1-2. (a) Ol samting long Judia i stap olsem wanem taim aposel Pol i raitim pas i go long ol Kristen Hibru? (b) Olsem wanem dispela pas em holi spirit i kirapim Pol long raitim i mekim gut wok bilong en?

 OL KRISTEN Hibru i stap long Jerusalem na Judia, ol i bin karim ol bikpela hevi long ol yia bihain long Jisas i dai. Bihain tasol long kongrigesen Kristen i kamap, ol man i mekim nogut tru long ol Kristen. (Apo. 8:1) Na inap 20 yia samting bihain, ol Kristen i bin karim ol bikpela hevi long sait bilong mani bikos taim bilong bikpela hangre tru i bin kamap long hap bilong ol paslain long dispela. (Apo. 11:​27-30) Tasol long yia 61 C.E. samting, ol Kristen i stap bel isi, maski i olsem, bihain ol bai karim bikpela hevi tru. Long dispela taim, ol i kisim wanpela pas em holi spirit i bin kirapim aposel Pol long raitim—em wanpela pas ol i kisim long taim stret bilong en.

² Dispela pas em Pol i raitim i go long ol Hibru i kamap long taim stret bilong en, long wanem, bel isi em ol Kristen i pilim i no inap stap longpela taim. Pol i givim edvais long ol Kristen long ol samting ol i ken mekim bilong sanap strong long taim traipela hevi i laik painim ol klostu nau. Jisas i bin tok profet olsem pinis bilong haptaim bilong ol Juda bai kamap, na dispela haptaim i kam klostu tru. (Luk 21:20) Tru tru, Pol na ol Kristen long Judia i no save long wanem taim tru dispela bagarap bai kamap. Maski i olsem, ol Kristen inap yusim dispela haptaim i stap yet bilong redim ol yet na kisim pasin bilong bilip na sanap strong.—Hib. 10:25; 12:​1, 2.

3. Wai na ol tok bilong Buk Hibru inap helpim ol Kristen long nau tu?

³ Yumi bai bungim wanpela traipela hevi tru winim dispela hevi ol Kristen Hibru i bin bungim. (Mat. 24:21; Rev. 16:​14, 16) So yumi ken skelim sampela gutpela tok em Jehova i bin givim  ol dispela Kristen we i ken helpim yumi long nau tu.

“TAITIM BUN NA WOK YET LONG KAMAP STRONG”

4. Ol Juda i kamap Kristen i bungim wanem sampela hevi? (Lukim tu piksa.)

⁴ Ol Juda em ol i kamap Kristen, ol i mas mekim sampela bikpela senis na em i no isi long ol. Inap wanpela haptaim, ol Juda i bin stap olsem ol manmeri em Jehova i makim bilong em yet. Jerusalem i stap olsem sia king bilong Kingdom Bilong God, na tempel i stap olsem ples bilong mekim lotu i tru. Olgeta Juda i save bihainim Lo Bilong Moses, em ol hetman bilong lotu bilong ol i skulim ol long en. Ol dispela skul ol i kisim i bosim kaikai samting ol i kisim, pasin bilong katim skin, na pasin ol i mekim long ol man i no bilong lain Juda. Tasol bihain long Jisas i dai, Jehova i no orait moa long ol ofa em ol Juda i givim. Dispela i putim hevi long ol Juda i kamap Kristen, em ol i lain pinis long bihainim Lo. (Hib. 10:​1, 4, 10) Sampela strongpela Kristen olsem aposel Pita tu i hatwok long bihainim sampela bilong ol dispela nupela senis. (Apo. 10:​9-14; Gal. 2:​11-14) Ol dispela nupela bilip bilong ol i mekim na ol hetman bilong lotu Juda i birua tru long ol dispela Kristen.

5. Ol Kristen i mas was gut long wanem samting?

⁵ Ol Kristen Hibru i mas was gut long tupela lain i wok long birua long ol. Wanpela lain em ol hetman bilong lotu Juda em ol i mekim nogut long ol Kristen Hibru bikos ol i lusim lotu Juda. Narapela lain em sampela husat i tok ol i Kristen, em ol i strong long ol disaipel bilong Krais i mas wok yet long bihainim sampela Lo Bilong Moses, ating em bilong abrusim ol man i laik mekim nogut long ol. (Gal. 6:12) Wanem samting bai helpim ol Kristen i gat strongpela bilip long holimpas tok i tru?

