1. Wai na yumi no kirap nogut olsem planti man long nau i hatwok long trastim ol narapela?

 OL MANMERI long graun bilong Satan i no save long ol i ken trastim husat. Oltaim ol i bel hevi long pasin bilong ol bisnis lain, ol lain politik, na ol lida bilong lotu. Planti i pilim hatwok tu long trastim ol pren, ol neiba, na ol wanfamili. Tasol yumi no kirap nogut long dispela samting. Baibel i tok profet olsem: “Long taim bilong las de . . . , ol man bai . . . i no stap gut long narapela, . . . ol bai bagarapim gutnem bilong ol arapela, . . . ol bai birua long ol pren bilong ol.” Dispela i makim olsem ol manmeri bai bihainim ol pasin bilong god bilong dispela graun, em Satan, em man yumi no inap trastim.​—2 Tim. 3:1-4; 2 Kor. 4:4.

2. (a) Yumi ken trastim tru husat? (b) Sampela inap tingting planti long wanem samting?

² Yumi ol Kristen i save olsem yumi ken trastim tru Jehova. (Jer. 17:7, 8) Yumi save tru olsem em i laikim yumi na em bai “no inap givim baksait” long ol pren bilong em. (Sng. 9:10) Yumi ken trastim tu Krais Jisas bikos em i bin givim laip bilong em long helpim yumi. (1 Pita 3:18) Na yumi ken trastim ol tok bilong Baibel bikos ol dispela tok i stiaim yumi long wokim ol gutpela disisen long laip bilong yumi. (2 Tim. 3:16, 17) Yumi save olsem yumi ken trastim Jehova, Jisas, na ol tok bilong Baibel. Tasol sampela inap tingting planti olsem ol i ken trastim ol bratasista long kongrigesen o nogat. Sapos yu pilim olsem, orait bilong wanem yumi ken trastim ol?

3. Yumi kisim wanem gutpela blesing tru? (Mak 10:29, 30)

³ Jehova i makim yumi long stap insait long bikpela lain famili bilong ol manmeri i lotuim em long olgeta hap bilong graun. Tingim, dispela em gutpela blesing tru yumi kisim na planti gutpela samting i kamap long dispela! (Ritim Mak 10:29, 30.) Long graun olgeta, yumi gat ol bratasista em ol i laikim Jehova wankain olsem yumi laikim Em, na ol i wok strong long bihainim ol lo bilong em  long laip bilong ol. Tokples, kalsa, na pasin bilong yumi long bilas i no wankain, tasol yumi laikim ol maski yumi bungim ol long namba 1 taim. Na yumi save amamas tru long bung wantaim ol na preisim na lotuim gutpela Papa bilong yumi long heven.​—Sng. 133:1.

4. Wai na yumi nidim ol bratasista bilong yumi?

⁴ Long nau winim olgeta narapela taim bipo, yumi mas pas gut yet wantaim ol bratasista bilong yumi. Sampela taim ol i helpim yumi long karim ol hevi bilong yumi. (Rom 15:1; Gal. 6:2) Na tu, ol i kirapim yumi long mekim yet wok bilong Jehova na stap strong long bilip. (1 Tes. 5:11; Hib. 10:23-25) Tingim, yumi bai pilim olsem wanem sapos yumi no gat ol bratasista i stap bilong helpim yumi long sanap strong na sakim ol birua bilong yumi, em Satan dispela Devil na ol manmeri nogut bilong dispela graun? Klostu nau Satan na ol lain em i bosim bai birua na pait long ol wokman bilong God. Tingim, yumi bai tenkyu tru olsem yumi gat ol bratasista i stap bilong sambai long yumi!

