1-2. Olsem wanem tok bilong Eklisiastis 11:6 i stret long wok bilong autim gutnius bilong Kingdom?

LONG sampela kantri, ol man i amamas long kisim sampela save moa taim ol i harim gutnius. Em samting ol i gat laik tru long harim! Long ol narapela hap, ol man i no save tingim God o tok bilong Baibel. Ol man i save mekim wanem long hap bilong yu? Maski wanem hap yu stap, Jehova i laik bai yumi wok yet long autim tok i go inap long em yet i tok wok i pinis.

² Long taim Jehova yet i makim, wok autim tok bai inapim mak bilong en na “pinis bai kamap.” (Mat. 24:14, 36) Tasol long nau, olsem wanem yumi inap bihainim dispela tok “no ken larim han bilong yu i malolo”? *—Ritim Eklisiastis 11:6.

3. Bai yumi stori long wanem samting long dispela atikol?

³ Atikol i kamap paslain i stori long 4-pela samting yumi mas mekim bilong “kamap ol man bilong kisim ol manmeri.” (Mat. 4:19) Dispela atikol bai stori long 3-pela rot we yumi inap strongim tingting bilong yumi long autim tok, maski wanem hevi yumi bungim. Yumi bai kisim skul long olsem wanem em i bikpela samting long (1) putim tingting olgeta long autim tok, (2) no ken les kwik, na (3) holimpas strongpela bilip.

4. Bilong wanem yumi laik putim tingting olgeta long wok Jehova i givim yumi long mekim?

⁴ Jisas i tok profet long ol samting bai kamap long taim bilong  las de na dispela inap mekim na ol disaipel bilong em i no putim tingting olgeta long wok autim tok. Em i tokim ol disaipel bilong em long “was i stap.” (Mat. 24:42) Long taim bilong Noa, planti samting i bin pulim tingting bilong ol manmeri na ol i no putim yau long ol tok lukaut em i givim. Ol wankain samting inap pulim tingting bilong yumi long nau. (Mat. 24:37-39; 2 Pita 2:5) Olsem na yumi laik putim tingting olgeta long wok Jehova i givim yumi long mekim.

5. Aposel 1:6-8 i stori olsem wok autim tok bai i go bikpela olsem wanem?

⁵ Long nau, yumi mas putim tingting olgeta long autim gutnius bilong Kingdom. Jisas i tok profet olsem dispela wok bai i go long olgeta hap bilong graun na i stap yet bihain long em i dai. (Jon 14:12) Bihain long Jisas i dai, sampela disaipel bilong em i go bek long wok bilong kisim pis. Bihain long Jisas i kirap bek, em i wokim mirakel na helpim sampela disaipel bilong em long kisim planti pis. Long dispela taim em i tokim ol disaipel bilong em olsem wok bilong ol olsem man bilong kisim ol manmeri i winim olgeta narapela wok. (Jon 21:15-17) Paslain long Jisas i go long heven, em i tokim ol disaipel bilong em olsem wok autim tok em i kirapim bai inapim olgeta hap bilong Israel na i go long olgeta hap bilong graun. (Ritim Aposel 1:6-8.) Bihain long sampela yia, Jisas i kamapim wanpela visen long aposel Jon bilong soim em long samting bai kamap long “de bilong Bikpela.” * Na tu, Jon i lukim dispela narakain samting: Wanpela ensel i bringim, “gutnius bilong i stap oltaim oltaim” i go “long olgeta kantri, long olgeta traib, long olgeta tokples na long olgeta lain pipol.” (Rev. 1:10; 14:6) Em i klia tru olsem long nau Jehova i laik yumi mekim wok autim tok long olgeta hap na mekim inap long dispela wok i pinis.

