Planti Man Long Olgeta Hap i Save Askim God Long Wankain Samting

PIKSAIM long tingting olsem planti milion manmeri, inap olsem sampela bilion, ol i askim nambawan bikman long heven na graun long wankain samting. Tasol planti bilong ol i no save gut long samting ol i askim long en. Yu ting kain samting olsem inap kamap? Yes, kain samting olsem i save kamap long olgeta de. Ol dispela manmeri i askim long wanem samting? Ol i askim long Kingdom Bilong God i mas i kam!

I gat 37,000 narapela narapela lotu i tok ol i Kristen na ol i tok Jisas Krais em i Lida bilong ol. Winim 2 bilion manmeri ol i insait long ol dispela lotu. Planti ol i save kolim wanpela beten em planti man i save kolim Papa Bilong Mipela. Yu save long dispela beten? Jisas i bin lainim ol disaipel bilong em long dispela beten, em kirap bilong en i olsem: “Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”​​—⁠Matyu 6:​9, 10.

Inap planti handet yia pinis, ol man i bin kolim dispela beten taim ol i bung long ol haus lotu. Na ol i bin kolim dispela beten taim ol i bung wantaim famili o long taim ol i stap wanpis​—⁠long gutpela taim na long taim nogut. Taim ol i beten, ol i bin pilim tru ol tok long bel. Tasol planti narapela, em ol i bin lainim ol tok bilong dispela beten, ol i save kolim nating tasol. Tasol i no ol dispela lotu bilong Kristendom tasol i bin beten long Kingdom Bilong God i mas i kam, nogat.

Ol Lotu i No Kristen Ol Tu i Beten Long Dispela Samting

Wanpela beten em planti man bilong lotu Juda i save long en, em beten ol i kolim Kadis. Ol i save kolim dispela beten taim wanpela wanblut i dai, maski ol tok bilong dispela beten i no stori tumas long dai o bel sori. Dispela beten i tok: “[God] i mas kamapim Kingdom bilong em long taim bilong yu . . . , na kamapim kwiktaim.” * Narapela beten bilong bipo ol Juda i save mekim insait long haus lotu bilong ol, em i stori long Kingdom Bilong Mesaia long famili bilong Devit.

 Lain bilong ol lotu i no gat nem Kristen ol tu i tingim Kingdom Bilong God. Nius The Times of India i kamapim tok bilong wanpela hetman bilong lotu long India husat i bin stap olsem 100 yia i go pinis na em i laik painim wanpela tok ol Hindu na Muslim na Kristen i ken wanbel long en. Em i tok: “Bilong kingdom tru bilong God i ken kamap, pastaim lain bilong is na lain bilong wes i mas stap olsem wanpela lain.” Na i no longtaim i go pinis, het tisa bilong wanpela kolis bilong Islam long Strathfield, Australia, i raitim pas long wanpela niuspepa na i tok: “Wankain olsem olgeta Muslim, mi tu i bilip olsem Jisas bai kam bek na kamapim Kingdom tru bilong God.”

Em nau, i gat planti bilion manmeri ol i wetim na beten long Kingdom Bilong God i mas i kam. Tasol tingim dispela samting:

Ating yu save pinis olsem mipela lain Witnes Bilong Jehova husat i wokim dispela magasin, mipela i save go long ol haus long hap bilong yu bilong toktok wantaim ol manmeri long Baibel. Mipela i save mekim dispela wok long olgeta hap bilong graun, long 236 kantri na winim 400 tok ples. Nambawan bikpela tok mipela i autim em Kingdom Bilong God. Nem olgeta bilong dispela magasin em Wastaua i Tokaut Long Kingdom Bilong Jehova. Planti taim mipela i save askim ol man, “Yu save beten long Kingdom Bilong God i mas i kam?” Planti i tok yes. Tasol taim mipela i askim ol long dispela Kingdom em i wanem samting, planti i tok, “Mi no save,” o bekim bilong ol i kamapim olsem ol i no klia tumas.

Bilong wanem planti man i beten long Kingdom i mas i kam, tasol ol i no save em i wanem samting tru? Yu ting Kingdom Bilong God em samting i hatwok long kliagut long en? Nogat. Baibel i kamapim klia Kingdom em i wanem samting. Na narapela samting tu, ol tok Baibel i mekim long Kingdom inap givim yu gutpela samting bilong bilip na wet long en nau long dispela taim nogut yumi stap long en. Tupela stori i kamap bihain long dispela bai stori gut long dispela Kingdom na long wanem taim em bai kam.

[Futnot]