1. Joas, Usia na Josaia i bungim wanem hevi?

 PIKSAIM long tingting olsem yu kamap king bilong ol manmeri bilong God taim yu liklik mangi o taim yu tineja! Bai yu mekim wanem wok long strong na namba bilong yu? Baibel i stori long sampela yangpela em ol i kamap king bilong Juda. Olsem, Joas i gat 7 krismas, Usia i gat 16 krismas, na Josaia i gat 8 krismas taim ol i kamap king. Tingim presa ol i pilim! Maski i hatwok, Jehova na ol narapela i helpim ol long daunim ol hevi na mekim planti gutpela wok.

2. Wai na em i gutpela long stadi long eksampel bilong Joas, Usia, na Josaia?

² Yumi no ol king na ol kwin, tasol yumi ken lainim planti samting long dispela 3-pela yangpela em Baibel i stori long ol. Ol i bin mekim ol gutpela disisen, tasol ol i bin mekim ol disisen i no stret tu. Long ol stori bilong ol, yumi bai kisim save long as na yumi mas makim ol gutpela poroman, mekim yet pasin daun, na wok yet long painim Jehova.

3. King Joas i mekim wanem long ol tok em Hetpris Jehoiada i givim long em?

³ Bihainim pasin bilong Joas long mekim ol gutpela disisen. Taim King Joas i liklik mangi, em i mekim wanpela gutpela disisen. Em i no gat Papa, olsem na em i bihainim ol tok em Hetpris Jehoiada i givim long em bilong stiaim em. Dispela pris i skulim Joas long pasin i wankain olsem pasin em bai mekim long pikinini bilong em yet. Joas i bihainim tok na em i mekim ol gutpela disisen bilong go pas long lotu i tru na mekim wok bilong Jehova. Joas i tok na ol i stretim bek tempel bilong Jehova.—2 Sto. 24:​1, 2, 4, 13, 14.    

4. Wanem gutpela samting i save kamap taim yumi laikim na bihainim ol lo bilong Jehova? (Provep 2:​1, 10-12)

⁴ Sapos papamama bilong yu o wanpela i bin skulim yu long  laikim Jehova na long bihainim ol lo bilong em, orait yu ken save olsem dispela em nambawan gutpela presen yu kisim. (Ritim Provep 2:​1, 10-12.) Ol papamama i ken skulim ol pikinini bilong ol long planti rot. Skelim hau papa bilong wanpela sista, nem bilong em Katya, i bin helpim em long mekim ol gutpela disisen. Long olgeta de taim papa bilong em i bringim em i go long skul, em i save stori wantaim em long teks bilong de. Katya i tok: “Ol dispela tok em i mekim i save helpim mi long karim ol hevi i painim mi long dispela de.” Tasol olsem wanem sapos yu pilim olsem ol tok bilong Baibel em papamama i skulim yu long en i pasim yu long mekim ol samting yu laik mekim? Wanem samting i ken helpim yu long bihainim tok ol i givim bilong stiaim yu? Wanpela sista nem bilong em Anastasia, em i stori long hau papamama i save eksplenim gut long em long as na ol i putim sampela lo. Em i tok: “Dispela i helpim mi long kliagut olsem ol i no putim ol lo bilong kontrolim mi, nogat, ol i putim bilong lukautim mi bikos ol i laikim mi.”

5. Pasin bilong yu inap mekim wanem long papamama bilong yu na long Jehova? (Provep 22:6; 23:​15, 24, 25)

⁵ Taim yu bihainim ol edvais bilong Baibel yu kisim, yu bai mekim papamama bilong yu i amamas. Na bikpela samting moa, yu bai mekim God i amamas na yu bai pas gut wantaim em inap oltaim. (Ritim Provep 22:6; 23:​15, 24, 25.) Dispela em ol gutpela risen na yu ken bihainim pasin bilong Joas taim em i liklik.

