Stadi Atikol 39
Nem Bilong Yu i Stap Long “Buk Bilong Laip”?
“Long ai bilong em ol i raitim wanpela buk. Dispela buk i gat nem bilong ol man em i tingim ol, em ol man i pret long Jehova.”—MAL. 3:16.
SINGSING 61 [17] Kirap, Yupela Witnes!
PRIVIU *
Kirap long bipo yet na i kam, Jehova i wok yet long raitim nem bilong ol man long “buk bilong laip” (Lukim paragraf 1-2)
1. Olsem Malakai 3:16 i kamapim, Jehova i wok long raitim wanem buk, na wanem samting i stap long dispela buk?
INAP planti tausen yia, Jehova i wok long raitim wanpela spesel buk. Dispela buk i gat lista bilong nem bilong ol manmeri kirap wantaim nem bilong namba 1 gutpela witnes em Abel. * (Luk 11:50, 51) Kirap long dispela taim na i kam, Jehova i wok yet long raitim nem bilong ol man long dispela buk, na long nau, dispela buk i gat nem bilong planti milion manmeri. Baibel i kolim dispela buk olsem, “buk i gat nem bilong ol man em i tingim ol,” “buk bilong laip,” na “skrol bilong laip.” Long dispela atikol, yumi bai kolim dispela buk olsem “buk bilong laip.”—Ritim Malakai 3:16; Rev. 3:5; 17:8.
2. (a) Nem bilong husat i stap long buk bilong laip? (b) Yumi ken mekim wanem na bai nem bilong yumi i stap long dispela buk?
2 Dispela spesel buk i gat nem bilong ol manmeri em ol i lotuim Jehova na aninit long em na rispektim tru nem bilong em. Ol i gat rot long kisim laip oltaim. Long nau, God i ken raitim nem bilong yumi tu long dispela buk bilong laip, sapos yumi bilip long ofa bilong Pikinini bilong Em, Jisas Krais, na kisim pasin bilong pas gut wantaim Jehova. (Jon 3:16, 36) Yumi olgeta i laik bai nem bilong yumi i stap long dispela buk—maski yumi bilip long kisim laip long heven o long graun.
3-4. (a) Yu ting yumi bai stap laip oltaim sapos nem bilong yumi i stap long buk bilong laip long nau? Stori long dispela. (b) Bai yumi stori long wanem samting long dispela atikol na long atikol i kamap bihain?
3 Yu ting dispela i makim olsem olgeta man em nem bilong ol i stap long dispela buk ol bai kisim laip oltaim? Yumi ken kisim bekim bilong dispela askim long tok em Jehova i mekim long Moses na i stap long Kisim Bek 32:33. Jehova i tok: “Mi bai rausim long buk bilong mi nem bilong man i mekim sin.” Dispela i makim olsem nem bilong man i stap long dispela buk long nau, God i ken klinim na rausim dispela nem. I olsem taim Jehova i raitim nem bilong man long fes taim, em i raitim long pensil. (Rev. 3:5) Yumi mas mekim olgeta samting yumi inap mekim bambai nem bilong yumi i ken i stap long dispela buk inap oltaim, i olsem God i raitim nem bilong yumi long ing.
4 Dispela inap mekim na yumi gat sampela askim. Olsem, Baibel i tok wanem long ol manmeri em God i raitim nem bilong ol long buk bilong laip na ol manmeri em God i no raitim nem bilong ol long dispela buk? Ol man em nem bilong ol i stap long dispela buk, wanem taim bai ol i kisim laip oltaim? Olsem wanem long ol manmeri em ol i no bin i gat rot long kisim save long Jehova paslain long ol i dai? I gat wanpela taim we God bai raitim nem bilong ol long dispela buk? Bai yumi kisim bekim bilong ol dispela askim long dispela atikol na long atikol i kamap bihain.
NEM BILONG HUSAT I STAP LONG BUK?
5-6. (a) Olsem Filipai 4:3 i kamapim, nem bilong husat i stap long buk bilong laip? (b) Long wanem taim nem bilong ol bai stap oltaim long dispela buk bilong laip?
