1. Paslain long aposel Pita i dai, Jehova i kirapim em long mekim wanem?

 APOSEL PITA i save olsem klostu nau em bai dai. Insait long planti yia em i bin mekim wok bilong God, em i wok wantaim Jisas, em i opim rot bilong autim tok long ol man bilong kain kain ples na sindaun, na em i mekim wok olsem wanpela memba bilong gavening bodi. Tasol wok bilong Pita i no pinis yet. Long yia 62 i go 64 C.E. samting, Jehova i kirapim em long raitim tupela pas, em Baibel buk bilong 1 na 2 Pita. Pita i laik bai ol tok bilong ol dispela pas i helpim ol Kristen bihain long em i dai.—2 Pita 1:​12-15.

2. Wai na ol pas Pita i raitim i helpim gut ol kongrigesen?

² Pita i raitim ol pas bilong em long haptaim we ol wanbilip bilong em i “karim kain kain hevi i mekim [ol] i bel hevi.” (1 Pita 1:6) Ol man nogut i traim long skulim ol Kristen insait long kongrigesen long ol bilip giaman na kirapim ol long mekim ol pasin doti. (2 Pita 2:​1, 2, 14) Na tu, klostu nau ol Kristen i stap long Jerusalem bai lukim “pinis bilong olgeta samting”—em taim lain ami bilong Rom i kam bagarapim Jerusalem na pinisim pasin na ol lo em ol Juda i stap aninit long en. (1 Pita 4:7) Tru tumas, ol pas Pita i raitim i helpim ol Kristen long save long ol samting ol i mas mekim bilong sanap strong na karim ol hevi na redi long karim ol hevi bai kamap bihain. b

3. Wai na yumi mas skelim ol pas bilong Pita?

³ Pita i raitim ol pas bilong em i go long ol Kristen i stap long taim bilong ol aposel, tasol Jehova i larim ol tok bilong ol i stap long Baibel. Olsem na yumi tu i ken kisim helpim long ol tok  bilong ol dispela pas. (Rom 15:4) Olsem ol Kristen long bipo, yumi stap long haptaim we ol manmeri i amamas long mekim ol pasin doti, na dispela inap mekim na i hatwok long yumi mekim wok bilong Jehova. Na tu, klostu nau yumi bai bungim taim bilong traipela hevi tru i winim bikpela hevi i bin kamap long bipo we i pinisim ol lo na pasin bilong ol Juda. Long tupela pas bilong Pita, yumi kisim save long sampela bikpela tok bilong helpim yumi. Ol dispela tok bai helpim yumi long wet i stap long de bilong Jehova, daunim pasin bilong pret long man, na kisim pasin bilong laikim tru narapela narapela. Na tu, ol dispela tok inap helpim ol elda long luksave long ol samting ol i mas mekim bilong lukautim gut ol sipsip long ol samting ol i nidim.

4. Olsem 2 Pita 3:​3, 4 i kamapim, wanem samting inap traim bilip bilong yumi?

⁴ Yumi stap namel long ol manmeri em ol i no bilip long ol tok profet bilong Baibel. Ol birua inap tok bilas long yumi bikos yumi wet i stap inap planti yia bilong lukim pinis bilong dispela haptaim nogut i kamap. Sampela man i tok dispela de i no inap kamap. (Ritim 2 Pita 3:​3, 4.) Sapos yumi harim ol kain tok olsem long wanpela em yumi autim tok long em o long wanpela wanwok o wanblut, dispela inap traim bilip bilong yumi. Pita i stori long samting we inap helpim yumi.

5. Wanem samting bai helpim yumi long holim stretpela tingting long pinis bilong dispela haptaim nogut? (2 Pita 3:​8, 9)

⁵ Sampela inap pilim olsem Jehova i isi isi tumas long pinisim dispela haptaim nogut bilong nau. Ol tok bilong Pita i ken helpim yumi long holim yet stretpela tingting, ol i kirapim yumi long tingim olsem tingting Jehova i gat long taim i no wankain long tingting yumi ol man i gat long taim. (Ritim 2 Pita 3:​8, 9.) Long Jehova, wan tausen yia i olsem wanpela de. Jehova i wet na em i no les kwik bikos em i no laik bai wanpela i kisim bagarap. Tasol taim de bilong em i kamap, yumi bai lukim pinis bilong dispela haptaim nogut. Yumi amamas tru long yusim haptaim i stap yet long nau bilong autim tok long ol manmeri long graun olgeta.

