1. Klostu nau Jisas bai mekim wanem?

 YUMI stap long haptaim we ol bikpela senis bai kamap! Klostu nau, Jisas bai skelim olgeta wan wan man. Jisas i stori long haptaim paslain long de bilong kot taim em i mekim tok profet long wanpela “sain” bai kamap bilong soim olsem em i kam i stap na “pinis bilong dispela taim i kamap pinis.” (Mat. 24:3) Dispela tok profet i stap long Matyu sapta 24 na 25, na tu, long Mak sapta 13 na Luk sapta 21.

2. Yumi bai stori long wanem samting long dispela atikol, na bilong wanem dispela bai helpim yumi?

² Jisas i kolim 3-pela tok piksa bilong givim ol tok lukaut long yumi. Em ol tok piksa bilong ol sipsip na ol meme, ol savemeri na ol krankimeri, na ol talen. Ol dispela tok piksa i helpim yumi long kliagut olsem Jisas bai skelim ol man long pasin ol i bin mekim. Taim yumi skelim ol dispela tok piksa, yumi bai luksave long ol lesen yumi kisim na hau yumi ken bihainim ol dispela lesen. Namba 1 tok piksa yumi bai skelim em tok piksa bilong ol sipsip na ol meme.

OL SIPSIP NA OL MEME

3. Wanem taim bai Jisas i skelim ol man?

³ Long tok piksa bilong ol sipsip na ol meme, Jisas i tok em bai skelim ol man olsem ol i bin putim yau na bihainim gutnius na ol i bin sapotim ol brata bilong Krais, o nogat. (Mat. 25:​31-46) Klostu long pinis bilong “traipela hevi tru,” em bai skelim ol man olsem ol sipsip o ol meme paslain long pait bilong Armagedon i kirap. (Mat. 24:21) Olsem wanpela wasman i save tilim ol sipsip i go long wanpela sait na ol meme i go long narapela sait, Jisas bai tilim ol man i sapotim gut ol brata bilong Krais i go long wanpela sait na ol man i no bin mekim olsem i go long narapela sait.

4. Olsem Aisaia 11:​3, 4 i kamapim, wai na yumi ken bilip tru olsem Jisas bai bihainim stretpela pasin taim em i kotim ol manmeri? (Lukim tu piksa.)

 ⁴ Baibel i tok profet olsem Jas em Jehova i bin makim, em Jisas, em bai mekim stretpela pasin taim em i kotim ol manmeri. (Ritim Aisaia 11:​3, 4.) Em i save skelim pasin na toktok bilong ol manmeri, na em i save skelim tu pasin ol i mekim long ol Kristen God i bin makim. (Mat. 12:​36, 37; 25:40) Jisas bai save long husat i bin sapotim ol brata bilong Krais na ol wok ol i bin mekim. a Wanpela nambawan rot ol man i olsem sipsip i sapotim ol brata bilong Krais em long mekim wok autim tok. Ol lain i sapotim ol brata bilong Krais, Jisas bai skelim ol olsem “ol stretpela man” na rot bai op long ol inap kisim “laip inap oltaim oltaim” long graun. (Mat. 25:46; Rev. 7:​16, 17) Tru tumas, dispela em i gutpela pe ol man i stap gut long God inap kisim! Sapos ol i holimpas yet bilip long taim bilong traipela hevi tru na ol i mekim olsem tu bihain long dispela, nem bilong ol bai stap yet long “buk bilong laip.”—Rev. 20:15.

5. Yumi kisim wanem skul long tok piksa bilong ol sipsip na ol meme, na dispela tok piksa inap helpim husat?

⁵ Holimpas bilip na stap gut long God. Long tok piksa bilong Jisas long ol sipsip na ol meme, em i stori moa long ol lain i bilip na wet long kisim laip oltaim long graun. Ol i soim olsem ol i gat bilip taim ol i helpim ol brata bilong Krais long mekim wok autim tok, na tu, taim ol i redi long daun na bihainim daireksen i kam long gutpela wokboi i gat savetingting em Jisas i bin makim ol. (Mat. 24:45) Tasol ol Kristen em ol i bilip na wet long kisim laip long heven, ol tu i mas bihainim tok lukaut i stap long dispela tok piksa. Bilong wanem? Bikos Jisas bai skelim gut pasin na toktok bilong ol tu. Ol tu i mas soim olsem ol i holimpas bilip. Jisas i stori tu long 2-pela narapela tok piksa i gat ol tok lukaut i go long ol Kristen God i bin makim. Ol dispela tok piksa i stap tu long Matyu sapta 25. Nau yumi ken stori long tok piksa bilong ol savemeri na ol krankimeri.