5 God i raitim nem bilong husat long dispela buk? Bilong bekim dispela askim, yumi bai stori long 5-pela grup bilong ol manmeri. Long ol dispela grup, sampela em nem bilong ol i stap long buk bilong laip, tasol sampela nogat.
6 Namba 1 grup em ol manmeri God i bin makim ol bilong mekim wok king wantaim Jisas long heven. Yu ting nem bilong ol i stap nau long dispela buk bilong laip? Yes. Long tok em aposel Pol i mekim long ol “wanwok” bilong em long Filipai, em i tok nem bilong ol man God i bin makim em ol bai mekim wok king wantaim Jisas long heven, i stap long dispela buk bilong laip. (Ritim Filipai 4:3.) Tasol bilong nem bilong ol i ken stap yet long dispela buk, ol i mas stap gut long God. Taim God i putim pinis laspela mak long ol, maski em paslain long ol i dai o paslain long traipela hevi tru i kirap, long dispela taim bai nem bilong ol i stap oltaim long dispela buk.—Rev. 7:3.
7. Olsem Revelesen 7:16, 17 i kamapim, wanem taim bai God i raitim nem bilong bikpela lain manmeri bilong ol arapela sipsip long buk bilong laip bilong i stap oltaim oltaim?
7 Namba 2 grup em bikpela lain manmeri bilong ol arapela sipsip. Olsem wanem? Nem bilong ol i stap nau long buk bilong laip? Yes. Nem bilong ol bai stap yet long buk bilong laip bihain long ol i abrusim Armagedon? Yes. (Rev. 7:14) Jisas i tok ol dispela manmeri i olsem sipsip ol “bai kisim laip inap oltaim oltaim.” (Mat. 25:46) Tasol taim ol i abrusim bagarap long Armagedon, ol bai i no inap kisim laip oltaim wantu tasol, nogat. Nem bilong ol bai stap yet long buk bilong laip, tasol bai i olsem God i raitim nem bilong ol long pensil. Long Wan Tausen Yia Bilong Krais i Stap King, em “bai lukautim ol olsem wasman i save lukautim sipsip, na stiaim ol i go long ol hulwara i gat wara bilong laip.” So ol dispela manmeri em ol i bihainim tok na larim Krais i stiaim ol, na God i skelim ol long kot na em i lukim olsem ol i stap gut long em, Jehova bai raitim nem bilong ol long buk bilong laip bilong i stap oltaim oltaim.—Ritim Revelesen 7:16, 17.
8. (a) Nem bilong husat i no stap long buk bilong laip? (b) Wanem samting bai painim ol?
8 Namba 3 grup em ol meme em ol bai kisim bagarap long Armagedon. Nem bilong ol i no stap long buk bilong laip. Jisas i tok ol “bai i dai na stap olsem inap oltaim oltaim.” (Mat. 25:46) God i kirapim aposel Pol long tokim yumi olsem “ol dispela lain bai kisim pe nogut long kot na bagarap inap oltaim.” (2 Tes. 1:9; 2 Pita 2:9) Wankain samting bai painim olgeta manmeri—em ol i stap laip long bipo na i kam inap long nau—em long laik bilong ol yet ol i bin mekim sin long holi spirit. Ol tu bai kisim bagarap inap oltaim oltaim, na ol i no inap kisim laip oltaim. I klia tru olsem God bai i no inap kirapim bek ol. (Mat. 12:32; Mak 3:28, 29; Hib. 6:4-6) Nau yumi ken skelim tupela grup bilong ol manmeri em ol bai kirap bek na kisim laip long graun.
OL MAN EM OL BAI KIRAP BEK
9. (a) Olsem Aposel 24:15 i kamapim, wanem 2-pela grup bilong ol manmeri bai kirap bek long graun? (b) Wanem samting i no wankain long dispela 2-pela grup?