6. Long wanem rot yumi ken “tingim na wetim” de bilong Jehova? (2 Pita 3:​11, 12)

⁶ Pita i kirapim yumi long “tingim na wetim de bilong Jehova.” (Ritim 2 Pita 3:​11, 12.) Hau yumi ken mekim olsem? Sapos inap, long olgeta wan wan de i gutpela yumi tingim tingim long bel ol blesing yumi bai kisim long nupela taim. Piksaim long tingting olsem yu pulim klinpela win, yu kisim gutpela kaikai, yu welkamim ol pren na famili bilong yu i kirap bek, na yu skulim ol manmeri em ol i bin stap planti handret yia i go pinis long truim bilong ol tok profet bilong Baibel. Taim yu tingim tingim long bel ol kain samting olsem, dispela bai helpim yu long wet i stap na em bai strongim bilip bilong yu olsem klostu nau pinis bilong dispela haptaim nogut bai kamap. “[Yumi] save pinis long ol dispela samting” bai kamap bihain, olsem na yumi bai i no larim ol tisa giaman “i pulim [yumi].”—2 Pita 3:17.

7. Pasin bilong pret long man inap mekim wanem long yumi?

⁷ Yumi wok long wet i stap long de bilong Jehova bai i kamap, na dispela i kirapim yumi long autim gutnius long ol narapela. Tasol sampela taim yumi inap pret long autim tok. Bilong wanem? Ating yumi larim pasin bilong pret i pasim yumi long mekim olsem. Dispela samting i bin kamap long Pita. Long nait ol i bin kotim Jisas, Pita i no tokaut olsem em i wanpela disaipel bilong Jisas na inap 3-pela taim em i tok em i no save long Jisas. (Mat. 26:​69-75) Tasol bihain Pita i daunim pasin bilong pret na em i tok: “Samting ol arapela man i pret long en, yupela i  no ken pret long en, na yupela i no ken tingting planti.” (1 Pita 3:14) Tok bilong Pita i helpim yumi long save tru olsem yumi inap daunim pasin bilong pret long man.

8. Wanem samting i ken helpim yumi long daunim pasin bilong pret long man? (1 Pita 3:15)

⁸ Wanem samting i ken helpim yumi long daunim pasin bilong pret long man? Pita i tokim yumi olsem: “Long bel bilong yupela, yupela i mas tokaut olsem Krais em i Bikpela na em i holi.” (Ritim 1 Pita 3:15.) Dispela i makim tu pasin bilong tingim tingim long bel namba na strong bilong Bikpela na King bilong yumi, em Jisas Krais. Sapos yu tingting planti o yu pret long autim gutnius long ol narapela taim rot i op long mekim olsem, orait tingim King bilong yumi Jisas. Piksaim long tingting olsem em i mekim wok king long heven na planti milion ensel i stap raunim em. Tingim olsem em i gat “namba long bosim olgeta samting long heven na long graun” na em bai “stap wantaim [yu] olgeta de i go inap long pinis bilong dispela taim.” (Mat. 28:​18-20) Pita i kirapim yumi long “oltaim [yumi] mas redi” long sambai long bilip bilong yumi. Olsem wanem? Yu laik autim tok long ples wok, long skul, o long narapela taim na ples? Sapos olsem, orait tingim wanem taim yu laik mekim olsem, na redim gut wanem tok yu laik mekim. Beten na askim Jehova long strongim bel bilong yu, na bilip olsem Em bai helpim yu long daunim pasin bilong pret long man.—Apo. 4:29.

9. Wanpela taim Pita i mekim wanem na em i no bin soim pasin laikim? (Lukim tu piksa.)

⁹ Pita i kisim skul long hau em i ken soim pasin laikim. Em i bin stap taim Jisas i tok: “Mi givim nupela lo long yupela, olsem narapela i mas laikim narapela. Yupela i mas laikim narapela narapela olsem mi bin laikim yupela.” (Jon 13:34) Maski i olsem, bihain Pita i larim pasin bilong pret i daunim em na em i no kaikai wantaim ol Kristen em ol i bilong narapela lain. Aposel Pol i tok taim Pita i mekim olsem, em i mekim “pasin giaman” o em i kamap man bilong tupela maus. (Gal. 2:​11-14) Pita i kisim dispela tok bilong stretim em na em i kisim skul long en. Long tupela pas bilong em, em i kamapim klia olsem yumi no ken pilim tasol pasin bilong laikim ol bratasista bilong yumi, nogat, yumi mas soim dispela pasin laikim.

