Long 1 Korin 15:8, aposel Pol i tok: “Las tru em i kamap long mi. Mi olsem pikinini em mama i karim paslain long taim stret bilong en.” Pastaim yumi bin stori olsem Pol i tok long samting i bin painim em taim em i lukim visen long Jisas long glori long heven. I olsem Jisas i opim rot long Pol i bon, o kirap bek na kisim laip olsem spirit paslain long taim stret bilong en, inap planti handret yia paslain long dispela kain kirap bek bai kamap. Tasol mipela i stadi gut long dispela ves na mipela i luksave olsem i mas i gat senis long save yumi holim long dispela ves.

Em tru Pol i stori long samting i bin kamap long taim em i kamap Kristen. Tasol em i minim wanem taim em i tok “mi olsem pikinini em mama i karim paslain long taim stret bilong en”? Dispela tok inap makim narapela narapela samting.

Senis i kamap wantu tasol na i givim hevi long em. Yumi save kirap nogut taim mama i karim pikinini paslain long taim stret bilong en. Tingim, Sol (em bihain yumi save long em olsem Pol) i bin go long Damaskus bilong kalabusim ol Kristen long hap, em i no gat tingting liklik long lukim visen bilong Jisas husat i bin kirap bek pinis. Senis i kamap long Pol i mekim em i kirap nogut, na tu, ol Kristen long dispela taun em Pol i go bilong mekim nogut long ol, ol tu i kirap nogut long dispela. Na tu, dispela samting i kamap i givim hevi long em taim em i kamap aipas inap sotpela haptaim.​—Apo. 9:1-9, 17-19.

Senis i kamap long em long “rong taim.” Long tok Grik bilong pastaim, dispela tok “pikinini em mama i karim paslain long taim stret bilong en” em ol inap tanim tu olsem “pikinini i bon long rong taim.” Wanpela Baibel (The New Jerusalem Bible) i tanim dispela tok olsem: “I olsem mi bon long taim we i no gat man i ting mi inap bon.” Long taim Pol i kamap Kristen, Jisas i bin go bek pinis long heven. Ol narapela man em Pol i stori long ol long ol ves paslain, ol i bin lukim Jisas i go bek long heven, tasol Pol i no bin lukim dispela samting. (1 Kor. 15:4-8) Jisas i kamap long Pol long taim em i no ting long en na em i givim rot long Pol i ken lukim em, maski i luk olsem em long “rong taim.”

Em i toktok long em yet long pasin daun. Sampela saveman i tok olsem dispela tok Pol i mekim long hia i makim olsem em i no amamas. Sapos tok bilong Pol i minim olsem, orait em i tokaut olsem em i no gutpela inap long kamap wanpela aposel. Em i bin tok olsem: “Ol arapela aposel i winim mi. Mi no gutpela man inap long ol i kolim mi wanpela aposel, long wanem, mi bin mekim nogut long kongrigesen bilong God. Tasol long rot bilong bikpela pasin helpim bilong God mi kisim dispela wok.”​—1 Kor. 15:9, 10.

So i luk olsem tok Pol i mekim long hia inap makim hau Jisas i bin kamap long em wantu tasol taim em i no redi, na em i kamap Kristen hariap tru, o em i pilim olsem em i no gutpela man inap long lukim Jisas long dispela narakain visen olsem. Maski wanem samting i kamap, dispela samting i bin kamap long Pol em i bikpela samting tru long em. Dispela i kamapim klia tru long em olsem Jisas i bin kirap bek pinis long dai. Em as na em i save stori long dispela narakain samting i painim em taim em i autim tok long ol narapela long kirap bek bilong Jisas.​—Apo. 22:6-11; 26:13-18.