1-2. Wanem samting i mekim lain bilong God i stap amamas? (Jems 1:​22-25)

 JEHOVA na Pikinini bilong em i laik bai yumi stap amamas. Man bilong raitim Buk Song 119:2 i tok: “Ol man i bihainim ol tok bilong em, na i givim bel tru long painim em, ol i ken amamas.” Jisas i tok moa olsem: “Ol man i harim tok bilong God na bihainim, ol i ken amamas!”—Luk 11:28.

² Yumi ol manmeri i lotuim Jehova, yumi lain bilong stap amamas. Bilong wanem? Yumi gat planti risen long stap amamas, tasol wanpela risen na yumi stap amamas em bikos yumi save ritim Tok Bilong God long olgeta taim na wok strong long bihainim ol skul yumi kisim.—Ritim Jems 1:​22-25.

3. Yumi kisim wanem helpim taim yumi bihainim ol skul yumi kisim long Tok Bilong God?

³ Yumi kisim helpim long planti rot taim yumi “kamap ol man bilong bihainim tok.” Olsem, yumi amamasim Jehova taim yumi bihainim ol skul yumi kisim long Baibel, na dispela i save mekim yumi amamas. (Ekl. 12:13) Taim yumi bihainim ol skul yumi kisim long Tok Bilong God, dispela i helpim i stap bilong famili bilong yumi na yumi strongim pasin pren namel long yumi na ol wanbilip. Ating dispela i kamap tru long laip bilong yu. Na moa yet, yumi abrusim ol hevi i save painim ol man em ol i no bihainim ol lo bilong Jehova. Tru tumas, yumi wanbel long tok bilong King Devit. Em i mekim singsing i kolim ol lo, ol tok, na ol disisen bilong Jehova, na bihain em i pinisim tok olsem: “Man i bihainim ol, em bai kisim gutpela pe tru.”—Sng. 19:​7-11.

4. Wai na yumi inap pilim hatwok long ritim na bihainim Tok Bilong God long olgeta taim?

⁴ Em tru olsem, em i no isi long yumi ritim na bihainim Tok  Bilong God long olgeta taim. Planti taim yumi save bisi, tasol yumi mas lusim haptaim long ritim na stadi long Baibel na bai yumi kliagut long samting Jehova i laik bai yumi mas mekim. So yumi ken skelim sampela rot we i ken helpim yumi long ritim Baibel long olgeta de. Na tu, yumi bai stori long ol samting we bai helpim yumi long tingim gut ol tok yumi ritim na luksave long ol rot yumi ken bihainim ol skul yumi kisim.

MAKIM HAPTAIM LONG RITIM TOK BILONG GOD

5. Wanem ol wok i save kisim bikpela haptaim bilong yumi?

⁵ Planti wokman bilong Jehova i save bisi tru. Yumi save lusim bikpela haptaim long mekim ol samting em Baibel i kolim olsem ol bikpela samting. Olsem, planti bilong yumi i save mekim wok mani bilong lukautim yumi yet na famili bilong yumi. (1 Tim. 5:8) Planti Kristen i save lukautim ol wanfamili bilong ol em ol i gat sik o ol i lapun. Na yumi olgeta i mas lukautim helt bilong yumi, na dispela i save kisim bikpela haptaim tu. Yumi save mekim ol dispela wok, na tu, yumi gat ol wok insait long kongrigesen. Wanpela bikpela wok yumi save mekim em long givim bel tru long autim tok. Yumi olgeta wan wan i gat planti wok bilong mekim, olsem na hau yumi ken painim haptaim bilong ritim Baibel long olgeta taim, tingim tingim long bel, na bihainim ol tok yumi ritim?

6. Yu ken mekim wanem bilong givim bel long ritim Baibel? (Lukim tu piksa.)

⁶ Pasin bilong ritim Baibel em wanpela bilong ol “bikpela samting” long yumi ol Kristen, olsem na yumi mas givim bel long mekim olsem. (Fili. 1:10) Buk Song sapta 1 i stori long man i save amamas, na em i tok: “Dispela man i save amamas long lo bilong Jehova, na em i save ritim isi isi dispela lo long san na long nait.” (Sng. 1:​1, 2) Dispela i makim olsem yumi mas makim haptaim long ritim Baibel. Wanem taim em i gutpela taim long ritim Baibel? Ating yumi olgeta wan wan i gat narapela narapela bekim long dispela askim. Tasol bikpela samting em olsem, yumi mas makim wanpela haptaim we yumi ken ritim Baibel long olgeta taim.  Wanpela brata nem bilong em Victor, em i tok: “Mi save amamas long ritim Baibel long moning. Mi no man bilong kirap long bikmoning, tasol mi save kirap long ritim Baibel bikos long dispela taim i no gat planti samting i save pulim nabaut tingting bilong mi. Tingting bilong mi i save stap klia na mi inap tingim gut ol tok mi ritim.” Ating yu tu i pilim olsem. Yu ken askim yu yet olsem, ‘Wanem taim em i gutpela taim long mi ken ritim Baibel?’