10. Wanem samting i helpim yumi long kisim “pasin bilong laikim tru ol brata”? (1 Pita 1:22)

¹⁰ Pita i tok yumi mas kisim “pasin bilong laikim tru ol brata,” em ol wanbilip bilong yumi. (Ritim 1 Pita 1:22.) Yumi inap kisim dispela kain pasin laikim taim yumi “bihainim tok i tru.” Wanpela bilong ol dispela tok i tru em olsem, “God i save mekim wankain pasin long olgeta man.” (Apo. 10:​34, 35) Sapos yumi soim pasin laikim tasol long sampela long kongrigesen na ol narapela nogat, orait dispela i soim olsem yumi no bihainim lo Jisas i givim long laikim ol arapela. Olsem Jisas i bin mekim, ating yumi pilim olsem yumi pas gut moa wantaim sampela na ol narapela nogat. (Jon 13:23; 20:2) Tasol Pita i kirapim yumi long wok strong long kisim pasin bilong “laikim tru ol brata,” em olgeta bratasista bilong yumi, na pas gut wantaim ol olsem wanpela famili.—1 Pita 2:17.

11. Hau yumi ken soim olsem yumi “laikim tru narapela narapela long bel olgeta”?

¹¹ Pita i kirapim yumi long “laikim tru narapela narapela long bel olgeta.” Long hia, tok bilong Pita olsem “laikim tru” i makim olsem yumi mas laikim wanpela maski yumi pilim hatwok long soim pasin laikim long em. Olsem wanem sapos wanpela wanbilip i rongim yumi o em i mekim yumi bel hevi? Ating yumi bai gat laik long bekim rong bilong em na yumi no laik soim pasin laikim long em. Tasol Pita i kisim skul long Jisas olsem pasin bilong bekim rong i no save amamasim God. (Jon 18:​10, 11) Pita i tok: “Yupela i no ken bekim rong narapela i mekim long yupela na yupela i no ken bekim tok nogut narapela i mekim long yupela, nogat. Yupela i mas toktok wantaim ol long gutpela pasin.” (1 Pita 3:9) Larim pasin bilong laikim tru ol arapela i kirapim yu long mekim gutpela pasin na tingim gut ol narapela, na tu, long ol manmeri husat i mekim yu bel hevi.

12. (a) Taim yumi gat pasin bilong laikim tru ol arapela, dispela bai kirapim yumi long mekim wanem? (b) Olsem yu lukim long vidio Lukautim Gut Presen Bilong Stap Wanbel, yu laik wok strong long mekim wanem?

¹² Long namba wan pas bilong Pita, em i kolim dispela tok “laikim tru.” Dispela kain pasin laikim i save karamapim “planti sin” na i no sampela sin tasol, nogat. (1 Pita 4:8) Ating Pita i tingim skul em i kisim long Jisas sampela yia i go pinis long pasin bilong fogivim ol narapela. Long dispela taim, ating Pita i ting olsem em i mekim gutpela pasin taim em i fogivim brata bilong em “inap 7-pela taim.” Tasol Jisas i skulim em na yumi tu olsem yumi mas fogivim ol narapela “inap 77 taim,” olsem fogivim ol long olgeta taim. (Mat. 18:​21, 22) Sapos yu pilim hatwok long bihainim dispela tok kaunsel, orait no ken bel hevi! Olgeta wokman bilong Jehova i gat sin, olsem na sampela taim ol i pilim hatwok long fogivim ol narapela. Bikpela samting em olsem, long nau yu mas mekim olgeta samting bilong fogivim brata bilong yu na stap bel isi wantaim em. c

13. Wanem samting inap mekim na i hatwok long ol elda i lukautim ol bratasista?

¹³ Pita i no bin lusim tingting long ol tok Jisas i mekim long em bihain long em i kirap bek, olsem: “Lukautim ol liklik sipsip bilong mi.” (Jon 21:16) Sapos yu wanpela elda, orait yu save olsem yu mas bihainim dispela tok. Tasol wanpela elda inap pilim hatwok long painim taim bilong mekim wok bilong lukautim ol sipsip. Ol elda i gat wok long lukautim ol famili bilong ol yet long sait bilong skin, bel na tingting, na long bilip. Na tu, ol i go pas long mekim wok autim tok na redim na mekim ol tok long ol miting, ol liklik kibung, na ol bikpela kibung. Na sampela bilong ol i wok wantaim Hospital Lieson Komiti o ol i helpim wok bilong Lokol Disain/Konstraksen Dipatmen. Tru tumas, ol elda i gat planti wok bilong mekim!

