Taim Mi Yangpela Mi Stap Nogut, Nau Mi Stap Bel Isi

Stori bilong Eusebio Morcillo

Long Septemba 1993, mi go visitim wanpela i stap long strongpela haus kalabus. Em liklik susa bilong mi, Mariví, na em i laik kisim baptais. Sampela kalabuslain na ol bikman bilong kalabus i lukluk i stap taim mi baptaisim em. Paslain long mi stori long olsem wanem Mariví na mi i stap long dispela haus kalabus, mi laik stori long laip bilong mipela taim mipela i yangpela.

MAMA i karim mi long Spen long Me 5, 1954. Famili bilong mipela i gat 8-pela pikinini na mi fesbon pikinini na Mariví i namba 3. Bubu meri i lainim mipela long kamap strongpela Katolik, na mi inap tingim bek taim mi pikinini yet na mi pilim olsem mi givim bel long God taim mi stap wantaim bubu meri. Tasol sindaun bilong famili bilong mipela i no gutpela. Oltaim Papa i save paitim Mama na mipela ol pikinini. Mipela i save pret long olgeta taim, na mi bel hevi tru long lukim Mama i karim bikpela pen.

Long skul ol narapela hevi i painim mi. Wanpela tisa, em wanpela pris, em i save bengim het bilong mipela long wol sapos mipela i no bekim stret wanpela askim. Narapela pris i mekim pasin sem long ol sumatin taim em i stap wantaim ol na skelim homwok bilong ol. Na tu, ol Katolik i lainim ol man long helpaia na dispela i paulim mi na i pretim mi. I no longtaim na mi no givim bel moa long God.

Laip i No Gat As Bilong En

I no gat wanpela bilong stiaim mi long mekim pasin God i laikim, olsem na mi kirap poromanim ol man i save mekim pasin pamuk na pait long ol haus disko. Planti taim ol man i pait, na ol i yusim ol naip, sen, glas, na sia bilong paitim narapela. Maski mi yet i no insait long ol pait, tasol wanpela taim ol i paitim mi na mi hap indai.

Bihain mi les long dispela kain pasin na mi kirap go long ol haus disko i no gat pasin pait long en. Tasol long ol dispela ples tu planti man i kisim ol drak. Ol drak i no givim amamas o bel isi long mi, nogat, ol i mekim na tingting bilong mi i paul nabaut na mi tingting planti.

 Maski mi no stap amamas, mi pulim liklik brata bilong mi, José Luis, na wanpela pren, Miguel, long bihainim pasin bilong mi. Olsem planti narapela yangpela long Spen long dispela taim, mipela i kalabus long pasin nogut bilong dispela graun. Mi redi long mekim olgeta kain samting bilong kisim mani bilong baim ol drak. Pasin bilong mi i go nogut olgeta.

Jehova i Helpim Mi

Long dispela taim, planti taim mi toktok wantaim ol pren bilong mi long God na long laip i gat wanem as bilong en. Mi laik save long God, olsem na mi wok long painim wanpela em mi ken kamapim tingting bilong mi long em. Mi bin luksave olsem wanpela wanwok bilong mi, Francisco, em i no wankain olsem ol narapela. I luk olsem em i stap amamas, em i save mekim pasin i stret, na em i gat gutpela pasin, olsem na mi kamapim bel bilong mi long em. Francisco em i wanpela Witnes Bilong Jehova, na em i givim mi wanpela Wastaua i stori long ol drak.

Taim mi ritim pinis dispela stori, mi beten askim God long helpim mi: “Bikpela, mi save yu stap, na mi laik kisim save long yu na mekim laik bilong yu. Plis helpim mi!” Francisco na ol narapela Witnes i yusim Baibel bilong strongim bel bilong mi na ol i givim ol buk na nius bilong Baibel bilong mi ken ritim. Mi luksave olsem ol i givim helpim long mi olsem mi bin askim God long en. I no longtaim na mi kirap tokim ol pren na José Luis long ol samting mi lainim.

Wanpela taim mi na ol pren i go harim wanpela ben i pilaim rok musik, na taim mipela i lusim dispela ples, mi go sanap longwe liklik na lukluk long ol olsem mi no wanpela bilong ol. Nau mi luksave olsem ol drak i mekim na pasin bilong mipela i bin kamap nogut olgeta. Long dispela taim stret, mi wokim disisen olsem mi bai sakim dispela kain pasin na kamap wanpela Witnes Bilong Jehova.

Mi askim Francisco long givim wanpela Baibel long mi, na em i givim wanpela wantaim buk Tok i Tru i Bringim Man Long Laip Oltaim. * Taim mi ritim tok promis bilong God long em bai mekim drai wara i stap long ai bilong ol man na pinisim dai tu, mi save olsem mi painim pinis tok i tru i mekim ol man i kamap fri. (Jon 8:32; KTH 21:⁠4) Bihain, mi go long wanpela miting long Haus Kingdom bilong ol Witnes Bilong Jehova. Mi pilim tru pasin pren na gutpela pasin bilong ol.

