Wanem Taim Kingdom Bilong God Bai Kam?
Wanem Taim Kingdom Bilong God Bai Kam?
“BIKPELA, ating nau long dispela taim bai yu mekim kantri Israel i kamap strong gen na i gat king i bosim em, o nogat?” (Aposel 1:6) Ol aposel i gat bikpela laik long save wanem taim Jisas bai kamapim Kingdom bilong em. Long nau, klostu 2,000 yia bihain, ol manmeri i gat bikpela laik yet long save: Wanem taim Kingdom Bilong God bai kam?
Tok bilong Kingdom em i nambawan bikpela tok Jisas i autim, olsem na yumi ken ting olsem em i bin bekim dispela askim. Na tru tumas, em i mekim olsem! Planti taim em i stori long wanpela haptaim em i kolim parousia, olsem taim bilong em long kam bek na i stap. (Matyu 24:37) * Taim em i kam bek, Kingdom long han bilong Mesaia bai kamap. Dispela haptaim bilong Krais i kam bek na i stap em i wanem samting? Orait nau yumi ken stori long 4-pela samting bilong en em Baibel i kamapim.
1. Taim bilong Krais long kam bek na i stap bai kirap longpela taim bihain long em i dai. Jisas i mekim wanpela tok piksa i stori long em yet i olsem wanpela man “i laik i go long wanpela longwe ples, bai ol i ken makim em long kamap king.” (Luk 19:12) Dispela tok piksa i gat tok profet long en i bin kamap olsem wanem? Taim Jisas i dai pinis na i kirap bek, em i go long dispela “longwe ples,” em heven. Long narapela tok piksa i wankain, Jisas i tok profet long em bai kam bek “longpela taim” bihain long em i go long dispela longwe ples.—Matyu 25:19.
Sampela yia bihain long Jisas i go antap long heven, aposel Pol i tok: “Krais em i mekim wanpela ofa tasol bilong rausim sin, na dispela ofa em inap long i stap olgeta taim. Em i mekim olsem pinis, orait em i sindaun long han sut bilong God na em i wetim taim bilong God i putim ol birua bilong en i stap aninit long en.” (Hibru 10:12, 13) Olsem na taim em i kamap pinis long heven, em i mas wet i stap longpela taim. Dispela taim bilong wet i stap em i pinis taim God Jehova i putim Pikinini bilong em i stap King long Kingdom Bilong Mesaia. Haptaim bilong Krais long kam bek na i stap i kirap long dispela taim. Tasol olsem wanem? Em samting ol man long graun inap lukim?
2. Taim Krais i kam bek na i stap, ol man i no lukim long ai bilong ol. Tingim: Jisas i tok wanpela mak bai kamap bilong makim olsem em i kam bek pinis na i stap. (Matyu 24:3) Sapos long ai tru ol man inap lukim Jisas i kam bek pinis na i stap, yu ting i mas i gat wanpela mak bilong makim dispela samting? Yumi ken tok piksa: Tingim olsem yu laik lukim solwara. Taim yu wokabaut i go, ating yu lukim planti sain-bot i tokaut long rot yu mas bihainim bilong kamap long solwara, tasol taim yu kamap pinis long nambis na sanap arere long wara na lukluk i go long bikpela solwara, yu ting bai i gat sain-bot na bikpela rait “Solwara” bilong makim olsem solwara i stap? Nogat tru! Yu lukim pinis solwara, olsem na i no gat wok long sain-bot bilong makim samting yu no hatwok long luksave long en.
Mak Jisas i stori long en bilong makim olsem em i kam bek na i stap, dispela i no bilong makim samting ol man inap lukim long ai bilong ol, nogat. Em i bilong helpim ol long luksave long samting bai kamap long heven. Orait olsem wanem dispela mak bai soim ol man long graun olsem Krais i kam pinis na i stap?
3. Taim Jisas i kam bek na i stap, bai i gat ol bikpela hevi hia long graun. Jisas i tok taim em i kam pinis na mekim wok King long heven, bai i gat ol bikpela pait, hangre, guria, sik, na pasin bilong brukim lo hia long graun. (Matyu 24:7-12; Luk 21:10, 11) Wanem samting i mekim na ol dispela hevi i kamap? Baibel i tok, Satan, em “dispela hetman i save bosim dispela graun,” em i belhat nogut tru, long wanem, em i save olsem em i gat sotpela taim tasol bilong i stap, long wanem, Krais i kam pinis na i stap King. (Jon 12:31; KTH 12:9, 12) Ol dispela hevi em belhat bilong Satan i kamapim na i makim olsem Krais i kam pinis na i stap, ol dispela hevi i bin kamap planti tru long taim bilong yumi. Kirap long 1914, em wanpela yia ol saveman i tok i bikpela yia, ol dispela hevi i bin kamap bikpela tru long olgeta hap bilong graun.
