Taim yumi redi long stadi, yumi ken askim yumi yet olsem, ‘Mi tingting long lainim wanem samting long nau?’ Tasol yumi laik was gut tu, nogut yumi larim ol samting yumi tingting long en i pasim yumi long lainim ol nupela samting em Jehova i laik skulim yumi long en. Hau yumi ken redi long lainim ol nupela samting taim yumi mekim pesenel stadi?

Beten long kisim savetingting. Beten askim Jehova long helpim yu long kliagut long wanem samting em i laik bai yu mas lainim long nau. (Jems 1:5) No ken ting olsem save yu gat pinis em inap na i no gat wok long yu lainim ol nupela samting, nogat.—Prov. 3:​5, 6.

Larim strong bilong Tok Bilong God i stiaim yu. “Tok bilong God i gat laip.” (Hib. 4:12) Taim yumi ritim “tok” bilong God, em inap stiaim yumi wan wan long narapela narapela rot. Tasol bilong Baibel i ken mekim olsem, yumi yet i mas i gat laik long kisim save long samting God i skulim yumi long en.

Soim tenkyu bilong yu long olgeta tok bilong strongim bilip em Jehova i givim yu. Ol tok bilong strongim bilip em Jehova i givim, ol i olsem “wanpela bikpela bung i gat planti gutpela kaikai.” (Ais. 25:6) I gutpela long skelim tu ol topik em yu pilim hatwok long stadi long en. Taim yu mekim olsem, yu bai kisim gutpela helpim, na tu, yu bai amamas tru long gutpela skul i kam long God!