Mi gat bikpela laik long tokim ol narapela long ol samting i bin painim mi long Haus Kingdom, olsem na wantu mi bungim José Luis na ol pren bilong mi na stori long ol. Sampela de bihain, mipela olgeta i go long wanpela miting. Wanpela yangpela meri i sindaun long fran bilong mipela em i lukluk long mipela. Em i kirap nogut long lukim wanpela lain man i gat longpela gras, na em i no tanim moa na lukluk long mipela. Ating em i kirap nogut long lukim mipela i kam gen long Haus Kingdom long wik bihain, na long dispela taim mipela i werim saket na trausis na nektai.

Bihain liklik, mi na Miguel i go long wanpela kibung sekit bilong ol Witnes Bilong Jehova. Mipela i no bin lukim kain samting olsem long bipo​—⁠wanpela lain manmeri ol i gat kain kain krismas em ol i pas gut wantaim olsem ol brata  brata tru. Na dispela kibung i kamap long wankain hap we dispela ben i bin pilai rok musik long en. Tasol long dispela bung, pasin bilong ol man na musik ol i pilai i strongim bel bilong mipela.

Olgeta long grup bilong mipela i kirap stadi long Baibel. Inap 8-pela mun bihain, long Julai 26, 1974, mi na Miguel i kisim baptais. Mipela i gat 20 krismas. Fopela narapela long grup bilong mipela i kisim baptais long sampela mun bihain. Skul mi bin kisim long Baibel i kirapim mi long helpim gutpela mama bilong mi long mekim ol wok bilong haus na mi stori long em long nupela bilip bilong mi. Na mipela i pas gut wantaim. Mi lusim bikpela hap taim tu bilong helpim ol liklik brata na susa bilong mi.

Bihain, mama bilong mi na olgeta bratasusa bilong mi i kisim save long tok i tru bilong Baibel na ol i kisim baptais na kamap Witnes Bilong Jehova. Wanpela brata tasol i no bin mekim olsem. Long 1977, mi maritim Soledad, em dispela yangpela meri i bin kirap nogut long lukim mipela, taim mipela i kam long Haus Kingdom long namba wan taim. Bihain long sampela mun, mipela i kirap mekim wok painia, em nem ol Witnes Bilong Jehova i save kolim long ol man i autim gutnius fultaim.

Helpim Wanpela Bilong Famili

Taim liklik susa bilong mi Mariví i pikinini yet, ol man i bin mekim pasin sem long em, na dispela i bagarapim tru bel na tingting bilong em. Taim em i yangpela meri, em i kirap mekim ol pasin nogut, olsem kisim ol drak, stil, na wok pamuk. Taim em i gat 23 krismas, em i go kalabus na em i bihainim yet pasin nogut bilong em.

Long dispela taim, mi wanpela wasman sekit, olsem wasman raun bilong ol Witnes Bilong Jehova. Long 1989, ol i makim mi na Soledad long wok long hap we kalabus bilong Mariví i stap long en. Ol bikman bilong gavman i bin kisim pikinini man bilong em; bel bilong em i bagarap stret, na em i no laik stap laip moa. Wanpela de mi go lukim em na tokim em olsem mi laik stadi wantaim em long Baibel, na em i orait long dispela. Taim em i stadi inap wanpela mun pinis, em i lusim ol drak na smok. Mi amamas tru long lukim olsem Jehova i strongim em long mekim ol dispela senis long laip bilong em.​—⁠Hibru 4:⁠12.

Bihain liklik long em i kirap long stadi, Mariví i kirap autim ol tok i tru bilong Baibel long ol wankalabus na ol bikman bilong kalabus. Maski ol i kisim em i go long narapela narapela kalabus, em i wok yet long autim tok. Long wanpela haus kalabus, em i autim tok long ol wan wan rum. Insait long ol yia em i kalabus, em i bin kirap stadi long Baibel wantaim planti kalabuslain long narapela narapela kalabus.

Wanpela de Mariví i tokim mi olsem em i laik dediketim laip bilong em long Jehova na kisim baptais. Tasol ol i no givim tok orait long em long lusim kalabus, na ol i no larim wanpela i kam insait long kalabus bilong baptaisim em. Em i karim hevi inap 4-pela yia moa long dispela kalabus i gat pasin nogut long en. Wanem samting i bin helpim em long holimpas bilip bilong em? Long wankain taim kongrigesen long hap em i stap long en i mekim miting, em tu i save skelim ol tok i save kamap long miting. Na tu, oltaim em i stadi long Baibel na beten.

