1. Pita i mekim wanem taim Jisas i wokim mirakel na ol i kisim planti pis?

 LONG nait olgeta Pita i wok strong long painim pis, tasol em i no kisim wanpela pis. Em i kirap nogut taim Jisas i tokim em olsem: “Go aut long hap we wara i dip na tromoi ol umben bilong yupela i go daun bilong kisim pis.” (Luk 5:4) Pita i no ting em bai kisim wanpela pis, tasol em i bihainim dispela tok. Pita na ol wanwok bilong em i kisim planti pis tru, olsem na umben i stat long bruk. Ol i luksave olsem dispela em wanpela mirakel, olsem na ol i “kirap nogut tru.” Pita i tok: “Bikpela, lusim mi na go. Mi wanpela sinman.” (Luk 5:​6-9) I luk olsem Pita i pilim olsem em i no gutpela inap long sanap long ai bilong Jisas.

2. Wai na i gutpela long yumi stadi long eksampel bilong Pita?

² Tok bilong Pita em i stret, em i “wanpela sinman.” Baibel i soim olsem sampela taim em i save mekim ol tok na ol pasin we bihain em i rigret long en. Sampela taim yu pilim wankain olsem Pita? Yu wok strong long daunim wanpela pasin kranki o pasin nogut em yu hatwok long lusim? Sapos olsem, orait yu ken kisim bel isi taim yu stadi long eksampel bilong Pita. Wai na yumi tok olsem? Tingim dispela: God inap mekim samting na bai ol man i no raitim ol popaia bilong Pita long Baibel. Tasol Em i kirapim ol man long raitim ol dispela stori bambai yumi ken kisim skul long en. (2 Tim. 3:​16, 17) Taim yumi kisim skul long dispela man i gat ol pasin kranki na ol filings wankain olsem yumi, dispela bai helpim yumi long luksave olsem Jehova i no ekspektim yumi long mekim ol samting i kamap gutpela olgeta, nogat. Em i laik bai yumi wok strong yet na i no givap, maski yumi gat ol pasin kranki.   

3. Wai na yumi mas wok strong yet na i no givap?

³ Wai na em i bikpela samting long yumi mas wok strong yet na  i no givap? I gat wanpela tok olsem, taim yu mekim prektis planti taim, yu bai kamap gutpela moa. Yumi ken tok piksa olsem: Wanpela man bilong pilaim musik inap lusim planti yia long lain gut long pilaim gita. Insait long ol dispela haptaim, ating em inap mekim planti popaia, tasol sapos em i wok yet long mekim prektis, em bai kamap gutpela moa. Maski em i kamap gutpela moa long pilaim gita, ating sampela taim em bai mekim popaia. Tasol em i no inap givap. Em bai wok yet long lain gut long pilaim gita. Wankain olsem, bihain long yumi lusim wanpela pasin kranki bilong yumi, ating yumi inap popaia na mekim gen dispela pasin. Tasol yumi save wok strong yet long lusim dispela pasin. Yumi olgeta i save mekim ol tok na ol pasin we bihain yumi rigret long en, tasol sapos yumi no givap, Jehova bai helpim yumi long wok strong long kamap gutpela moa. (1 Pita 5:10) Yumi ken skelim eksampel bilong Pita long wok strong yet na i no givap. Pasin sori Jisas i mekim long Pita maski em i mekim ol popaia, dispela i ken kirapim yumi long wok yet long mekim wok bilong Jehova.

4. Olsem Luk 5:​5-10 i kamapim, Pita i tok wanem long em yet, tasol Jisas i tok wanem bilong mekim gut bel bilong em?

⁴ Baibel i no stori long risen na Pita i tok em i “wanpela sinman” o em i tingim wanem samting taim em i mekim dispela tok. (Ritim Luk 5:​5-10.) Tasol ating em i bin mekim sampela bikpela popaia. Jisas i luksave olsem Pita i pret, ating em i pret bikos em i pilim olsem em i no gutpela man tumas. Tasol Jisas i save tu olsem Pita inap stap gut yet long em. Olsem na long gutpela pasin Jisas i tokim Pita olsem “no ken pret.” Jisas i bilip long Pita na dispela i strongim tru Pita. Bihain, Pita na brata bilong em Andru i lusim wok bisnis bilong kisim pis na ol i givim bel olgeta long bihainim Mesaia, em disisen i kamapim planti gutpela blesing.—Mak 1:​16-18.   