TINGIM GUT OL TOK YU RITIM

7-8. Wanem samting inap pasim yumi long kisim helpim long ol tok yumi ritim? Stori long tok piksa.

⁷ Em tru olsem maski yumi ritim planti buk na nius samting, yumi no inap tingim gut ol tok yumi ritim. Yu bin ritim sampela tok na sotpela haptaim bihain yu no inap tingim moa ol tok yu ritim? Dispela samting i save painim yumi olgeta. Sori tru olsem kain samting inap kamap long Baibel ritim bilong yumi. Ating yumi putim mak long ritim sampela sapta bilong Baibel long olgeta wan wan de. Em gutpela long mekim olsem. Yumi mas putim ol mak na wok strong long winim ol dispela mak. (1 Kor. 9:26) Pasin bilong ritim Baibel em gutpela samting, tasol em kirap tasol bilong en. Yumi mas mekim sampela samting moa sapos yumi laik kisim helpim taim yumi ritim Tok Bilong God.

⁸ Tingim dispela tok piksa: Ren wara i save helpim gut ol samting i gat laip. Tasol sapos bikpela ren tru i pundaun insait long sotpela haptaim, graun bai pulap tru long wara. Sapos dispela samting i kamap, orait ren i no mekim gutpela wok. Graun i nidim sampela haptaim long kisim gut ren wara we i pundaun pinis bilong helpim ol diwai na plaua samting long gro gut. Olsem tasol, yumi mas abrusim pasin bilong ritim Baibel hariap hariap, olsem ritim hariap ol tok na nau yumi no lusim haptaim long tingim gut ol dispela tok na bihainim.—Jems 1:24.

9. Yumi mas mekim wanem sapos yumi kisim pasin bilong hariap hariap tasol long ritim Baibel?

⁹ Olsem wanem? Sampela taim yu luksave olsem yu save hariap hariap tasol long ritim Baibel? Yu mas mekim wanem? Ritim isi isi. Lusim sampela haptaim long tingim gut ol tok yu wok long ritim o ol tok em nau tasol yu ritim. Dispela  em i no hatwok long mekim. Ating yu ken lusim sampela haptaim moa long mekim stadi bilong yu yet na bai yu ken tingim tingim long bel ol tok yu ritim. O yu ken makim sampela ves tasol long ritim na yusim bikpela haptaim i stap yet long tingim gut ol tok yu ritim. Victor, em yumi stori pinis long em, em i tok: “Mi save ritim liklik hap tasol bilong Baibel, olsem wanpela sapta. Mi save rit long bikmoning tru, olsem na long de olgeta mi inap tingim ol tok mi ritim.” Maski wanem rot yu bihainim, em i bikpela samting long ritim Baibel long pasin we inap helpim yu long tingim gut ol tok yu ritim.—Sng. 119:97; lukim blok “ Ol Askim Bilong Skelim.”

10. Stori long olsem wanem yu ken bihainim ol tok yu wok long lainim. (1 Tesalonaika 5:​17, 18)

¹⁰ Maski wanem taim yu ritim Baibel o hamas haptaim yu lusim long mekim olsem, i gutpela yu luksave long ol rot yu ken bihainim ol tok yu ritim. Taim yu ritim wanpela tok long Baibel, askim yu yet, ‘Hau mi ken bihainim dispela tok long nau o long bihain?’ Olsem, piksaim long tingting olsem yu ritim 1 Tesalonaika 5:​17, 18. (Ritim.) Bihain long yu ritim dispela tupela ves, yu ken stop na tingim olsem, yu save beten planti taim o nogat, na taim yu beten yu save kolim stret ol samting yu pilim long bel o nogat. Na tu, yu ken tingim ol samting yu amamas long en. Ating yu laik tok tenkyu long Jehova long 3-pela samting. Maski yu lusim sampela minit tasol long putim tingting olgeta long ol tok yu ritim, dispela bai helpim yu long kamap olsem man bilong harim na bihainim Tok Bilong God. Tingim helpim yu inap kisim taim yu bihainim wankain pasin long olgeta taim yu ritim wanpela hap bilong Baibel! Taim yu mekim olsem, yu bai kamap olsem man bilong bihainim Tok Bilong God. Tasol olsem wanem sapos yu pilim olsem i gat planti samting em yu mas kamap gutpela moa long en?

PUTIM OL MAK YU INAP WINIM

11. Wai na sampela taim yu inap pilim olsem i gat planti samting em yu mas kamap gutpela moa long en? Stori long wanpela eksampel.