6. Bihain long Jehoiada i dai, Joas i putim yau long tok bilong husat na wanem samting i kamap? (2 Stori 24:​17, 18)

⁶ Kisim skul long ol disisen i no stret em Joas i bin mekim. Bihain long Jehoiada i dai, Joas i makim ol poroman nogut. (Ritim 2 Stori 24:​17, 18.) Em i putim yau long ol hetman bilong Juda em ol i no laikim Jehova. Ating yu bai wanbel long tok olsem i gutpela Joas i stap longwe long ol dispela bikhetman. (Prov. 1:10) Tasol nogat, em i putim yau long ol dispela pren giaman bilong em. So Sekaraia em kasen brata bilong Joas, i traim long stretim Joas, tasol Joas i tok na ol i kilim em i dai. (2 Sto. 24:​20, 21; Mat. 23:35) Joas i mekim longlong pasin tru! Taim Joas i liklik em i stap gut long God, tasol bihain em i kamap apostet na kilman. Bihain ol wokman bilong em yet i kilim em i dai. (2 Sto. 24:​22-25) Ating ol samting long laip bilong Joas bai stap gut yet sapos em i wok yet long putim yau long tok bilong Jehova na ol man husat i laikim Jehova! Yu yet i laik kisim wanem skul long dispela stori bilong Joas?

7. Yu ken makim husat long stap pren bilong yu? (Lukim tu piksa.)

⁷ Wanpela skul yumi ken kisim long disisen i no stret em Joas i mekim em olsem: Yumi mas makim ol pren em ol bai helpim yumi long mekim ol  gutpela disisen—em ol pren husat i laikim Jehova na ol i laik amamasim em. Yumi ken kisim ol pren i gat kain kain krismas na i no ol wankrismas bilong yumi tasol. Tingim, Joas em i yangpela moa winim pren bilong em Jehoiada. Taim yu laik makim ol pren, askim yu yet: ‘Ol i save helpim mi long strongim bilip bilong mi long Jehova? Ol i save strongim mi long bihainim ol lo bilong God? Ol i save stori long Jehova na ol gutpela tok i tru bilong em? Ol i save rispektim ol lo bilong God? Ol i save tokim mi tasol long ol samting mi laik harim, o ol i gat strongpela bel bilong stretim mi taim mi mekim ol samting i no stret?’ (Prov. 27:​5, 6, 17) Bilong tok stret long yu, sapos ol pren bilong yu i no laikim Jehova, orait yu no nidim ol. Tasol sapos yu gat ol pren em ol i laikim Jehova, stap gut long ol, ol bai helpim yu!—Prov. 13:20.

8. Sapos yumi yusim sosel midia, yumi mas tingim wanem samting?

⁸ Sosel midia em wanpela gutpela rot bilong toktok wantaim famili na ol pren bilong yumi. Tasol planti manmeri i yusim sosel midia bilong pulim ai bilong ol narapela, ol i putim ol poto na ol vidio bilong ol samting ol i baim o mekim. Sapos yu save yusim sosel midia, askim yu yet: ‘Mi save yusim sosel midia bilong pulim ai bilong ol narapela? Astingting bilong mi em long strongim ol narapela o long apim nem bilong mi yet? Mi larim ol manmeri i yusim sosel midia long stiaim tingting, toktok, na pasin bilong mi long ol rot i no stret?’ Brata Nathan Knorr, em wanpela memba bilong Gavening Bodi, em i givim dispela edvais: “No ken traim long amamasim ol man. Bai yu no inap long amamasim wanpela man. Amamasim Jehova, na bai yu amamasim olgeta lain i laikim Jehova.”

9. Jehova i helpim Usia long mekim wanem? (2 Stori 26:​1-5)

⁹ Bihainim pasin bilong Usia long mekim ol gutpela disisen. Taim King Usia i yangpela mangi, em i gat pasin daun. Em i lain long “pret long God tru.” Na klostu long laip olgeta bilong em insait long 68 yia, Jehova i bin blesim em. (Ritim 2 Stori 26:​1-5.) Usia i pait na daunim planti birua bilong lain Israel na em i strongim banis bilong Jerusalem. (2 Sto. 26:​6-15) Usia i amamas long olgeta samting God i helpim em long mekim.—Ekl. 3:​12, 13.

10. Wanem samting i kamap long Usia?

¹⁰ Kisim skul long ol disisen i no stret em Usia i bin mekim. King Usia i lain pinis long tokim ol narapela long mekim ol samting em laikim. Yu ting dispela i mekim na em i kisim tingting olsem em i ken mekim wanem samting em i laik mekim? Wanpela taim Usia i go long tempel bilong Jehova na em i mekim pasin antap taim em i traim long kukim paura bilong smok i gat gutpela smel antap long alta, em samting ol king i no gat rait long mekim. (2 Sto. 26:​16-18) Hetpris Asaria i traim long stretim em, tasol Usia i belhat nogut tru. Sori tru, Usia i bagarapim pasin bilong em long stap gut long God, olsem na God i givim strafe long em na mekim sik lepra i kamap long em. (2 Sto. 26:​19-21) Tingim, sapos em i bin mekim pasin daun, gutpela samting inap kamap long laip bilong em!