OL SAVEMERI NA OL KRANKIMERI

6. Long ol dispela 10-pela yangpela meri, olsem wanem faivpela i soim olsem ol i savemeri? (Matyu 25:​6-10)

⁶ Long tok piksa bilong ol yangpela meri, Jisas i stori long 10-pela yangpela meri em ol i go bilong bungim man i laik marit. (Mat. 25:​1-4) Ol i laik go wantaim man i laik marit long marit kaikai bilong em. Jisas i tok faivpela bilong ol i “savemeri” na narapela faivpela ol i “krankimeri.” Ol savemeri ol i redi na was i stap. Ol i redi long wetim dispela man i laik marit long i kam, maski ol i mas wet i go inap biknait. Olsem na ol i bringim ol lam bilong ol long givim lait long ol long tudak. Na ol i bringim tu sampela oil i kam wantaim ol nogut man i laik marit i no kam hariap. So ol i redi long mekim samting na bai lam bilong ol i no ken i dai. (Ritim Matyu 25:​6-10.) Taim man i laik marit i kam kamap, ol savemeri i go insait wantaim em long dispela marit kaikai. Long wankain pasin, ol Kristen God i bin makim em ol i soim olsem ol i redi na was i stap na holimpas bilip inap long taim Krais i kam, ol bai kisim gutpela pe bilong i go wantaim Man i Laik Marit, em Jisas, insait long Kingdom bilong em long heven. b (Rev. 7:​1-3) Tasol olsem wanem long dispela 5-pela krankimeri?

7. Wanem samting i painim dispela 5-pela krankimeri, na bilong wanem?

⁷ Ol savemeri i bin redi i stap, tasol ol dispela 5-pela krankimeri i no redi i stap taim man i laik marit i kam kamap. Ol lam bilong ol i laik i dai, tasol ol i no bringim sampela oil i kam wantaim ol. Taim ol i harim olsem man i laik marit i wok long i kam klostu, ol i go baim oil. Na ol i  no kam bek taim man i laik marit i kam kamap pinis. Long dispela taim, “ol yangpela meri husat i redi i stap ol i go insait wantaim em long dispela marit kaikai, na ol man i pasim dua.” (Mat. 25:10) Bihain taim ol dispela krankimeri i kam bek na ol i laik i go insait, man i laik marit i tokim ol: “Mi no save long yupela.” (Mat. 25:​11, 12) Ol dispela krankimeri i no redi long wet i stap i go inap long man i laik marit i kam kamap. Ol Kristen God i bin makim inap kisim wanem skul long dispela tok piksa?

8-9. Ol Kristen God i bin makim i ken kisim wanem skul long tok piksa bilong ol yangpela meri? (Lukim tu piksa.)

⁸ Redi na was i stap. Tok piksa bilong Jisas i no makim olsem bai i gat 2-pela grup bilong ol Kristen God i bin makim, olsem wanpela grup em ol bai redi long wet i stap i go inap long pinis bilong haptaim bilong nau, na narapela grup em ol i no inap mekim olsem. Em i stori long samting inap kamap sapos ol i no redi long sanap strong long bilip i go inap long pinis i kamap. Sapos ol i no redi na was i stap, ol bai no inap kisim gutpela pe bilong ol. (Jon 14:​3, 4) Dispela em i wanpela bikpela tok lukaut ol i mas tingim gut! Maski yumi bilip na wet long kisim laip long heven o long graun, yumi olgeta i mas tingim gut tok lukaut i stap long tok piksa bilong ol yangpela meri. Yumi olgeta wan wan i mas was i stap na redi long sanap strong i go inap long pinis.—Mat. 24:13.

⁹ Bihain long Jisas i stori long tok piksa bilong ol yangpela meri bilong soim olsem em i bikpela samting long ol Kristen i mas redi na was i stap, em i stori long tok piksa bilong ol talen. Dispela tok piksa i skulim yumi olsem em i bikpela samting long yumi mas givim bel long mekim wok.

OL TALEN

10. Olsem wanem 2-pela wokboi i soim olsem ol i stap gut long bosman bilong ol? (Matyu 25:​19-23)

¹⁰ Long tok piksa bilong ol talen, Jisas i stori long 2-pela wokboi em ol i stap gut long bosman bilong ol na narapela wokboi husat i no bin mekim olsem. (Mat. 25:​14-18) Dispela tupela wokboi i givim bel tru long mekim wok na ol i helpim bosman bilong ol long kisim sampela moa winmani. Paslain long bosman i go  long wanpela longwe ples, em i givim ol talen long ol wokboi bilong em—dispela em i bikpela mani tru. Tupela gutpela wokboi i givim bel tru long mekim wok na ol i yusim gut dispela mani. Wanem gutpela samting i kamap? Taim bosman bilong ol i kam bek, winmani ol i kisim i wankain olsem mani bosman i bin givim long ol. Bosman i tok amamas long ol, na tupela i “amamas wantaim bosman bilong [ol].” (Ritim Matyu 25:​19-23.) Tasol olsem wanem long namba 3 wokboi? Em i mekim wanem long mani em bosman i bin givim long em?

