Skelim olsem wanem Baibel i bekim ol dispela askim.

Aposel 24:15 i tok bai i gat “kirap bek bilong ol man i dai pinis, em ol stretpela man na ol man nogut wantaim.” Ol stretpela man em ol manmeri husat i bin bihainim tok bilong God paslain long ol i dai, olsem na nem bilong ol i stap long buk bilong laip. (Mal. 3:16) Ol man nogut em ol manmeri husat i no bin gat rot long kisim save long Jehova paslain long ol i dai, olsem na nem bilong ol i no stap long buk bilong laip.

Jon 5:28, 29 i stori long dispela 2-pela wankain grup bilong ol manmeri em Aposel 24:15 i bin stori long en. Jisas i tok: “Ol man i bin mekim ol gutpela pasin, kirap bek bilong ol em bilong kisim laip, na ol man i bin mekim ol stingpela pasin, kirap bek bilong ol em bilong kisim kot.” Ol stretpela man i bin mekim ol gutpela pasin paslain long ol i dai. Kirap bek bilong ol em bilong kisim laip bikos nem bilong ol i stap yet long buk bilong laip. Tasol ol man nogut i bin mekim ol stingpela pasin paslain long ol i dai. Olsem na kirap bek bilong ol em bilong kisim kot. Nem bilong ol i no stap yet long buk bilong laip, na insait long sampela haptaim God bai skelim gut ol pasin bilong ol—i olsem ol i stap long wanpela haptaim we kot bai skelim pasin bilong ol. Insait long dispela haptaim, rot bai op long ol i ken kisim save long Jehova na nem bilong ol i ken stap long buk bilong laip.

Revelesen 20:12, 13 i tok olsem olgeta man i kirap bek i mas bihainim “rait i stap long ol dispela skrol,” em ol nupela lo em God bai givim long yumi long nupela taim. Ol man husat i no bihainim ol dispela lo, Jehova bai bagarapim ol.​—Ais. 65:20.

Daniel 12:2 i tok profet olsem sampela manmeri em ol i dai pinis, ol bai kirap bek na “kisim laip oltaim oltaim na ol arapela bai kamap olsem samting bilong kisim sem long en na bilong heitim inap oltaim oltaim.” Dispela ves i stori long laspela kot bai painim ol man i kirap bek. Ol bai kirap bek na kisim “laip oltaim oltaim” o kirap bek na “kamap olsem samting . . . bilong heitim inap oltaim oltaim.” Olsem na long pinis bilong 1,000 yia, sampela man bai kisim laip oltaim, tasol ol narapela bai bagarap na pinis olgeta.​—Rev. 20:15; 21:3, 4.

Tingim dispela tok piksa. Dispela 2-pela grup bilong ol manmeri em ol bai kirap bek, ol i wankain olsem ol man bilong wanpela kantri em ol i laik i go stap long narapela kantri. Ol stretpela man i olsem ol man i kisim wok visa o residen visa we i opim rot long ol i ken stap longpela taim na ol i gat sampela fridom. Tasol ol man nogut i olsem ol man i kisim temporari visa o visa bilong visita we i larim ol i stap long kantri inap liklik haptaim tasol. Ol i mas soim olsem ol bai bihainim ol lo bilong dispela kantri bambai gavman i ken orait long ol i stap yet insait long kantri. Olsem tasol, ol man nogut em ol i kirap bek, ol i mas bihainim ol lo bilong Jehova na soim olsem ol i bihainim ol stretpela pasin bambai ol i ken stap yet long Paradais. Maski ol man long dispela 2-pela grup i kisim narapela narapela visa bilong i go insait long kantri, bihain ating sampela bai kamap sitisen na sampela em gavman bai rausim ol. Gavman bilong dispela kantri bai skelim pasin bilong ol na wokim disisen long larim ol i stap o long rausim ol. Dispela i wankain tu long laspela kot bai painim ol man i kirap bek. Pasin na bilip bilong ol bai makim olsem ol bai stap long nupela taim o God bai rausim ol.

Jehova em i God bilong pasin sori, na tu, em i God bilong mekim pasin i stret. (Lo 32:4; Sng. 33:5) Em bai soim pasin laikim bilong em taim em i kirapim bek ol gutpela man na ol man nogut wantaim. Tasol em bai laik olsem olgeta man em ol i kirap bek, ol i mas bihainim ol stretpela lo bilong em long wanem samting i stret na wanem samting i no stret. Ol manmeri em ol i kisim pasin bilong laikim God na ol i bihainim ol lo bilong em, Em bai orait long ol na em bai larim ol i stap yet long nupela taim.