5. Pita i kisim wanem ol blesing taim em i daunim pret bilong em na bihainim singaut bilong Jisas?

⁵ Pita i kisim planti gutpela blesing taim em i kamap wanpela disaipel bilong Krais. Em i lukim Jisas i oraitim ol sikman, rausim ol spirit nogut long ol man, na kirapim bek ol man i dai pinis. b (Mat. 8:​14-17; Mak 5:​37, 41, 42) Pita i lukim tu wanpela visen i soim glori bilong Jisas taim em i mekim wok olsem King long Kingdom, na dispela i mekim bikpela samting long Pita. (Mak 9:​1-8; 2 Pita 1:​16-18) Yes, Pita i lukim ol samting we em i no inap lukim sapos em i no bin bihainim Jisas. Ating em i amamas tru olsem em i no  bin larim ol tingting kranki em i gat long em yet i pasim em long kisim ol dispela blesing!

6. Yu ting wantu tasol Pita i lusim ol pasin kranki bilong em? Stori long dispela.

⁶ Maski Pita i lukim na harim ol dispela samting, em i hatwok yet long daunim ol pasin kranki bilong em. Skelim sampela eksampel. Taim Jisas i tok olsem em bai karim pen na hevi na dai bilong truim tok profet bilong Baibel, Pita i givim strongpela tok long em olsem dispela samting i no ken kamap long em. (Mak 8:​31-33) Planti taim, Pita na ol arapela aposel i bin tok kros long husat namel long ol i winim ol arapela. (Mak 9:​33, 34) Long laspela nait paslain long ol i kilim i dai Jisas, Pita i hariap long mekim samting na em i katim yau bilong wanpela man. (Jon 18:10) Long dispela seim nait, Pita i pret na inap 3-pela taim em i tok em i no save long pren bilong em Jisas. (Mak 14:​66-72) Dispela i mekim na Pita i krai nogut tru.—Mat. 26:75.

7. Bihain long Jisas i kirap bek, em i opim rot long Pita inap mekim wanem?

⁷ Jisas i no givap long dispela aposel bilong em husat i bel hevi tru. Bihain long Jisas i kirap bek, em i opim rot long Pita inap soim gen olsem em i laikim tru Jisas. Jisas i tokim Pita long mekim wok olsem wanpela wasman bilong lukautim ol sipsip bilong em. (Jon 21:​15-17) Pita i redi long bihainim dispela tok. Em i bin stap long Jerusalem long de bilong Pentikos na em i wanpela bilong ol fes lain em God i makim ol long holi spirit.

8. Pita i mekim wanem bikpela popaia long Antiok?

⁸ Bihain long Pita i kamap wanpela Kristen God i makim, em i wok strong yet long daunim ol pasin kranki bilong em. Long 36 C.E., Pita i stap taim God i makim Kornilius long holi spirit, em man bilong narapela lain na em i no bin katim skin. Dispela i kamapim klia olsem “God i save mekim wankain pasin long olgeta man” na ol man bilong narapela lain i ken insait long kongrigesen Kristen. (Apo. 10:​34, 44, 45) Bihain long dispela, Pita i amamas long kaikai wantaim ol man bilong narapela lain, em samting we pastaim em i no inap tru long mekim. (Gal. 2:12) Tasol sampela Juda Kristen i pilim olsem i no stret long ol Juda na ol man bilong narapela lain i kaikai wantaim. Taim sampela Kristen husat i gat dispela tingting i kam long Antiok, Pita i stop long kaikai wantaim ol brata bilong em husat i bilong narapela lain, ating em i pret long bagarapim bel bilong ol Juda Kristen. Aposel Pol i lukim dispela pasin bilong tupela maus na em i stretim Pita long ai bilong ol narapela. (Gal. 2:​13, 14) Maski Pita i mekim dispela popaia, em i wok strong yet na em i no givap. Wanem samting i helpim em?