6. Pol i strongim ol wanbilip bilong em long mekim wanem? (Hibru 5:14–6:1)

⁶ Long pas Pol i raitim long ol Hibru, em i kirapim ol wanbilip bilong em long stadi gut long Tok Bilong God na tingim tingim long bel. (Ritim Hibru 5:14–6:1.) Pol i yusim tok bilong Ol Skripsa Hibru long helpim ol brata bilong em  long luksave olsem pasin bilong mekim lotu Kristen em i gutpela moa winim lotu Juda. a Pol i save olsem taim ol Kristen i save gut moa long tok bilong God na kliagut moa long tok i tru, dispela bai helpim ol long luksave na sakim ol bilip giaman na bai i no gat wanpela samting i pulim ol i go longwe long God.

7. Wanem sampela hatwok yumi bungim long nau?

⁷ Wankain olsem ol Kristen Hibru, long nau yumi save bungim ol manmeri em ol i kamapim ol tok na ol bilip we i no stret wantaim ol stretpela lo bilong Jehova. Planti taim ol birua i sutim tok long yumi olsem yumi strong tumas long bihainim lo bilong Baibel long maritpasin, na ol i tok yumi no tingim ol narapela na yumi mekim pasin nogut. Ol pasin na tingting bilong ol man bilong graun i wok long i go longwe moa long tingting bilong God we i gutpela olgeta. (Prov. 17:15) Olsem na yumi mas strongim pasin bilong yumi long luksave na sakim ol tingting em ol birua i laik yusim bilong bagarapim bel bilong yumi o pulim yumi i go longwe long God.—Hib. 13:9.

8. Olsem wanem yumi ken taitim bun na wok yet long kamap strong long bilip?

⁸ I gutpela long yumi tingim na bihainim tok em aposel Pol i givim long ol Kristen Hibru long taitim bun na wok yet long kamap strong long bilip. Dispela i makim olsem yumi mas kisim save long ol bikpela tok i tru bilong Baibel na wok strong long kisim tingting bilong Jehova long ol samting. Yumi gat wok long mekim olsem yet bihain long yumi dediket na baptais. Maski yumi bin stap longpela taim long tok i tru o nogat, yumi olgeta i gat wok yet long ritim na stadi long Tok Bilong God. (Sng. 1:2) Taim yumi bihainim gutpela sediul bilong mekim pesenel stadi, dispela bai strongim bilip bilong yumi, em wanpela pasin aposel Pol i kolim long pas bilong em i go long ol Kristen Hibru.—Hib. 11:​1, 6.

“YUMI MAN I GAT BILIP, NA DISPELA BILIP I LUKAUTIM LAIP BILONG YUMI”

9. Wai na ol Kristen Hibru i mas i gat strongpela bilip?

⁹ Ol Hibru Kristen i mas i gat strongpela bilip bambai ol i ken abrusim traipela hevi bai kamap long Judia. (Hib. 10:​37-39) Jisas i givim tok lukaut long ol disaipel bilong em olsem taim ol i lukim ol ami i kam banisim Jerusalem, ol i mas ranawe i go long ol maunten. Dispela tok lukaut bilong em i go long olgeta Kristen, maski ol i stap insait long dispela taun o ol i stap ausait long taun. (Luk 21:​20-24) Ol man long dispela taim bipo i save hait insait long taun bilong ol i gat banis, olsem Jerusalem, bilong stap gut taim ol ami i kam banisim taun. Tasol bilong ranawe i go long ol maunten, em bai luk olsem em i no savetingting long mekim olsem so ol i mas i gat strongpela bilip bilong bihainim dispela tok.

10. Strongpela bilip bai kirapim ol Kristen long mekim wanem? (Hibru 13:17)

¹⁰ Ol Kristen Hibru i mas trastim ol man em Jisas i yusim bilong stiaim kongrigesen. Ol man i go pas long stiaim kongrigesen long dispela taim, ol i givim ol daireksen bilong helpim kongrigesen olgeta long bihainim daireksen bilong Jisas long wanem taim ol i ken lusim taun na hau ol i ken mekim olsem. (Ritim Hibru 13:17.) Tok Grik em ol i tanim long Hibru 13:17 olsem “bihainim tok” inap makim olsem man i bihainim tok bikos em i trastim man husat i givim ol daireksen. So aposel Pol i laik kirapim ol Kristen long ol i mas bihainim tok bikos ol i trastim ol brata i go pas long wok, na i no bikos em samting ol i mas mekim. Ol Kristen Hibru i mas wok strong long trastim ol man i go pas  long lukautim ol paslain long traipela hevi i kamap. Sapos ol Kristen i gat pasin bilong bihainim tok bilong ol man i go pas long ol long taim ol i stap bel isi, em bai isi moa long ol i bihainim tok bilong ol long taim bilong hevi.

