1. Yumi ken putim wanem mak taim yumi wok long kamap lapun?

TAIM yumi wok long kamap lapun, ating yumi inap pret olsem yumi no inap mekim bikpela wok moa bilong Jehova olsem yumi save mekim. Tru yumi no gat wankain strong olsem bipo, tasol yumi ken yusim savetingting na ekspiriens bilong yumi long helpim ol yangpela long mekim planti gutpela wok moa bilong God. Wanpela brata husat i mekim wok elda inap longpela taim i tok: “Taim mi lapun na mi no inap mekim wankain wok olsem bipo, mi bin amamas olsem i gat ol yangpela man em ol i winim pinis ol mak na ol i redi long mekim bikpela wok moa.”

2. Long dispela atikol yumi bai stori long wanem samting?

² Long atikol i go pinis, yumi bin stori long hau ol yangpela i ken kisim skul taim ol i poroman gut wantaim ol lapun. Long dispela atikol, yumi bai stori long olsem wanem pasin daun, pasin bilong bihainim gutpela tingting, pasin bilong tenkyu, na pasin bilong givim samting i ken helpim ol lapun long wok gut wantaim ol yangpela, na dispela bai stap olsem gutpela blesing bilong kongrigesen.

3. (a) Olsem Filipai 2:3, 4 i kamapim, pasin daun em i wanem samting? (b) Olsem wanem dispela pasin i ken helpim wanpela Kristen?

³ Ol lapun i mas i gat pasin daun taim ol i laik helpim ol yangpela. Man i gat pasin daun em i tingim ol narapela olsem ol i gat bikpela save moa winim em. (Ritim Filipai 2:3, 4.) Ol lapun husat i gat pasin daun i luksave olsem i gat planti wei bilong mekim wanpela wok i ron gut na dispela i stret wantaim tok bilong Baibel. So ol i holim stretpela tingting na ol i no ekspektim ol yangpela long mekim wok long wankain wei olsem ol i bin mekim long bipo. (Ekl. 7:10) Ol lapun i gat bikpela ekspiriens  moa long serim wantaim ol yangpela manmeri, tasol ol i mas save olsem “ol samting i kamap long dispela graun i wok long senis,” na ol i mas redi tu long lain long ol nupela wei bilong mekim ol samting.​—1 Kor. 7:31.

4. Olsem wanem ol wasman sekit i holim wankain tingting olsem bilong ol Livai?

⁴ Ol lapun i gat pasin daun ol i luksave olsem taim krismas bilong ol i wok long i go antap, ol i no inap mekim sampela wok em ol i save mekim bipo. Eksampel, tingim ol wasman sekit. Taim ol i winim pinis 70 krismas, ol i save kisim nupela asainmen. Ating dispela em bai hatwok. Ol i amamas long mekim ol wok bilong helpim ol brata bilong ol. Em asainmen ol i laikim tru na ol i laik holim yet dispela asainmen bilong ol. Tasol ol i kliagut olsem nau ol yangpela i mas mekim dispela wok. Ol i holim wankain tingting olsem bilong ol Livai long Israel bilong bipo—taim ol Livai i winim pinis 50 krismas, ol i no inap mekim wok moa long haus lotu sel. Maski i olsem, ol lapun Livai i holimpas yet amamas bilong ol long mekim wok bilong God. Ol i mekim gutpela wok long ekspiriens bilong ol long helpim ol yangpela. (Nam. 8:25, 26) Long nau, taim ol wasman sekit i winim pinis 70 krismas, ol i no moa mekim wok bilong visitim ol kongrigesen. Tasol ol i amamas long helpim na strongim kongrigesen em ol brata i asainim ol long en.