9. Olsem Jon 6:​68, 69 i kamapim, hau Pita i soim olsem em i stap gut long Jisas?

⁹ Pita i stap gut long Jisas, na em i no larim wanpela samting i mekim na em i givap olgeta. Olsem, wanpela taim em i soim pasin bilong em long stap gut long Jisas taim Jisas i mekim wanpela tok we ol disaipel i no kliagut long en. (Ritim Jon 6:​68, 69.) Planti i no laik wet long Jisas i stori gut long dispela samting o askim em long kisim sampela save moa, nogat, ol i lusim em na ol i go. Tasol Pita i no mekim olsem. Em i luksave olsem Jisas tasol i save mekim “ol tok bilong . . . bringim man i go long laip oltaim.”

10. Olsem wanem Jisas i soim olsem em i bilip long Pita? (Lukim tu piksa.)

¹⁰ Jisas i no lusim Pita. Long laspela nait bilong Jisas long graun, em i save olsem Pita na ol arapela aposel bai lusim em. Maski i olsem, Jisas i tokaut klia olsem Pita bai kamap strong gen na stap gut yet long em. (Luk 22:​31, 32) Jisas i save olsem “bel bilong man i redi long mekim olgeta samting, tasol bodi i no gat strong.” (Mak 14:38) Olsem na maski Pita i tok em i no save long em, Jisas i no givap long dispela aposel bilong em. Bihain long Jisas i kirap bek, em i go  kamap long Pita—i luk olsem long dispela taim Pita yet i stap. (Mak 16:7; Luk 24:34; 1 Kor. 15:5) Ating dispela i strongim tru dispela aposel husat i bel hevi!

11. Olsem wanem Jisas i strongim Pita olsem Jehova bai lukautim em?

¹¹ Jisas i strongim Pita olsem Jehova bai lukautim em. Taim Jisas i kirap bek, em i wokim narapela mirakel gen na Pita na ol wan aposel bilong em i kisim planti pis. (Jon 21:​4-6) Tru tumas, dispela mirakel i strongim Pita olsem Jehova bai lukautim em long ol samting bilong skin em i nidim. Ating long dispela taim, aposel Pita i tingim tok Jisas i bin mekim olsem Jehova bai givim ol samting ol i nidim taim ol i “wok yet long painim Kingdom pastaim.” (Mat. 6:33) Olgeta dispela samting i mekim na Pita i putim wok autim tok i stap nambawan samting long laip bilong em, na i no wok bisnis bilong kisim pis. Em i strongim bel na autim tok long de bilong Pentikos 33 C.E., na helpim planti tausen manmeri long bilipim tok bilong gutnius. (Apo. 2:​14, 37-41) Bihain long dispela, em i helpim lain Samaria na ol man bilong narapela lain long bilip long Krais. (Apo. 8:​14-17; 10:​44-48) Tru tumas, Jehova i yusim Pita long wanpela narakain rot long bringim ol manmeri bilong olgeta kain lain i kam insait long kongrigesen Kristen.   

12. Olsem wanem eksampel bilong Pita inap helpim yumi long daunim wanpela pasin kranki em yumi hatwok long daunim inap sampela yia?

¹² Jehova i ken helpim yumi long wok strong yet na i no givap. Ating em i no isi long daunim wanpela pasin kranki, moa yet sapos yumi wok strong long daunim dispela pasin inap sampela yia. Sampela taim, yumi inap pilim olsem ol pasin kranki bilong yumi i hatwok moa long daunim winim ol samting i bin painim Pita. Tasol Jehova i ken strongim yumi bambai yumi no givap. (Sng. 94:​17-19) Olsem, wanpela brata i bin stap olsem wanpela gei inap planti yia paslain long em i kisim save long tok i tru. Em i mekim bikpela senis long laip bilong em na lusim ol dispela pasin nogut tru. Tasol sampela taim em i hatwok yet long daunim ol laik nogut bilong em. Wanem samting i helpim em long wok strong yet na i no givap? Em i tok: “Jehova i save strongim yumi.” Em i tok moa: “Long rot bilong holi spirit bilong Jehova . . . , mi kisim save olsem yumi inap [wok yet] long bihainim rot bilong tok i tru . . . Jehova i yusim mi long mekim wok bilong em, na maski mi gat ol pasin kranki em i wok yet long strongim mi.”