Bihain, ol i kisim Mariví i go long wanpela strongpela kalabus i gat swiming pul. Em i ting nau em i gat rot long kisim baptais. Na tru tumas, ol i givim tok orait long em. Olsem na mi inap mekim tok bilong baptais bilong em. Mi stap wantaim em long dispela taim em i mekim nambawan bikpela samting long laip bilong em.

Ol pasin bilong Mariví long bipo i mekim na em i kisim sik AIDS. Tasol gutpela pasin bilong em i mekim na em inap lusim kalabus long Mas 1994. Em i stap wantaim Mama na i mekim ol wok Kristen i go inap long em i dai inap tupela yia bihain.

 Daunim Ol Tingting i Bagarapim Bel

Ol pasin mi bin mekim long bipo i givim sampela hevi long mi tu. Hatpela pasin Papa i bin mekim long mi na ol samting mi bin mekim taim mi yangpela i bin mekim sampela samting long pasin bilong mi. Taim mi bikpela pinis, planti taim bel i kotim mi na mi pilim olsem mi samting nating. Sampela taim mi bel hevi stret. Tasol Tok Bilong God i bin helpim mi tru long daunim ol dispela kain tingting. Insait long planti yia i go pinis, pasin bilong tingim tingim long bel planti taim ol skripsa olsem Aisaia 1:18 na Song 103:​8-​13, i bin helpim mi na bel i no kotim mi.

Beten em i narapela samting i bin helpim mi long daunim ol tingting olsem mi samting nating. Planti taim mi beten long Jehova na aiwara i pulap long ai bilong mi. Tasol tok bilong 1 Jon 3:​19, 20 i strongim mi. Em i tok: “Sapos yumi laikim tru ol arapela, orait yumi ken save, yumi bihainim tok tru. Na maski sapos bel bilong yumi i kotim yumi long wanpela samting, yumi ken i stap bel isi long ai bilong God. Long wanem, God em i save long olgeta samting, na save bilong en i winim tru save i stap long bel bilong yumi.”

Taim mi beten long God mi ‘pilim hevi long sin na mi daunim mi yet,’ olsem na mi save mi no man nogut olsem bipo mi bin ting. Baibel i tokim olgeta man i painim Jehova olsem em i no save givim baksait long ol man i bel hevi long ol rong ol i bin mekim long bipo na ol i kirap bihainim laik bilong em.​—⁠Song 51:⁠17.

Taim mi no bilip tumas long mi yet, mi traim long tingting long ol gutpela samting, olsem ol gutpela samting Filipai 4:8 i stori long en. Mi putim long tingting olgeta tok bilong Song 23 na Bikpela Tok Long Maunten em Jisas i mekim. Taim ol tingting bilong bagarapim bel i kamap, mi save kolim long tingting ol dispela skripsa. Dispela pasin i helpim mi tru taim mi no inap slip long nait.

Narapela samting i bin helpim mi em gutpela tok amamas meri bilong mi na ol narapela strongpela Kristen i mekim long mi. Pastaim mi hatwok long bilip long ol gutpela tok bilong ol, tasol Baibel i bin helpim mi long pilim olsem pasin laikim i mekim na man i “bilip” long narapela. (1 Korin 13:⁠7) Na isi isi long pasin daun mi bin lain long luksave olsem i gat ol samting em mi no inap mekim.

Tasol wanpela gutpela samting i bin kamap long hatwok bilong mi long daunim ol tingting i bagarapim bel. Dispela i bin helpim mi long pilim hevi bilong ol narapela taim mi mekim wok wasman raun. Mi na meri bilong mi i bin lusim klostu 30 yia long wok bilong autim gutnius fultaim. Amamas mi kisim long wok bilong helpim ol narapela i helpim mi long rausim ol tingting i bagarapim bel na mi no bel hevi tumas moa long ol samting nogut mi bin mekim long bipo.

Nau taim mi tingting i go bek na tingim ol blesing Jehova i bin givim long mi, bel bilong mi i kirapim mi long mekim wankain tok olsem man bilong raitim song. Em i tok: “Mi mas litimapim nem bilong Bikpela. . . . Em i save lusim olgeta sin bilong mi, na em i save mekim orait olgeta sik bilong mi. Bikpela i kisim bek mi na mi no i dai. Em i save marimari na sori moa yet long mi.”​—⁠Song 103:​1-4.

[Futnot]

[Rait long pes 30]

Planti taim bel i kotim mi na mi pilim olsem mi samting nating, tasol Tok Bilong God i bin helpim mi tru long daunim ol dispela tingting

[Ol Piksa long pes 27]

Brata bilong mi José Luis na pren bilong mi Miguel i bihainim pasin nogut na gutpela pasin bilong mi

[Piksa long pes 28, 29]

Morcillo famili long 1973

[Piksa long pes 29]

Taim Mariví i stap long kalabus

[Piksa long pes 30]

Mi wantaim meri bilong mi, Soledad