5. Yumi kisim wanem skul long stori bilong Dan na Katie?

⁵ Skelim stori bilong Dan, em i bin mekim wok wasman sekit inap 23 yia. Taim Dan i winim pinis 70 krismas, em na meri bilong  em Katie i kisim asainmen bilong mekim wok spesel painia. Ol i mekim wanem bilong enjoim nupela asainmen bilong ol? Dan i tok nau em i bisi moa winim bipo. Em i lukautim ol wok bilong em insait long kongrigesen, helpim ol brata long winim mak bilong mekim wok kongrigesen sevan, na em i trenim ol narapela long autim tok long ol siti na long ol haus kalabus. Ol lapun, maski yu stap long fultaim sevis o nogat, yu ken mekim bikpela samting bilong helpim ol narapela. Hau yu ken mekim olsem? Yu ken lain long ol senis i kamap long sindaun bilong yu, putim ol nupela mak, tingim ol samting yu ken mekim long nau, na lusim tingting long ol samting em yu no inap mekim.

6. Wai na yumi mas bihainim gutpela tingting? Stori long tok piksa.

⁶ Man i gat gutpela tingting em i save long mak bilong em. (Prov. 11:2, BB) Gutpela tingting i helpim em long luksave olsem em i no inap mekim bikpela wok moa winim strong bilong em. Dispela i mekim na em i stap amamas na em i givim bel long mekim wok em inap mekim. Man i gat gutpela tingting em i olsem wanpela draiva i draivim kar i go antap long maunten. Taim em i draiv i go antap moa, em i save olsem em i mas senisim gia i go long lou gia bambai em i ken draiv gut i go antap. Tru em i no inap spit, tasol em i wok long muv isi isi i go antap. Olsem tasol, man i gat gutpela tingting em i luksave long taim em i mas mekim ol senis na slo daun liklik bambai em i ken amamas yet long mekim wok bilong Jehova na helpim ol narapela.​—Fili. 4:5.

7. Olsem wanem Barsilai i soim olsem em i gat gutpela tingting?

⁷ Tingim stori bilong Barsilai. Em i gat 80 krismas taim King Devit i singautim em long kam joinim em long haus king. Barsilai i gat gutpela tingting, olsem na em i tok nogat long dispela askim bilong king. Barsilai i luksave olsem em i lapun na em i no inap mekim bikpela wok moa, olsem na Barsilai i tokim king long kisim narapela yangpela man long kisim ples bilong em—em Kimham. (2 Sml. 19:35-37) Olsem Barsilai, ol lapun man i save amamas long givim helpim long ol yangpela man long mekim bikpela wok moa.

8. Olsem wanem King Devit i soim olsem em i gat gutpela tingting taim em i laik wokim tempel?

⁸ King Devit i stap olsem gutpela eksampel long sait bilong holim gutpela tingting. Long bel olgeta bilong em, em i gat laik tru long wokim wanpela haus bilong Jehova. Tasol taim Jehova i tokim em olsem dispela wok bai go long yangpela Solomon, Devit i orait long disisen bilong Jehova na em i givim bel olgeta long sapotim dispela projek. (1 Sto. 17:4; 22:5) Devit i no pilim olsem em i gat bikpela save moa long mekim dispela wok bikos Solomon i “yangpela yet na em i no gat planti save long ol samting,” nogat. (1 Sto. 29:1) Devit i save olsem Jehova bai blesim dispela wok na wok bai kamap gut, na i no bikos long krismas o save bilong ol man husat i go pas long mekim dispela wok. Olsem Devit, ol lapun long nau ol i mekim yet wok bilong Jehova taim ol asainmen bilong ol i senis. Ol i save olsem Jehova bai blesim wok bilong ol yangpela, em ol wok ol i bin mekim bipo.

9. Olsem wanem wanpela Brens Komiti brata i soim olsem em i gat gutpela tingting?

⁹ Wanpela brata nem bilong em Shigeo, em i stap gutpela eksampel long pasin bilong bihainim gutpela tingting long nau. Long 1976, taim em i gat 30 krismas, ol i makim em long stap long Brens Komiti. Long 2004, em i kamap Brens Komiti kodineta. Bihain em i luksave olsem strong bilong em i pinis na em i no inap mekim gut ol wok bilong em. Em i beten na  luksave olsem ating wanpela yangpela brata bai mekim gut moa dispela wok. Maski em i no stap moa olsem wanpela kodineta long nau, Shigeo i wok yet long sapotim wok bilong ol brata long Brens Komiti. Olsem yumi lukim long eksampel bilong Barsilai, King Devit, na Shigeo, man i gat pasin daun na gutpela tingting i no save tingim ol yangpela olsem ol i no gat save, nogat. Em i tingim ol yangpela olsem ol i gat strong long mekim planti wok moa. Na em i no tingim olsem ol i wok resis wantaim em, nogat, em i pilim olsem ol i wanwok bilong em.​—Prov. 20:29.