11. Wai na em i bikpela samting long ol Kristen long nau i mas i gat strongpela bilip?

¹¹ Long nau yumi mas i gat wankain bilip olsem bilong ol manmeri em Pol i bin raitim pas long ol. Yumi stap long haptaim we planti manmeri i sakim tok o ol i tok bilas long tok lukaut bilong Baibel long pinis bilong dispela haptaim bilong nau. (2 Pita 3:​3, 4) Maski Baibel i stori long sampela samting we bai kamap long taim bilong traipela hevi tru, i gat planti samting em yumi no kliagut yet long en. Yumi mas bilip olsem pinis bilong dispela haptaim bilong nau bai kamap long taim stret Jehova i makim na Jehova bai lukautim yumi.—Hab. 2:3.

12. Wanem samting bai helpim yumi long abrusim bagarap bilong traipela hevi tru?

¹² Yumi mas strongim tu pasin bilong yumi long bilip long “gutpela wokboi i gat savetingting,” em lain Jehova i yusim bilong stiaim yumi long nau. (Mat. 24:45) Taim traipela hevi tru i kirap, ating yumi bai kisim ol instraksen we bai lukautim laip bilong yumi, wankain olsem ol Kristen Hibru i bin kisim ol tok bilong stiaim ol taim ami bilong Rom i kam banisim Jerusalem. Nau em taim bilong strongim pasin bilong yumi long trastim na bilipim ol daireksen yumi kisim long lain i go pas insait long oganaisesen bilong Jehova. Yumi bai hatwok long bihainim ol daireksen ol i givim long taim bilong traipela hevi tru, sapos yumi hatwok long bihainim long nau.

13. Wai na em i bikpela samting long bihainim tok i stap long Hibru 13:5?

¹³ Taim ol i wet long kisim toksave bilong ranawe, ol Kristen Hibru i mas holim liklik samting tasol bilong skin na sakim pasin bilong “laikim tumas mani.” (Ritim Hibru 13:5.) Sampela bilong ol i bin karim hevi long taim i gat bikpela hangre na pasin bilong stap rabis. (Hib. 10:​32-34) Maski ol i redi long karim hevi bilong helpim gutnius, ating bihain sampela bilong ol i bin kisim tingting olsem sapos ol i gat planti mani, dispela bai lukautim ol. Tasol mani i no inap lukautim ol long taim bikpela bagarap i laik painim ol. (Jems 5:3) Tru tru, sapos sampela i bin laikim mani kago bilong ol, ol bai pilim hatwok long lusim haus na ol mani kago bilong ol na ranawe.

14. Taim yumi gat strongpela bilip, dispela inap mekim wanem long ol disisen bilong yumi long sait bilong mani kago?

¹⁴ Yumi bai i gat laik long sakim pasin bilong bungim planti mani kago samting sapos yumi bilip strong olsem pinis bilong dispela haptaim bilong nau em i kam klostu tru. Ol manmeri “bai tromoi silva bilong ol long ol strit,” bikos ol bai luksave olsem “silva na gol bilong ol i no inap seivim ol long de bilong belhat bilong Jehova.” (Ese. 7:19) So yumi no ken putim tingting olgeta long bungim planti mani, nogat, yumi mas wokim ol disisen bilong holim liklik samting tasol na i gat stretpela tingting long i stap bilong yumi. Dispela i makim olsem yumi mas sakim traim bilong kisim bikpela dinau, o wok strong oltaim long bungim planti mani kago. Na tu, yumi mas was gut na bai yumi no ken laikim tumas ol samting yumi gat pinis. (Mat. 6:​19, 24) Ol samting inap kamap na traim yumi long sait bilong mani kago o ol narapela samting taim yumi wok long i go klostu moa long pinis bilong dispela haptaim bilong nau.

“YUPELA I MAS I GAT PASIN BILONG SANAP STRONG”

15. Wai na ol Kristen Hibru i mas i gat pasin bilong sanap strong?

¹⁵ Ol Kristen Hibru i mas i gat pasin bilong sanap strong taim ol samting long Judia i wok  long i go nogut na i traim bilip bilong ol. (Hib. 10:36) Maski ol man i bin mekim nogut tru long sampela bilong ol Kristen Hibru, planti bilong ol i bin kamap Kristen insait long haptaim we i gat bel isi. Pol i tok olsem maski ol i sanap strong na karim ol hevi we i traim bilip bilong ol, ol i no karim hevi i go inap long mak bilong dai wankain olsem Jisas bin karim. (Hib. 12:4) Tasol taim lotu Kristen i go bikpela, planti Juda em ol i birua long ol Kristen, ol i belhat nogut tru na ol i mekim nogut moa yet long ol. Sampela yia i go pinis, taim Pol i bin go kamap long Jerusalem, dispela i kirapim bikpela lain long bung na ol i laik kilim i dai Pol. Winim 40 man Juda i bung na ol i tok: “Mipela i mekim wanpela tok tru antap olsem mipela i no ken kisim wanpela liklik kaikai inap long mipela i kilim Pol i dai, na mipela i ken bagarap sapos mipela i no mekim olsem.” (Apo. 22:22; 23:​12-14) Maski ol lotu lain i belhat na ol i heitim tru ol Kristen, ol Kristen i mas wok yet long mekim lotu, autim gutnius, na mekim ol samting bilong stap strong long bilip.