¹¹ Taim yu ritim Baibel na yu luksave long ol rot yu ken bihainim ol tok yu ritim, sampela taim yu inap pilim olsem i gat planti samting em yu mas kamap gutpela moa long en. Tingim dispela: Baibel ritim bilong yu long nau i stori long tok kaunsel long no ken mekim wansait pasin. (Jems 2:​1-8) Yu luksave olsem yu mas kamap gutpela moa long pasin yu mekim long ol narapela, so yu laik mekim sampela senis. Em gutpela tru! Na tumora yu ritim wanpela ves i stori olsem em i bikpela samting long yu mas bosim gut toktok bilong yu. (Jems 3:​1-12) Yu luksave olsem sampela taim yu save mekim ol tok i no stret. So nau yu tingting strong long mekim ol gutpela tok bilong strongim ol narapela. Baibel ritim bilong yu long neks de i givim  tok lukaut olsem yu no ken stap pren bilong ol manmeri i stap longwe long God. (Jems 4:​4-12) Yu luksave olsem yu mas makim gut ol samting yu laik mekim bilong kisim amamas. Long de namba 4, yu inap pilim olsem i gat planti samting em yu mas kamap gutpela moa long en.

12. Wai na yu no ken bel hevi sapos Baibel ritim bilong yu i kamapim klia olsem yu mas mekim ol senis? (Lukim tu futnot.)

¹² Sapos i gat planti samting yu mas mekim senis o kamap gutpela moa long en, orait no ken bel hevi. Dispela i kamapim klia olsem yu gat gutpela bel. Taim yumi gat pasin daun, yumi bai ritim Baibel na luksave long ol rot yumi ken kamap gutpela moa long ol pasin bilong yumi. a Tingim tu olsem, bilong kisim “nupela pasin” em wanpela samting yumi mas wok yet long mekim. (Kol. 3:10; skelim tu stadi nout bilong dispela tok “dispela pasin i wok long kamap nupela” long Inglis Baibel.) Wanem samting bai helpim yu long stap yet olsem man bilong bihainim Tok Bilong God?

13. Hau yu ken putim ol mak em yu inap winim? (Lukim tu piksa.)

¹³ Yu ken putim ol mak em yu inap winim, na no ken traim long bihainim olgeta tok yu ritim long wankain taim. (Prov. 11:2) Yu ken traim dispela rot: Wokim wanpela lista bilong ol samting em yu mas kamap gutpela moa long en, na bihain makim wanpela o tupela bilong ol na wok long ol pastaim, na isi isi yu ken wok long ol narapela. Yu ken stat long mekim wanem samting pastaim?

14. Yu ken putim wanem ol mak pastaim?

¹⁴ Ating fes samting yu ken mekim em traim putim wanpela mak em isi moa long yu inap winim. O yu ken putim mak long kamap gutpela moa long wanpela pasin em yu ting yu mas winim  pastaim. Taim yu putim pinis wanpela mak yu laik winim, orait yu ken mekim wok painimaut long ol pablikesen bilong yumi, ating yu ken yusim Watch Tower Publications Index o Stadi Indeks Bilong Ol Witnes Bilong Jehova. Beten long Jehova na askim em long givim yu “dispela laik na strong long mekim ol samting em yet i laikim.” (Fili. 2:13) Na bihainim ol skul yu kisim. Taim yu luksave olsem yu winim pinis fes mak yu putim, dispela bai kirapim yu long givim bel long winim narapela mak. Tru tumas, taim yu luksave olsem yu kamap gutpela moa long wanpela pasin Kristen bilong yu o wanpela samting long i stap bilong yu, yu bai pilim olsem em isi moa long mekim olsem long ol narapela samting tu.

LARIM TOK BILONG GOD I “WOK I STAP INSAIT LONG YUPELA”

15. Olsem wanem lain bilong Jehova i no wankain long planti man em ol i save ritim Baibel? (1 Tesalonaika 2:13)

¹⁵ Sampela man i tok ol i bin ritim Baibel planti taim tru. Tasol olsem wanem? Tru tru ol i bilipim ol tok bilong Baibel? Ol i bihainim ol dispela tok o larim ol dispela tok i senisim ol samting ol i mekim long laip bilong ol? Sori tru, planti bilong ol i no mekim olsem. Tasol lain bilong Jehova i no wankain olsem ol! Olsem ol Kristen long taim bilong ol aposel, yumi bilip olsem Baibel em i “tok bilong God, na tru tru i olsem.” Na moa yet, yumi wok strong long bihainim ol dispela tok long laip bilong yumi.—Ritim 1 Tesalonaika 2:13.

16. Wanem samting inap helpim yumi long kamap ol man bilong bihainim Tok?

¹⁶ Sampela taim i hatwok long ritim Tok Bilong God na bihainim. Yumi inap pilim hatwok long painim haptaim long ritim Baibel. O yumi inap ritim Baibel hariap hariap na yumi no tingim gut ol tok yumi ritim. O yumi inap pilim olsem i gat planti samting tumas em yumi mas kamap gutpela moa long en. Maski yu pilim hatwok long mekim ol dispela samting, yu inap winim ol dispela hevi. Jehova i ken helpim yu long mekim olsem. Yumi ken tingting strong long larim Jehova i helpim yumi na yumi laik kamap ol man bilong bihainim Tok na i no ol man bilong harim nating tasol. Tru tumas, taim yumi ritim Tok Bilong God long olgeta taim na bihainim long laip bilong yumi, yumi bai stap amamas tru.—Jems 1:25.