14. Wanem samting i ken kirapim ol elda long lukautim ol bratasista? (1 Pita 5:​1-4)

¹⁴ Pita i mekim dispela tok long ol wanwok elda olsem: “Lukautim gut ol sipsip bilong God.” (Ritim 1 Pita 5:​1-4.) Sapos yu wanpela elda, mipela i save olsem yu laikim tru ol bratasista bilong yu na yu laik lukautim ol. Tasol sampela taim yu inap pilim olsem yu gat planti wok bilong mekim o yu taiet tru na yu no inap long inapim dispela asainmen. Yu ken mekim wanem? Tokim Jehova long olgeta wari bilong yu. Pita i tok: “Sapos man i laik helpim narapela, orait em i mas mekim long strong God i givim em.” (1 Pita 4:11) Ating ol bratasista bilong yu i karim ol hevi em ol i no inap pinis long dispela haptaim bilong nau. Long kain taim olsem, yu ken save olsem Jisas Krais, em “nambawan wasman bilong sipsip,” em inap helpim ol winim helpim yu inap givim long ol. Em i ken mekim olsem long nau na long nupela taim tu. Samting God i laik ol elda i mas mekim em long laikim ol wanbilip bilong ol, lukautim ol, na stap “gutpela piksa bilong ol dispela sipsip.”

15. Olsem wanem wanpela elda i lukautim gut ol bratasista? (Lukim tu piksa.)

¹⁵ William i mekim wok elda inap planti yia, na em i luksave olsem em i bikpela samting long lukautim ol bratasista. Taim COVID-19 pendemik i kirap, long olgeta wik em na ol narapela elda long kongrigesen i save kontektim olgeta wan wan pablisa i stap long ol grup ol i lukautim. Em i stori long as na ol i mekim olsem, em i tok: “Planti bratasista i stap wanpis long haus, olsem na em isi tru long ol inap kisim ol tingting kranki.” Taim wanpela brata o sista i gat hevi,  William i save putim gut yau na bai em i ken kliagut long ol wari bilong em na wanem helpim em i nidim. Bihain em i painim ol tul bilong helpim ol, planti taim em i yusim ol vidio long websait bilong yumi long helpim wanpela brata o sista. Em i tok: “Nau em i bikpela samting tru long lukautim gut ol bratasista. Yumi save wok strong tru long helpim ol manmeri long kisim save long Jehova. Olsem tasol, yumi mas wok strong long lukautim na helpim ol sipsip bilong Jehova long stap yet insait long tok i tru.”

16. Long wanem ol rot yumi inap bihainim ol skul yumi kisim long ol pas bilong Pita?

¹⁶ Yumi bin stori tasol long sampela skul yumi inap kisim long tupela pas bilong Pita. Ating yu luksave long sampela samting em yu mas kamap gutpela moa long en. Olsem, ating yu laik tingim tingim long bel ol blesing yu bai kisim long nupela taim na yu laik mekim olsem long olgeta taim. O ating yu bin putim mak long autim tok long ples wok, long skul, o long narapela taim na ples. O ating yu luksave long ol rot we yu inap soim pasin laikim tru long ol bratasista bilong yu. Olsem wanem? Yupela ol elda i tingting strong long lukautim ol sipsip bilong Jehova na yupela i redi na i gat laik long mekim olsem? Taim yu skelim yu yet, ating yu luksave long sampela pasin kranki bilong yu yet, tasol no ken bel hevi long dispela. “Bikpela em i gutpela” na em bai helpim yu long kamap gutpela moa. (1 Pita 2:3) Pita i tokim yumi olsem: “God bai inapim trening bilong yupela. Em bai strongim yupela na helpim yupela long stap strong yet na mekim yupela i sanap strong.”—1 Pita 5:10.

17. Sapos yumi wok strong na larim Jehova i trenim yumi, wanem gutpela samting bai kamap?

¹⁷ Wanpela taim Pita i pilim olsem em i no gutpela inap long sanap long ai bilong Pikinini Bilong God. (Luk 5:8) Tasol Jehova na Jisas i bin helpim Pita, na em bin sanap strong yet olsem wanpela disaipel bilong Krais. Olsem na Pita i kisim tok orait long “i go insait long Kingdom bilong Jisas Krais, em Bikpela na Seivia bilong yumi, na dispela Kingdom bai stap oltaim oltaim.” (2 Pita 1:11) Em i kisim gutpela pe tru! Wankain olsem Pita, sapos yu wok strong yet na larim Jehova i trenim yu, yu tu bai kisim gutpela pe em laip oltaim. “Bilip bilong yupela i as na yupela bai kisim gutpela pe, olsem God bai kisim bek yupela.”—1 Pita 1:9.