11. Wanem samting i kamap long wokboi husat i “lesman,” na bilong wanem?

¹¹ Namba 3 wokboi i kisim wanpela talen, tasol em i “lesman.” Bosman i laik bai em i yusim gut dispela talen. Tasol em i go digim graun na haitim dispela talen. Taim bosman i kam bek, dispela wokboi i no gat winmani bilong givim long bosman. Namba 3 wokboi i no gat gutpela pasin. Em i no tok sori long bosman olsem em i no kisim winmani long talen em i bin kisim, nogat. Em i mekim pasin i no stret taim em i kolim bosman bilong em olsem “hatpela man.” Olsem na bosman i no orait long em. Na em i rausim dispela talen long han bilong dispela wokboi na rausim em i go ausait long haus bilong em.—Mat. 25:​24, 26-30.

12. Dispela tupela gutpela wokboi i makim husat long nau?

¹² Dispela tupela gutpela wokboi i makim ol Kristen God i bin makim em ol i holimpas bilip. Bosman i makim Jisas, na em i invaitim ol long “kam na amamas wantaim bosman bilong [ol].” Ol i kisim gutpela pe bilong go long heven, na dispela em namba 1 kirap bek. (Mat. 25:​21, 23; Rev. 20:5b) Tasol wokboi husat em i lesman, eksampel bilong em i stap olsem tok lukaut i go long ol Kristen God i bin makim. Bilong wanem yumi tok olsem?

13-14. Ol Kristen God i bin makim i kisim wanem skul long tok piksa bilong ol talen? (Lukim tu piksa.)

¹³ Givim bel na wok strong tru. Long tok piksa bilong ol talen, wankain long tok piksa bilong ol yangpela meri, tok bilong Jisas i no makim olsem ol Kristen God i bin makim bai kamap lesman na lesmeri, nogat. Em i givim tok lukaut long samting inap kamap sapos ol i  lusim pasin bilong givim bel long mekim wok. Sapos dispela i kamap, ol bai i no inap “kisim dispela samting God i singautim na makim bilong [ol] long kisim,” na em bai i no inap orait long ol i go insait long Kingdom bilong heven.—2 Pita 1:10.

¹⁴ Ol tok piksa bilong Jisas long ol yangpela meri na ol talen i soim klia olsem olgeta Kristen God i bin makim, ol i mas redi na was i stap na givim bel na wok strong tru long mekim wok bilong God. Tasol yu ting Jisas i mekim sampela moa tok i olsem tok lukaut long ol Kristen God i bin makim? Yes, em i bin mekim olsem! Ol tok Jisas i mekim long Matyu 24:​40, 41 i stori tu long laspela kot bilong ol Kristen God i bin makim.

“GOD BAI KISIM HUSAT I GO”?

15-16. Olsem wanem tok bilong Matyu 24:​40, 41 i soim olsem ol Kristen God i bin makim i mas was i stap?

¹⁵ Paslain long Jisas i stori long dispela 3-pela tok piksa, em i stori long ol Kristen God i bin makim bai kisim laspela mak we bai kamapim klia olsem Jehova i orait long husat bilong ol. Jisas i mekim tok piksa long tupela man i wok i stap long gaden na tupela meri i memeim wit i stap. Long dispela tupela stori, i luk olsem dispela tupela man i mekim wankain wok na dispela tupela meri i mekim wankain wok, tasol Jisas i tok: “God bai kisim wanpela i go na lusim narapela i stap.” (Ritim Matyu 24:​40, 41.) Na bihain em i strongim ol disaipel bilong em na em i tok: “Olsem na yupela i mas was i stap, long wanem, yupela i no save long wanem de Bikpela bilong yupela bai i kam.” (Mat. 24:42) Jisas i mekim wankain tok bihain long em i stori long tok piksa bilong ol yangpela meri. (Mat. 25:13) Yu ting dispela 2-pela tok piksa i stori long wankain samting? Yumi ken ting olsem, bikos God bai ‘kisim i go’ ol Kristen em i bin makim em ol i holimpas bilip na ol bai mekim wok king wantaim Jisas long Kingdom long heven.—Jon 14:3.