11. Wanem samting i ken helpim yumi long mekim yet pasin daun? (Lukim tu piksa.)

¹¹ Taim wok king bilong Usia i stap strong tru, em i lusim tingting long Jehova em As bilong strong na olgeta gutpela samting em i gat. Yumi inap kisim wanem skul long em? I gutpela long yumi mas wok yet long tingim olsem ol blesing na ol gutpela wok yumi kisim i kam long Jehova. So yumi no ken hambak long ol wok yumi mekim, nogat, yumi mas givim glori na preis i go long Jehova long ol wok yumi mekim. b (1 Kor. 4:7) Long pasin daun yumi mas luksave olsem yumi no  gutpela olgeta na yumi mas kisim ol tok bilong stretim yumi. Wanpela brata i gat 60 krismas, em i tok: “Mi lain olsem mi no ken bel hevi taim ol narapela i luksave long ol popaia bilong mi. Taim mi kisim ol tok bilong stretim mi long ol popaia mi mekim, mi traim long stretim ol pasin bilong mi na mekim ol samting i kamap gutpela moa.” Tru tumas, taim yumi bihainim yet tok bilong Jehova na mekim yet pasin daun, yumi bai stap amamas tru.—Prov. 22:4.

12. Olsem wanem Josaia i painim Jehova taim em i yangpela mangi yet? (2 Stori 34:​1-3)

¹² Bihainim pasin bilong Josaia long mekim ol gutpela disisen. Josaia i gat 16 krismas taim em i wok long painim Jehova. Em i laik kisim save long Jehova na mekim laik bilong Em. Tasol sori tru, laip i no isi long dispela yangpela king. Em i mas strongim bel bilong strongim lotu i tru taim olgeta manmeri i givim bel tru long lotuim ol giaman god. Na yes, em i bin mekim olsem! Paslain long Josaia i gat 20 krismas, em i kirap long rausim olgeta lotu giaman long kantri Israel.—Ritim 2 Stori 34:​1-3.

13. Wanem samting bai kamap long laip bilong yu taim yu dediket long Jehova?

¹³ Maski yu yangpela yet, yu ken mekim disisen long bihainim pasin bilong Josaia long rot bilong painim Jehova na lain long laikim ol pasin bilong Em. Taim yu mekim olsem, dispela bai kirapim yu long dediket long em. Wanem samting bai kamap long laip bilong yu taim yu dediket long Jehova? Luke i bin baptais taim em i gat 14 krismas, em i tok: “Kirap long nau na i go mi bai putim wok bilong Jehova i stap nambawan samting long laip bilong mi na mi bai traim long amamasim em.” (Mak 12:30) Yu tu bai kisim gutpela blesing tru sapos yu gat laik long mekim olsem!

14. Stori long sampela yangpela em ol i bihainim pasin bilong King Josaia.

¹⁴ Wanem sampela hevi em ol yangpela wokman na wokmeri bilong Jehova inap bungim? Johan em i kisim baptais taim em i gat 12 krismas, em i tok olsem ol wanklas bilong em i putim presa long em long smokim elektronik sigaret. Bilong kisim strong bilong sakim dispela presa, Johan i wok long tingim olsem dispela pasin bilong smok inap bagarapim helt bilong em na bagarapim tu pasin pren bilong em wantaim  Jehova. Rachel em i baptais taim em i gat 14 krismas, em i tok long samting i bin helpim em long karim ol hevi em i bungim long skul. Em i tok: “Mi traim long larim ol samting mi lukim na harim i kirapim mi long tingim Baibel na Jehova. Olsem, wanpela histori lesen inap kirapim mi long tingim wanpela stori bilong Baibel o wanpela tok profet. O taim mi stori wantaim wanpela long skul, mi traim long tingim wanpela skripsa em mi ken kolim tok bilong en.” Ating ol hevi yu bungim i no wankain long ol hevi em King Josaia i bin bungim, tasol yu ken bihainim savetingting na stap gut long God olsem em i bin mekim. Pasin bilong karim hevi long taim yu yangpela yet, dispela bai helpim yu long karim ol narapela hevi em yu bungim long ol yia i kam bihain.