9 Baibel i stori long 2-pela grup bilong ol manmeri em ol bai kirap bek na i gat rot bilong kisim laip oltaim long graun, em “ol stretpela man” na “ol man nogut.” (Ritim Aposel 24:15.) “Ol stretpela man” em ol man i bin stap gut long Jehova na mekim wok bilong em taim ol i bin stap laip. Tasol “ol man nogut” em ol man i no bin stap gut long Jehova na mekim wok bilong em. Ol pasin ol i bin mekim i no stret long ai bilong God. God bai kirapim bek dispela tupela grup wantaim, so yu ting dispela i makim olsem nem bilong ol i stap long buk bilong laip? Bilong bekim dispela askim, yumi ken skelim wan wan bilong dispela tupela grup.
10. (a) Wai na God bai kirapim bek “ol stretpela man”? (b) Sampela bilong ol dispela man i kirap bek bai kisim wanem gutpela blesing? (Lukim tu “Askim Bilong Ol Rida” long dispela nius i stori long kirap bek long graun.)
10 Namba 4 grup em “ol stretpela man.” Paslain long ol i dai, God i bin raitim nem bilong ol long buk bilong laip. Yu ting God i rausim nem bilong ol long buk bilong laip taim ol i dai? Nogat, bikos i olsem ol i “stap laip” yet long memori bilong Jehova. Jehova “em i no God bilong ol man i dai pinis, nogat, em i God bilong ol man i stap laip, long wanem, long tingting bilong em olgeta i stap laip.” (Luk 20:38) Dispela i makim olsem taim ol stretpela man i kirap bek na kisim laip long graun, nem bilong ol bai i stap yet long buk bilong laip, tasol i olsem God i bin raitim long pensil. (Luk 14:14) I klia tru olsem sampela bilong ol dispela man i kirap bek, ol bai kisim gutpela blesing tru long mekim wok olsem “ol prins long olgeta hap bilong graun.”—Sng. 45:16.
11. “Ol man nogut” i mas kisim skul long wanem samting bambai nem bilong ol i ken stap long buk bilong laip?
11 Namba 5 grup em “ol man nogut.” Ol i no save long ol lo bilong Jehova na ol i no bin bihainim stretpela pasin paslain long ol i dai. Olsem na God i no raitim nem bilong ol long buk bilong laip. Tasol taim God i kirapim ol bek, em i givim rot long ol na bai nem bilong ol i ken stap long buk bilong laip. Dispela “ol man nogut” i mas kisim planti helpim. Long laip bilong ol long bipo, sampela bilong ol i bin mekim ol stingpela pasin nogut tru. Em as na ol i mas kisim skul long hau ol i ken bihainim ol stretpela lo bilong Jehova. Bilong mekim olsem, Kingdom Bilong God bai stiaim ol samting na bai i gat bikpela wok tru i kamap bilong skulim ol manmeri long dispela taim.
12. (a) Husat bai skulim ol dispela man nogut? (b) Wanem samting bai painim ol manmeri i no redi long bihainim ol save ol i kisim?
12 Husat bai skulim ol dispela man nogut? Em bikpela lain manmeri na ol stretpela man i kirap bek. Bilong God i ken raitim nem bilong ol dispela man nogut long buk bilong laip, ol i mas wok long kisim pasin bilong pas gut wantaim Jehova na dediketim laip bilong ol long em. Jisas Krais wantaim ol man God i bin makim, ol bai stap long heven na ol bai lukluk na skelim ol dispela man nogut na ol senis ol i wok long mekim. (Rev. 20:4) Wanem ol manmeri i no redi long bihainim ol save ol i kisim, ol bai rausim ol, maski ol i winim pinis 100 krismas. (Ais. 65:20) Jehova na Jisas i save skelim bel bilong ol manmeri, olsem na ol bai no inap larim ol man nogut i stap na kamapim bagarap long dispela nupela taim.—Ais. 11:9; 60:18; 65:25; Jon 2:25.
KIRAP BEK BILONG KISIM LAIP NA BILONG KISIM KOT
13-14. (a) Long bipo, yumi bin holim wanem tingting long tok bilong Jisas long Jon 5:29? (b) Tasol yumi mas tingim wanem samting long ol dispela tok?