¹⁶ Was i stap. Ol Kristen God i bin makim em ol i no was i stap long sait bilong bilip, Jisas bai i no inap bungim ol wantaim “lain God i bin makim.” (Mat. 24:31) Olgeta manmeri bilong God, maski ol i bilip long kisim laip long heven o long graun, ol i mas tingim tok bilong Jisas olsem tok lukaut na ol i mas was i stap na holimpas yet bilip.

17. Wai na yumi no ken kwestenim disisen bilong Jehova long makim sampela Kristen long taim bilong yumi long go long heven?

¹⁷ Yumi save gut tru long Jehova, olsem na yumi bilip tru olsem oltaim em bai mekim stretpela disisen. Yumi no inap kwestenim disisen bilong Jehova long makim sampela Kristen long taim bilong yumi em ol i holimpas bilip long go long heven. c Yumi tingim tok piksa Jisas i mekim long ol wokman i kam wok long gaden wain long namba 11 aua. (Mat. 20:​1-16) Ol wokman em papagraun i singautim ol long kam wok long gaden wain long apinun, ol i kisim wankain pe em ol wokman i kam wok long kirap bilong de i kisim. Long wankain pasin, maski God i makim ol Kristen long go long heven long wanem taim, olgeta bai kisim gutpela pe bilong go long heven sapos ol i holimpas yet bilip na stap gut long em.

BIHAINIM OL TOK LUKAUT

18-19. Yumi bin stori long wanem ol skul yumi ken kisim na wanem ol tok lukaut?

¹⁸ Yumi bin stori long wanem ol samting? Long ol Kristen em ol i bilip na wet long kisim laip oltaim long graun, tok piksa bilong ol sipsip na ol meme i soim olsem ol i mas wok yet long stap gut long bilip na stap gut long Jehova long nau na long taim bilong traipela hevi tru em klostu nau bai kamap. Na bihain, em  paslain long pait bilong Armagedon i kamap, Jisas bai skelim ol man i holimpas bilip olsem ol i gutpela inap long “kisim laip inap oltaim oltaim.”—Mat. 25:46.

¹⁹ Yumi bin skelim tu 2-pela tok piksa i givim ol tok lukaut long ol Kristen God i bin makim. Long tok piksa Jisas i mekim long ol savemeri na ol krankimeri, faivpela bilong ol i soim olsem ol i gat savetingting. Ol i redi na was i stap na ol i wetim man i laik marit long i kam kamap, maski ol i mas wet i go inap long biknait. Tasol ol krankimeri i no redi i stap. Olsem na man i laik marit i no orait long ol i go insait long marit kaikai bilong em. Yumi tu i mas redi long wet i stap i go inap long taim Jisas i pinisim haptaim bilong nau, maski yumi mas wet longpela taim. Na tu, long tok piksa bilong Jisas long ol talen, yumi skelim stori bilong tupela gutpela wokboi em ol i givim bel na wok strong tru long mekim wok. Tupela i givim bel long mekim wok na ol i kisim winmani bilong givim long bosman, olsem na bosman i amamas long tupela. Tasol bosman i sakim dispela wokboi husat i no mekim gut wok. Yumi kisim wanem skul long dispela? Yumi mas givim bel long mekim wok bilong Jehova i go inap long pinis. Na laspela samting yumi stori long en em olsem, ol Kristen God i bin makim i mas wok yet long was i stap na bai Jisas i ‘kisim ol i go’ long heven, em gutpela pe ol bai kisim. Ol i amamas long wetim dispela taim we ol bai “bung bilong i stap wantaim” Jisas long heven. Na bihain long pait bilong Armagedon, ol bai stap olsem meri bilong Jisas long taim bilong Pikinini Sipsip long marit.—2 Tes. 2:1; Rev. 19:9.

20. Jehova bai mekim wanem long ol man i bihainim ol tok lukaut bilong em?

²⁰ De bilong kot bilong God i wok long kam klostu tru, tasol i no gat wok long yumi pret. Sapos yumi holimpas yet bilip, gutpela Papa bilong yumi long heven bai givim yumi “dispela strong i winim strong bilong yumi ol man” na bai yumi ken “sanap long ai bilong Pikinini bilong man.” (2 Kor. 4:7; Luk 21:36) Maski yumi bilip na wet long kisim laip long heven o long graun, yumi bai amamasim Papa bilong yumi sapos yumi bihainim ol tok lukaut i stap long ol tok piksa Jisas i bin mekim. Long rot bilong bikpela pasin helpim bilong Jehova, ol nem bilong yumi bai “stap pinis long buk” bilong laip.—Dan. 12:1; Rev. 3:5.