5. Wai na sampela inap pilim hatwok long trastim ol bratasista bilong ol?

⁵ Tasol sampela i pilim hatwok long trastim ol bratasista bilong ol. Wanpela Kristen inap pilim olsem bikos em i bin tokim wanpela wanbilip long pesenel samting long laip bilong em na dispela wanbilip i go tokim ol narapela long dispela samting, o ating dispela wanbilip i brukim promis em tupela i bin mekim namel long ol. O ating wanpela insait long kongrigesen i mekim wanpela tok o pasin i mekim em i bel hevi tru. Ol kain hevi olsem inap mekim na ol Kristen i pilim hatwok long trastim ol wanbilip. Orait wanem samting inap helpim yumi long trastim ol wanbilip bilong yumi?

6. Taim yumi laikim ol brata bilong yumi, hau dispela bai kirapim yumi long trastim ol? (1 Korin 13:4-8)

⁶ Pasin laikim i kirapim yumi long trastim ol narapela. Wan Korin sapta 13 i stori long ol pasin i kirapim yumi long laikim ol narapela na dispela  i ken helpim yumi long trastim ol o lain gen long trastim ol. (Ritim 1 Korin 13:4-8.) Olsem, ves 4 i tok “man i gat pasin laikim em i no save les kwik, na em i save mekim gutpela pasin.” Jehova i no save les kwik long yumi maski yumi mekim sin long ai bilong em. Olsem na yumi tu i no ken les kwik long ol brata bilong yumi sapos ol i mekim tok o pasin i sikirapim bel bilong yumi o i mekim yumi bel hevi. Ves 5 i tok: “[Man i gat pasin laikim] em i no save belhat kwik. Em i no save tingim rong ol arapela i mekim long em.” Yumi no laik “tingim rong ol arapela i mekim” long yumi, nogat. Eklisiastis 7:9 i tok: “No ken kirap kwik long bel hevi long samting narapela i mekim long yu.” Tru tumas, mobeta yumi bihainim tok i stap long Efesus 4:26, em i tok: “No ken larim san i go daun na yupela i belhat yet”!

7. Olsem wanem ol stiatok i stap long Matyu 7:1-5 i ken helpim yumi long trastim ol narapela?

⁷ Narapela samting yumi ken mekim bilong trastim ol bratasista em long holim wankain tingting olsem Jehova i gat long ol. God i laikim ol na em i no save tingim ol rong ol i mekim. Olsem na yumi tu i no ken tingim ol rong ol i bin mekim. (Sng. 130:3) Yumi no ken tingim ol popaia bilong ol, yumi mas wok strong long tingim ol gutpela pasin bilong ol na ol gutpela wok ol inap mekim. (Ritim Matyu 7:1-5.) Yumi bilip olsem ol i laik mekim gutpela pasin na ol i no laik mekim yumi bel hevi, long wanem, man i gat pasin laikim “i save bilip long olgeta samting.” (1 Kor. 13:7) Tasol tok bilong dispela ves i no makim olsem Jehova i laik bai yumi trastim nating ol narapela, nogat. Em i laik bai yumi trastim ol, long wanem, pasin bilong ol i soim olsem yumi ken trastim ol. *

8. Hau yu ken kisim pasin bilong trastim ol brata bilong yu?

⁸ Pasin bilong man i mas kamapim klia olsem ol narapela i ken trastim em, na sampela haptaim i mas lus bilong mekim olsem. Hau yu ken kisim pasin bilong trastim ol brata bilong yu? Save gut long ol. Toktok wantaim ol long taim bilong ol miting bilong kongrigesen. Stretim rot long autim tok wantaim ol. No ken les kwik long ol, larim rot i op long ol i ken soim yu olsem yu inap trastim ol. Ating pastaim, yu no inap tokim wanpela em nau tasol yu save long em long olgeta tingting na filings bilong yu. Tasol taim pasin pren bilong yupela i kamap strong, nau yu bai pilim isi long autim ol tingting bilong yu long em. (Luk 16:10) Yu ken mekim wanem sapos wanpela brata i tokim ol narapela long ol samting yu bin tokim em long en? No ken les kwik long em. Larim sampela haptaim i lus pastaim. Na no ken larim pasin bilong sampela long daunim pasin bilong yu long trastim ol brata bilong yu. Bilong helpim yumi long trastim ol bratasista, yumi bai stori long eksampel bilong sampela wokman na wokmeri bilong Jehova long bipo em ol i bin trastim yet ol narapela maski sampela i mekim ol i bel hevi.