10. Ol lapun i gat wanem tingting long ol yangpela insait long kongrigesen?

¹⁰ Ol lapun i tingim ol yangpela olsem presen i kam long Jehova na ol i tenkyu olsem ol yangpela inap mekim bikpela wok moa. Taim strong bilong ol lapun i wok long pinis, ol i tenkyu olsem i gat ol yangpela i stap em ol i gat strong na ol i redi long mekim wok bilong helpim kongrigesen.

11. Olsem Rut 4:13-16 i kamapim, ol lapun inap kisim wanem blesing taim ol i kisim helpim i kam long ol yangpela?

¹¹ Long Baibel, stori bilong lapun Naomi em wanpela gutpela eksampel long hau wanpela lapun i kisim helpim long wanpela yangpela. Pastaim Naomi i tokim tambu pikinini meri bilong em Rut long go bek long lain bilong em. Tasol Rut i strong long bihainim Naomi i go long Betlehem na Naomi i orait long gutpela sapot bilong Rut. (Rut 1:7, 8, 18) Na dispela i kamapim gutpela samting tru long tupela meri wantaim! (Ritim Rut 4:13-16.) Pasin daun i ken kirapim ol lapun long nau long bihainim eksampel bilong Naomi.

12. Olsem wanem aposel Pol i soim tenkyu bilong em?

¹² Aposel Pol i amamas long helpim em i kisim. Eksampel, em i tenkyu long ol Kristen  long Filipai long ol samting bilong skin ol i givim long em bilong helpim em. (Fili. 4:16) Em i tok tenkyu long Timoti i helpim em. (Fili. 2:19-22) Na tu, Pol i tok tenkyu long Jehova long ol bratasista i kam lukim em long taim em i stap olsem kalabusman long raun bilong em i go long Rom. (Apo. 28:15) Pol em wanpela man i gat bikpela strong tru na em i save wokabaut inap planti tausen kilomita bilong autim tok na strongim ol kongrigesen. Tasol em i no gat pasin antap, em i redi long kisim helpim i kam long ol bratasista bilong em.

13. Olsem wanem ol lapun i ken soim olsem ol i tenkyu long ol yangpela?

¹³ Ol lapun, yupela i ken soim olsem yupela i tenkyu long ol yangpela insait long kongrigesen long narapela narapela rot. Sapos ol i laik helpim yu na kisim yu long kar bilong ol, o go baim ol samting bilong yu, o helpim yu long ol narapela wok long haus, orait yu ken amamas na redi long kisim helpim bilong ol. Tingim kain helpim olsem rot em Jehova i soim pasin laikim long yu. Dispela inap strongim pasin pren bilong yupela. Oltaim soim ol yangpela olsem yu amamas long ol i kamap strong long bilip, na tokim ol olsem yu amamas long ol i wok strong long winim ol mak insait long kongrigesen. Na lusim haptaim long stori wantaim ol long ol ekspiriens bilong yu. Taim yupela i mekim olsem, yupela i “kamapim tenkyu bilong yupela” long Jehova long em i kirapim ol yangpela long lotuim em na stap insait long kongrigesen.​—Kol. 3:15; Jon 6:44; 1 Tes. 5:18.