6. Olsem wanem yumi inap putim tingting olgeta long wok bilong autim tok?

 ⁶ Yumi bai putim tingting olgeta long wok bilong autim tok sapos yumi tingim ol samting Jehova i mekim bilong helpim yumi. Olsem, em i redim planti samting long strongim bilip bilong yumi, ol pablikesen ol i prinim, ol pablikesen long websait, ol rekoding bilong odio na vidio, na ol JW brodkas long Intenet. Tingim: Long websait bilong yumi, ol pablikesen i stap long winim 1,000 tokples! (Mat. 24:45-47) Long dispela graun we ol man i no stap wanbel long wok politik, lotu, na ol i gat narapela narapela sindaun, winim 8 milion wokman bilong God i stap wanbel tru long olgeta hap bilong graun. Olsem, long Fraide, Epril 19, 2019, ol Witnes Bilong Jehova long olgeta hap bilong graun i lukim wanpela vidio olsem teks bilong de. Long dispela apinun, bikpela lain olsem 20,919,041 i bung long Memorial bilong tingim indai bilong Jisas. Yumi tingting strong long mekim wok bilong Kingdom taim yumi lukim na insait long dispela wok i kamap long taim bilong yumi.

7. Hau eksampel bilong Jisas i helpim yumi long putim tingting olgeta long wok bilong Kingdom?

⁷ Narapela rot yumi inap putim tingting olgeta long wok autim tok em taim yumi bihainim eksampel bilong Jisas. Em i no larim wanpela samting i pulim tingting bilong em long autim tok. (Jon 18:37) Em i no pundaun long traim taim Satan i soim em “olgeta kingdom bilong graun wantaim ol nambawan gutpela samting bilong ol” na taim ol narapela i laik mekim em i kamap king. (Mat. 4:8, 9; Jon 6:15) Em i no larim laik bilong kisim mani kago i pulim em, na em i no pret long ol man i birua long em. (Luk 9:58; Jon 8:59) Taim ol samting i traim bilip bilong yumi, yumi ken strongim tingting taim yumi tingim tok bilong aposel Pol. Em i kirapim ol Kristen long bihainim eksampel bilong Jisas na bai ol i “no les kwik na givap”!—Hib. 12:3.

8. (a) Pasin bilong i no les kwik i makim wanem samting? (b) Bilong wanem yumi mas i gat dispela pasin long nau?

⁸ Pasin bilong i no les kwik i makim pasin bilong stap isi na wet long ol samting i kamap orait. Maski yumi wet long lukim ol pasin nogut i pinis o wet long lukim truim bilong ol samting yumi laik i mas kamap, yumi mas i gat pasin bilong no ken les kwik. Profet Habakuk i laik tru long lukim pasin nogut i pinis long Juda. (Hab. 1:2) Ol disaipel bilong Jisas i laik tru olsem Kingdom i mas “kamap ples klia wantu tasol” na kisim bek ol long wok bos bilong Rom. (Luk 19:11) Yumi laik tru long lukim dispela taim we Kingdom bilong God bai pinisim olgeta sik na bringim yumi i go long nupela taim i pulap long ol manmeri i bihainim stretpela pasin. (2 Pita 3:13) Maski i olsem, yumi no ken les kwik na wet long taim Jehova yet i makim. Lukim sampela rot Jehova i skulim yumi long pasin bilong i no les kwik.

9. Wanem ol eksampel i soim pasin bilong Jehova long i no les kwik?

⁹ Jehova em gutpela eksampel long pasin bilong i no les kwik. Em i larim haptaim i lus long Noa i wokim sip na mekim wok olsem “man bilong tokaut long stretpela pasin.” (2 Pita 2:5; 1 Pita 3:20) Jehova i putim yau taim Abraham i mekim planti askim long disisen bilong Em long bagarapim ol manmeri nogut long taun Sodom na Gomora. (Stt. 18:20-33) Inap planti yia, Jehova i no les kwik long bikhetlain Israel. (Neh. 9:30, 31) Yumi lukim pasin bilong Jehova long i no les kwik taim em i larim  haptaim i lus na bai ol man husat i laik kamap pren bilong em i ken “tanim bel.” (2 Pita 3:9; Jon 6:44; 1 Tim. 2:3, 4) Eksampel bilong Jehova i soim olsem yumi mas kisim pasin bilong i no les kwik taim yumi wok yet long autim tok na skulim man. Na tu, em i skulim yumi long pasin bilong i no les kwik long rot bilong wanpela tok piksa i stap long Baibel.