16. Olsem wanem pas i go long ol Hibru i ken helpim yumi long sanap strong taim ol man i mekim pasin birua long yumi? (Hibru 12:7)

¹⁶ Wanem samting bai helpim ol Kristen Hibru long sanap strong taim ol man i birua long ol? Pol i save olsem ol i mas i gat stretpela tingting long ol hevi i painim ol. Em i tokim ol olsem God inap larim ol samting i kamap na i traim bilip bilong ol na dispela i olsem trening bilong ol olsem wanpela Kristen. (Ritim Hibru 12:7.) Kain trening olsem i ken helpim wanpela Kristen long kisim ol gutpela pasin na mekim ol dispela pasin i kamap gutpela moa. Taim ol Kristen Hibru i tingim ol gutpela samting i save kamap taim ol i sanap strong na karim hevi, dispela bai mekim na em bai isi moa long ol i sanap strong yet.—Hib. 12:11.

17. Pol i kisim wanem skul long pasin bilong sanap strong taim ol man i mekim nogut long em?

¹⁷ Pol i kirapim ol Kristen Hibru long tingting strong olsem ol bai sanap strong na karim hevi. Aposel Pol inap givim gutpela edvais long hau ol i ken sanap strong. Pastaim Pol yet i bin stap  olsem wanpela man bilong mekim nogut long ol Kristen, so em i save long wanem ol samting nogut inap painim ol. Na tu, em i save hau long sanap strong taim ol man i mekim nogut long em. Bikos bihain long em i kamap Kristen, em i bin karim hevi long han bilong planti man em ol i bin mekim nogut long em. (2 Kor. 11:​23-25) Olsem na Pol i save tru long wanem samting ol Kristen i mas mekim bilong sanap strong. Em i kirapim ol Kristen long tingim olsem taim ol i karim hevi, ol i no ken bilip long strong bilong ol yet, nogat. Ol i mas wetim Jehova i helpim ol. Pol i strongim bel na tok: “Jehova em i helpim bilong mi; mi no inap pret.”—Hib. 13:6.

18. Wanem samting bai painim yumi long bihain, na yumi mas mekim wanem bilong redim yumi yet?

¹⁸ Long nau, sampela bratasista bilong yumi i karim hevi long ol man i mekim nogut long ol. Yumi ken helpim ol long rot bilong beten long ol na sampela taim givim ol samting ol i nidim. (Hib. 10:33) Baibel i tokaut klia olsem: “Olgeta man husat i laik bihainim pasin bilong givim bel tru long God olsem ol disaipel bilong Krais Jisas, ol man bai mekim nogut long ol tu.” (2 Tim. 3:12) Em as na yumi olgeta i mas redi long wanem ol samting bai kamap long bihain. Yumi olgeta i mas wok yet long trastim tru Jehova na bilip tru olsem em bai helpim yumi long karim wanem ol hevi i painim yumi long bihain. Klostu nau, em bai pinisim hevi bilong olgeta gutpela wokman bilong em.—2 Tes. 1:​7, 8.

19. Yumi mas mekim wanem ol samting bilong redim yumi yet long taim bilong traipela hevi tru? (Lukim tu piksa.)

¹⁹ Tru tumas, pas em Pol i raitim long ol Kristen Hibru i helpim olgeta Kristen long taim bilong ol aposel long redi long traipela hevi bai painim ol long bihain. Pol i kirapim ol wanbilip bilong em long kisim sampela save moa na kliagut moa long ol tok bilong Ol Rait Holi. Taim ol i mekim olsem, ol bai luksave na sakim ol bilip we inap pundaunim ol long bilip. Em i kirapim ol long strongim bilip bilong ol na bai ol i ken bihainim gut ol daireksen ol i kisim long Jisas na ol man i go pas long ol insait long kongrigesen. Na em i helpim ol Kristen long strongim pasin bilong ol long sanap strong, long rot bilong holim stretpela tingting long ol hevi i painim ol na tingim ol dispela hevi olsem rot em gutpela Papa bilong ol long heven i yusim bilong trenim ol. Yumi tu i ken bihainim dispela tok Pol i mekim. Na long dispela rot, yumi tu i ken sanap strong i go inap long pinis.—Hib. 3:14.