13 Jisas i stori tu long ol manmeri em ol bai kirap bek na kisim laip long graun. Olsem, em i tok: “Taim i laik kamap na olgeta man i stap long matmat ol bai harim nek bilong Pikinini na kam ausait. Ol man i bin mekim ol gutpela pasin, kirap bek bilong ol em bilong kisim laip, na ol man i bin mekim ol stingpela pasin, kirap bek bilong ol em bilong kisim kot.” (Jon 5:28, 29) Wanem mining bilong tok bilong Jisas?
14 Long bipo, yumi bin holim tingting olsem dispela tok bilong Jisas i makim pasin em ol dispela manmeri bai mekim bihain long ol i kirap bek, olsem, sampela bai kirap bek na mekim ol gutpela pasin na sampela bai kirap bek na mekim ol pasin nogut. Tasol tingim, Jisas i no tok olsem ol manmeri i kirap bek long matmat, ol bai mekim ol gutpela pasin o ol bai mekim ol stingpela pasin, nogat. Em i yusim dispela tok “bin” bilong makim samting i bin kamap bipo. Em i tok long ol man “i bin mekim ol gutpela pasin,” na ol man “i bin mekim ol stingpela pasin.” Ol dispela tok bilong em i kamapim klia olsem ol dispela pasin em ol man i bin mekim paslain long ol i dai. Dispela tok em i stret, a? Long wanem, long nupela taim God i no inap larim wanpela man nogut i stap na mekim ol stingpela pasin. So ol dispela man nogut i bin mekim ol dispela stingpela pasin paslain long ol i bin dai. Sapos olsem, orait wanem mining bilong dispela tok bilong Jisas olsem “kirap bek bilong ol em bilong kisim laip,” na “kirap bek bilong ol em bilong kisim kot”?
15. Husat lain em “kirap bek bilong ol em bilong kisim laip,” na bilong wanem?
15 Ol stretpela man em ol i bin mekim ol gutpela pasin paslain long ol i dai, “kirap bek bilong ol em bilong kisim laip,” long wanem, God i raitim nem bilong ol pinis long buk bilong laip. Dispela i makim olsem, “ol man i bin mekim ol gutpela pasin” em Jon 5:29 i stori long ol bai kirap bek, em ol wankain lain em Aposel 24:15 i bin kolim ol olsem “ol stretpela man.” Dispela save nau yumi kisim i stret wantaim tok i stap long Rom 6:7, em i tok: “Man i dai pinis, em i bekim pinis pe bilong ol sin bilong em.” God i bin rausim sin bilong ol dispela stretpela man taim ol i bin dai, tasol God i tingim yet ol gutpela pasin ol i bin mekim taim ol i stap laip. (Hib. 6:10) Tru tumas, ol dispela stretpela man em ol i kirap bek, ol i mas stap gut yet long God bambai nem bilong ol i ken stap oltaim long buk bilong laip.
16. Wanem mining bilong dispela tok “kirap bek bilong ol em bilong kisim kot”?
16 Olsem wanem long ol man em ol i bin mekim ol stingpela pasin paslain long ol i dai? Maski God i bin rausim ol rong bilong ol long taim ol i dai, ol i no bin stap gut long God na mekim wok bilong em taim ol i bin stap laip. Em as na nem bilong ol i no bin stap long buk bilong laip. Olsem na kirap bek bilong “ol [dispela] man i bin mekim ol stingpela pasin,” em ol wankain lain em Aposel 24:15 i kolim ol olsem “ol man nogut” em ol i kirap bek. “Kirap bek bilong ol em bilong kisim kot.” * Jisas bai skelim pasin bilong ol dispela man nogut em ol i kirap bek. (Luk 22:30) Sampela haptaim i mas lus bambai ol pasin ol i mekim i kamapim klia olsem i stret nem bilong ol i stap long buk bilong laip o nogat. Sapos ol dispela man nogut i lusim ol pasin nogut ol i bin mekim bipo na ol i dediketim laip bilong ol long Jehova, orait nem bilong ol bai stap long buk bilong laip.
17-18. (a) Ol manmeri em ol bai kirap bek na kisim laip long graun, ol i mas mekim wanem? (b) Dispela tok “pasin ol i bin mekim” em Revelesen 20:12, 13 i stori long en i makim wanem samting?