10. Olsem Jems 5:7, 8 i kamapim, yumi laik tingim wanem samting long eksampel bilong fama?

¹⁰ Ritim Jems 5:7, 8. Eksampel bilong fama i skulim yumi long pasin bilong i no les kwik. Tru, sampela kaikai i save karim hariap. Tasol sampela, moa yet ol kaikai i save karim prut, bikpela haptaim i mas lus long ol i kamap bikpela. Long Israel, kaikai i save gro insait long 6-pela mun. So, fama i save planim kaikai taim fes ren i pundaun na kisim kaikai bihain long laspela ren i pundaun. (Mak 4:28) Yumi ken bihainim pasin bilong fama long i no les kwik. Tasol i gat hatwok bilong en.

11. Olsem wanem pasin bilong i no les kwik bai helpim yumi long wok autim tok?

¹¹ Yumi gat sin, olsem na yumi laik bai gutpela samting i kamap hariap long wok bilong yumi. Tasol sapos yumi laik bai gaden bilong yumi i karim kaikai, oltaim yumi mas lukautim—digim, planim, rausim gras nogut, na givim wara. Wok bilong kamapim disaipel tu i makim olsem yumi mas wok strong. Haptaim i mas lus long yumi rausim ol gras nogut olsem tingting kranki na tingting i no stret yumi holim long ol lain yumi skulim ol long Baibel. Pasin bilong i no les kwik bai helpim yumi long abrusim pasin bilong bel hevi. Taim sampela i laik harim tok yumi autim, yumi mas holim yet pasin bilong i no les kwik. Yumi no inap fosim wanpela Baibel sumatin long kamap strong long bilip. Sampela taim, ol disaipel bilong Jisas tu i no kliagut hariap long mining bilong tok em i skulim ol long en. (Jon 14:9) Yumi mas tingim olsem yumi planim  na givim wara, tasol Jehova i save mekim kaikai i gro.—1 Kor. 3:6.

12. Olsem wanem yumi ken holim pasin bilong i no les kwik taim yumi autim tok long ol wanfamili em ol i no wanbilip?

¹² Wanpela samting inap mekim na yumi pilim hatwok long holim pasin bilong i no les kwik em taim yumi autim tok long ol wanfamili em ol i no wanbilip. Stiatok i stap long Eklisiastis 3:1, 7 inap helpim yumi. Em i tok: “I gat . . . taim bilong pasim maus na taim bilong toktok.” Yumi mas larim gutpela pasin bilong yumi i autim tok long ol, na tu, oltaim yumi laik redi long tokim ol long tok i tru. (1 Pita 3:1, 2) Yumi no ken les kwik long olgeta man—na tu, ol wanfamili bilong yumi—taim yumi givim bel long autim tok na skulim ol man.

13-14. Husat lain i stap gutpela eksampel em yumi ken bihainim long pasin bilong i no les kwik?

¹³ Yumi ken kisim skul long pasin bilong i no les kwik long ol bilipman em stori bilong ol i stap long Baibel, na tu, ol bilipman long taim bilong yumi. Habakuk i laik tru long lukim pasin nogut i pinis, tasol em i no les kwik taim em i tok: “Mi bai sanap i stap long ples we mi save was.” (Hab. 2:1) Aposel Pol i tok em i laik tru long “pinisim” wok autim tok bilong em. Olsem na em i no les kwik long “autim gut tru dispela gutnius.”—Apo. 20:24.

¹⁴ Tingim stori bilong tupela marit em ol i grediuet long Gileat na ol i kisim asainmen long go long wanpela kantri we i no gat planti Witnes na long dispela hap lotu Kristen i no bikpela tumas. Wan wan man tasol i amamas long stadi long Baibel. Tasol ol klasmeit bilong ol long Skul Gileat em ol i stap long ol narapela kantri i save salim ol naispela ripot i go long ol long planti gutpela Baibel stadi ol i mekim. Maski ol man long teritori tupela i stap long en i no hariap long harim tok, ol i no les kwik long autim tok. Bihain long 8-pela yia, ol i amamas long lukim wanpela Baibel sumatin bilong ol i kisim baptais. Wanem samting i wankain long ol dispela eksampel bilong ol bilipman long bipo na long nau? Dispela ol bilipman i no les kwik na ol i no larim han bilong ol i malolo, na Jehova i blesim pasin bilong ol long i no les kwik. Yumi laik “bihainim pasin bilong ol man husat i bilip na i no les kwik na long dispela rot ol i kisim ol samting God i tok promis long en.”—Hib. 6:10-12.

