strong long strongim bilip bilong yumi long Jehova.—Ritim Hibru 10:38, 39.

19-20. (a) Olsem 1 Stori 28:9 i kamapim, yumi ken givim wanem ol askim long yumi yet? (b) Bilong wanem yumi mas mekim ol dispela askim?

¹⁹ Olsem King Asa, yumi mas “painim Jehova.” (2 Sto. 14:4; 15:1, 2) Yumi kirap long painim em taim yumi kisim save long Jehova na kisim baptais. Na yumi mekim ol samting bilong strongim pasin bilong yumi long laikim Jehova. Bilong save sapos yumi wok long mekim olsem o nogat, yumi ken askim yumi yet, ‘Oltaim mi save go long ol miting bilong kongrigesen?’ Taim yumi go long ol miting em oganaisesen bilong Jehova i redim, yumi kisim nupela strong long bilip na yumi strongim ol narapela na ol i strongim yumi. (Mat. 11:28) Na tu, yumi ken askim yumi yet, ‘Mi save mekim gut stadi bilong mi yet?’ Sapos yu stap wantaim famili bilong yu, orait yu save makim taim long olgeta wik bilong mekim famili lotu? O sapos yu stap yu yet, yu save makim taim bilong mekim pesenel stadi? Na yu save wok strong long autim tok na skulim ol narapela?

²⁰ Bilong wanem yumi mas mekim ol dispela askim? Baibel i tok Jehova i save skelim tingting bilong yumi na ol samting i stap long bel bilong yumi, so i gutpela yumi tu i mekim olsem. (Ritim 1 Stori 28:9.) Sapos yumi lukim olsem yumi mas mekim sampela senis long ol mak yumi laik winim, ol pasin bilong yumi, o tingting bilong yumi, orait yumi mas askim Jehova long helpim yumi long mekim ol dispela senis. Nau em taim bilong redim yumi yet long ol traim bai kamap bihain. No ken larim wanpela samting i pasim yu long mekim gutpela wok long dispela haptaim bilong bel isi!