17 Maski ol man i bin stap olsem gutpela man o man nogut long bipo, taim ol i kirap bek ol i gat wok long bihainim ol lo i stap long nupela skrol we bai op insait long 1,000 yia. Aposel Jon i stori long samting em i lukim long visen, na em i tok: “Mi lukim ol man i dai pinis, em ol man i gat nem na ol man nating, ol i sanap long ai bilong sia king, na God i opim ol skrol. Na em i opim tu narapela skrol; em skrol bilong laip. Na man i sindaun long sia king i lukim rait i stap long ol dispela skrol na em i skelim ol man i dai pinis long pasin ol i bin mekim.”—Rev. 20:12, 13.
18 Ol man i kirap bek, God bai skelim ol long ol “pasin ol i bin mekim” long wanem haptaim? Yu ting em ol pasin ol i bin mekim paslain long ol i dai? Nogat! Tingim, taim ol i dai ol i bekim pinis pe bilong sin ol i bin mekim. Olsem na dispela tok “pasin ol i bin mekim” i no makim pasin ol i bin mekim paslain long ol i dai, nogat. Em i makim pasin ol bai mekim long taim ol i kisim trening long nupela taim. Tingim ol bilipman olsem Noa, Samuel, Devit, na Daniel, ol tu i mas kisim save long Jisas Krais na bilip long ofa bilong em. Sapos ol dispela man i ken kisim kain save olsem, orait ol man nogut i mas kisim planti save moa!
19. Wanem samting bai painim ol man em ol i sakim gutpela rot God i givim long ol?
19 Wanem samting bai painim ol manmeri em ol i sakim dispela gutpela rot em God i givim long ol? Revelesen 20:15 i tokim yumi olsem: “Ol man em nem bilong ol i no stap long buk bilong laip, em i tromoi ol i go insait long dispela raunwara i gat bikpela paia.” Yes, God bai bagarapim ol na pinisim ol olgeta. Olsem na em i bikpela samting long nem bilong yumi i mas stap long buk bilong laip na em i mas stap oltaim long dispela buk!
Wanpela brata i insait long bikpela wok tru bilong skulim ol manmeri we bai kamap insait long Wan Tausen Yia (Lukim paragraf 20)
20. Wanem gutpela wok bai kamap long Wan Tausen Yia Bilong Krais i Stap King? (Lukim fran pes piksa.)
20 Wan Tausen Yia Bilong Krais i Stap King em bai wanpela gutpela taim tru! Em wanpela taim we ol manmeri bilong God bai mekim bikpela wok tru bilong skulim ol narapela manmeri hia long graun. Tasol em taim bilong God tu long skelim pasin bilong ol stretpela man na ol man nogut wantaim. (Ais. 26:9; Apo. 17:31) Olsem wanem yumi bai mekim dispela bikpela wok bilong skulim ol manmeri? Atikol i kamap bihain bai helpim yumi long kliagut na pilim tru dispela gutpela wok.
SINGSING 147 [12] Tok Promis Bilong Laip Oltaim
^ Dispela atikol bai stori long nupela save yumi kisim long tok bilong Jisas i stap long Jon 5:28, 29, we em i stori long “kirap bek bilong ol man, em bilong kisim laip” na “kirap bek bilong ol man, em bilong kisim kot.” Yumi bai kisim save long dispela tupela kirap bek na husat lain i insait long en.
^ God i bin raitim dispela buk “kirap long taim ol manmeri i bon long graun,” em ol manmeri we God i bin givim rot long ol long kisim helpim long ofa bilong Jisas Krais. (Mat. 25:34; Rev. 17:8) Olsem na nem bilong stretpela man Abel em fes nem long stap long dispela buk bilong laip.
^ Pastaim mipela i bin stori olsem dispela tok “kot” long hia i makim hatpela kot o kot bilong givim panismen long man. Em tru olsem dispela tok “kot” inap i gat kain mining olsem. Tasol long dispela ves, Jisas i kolim dispela tok “kot” bilong makim wok bilong skelim gut na lukim man i winim mak o nogat, olsem wanpela Baibel dikseneri bilong Grik i tok, “em wok bilong skelim gut pasin bilong wanpela man.”