15. Wanem wanpela rot bilip i helpim yumi long autim tok?

¹⁵ Yumi bilip long tok yumi autim, olsem na yumi laik tru long autim dispela tok long planti manmeri moa. Yumi bilip long ol tok promis i stap long Tok Bilong God. (Sng. 119:42; Ais. 40:8) Yumi lukim ol tok profet bilong Baibel i kamap tru long taim bilong yumi. Yumi lukim ol man i mekim gutpela senis long i stap bilong ol taim ol i kirap long bihainim tok bilong Baibel. Dispela ol samting i helpim yumi long bilip tru olsem gutnius bilong Kingdom em wanpela tok olgeta man i mas harim.

16. Olsem Buk Song 46:1-3 i kamapim, olsem wanem pasin bilong bilip long Jehova na Jisas i strongim yumi long autim tok?

¹⁶ Na tu, yumi bilip long Jehova, em As bilong ol tok yumi autim, na yumi bilip long man em i makim olsem King bilong Kingdom, Jisas. (Jon 14:1) Maski wanem samting i painim yumi, oltaim Jehova bai strongim yumi na stap olsem ples hait bilong yumi. (Ritim Buk Song 46:1-3.) Na tu, yumi bilip tru olsem Jisas i stap long heven na em i stiaim wok bilong autim tok, Jehova i givim strong na namba long em long mekim dispela wok.—Mat. 28:18-20.

17. Stori long wanpela eksampel i soim olsem yumi mas wok yet long autim tok.

 ¹⁷ Bilip i strongim tingting bilong yumi olsem Jehova bai blesim hatwok bilong yumi, na sampela taim long rot we yumi no ting long en. (Ekl. 11:6) Olsem, olgeta de planti tausen man i save wokabaut i go i kam long ol litresa kat bilong yumi. Yu ting gutpela samting i kamap long dispela wei bilong autim tok? Yes! Novemba 2014 Wok Kingdom Bilong Yumi i stori long wanpela yangpela meri i skul long yunivesiti husat i laik raitim wanpela stori long ol Witnes Bilong Jehova. Em i hatwok long painim wanpela Haus Kingdom, tasol long skul em i lukim ol nius bilong yumi i stap long wanpela tebol, na em i painim tu nius em i laikim bilong raitim stori bilong em. Bihain em i baptais na kamap wanpela Witnes na nau em i mekim wok painia oltaim. Kain ol ekspiriens i kirapim yumi long wok yet long autim tok bikos ol i kamapim klia olsem i gat ol man husat i mas harim tok bilong Kingdom.

18. Bilong wanem yumi ken bilip tru olsem wok autim tok bilong Kingdom bai pinis long taim stret em Jehova i makim?

¹⁸ Yumi ken bilip tru olsem wok autim tok bilong Kingdom bai pinis long taim stret. Tingim samting i kamap long taim bilong Noa. Jehova i kamapim klia olsem em i save mekim samting long taim stret. Olsem 120 yia paslain, Jehova i makim taim bilong Bikpela Tait bai kamap. Bihain long planti yia, Jehova i tokim Noa long wokim sip. Ating 40 o 50 yia paslain long Bikpela Tait, Noa i givim bel long mekim wok. Maski ol man i no laik harim tok bilong em, em i wok yet long autim tok lukaut i go inap long taim Jehova i tok em i mas kisim ol animal i go insait long sip. Bihain, long taim stret, “Jehova i pasim dua.”—Stt. 6:3; 7:1, 2, 16.

19. Yumi ken wet long lukim wanem samting sapos yumi no larim han bilong yumi i malolo?

¹⁹ Klostu nau Jehova bai stopim wok autim tok bilong Kingdom; em bai “pasim dua” long haptaim bilong nau em Satan i bosim na bringim yumi i go long nupela taim i pulap long ol manmeri i bihainim stretpela pasin. Long nau, yumi laik bihainim pasin bilong Noa, Habakuk, na ol narapela em ol i no larim han bilong ol i malolo. Yumi mas strongim tingting, i no les kwik, na holimpas strongpela bilip long Jehova na ol tok promis bilong em.