9. (a) Olsem wanem Hana i trastim yet man Jehova i makim maski em i mekim ol bikpela popaia? (b) Stori bilong Hana i givim wanem skul long yu long pasin bilong trastim ol man em Jehova i bin makim ol long mekim ol wok long kongrigesen? (Lukim piksa.)

⁹ Olsem wanem? Wanpela taim yu bin bel hevi long pasin bilong wanpela brata i holim ol wok insait long kongrigesen? Sapos olsem, orait yu inap kisim skul long eksampel bilong Hana. Long taim bilong Hana, Hetpris Eli i go pas long mekim ol wok lotu bilong Jehova long kantri Israel. Tasol ol pikinini man bilong em i no stap gutpela piksa long ol narapela. Ol i mekim wok pris, tasol oltaim ol i mekim pasin pamuk na ol pasin i doti tru. Maski i olsem, Eli i no stretim ol pikinini bilong em inap long skel bilong ol rong ol i mekim. Jehova i no hariap long rausim Eli long mekim wok olsem hetpris, nogat. Tasol Hana i no givim baksait long rot God i makim bilong mekim lotu, em i wok yet long go long haus lotu sel we Eli i  mekim yet wok olsem hetpris. Taim Eli i lukim Hana i bel hevi nogut tru na em i beten i stap, em i kisim tingting kranki olsem Hana i spak. Eli i no painimaut gut long ol samting i kamap long dispela meri i bel hevi tru na Eli i sutim tok long em. (1 Sml. 1:12-16) Maski i olsem, Hana i tok promis olsem sapos em i karim wanpela pikinini man, em bai bringim dispela pikinini i go long haus lotu sel na bai pikinini i mekim wok aninit long lukaut bilong Eli. (1 Sml. 1:11) Yu ting i stret ol pikinini man bilong Eli i kisim panismen long ol pasin nogut ol i mekim? Yes, na Jehova i bin givim panismen long ol long taim stret em i makim. (1 Sml. 4:17) Long dispela taim, God i blesim Hana na em i karim wanpela pikinini man, em Samuel.​—1 Sml. 1:17-20.

10. Olsem wanem King Devit i trastim yet ol narapela maski sampela man i birua long em?

¹⁰ Olsem wanem? I bin gat taim we wanpela pren i birua long yu? Sapos olsem, orait tingim eksampel bilong King Devit. Em i gat wanpela pren em nem bilong em Ahitofel. Tasol Ahitofel i joinim Apsalom, em pikinini man bilong Devit, long bikhetpasin bilong em long traim long rausim wok king long han bilong papa bilong em. Dispela inap mekim Devit i bel hevi nogut tru, long wanem, pikinini man bilong em na man em i tingim olsem gutpela pren bilong em, ol i birua long em! Tasol Devit i no larim pasin birua bilong tupela i pasim em long trastim ol narapela, nogat. Em i trastim yet Husai, em narapela gutpela pren bilong em, husat i no laik sapotim dispela bikhetpasin bilong Apsalom. I gat ol gutpela risen long Devit i trastim Husai. Husai i soim olsem em i stap gutpela pren bilong Devit, na em i bin redi tu long dai bambai em i ken helpim Devit.​—2 Sml. 17:1-16.