14. Olsem wanem King Devit i soim olsem em i redi long givim samting?

¹⁴ Long stori bilong King Devit, yumi luksave long narapela pasin em ol lapun i ken bihainim—em pasin bilong givim samting. Em i redi long givim mani na ol narapela samting em i holim bilong sapotim wok bilong wokim tempel. (1 Sto. 22:11-16; 29:3, 4) Em i helpim dispela wok, maski ol man bai kolim dispela tempel olsem tempel bilong Solomon. Maski yumi no gat strong moa long mekim wok long ol konstraksen projek, yumi ken givim kontribiusen bilong sapotim ol dispela projek inap stret long skel bilong yumi. Na yumi ken helpim ol yangpela long kisim skul long ol ekspiriens yumi bin kisim long ol yia i go pinis.

15. Aposel Pol i givim wanem gutpela presen long Timoti?

¹⁵ Long pasin bilong givim samting, skelim gutpela eksampel bilong aposel Pol. Em i singautim yangpela Timoti long wok misineri wantaim em na Pol i skulim em long pasin bilong autim tok na skulim ol man. (Apo. 16:1-3) Trening em Pol i givim long Timoti i helpim Timoti long kamap gutpela moa long wok bilong autim gutnius. (1 Kor. 4:17) Bihain Timoti i yusim trening em i kisim long aposel Pol na em i trenim ol narapela brata.

16. Wai na Shigeo i trenim ol narapela?

¹⁶ Ol lapun brata long nau ol i no pret long lusim ol wok ol i holim na ol i redi long trenim ol yangpela brata insait long kongrigesen long mekim ol dispela wok. Olsem, insait long ol yia i go pinis, Shigeo em yumi stori pinis long em i givim trening long ol yangpela brata insait long Brens Komiti. Em i mekim olsem bambai em i ken helpim wok bilong Kingdom i kamap insait long kantri em i stap long en. Dispela i mekim na taim em i kamap lapun na em i no inap mekim wok olsem kodineta, i gat wanpela brata i kisim pinis trening i stap bilong kisim ples bilong em. Shigeo i wok yet long yusim ekspiriens em i gat olsem wanpela Brens Komiti memba insait long 45 yia long helpim ol yangpela brata. Tru tumas, kain brata olsem i stap olsem gutpela blesing tru namel long lain bilong God!

17. Olsem Luk 6:38 i kamapim, ol lapun i ken givim wanem samting long ol narapela?

 ¹⁷ Yupela ol lapun bratasista i stap insait long kongrigesen, yupela i olsem evidens i soim olsem pasin bilong mekim wok bilong Jehova na stap gut long em—em nambawan gutpela rot. Eksampel bilong yupela i soim olsem i gutpela long mipela i mas lainim ol stiatok bilong Baibel na bihainim long i stap bilong mipela. Yupela i gat ekspiriens long hau ol samting i bin kamap long bipo, tasol yupela i luksave olsem yupela i mas mekim ol senis taim ol nupela senis i kamap. Yupela ol lapun husat i kisim baptais nau tasol, yupela tu i gat planti gutpela ekspiriens yupela i ken serim. Yupela i ken serim amamas yupela i pilim taim yupela i kisim save long Jehova taim yupela i lapun pinis. Ol yangpela bai amamas long harim ol ekspiriens bilong yupela na skul ol i ken kisim long yupela. Yupela i mas “bihainim pasin bilong givim ol samting” em long serim planti ekspiriens yupela i gat, na Jehova bai blesim yupela.​—Ritim Luk 6:38.

18. Olsem wanem ol yangpela na ol lapun i ken helpim narapela narapela?

¹⁸ Taim yupela ol lapun i pas gut wantaim ol yangpela, yupela bai helpim narapela narapela. (Rom 1:12) Ol yangpela na ol lapun wantaim i gat ol samting ol i ken serim wantaim narapela narapela. Ol lapun i gat savetingting na bikpela ekspiriens em ol i bin kisim insait long ol yia ol i stap laip. Yupela ol yangpela i gat bikpela strong. Olsem na taim ol yangpela na ol lapun i wok gut wantaim na stap olsem gutpela pren, dispela bai preisim Papa bilong yumi long heven na stap olsem gutpela blesing long olgeta insait long kongrigesen.