13. Olsem Aposel 4:​13, 29, 31 i kamapim, hau yumi ken bihainim eksampel bilong Pita? (Lukim tu piksa.)

 ¹³ Olsem yumi bin lainim, Pita i mekim ol bikpela rong bikos em i pret long ol man. Tasol taim Pita i beten long God i ken strongim em, dispela i helpim em long strongim bel. (Ritim Aposel 4:​13, 29, 31.) Yumi tu i ken daunim pasin bilong pret. Tingim samting i bin painim Horst, em wanpela brata long Natsi Jemani. Long skul, planti taim em i pret long ol narapela na em i mekim dispela salut olsem “Heil Hitler!” Papamama bilong Horst i no krosim em, tupela i beten wantaim em na askim Jehova long strongim bel bilong em. Papamama i helpim em na Jehova i strongim em, na dispela i helpim Horst long sanap strong. Bihain, em i tok olsem: “Jehova i no bin lusim mi.” c

14. Ol gutpela wasman i ken mekim wanem bilong strongim ol lain i bel hevi?

¹⁴ Jehova na Jisas bai i no inap givap long yumi. Bihain long Pita i tok em i no save long Jisas, em i mas mekim wanpela bikpela disisen long laip bilong em. Em bai givap o em bai wok strong yet long stap olsem wanpela disaipel bilong Krais? Jisas i bin beten strong na askim Jehova long helpim Pita na bai bilip bilong Pita i no ken pundaun. Jisas i tokim Pita long dispela beten na em i tok em i bilip long Pita olsem bihain em bai strongim ol brata bilong em. (Luk 22:​31, 32) Taim Pita i tingim gen tok bilong Jisas, ating dispela i strongim em! Taim yumi laik mekim wanpela bikpela disisen long laip bilong yumi, Jehova inap yusim ol gutpela wasman long givim ol tok em yumi nidim bilong helpim yumi long stap gut yet long Em. (Efe. 4:​8, 11) Paul, husat i mekim wok elda inap longpela taim, em i save wok strong long mekim gut bel  bilong ol bratasista. Em i save tokim ol lain em ol i pilim olsem ol i laik givap long tingim namba wan taim Jehova i bringim ol i kam insait long tok i tru. Na em i save kirapim ol long tingim olsem Jehova bai wok yet long mekim gutpela pasin laikim long ol na em i no inap givap long ol. Em i tok: “Mi lukim Jehova i helpim planti bratasista em ol i bel hevi tru long wok strong yet na i no givap.”

15. Olsem wanem eksampel bilong Pita na Horst i truim tok bilong Matyu 6:33?

¹⁵ Jehova i bin helpim Pita na ol arapela aposel long kisim ol samting bilong skin em ol i nidim, olsem tasol Em inap helpim yumi tu long kisim ol samting bilong skin em yumi nidim taim yumi putim wok autim tok i stap nambawan samting long laip bilong yumi. (Mat. 6:33) Bihain long Wol Woa 2, Horst em yumi stori pinis long em, em i tingting long mekim wok painia. Tasol em i stap rabis tru, olsem na em i tingting planti olsem em inap sapotim em yet na insait yet long wok painia o nogat. Em bai mekim wanem? Em i laik traim na lukim hau Jehova bai helpim em, olsem na long wik bilong wasman sekit, em i givim bel long autim tok long wik olgeta. Long pinis bilong wik, em i kirap nogut taim wasman sekit i givim em wanpela envelop i gat mani em wanpela i bin givim. Dispela envelop i gat mani we inap sapotim em long mekim wok painia inap sampela mun. Horst i tingim dispela presen olsem rot bilong Jehova long soim em olsem Em bai lukautim em. Na long laip olgeta bilong em, em i putim wok bilong Kingdom i stap nambawan samting.—Mal. 3:10.

16. Wai na i gutpela long tingim eksampel bilong Pita na ol tok em i bin raitim?

¹⁶ Ating Pita i amamas tru olsem Jisas i no bin lusim em, maski wanpela taim Pita i bin tokim Jisas long lusim em! Krais i trenim yet Pita long stap olsem wanpela gutpela aposel na olsem wanpela strongpela Kristen em ol narapela Kristen i ken bihainim eksampel bilong em. Yumi ken kisim planti gutpela skul long ol trening Jisas i bin givim long Pita. Pita i stori long sampela bilong ol dispela skul em i kisim na sampela samting moa long 2-pela pas em i bin raitim i go long ol kongrigesen long taim bilong ol aposel. Neks atikol bai stori long sampela tok bilong ol dispela pas na hau yumi ken bihainim ol dispela tok long nau.