11. Wanpela wokman bilong Nabal i mekim wanem bilong soim olsem em i trastim Abigel?

¹¹ Tingim tu eksampel bilong wanpela wokman bilong Nabal. Devit na ol man bilong em i bin mekim gutpela pasin na ol i lukautim ol wokman bilong wanpela man Israel, nem bilong em Nabal. Sampela taim bihain, Devit i askim maniman Nabal long givim sampela kaikai long ol man i go wantaim em. Tasol Nabal i no laik helpim em maski em i askim long liklik kaikai tasol, olsem na Devit i belhat nogut tru na em i laik kilim i dai olgeta man long haus bilong Nabal. Wanpela wokman bilong Nabal i go lukim Abigel, em meri bilong Nabal, na em i tokim em long dispela samting. Dispela wokman inap ranawe, tasol em i no mekim olsem. Em i trastim Abigel olsem em inap long stretim dispela hevi. Em i save olsem Abigel  em meri bilong skelim gut ol samting. Pasin bilong em long trastim Abigel i kamapim gutpela samting. Abigel i strongim bel na em i toktok wantaim Devit na pasim em long mekim samting em i tingting long mekim. (1 Sml. 25:2-35) Na Abigel i trastim Devit olsem em bai mekim samting i stret.

12. Olsem wanem Jisas i soim olsem em i trastim ol disaipel bilong em, maski ol i bin mekim ol popaia?

¹² Jisas i trastim ol disaipel bilong em, maski ol i bin mekim ol popaia. (Jon 15:15, 16) Taim Jems na Jon i askim Jisas long larim tupela i sindaun long rait sait na left sait bilong em long Kingdom, Jisas i no kwestenim tupela long astingting bilong ol long mekim wok bilong Jehova na em i no rausim wok aposel long tupela, nogat. (Mak 10:35-40) Bihain, taim ol birua i kam arestim Jisas long nait, olgeta disaipel bilong em i lusim em na ranawe. (Mat. 26:56) Tasol i no gat wanpela taim Jisas i lusim pasin bilong trastim ol. Em i save long ol pasin kranki bilong ol, tasol “em i laikim ol i go inap long laip bilong em i pinis.” (Jon 13:1) Taim Jisas i kirap bek, em i givim bikpela wok long 11-pela gutpela aposel bilong em long go pas long mekim wok bilong kamapim ol disaipel na long lukautim ol sipsip bilong em i dia tumas long em. (Mat. 28:19, 20; Jon 21:15-17) I gat ol gutpela risen long em i trastim ol dispela man i no gutpela olgeta. Olgeta aposel i stap gut long mekim wok bilong God i go inap long taim ol i dai na i go long heven. Tru tumas, Hana, Devit, wokman bilong Nabal, Abigel, na Jisas i stap gutpela eksampel tru long pasin bilong trastim ol man i no gutpela olgeta.

13. Wanem samting inap kamap na dispela i mekim yumi pilim hatwok long trastim ol narapela?

¹³ Olsem wanem? Yu bin trastim wanpela brata na yu stori long em long sampela pesenel samting long laip bilong yu, na bihain yu painimaut olsem em i tokim ol narapela long dispela samting? Ating yu bin bel hevi tru. Wanpela taim, wanpela sista i toktok wantaim wanpela elda long pesenel samting long laip bilong em. Long de bihain, meri bilong dispela elda i ringim dispela sista bilong strongim em. I luk olsem dispela elda i bin stori long meri bilong em long dispela samting. Dispela sista i pilim hatwok tru long trastim dispela elda. Tasol em i mekim samting i stret, em i kisim helpim long ol narapela. Em i toktok wantaim narapela elda long dispela samting, na dispela elda i helpim em long lain gen long trastim ol elda.

14. Wanem samting i helpim wanpela brata long lain gen long trastim ol narapela?

¹⁴ Inap longpela taim wanpela brata i bel hevi long tupela elda na em i pilim hatwok long trastim tupela. Tasol dispela brata i tingim wanpela tok em wanpela brata em i rispektim tru i bin mekim. Dispela sotpela tok i kirapim tru tingting bilong em, olsem: “Satan em i birua bilong yumi, na i no ol brata bilong yumi.” Dispela brata i tingim tingim dispela tok na em i beten long dispela samting, na bihain em i kamap wanbel gen wantaim dispela tupela elda.