Tru, yumi inap ting olsem ol dispela tok em nius nogut, tasol nogat. Ol dispela samting i makim olsem Kingdom Bilong Mesaia i mekim wok i stap nau long heven. Klostu nau dispela gavman bai kirap bosim olgeta hap bilong graun. Tasol olsem wanem ol man inap kisim save long dispela Kingdom na bai ol inap kamap man i stap aninit long en?
4. Taim Jisas i kam bek na i stap, bai i gat wok bilong autim tok long olgeta hap bilong graun. Jisas i tok, taim em i kam i stap, dispela bai i wankain long “taim bilong Noa.” * (Matyu 24:37-39) Noa i no wokim sip tasol, em i mekim narapela wok tu—em i “man bilong tokaut long stretpela pasin.” (2 Pita 2:5) Noa i tokim ol man olsem strafe bilong kot bilong God i laik kamap. Jisas i tok ol disaipel bilong em bai mekim wankain wok long taim em i kam pinis na i stap. Em i tok profet: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14.
Olsem stori i kamap paslain long dispela i kamapim, Kingdom Bilong God bai bagarapim olgeta gavman bilong dispela graun. Long wok bilong autim tok, ol man inap kisim save olsem klostu nau dispela gavman long heven bai kirap na mekim dispela wok, tasol i gat rot long ol man i ken abrusim bagarap na stap aninit long dispela Kingdom. Orait nau bikpela askim i kamap, Yu bai mekim wanem?
Kingdom Bilong God Bai Mekim Wanem Long Yu?
Ol tok Jisas i autim i helpim ol man long wetim gutpela samting tru i kamap. Bihain long pasin bikhet i kamap long Iden planti tausen yia i go pinis, God Jehova i tingting long kamapim wanpela gavman bilong helpim ol gutpela man long kisim bek samting God i laik givim long ol long pastaim—em laip i stap gut oltaim oltaim long wanpela paradais hia long graun. Yumi ken amamas tru olsem dispela gavman, em longtaim pinis God i bin promis long en, em i mekim wok i stap nau long heven. Em i no samting i stap long tingting tasol bilong ol man, nogat. Em samting tru!
Nau, dispela King God i makim pinis em i mekim wok i stap namel long ol birua bilong em. (Song 110:2) Hia long dispela graun we ol man i stap longwe long God, Mesaia i bihainim laik bilong Papa bilong em long painim olgeta man husat i laik save long God em i husat tru na lotu long em “long Holi Spirit na long pasin i tru.” (Jon 4:24) Rot i op long ol man bilong olgeta kain skin na krismas na sindaun long stap oltaim oltaim aninit long Kingdom Bilong God. (Aposel 10:34, 35) Mipela i laik bai yu kirap nau long kisim save long Kingdom Bilong God, na bai yu inap stap oltaim oltaim taim Kingdom i bosim graun long stretpela pasin!—1 Jon 2:17.
[Ol Futnot]
^ par. 3 Long dispela ves, Buk Baibel i tanim dispela tok “parousia” olsem “kamap.” Tasol mining bilong dispela tok Grik “parousia” i makim olsem man i “kam i stap.”
^ par. 10 Dispela tok bilong Jisas i stretim wanpela tingting kranki em sampela man i kisim long sampela Baibel em ol i tanim kranki dispela tok “kam i stap.” Sampela Baibel i tanim dispela tok olsem “kamap,” o “kam bek,” na kain tok olsem i makim samting em bai kamap insait long wanpela sotpela haptaim. Tasol tingim: Jisas i no tok olsem taim em i kam bek na i stap, dispela bai i wankain long haptaim bilong Bikpela Tait, em samting i bin kamap insait long wanpela sotpela haptaim, nogat. Em i tok taim em i kam bek na i stap, dispela bai i wankain long “taim bilong Noa.” Taim bilong Noa em wanpela longpela haptaim, na olsem tasol, taim Krais i kam bek na i stap, em tu em wanpela longpela haptaim we ol man bai bisi tru long tingim ol samting bilong ol yet na ol i no tingim tok lukaut bilong las de.
[Ol Piksa long pes 8, 9]
Ol nius nogut yumi save harim olgeta de i makim olsem klostu nau ol gutpela samting tru bai kamap
[Kredit Lain]
Antiaircraft gun: U.S. Army photo