15. Wanem samting i helpim Josaia long stap gut yet long God na mekim wok bilong em? (2 Stori 34:​14, 18-21)

¹⁵ Taim King Josaia i gat 26 krismas, em i tok na ol i kirapim wok bilong stretim gen tempel. Taim ol i wok long mekim dispela wok, ol i painim “buk i gat Lo bilong Jehova long en, em God i bin givim long ol long rot bilong Moses.” King i harim ol i ritim, na dispela i kirapim em long mekim ol samting i stret wantaim ol tok i stap long dispela buk. (Ritim 2 Stori 34:​14, 18-21.) Yu laik ritim Baibel long olgeta de? Sapos yu bin kirap pinis long traim, em go orait? Yu save raitim ol ves em yu yet inap kisim helpim long en? Luke em yumi stori pinis long em, em i save raitim ol poin em i laikim long wanpela nout buk. Sapos yu bihainim wankain pasin olsem, yu ting dispela inap helpim yu long tingim ol ves na ol poin yu laikim? Taim yu save gut moa long Baibel na laikim ol tok bilong en, yu bai gat laik tru long mekim wok bilong Jehova. Na wankain olsem King Josaia, Tok Bilong God bai kirapim yu long mekim samting.

16. Bilong wanem Josaia i mekim bikpela rong, na yumi inap kisim wanem skul long em?

¹⁶ Kisim skul long disisen i no stret em Josaia i bin mekim. Taim Josaia i gat 39 krismas, em i mekim wanpela popaia na laip bilong em i lus long dispela rot. Em i trastim em yet, na em i no askim Jehova long stiaim em. (2 Sto. 35:​20-25) Yumi inap kisim wanem skul long dispela stori? Yumi  mas wok yet long painim Jehova, maski yumi gat wanem krismas o yumi bin stadi long Baibel inap hamas yia. Bilong mekim olsem, oltaim yumi mas beten askim God long stiaim yumi, stadi long Baibel, na kisim helpim long edvais em ol strongpela Kristen i givim long yumi. Long dispela rot, yumi bai abrusim pasin bilong mekim ol bikpela rong na yumi inap stap amamas.—Jems 1:25.

17. Yumi inap kisim wanem skul long stori bilong 3-pela king bilong Juda?

¹⁷ Taim yu stap yangpela, rot i op long yu inap mekim planti samting. Stori bilong Joas, Usia, na Josaia i soim olsem ol yangpela i ken mekim ol gutpela disisen na bihainim ol rot we i amamasim Jehova. Tasol olsem yumi stori pinis, i no olgeta taim bai gutpela samting tasol i kamap. Maski i olsem, yumi ken bihainim ol gutpela pasin em ol dispela king i bin mekim na abrusim ol popaia ol i bin mekim. Taim yumi mekim olsem, yumi ken save olsem gutpela samting bai kamap long laip bilong yumi.

18. Wanem ol eksampel long Baibel i soim olsem gutpela samting inap kamap long laip bilong yu? (Lukim tu piksa.)

¹⁸ Baibel i stori long ol narapela yangpela em ol i pas gut wantaim Jehova, na Em i orait long ol, na gutpela samting i kamap long laip bilong ol. Devit em i wanpela bilong ol. Taim em i yangpela mangi yet, em i makim olsem em bai lotuim God na bihain em i kamap wanpela king husat i stap gut long God. Em i bin mekim sampela popaia long laip bilong em, tasol God i tingim em olsem wanpela man i stap gut long Em. (1 Kin. 3:6; 9:​4, 5; 14:8) Taim yu stadi long stori bilong Devit na wok bilong God em i bin mekim, dispela i ken kirapim yu na strongim yu tu long mekim laik bilong God. O yu ken mekim wanpela stadi projek long stori bilong Mak o Timoti. Yu bai lukim olsem ol i mekim wok bilong Jehova taim ol i yangpela yet na God i bin orait long ol na gutpela samting i bin kamap long laip bilong ol.

19. Yu ken mekim wanem long laip bilong yu?

¹⁹ Ol samting yu mekim long nau bai makim wanem samting bai kamap long laip bilong yu long bihain. Taim yu trastim Jehova na yu no bilip long save bilong yu yet, em bai helpim yu long mekim ol gutpela disisen. (Prov. 20:24) Yu bai stap amamas na laip bilong yu bai i gat as tru bilong en. Tingim, Jehova i tingim tru ol wok bilong em yu mekim. Nambawan gutpela rot yu inap yusim laip bilong yu em long mekim wok bilong Papa bilong yumi long heven, Jehova.