15. Wai na longpela haptaim i mas lus na bai yumi ken lain gen long trastim ol narapela? Stori long wanpela eksampel.

¹⁵ Olsem wanem? Yu bin lusim wanpela wok long kongrigesen? Em samting bilong bel hevi tru long en. Greta na mama bilong em, em tupela Witnes i bin stap gut long bilip long Natsi Jemani long yia 1930 samting taim gavman i bin tambuim wok lotu bilong yumi. Greta i amamas long gutpela wok em i mekim long taipim ol kopi bilong Wastaua na bai ol wanbilip i ken ritim ol. Tasol taim ol brata i painimaut olsem papa bilong Greta i birua long tok i tru, ol i rausim dispela wok long Greta bikos ol i pret olsem nogut papa bilong em i tokim ol birua long infomesen bilong kongrigesen. Greta i bungim narapela hevi tu. Namel long haptaim bilong Wol Woa 2, ol brata i no givim ol kopi bilong ol magasin long Greta na mama bilong em na ol i no save toktok long tupela taim ol i bungim ol long rot. Greta i bin bel hevi tru! Bel bilong Greta i bagarap olgeta, olsem  na inap longpela haptaim i lus paslain long em i fogivim ol dispela brata na trastim ol gen. Tasol bihain, em i luksave olsem Jehova i fogivim ol, olsem na em i mas fogivim ol tu. *

16. Bilong wanem yumi mas wok strong long trastim ol bratasista bilong yumi?

¹⁶ Sapos yu bin bungim ol kain hevi olsem we i bagarapim tru bel bilong yu, orait wok strong long lain gen long trastim ol narapela. Em tru olsem sampela haptaim i mas lus long yu ken trastim gen ol narapela, tasol gutpela samting bai kamap long dispela. Tingim dispela tok piksa, sapos yu bin kisim wanpela kaikai i bagarap na dispela i mekim yu sik, ating bihain yu bai skelim gut ol kaikai yu kisim, a? Tasol dispela i no inap pasim yu long kaikai olgeta kain kaikai, nogat. Olsem tasol, taim wanpela hevi i kamap namel long yumi na wanpela wanbilip, yumi no ken larim dispela hevi i daunim pasin bilong yumi long trastim ol bratasista bilong yumi em ol i no gutpela olgeta. Taim yumi lain gen long trastim ol, yumi bai stap amamas moa na yumi bai tingting strong long ol samting yumi ken mekim bilong strongim pasin bilong trastim narapela narapela insait long kongrigesen.

17. (a) Wai na em i bikpela samting long yumi trastim ol brata bilong yumi? (b) Bai yumi stori long wanem samting long atikol i kamap bihain?

¹⁷ Ol man bilong dispela graun Satan i bosim, ol i no gat pasin bilong trastim narapela narapela, tasol yumi save trastim ol bratasista bilong yumi bikos pasin laikim i stap namel long yumi. Kain pasin bilong trastim narapela i mekim na yumi stap amamas na stap wanbel wantaim long nau, na dispela pasin bai lukautim yumi taim yumi bungim ol bikpela hevi long bihain. Yu ken mekim wanem sapos wanpela i mekim yu bel hevi na yu no trastim em moa? Traim long holim wankain tingting em Jehova i gat long ol samting, bihainim ol stiatok bilong Baibel, kisim pasin bilong laikim tru ol brata bilong yu, na lain long eksampel bilong ol manmeri long Baibel. Yumi ken daunim bel hevi bilong yumi na lain gen long trastim ol narapela. Taim yumi mekim olsem, yumi bai kisim planti gutpela pren em ol “i save pas gut tru wantaim [yumi], winim pasin i stap namel long tupela brata.” (Prov. 18:24) Yumi mas trastim ol bratasista bilong yumi, tasol ol i mas save tu olsem ol i ken trastim yumi. Long atikol i kamap bihain, yumi bai stori long ol samting yumi ken mekim na bai ol bratasista bilong yumi i ken trastim yumi.