Wanpela Papa i Nambawan Gutpela Papa Tru
Go Klostu Long God
Wanpela Papa i Nambawan Gutpela Papa Tru
“PAPA.” Dispela tok i kirapim tru bel bilong yumi ol man. Papa i save laikim tru ol pikinini, em i save helpim ol long kamap gutpela tru. Olsem na i stret Baibel i kolim God Jehova olsem “Papa.” (Matyu 6:9) Jehova em i wanem kain papa? Bilong bekim dispela askim yumi ken skelim tok Jehova i bin mekim long Jisas taim Jisas i kisim baptais. Yumi save, ol tok papa i mekim long pikinini inap soim yumi planti samting long pasin bilong papa, olsem em i wanem kain papa.
Long mun Oktoba samting bilong yia 29 C.E., Jisas i go long wara Jordan bilong kisim baptais. Baibel i stori long samting i bin kamap, em i tok: “Jisas i kisim baptais pinis, na kwiktaim em i lusim wara na i kam antap. Na heven i op, na em i lukim Spirit bilong God i kam daun olsem wanpela bilong ol dispela kain pisin ol i kolim balus, na i kam i stap long em. Na long heven wanpela maus i singaut olsem, ‘Dispela em i Pikinini bilong mi. Mi laikim em tumas. Bel bilong mi em i amamas long em.’ ” * (Matyu 3:16, 17) Jehova yet i mekim dispela tok, na dispela i givim save long yumi long em i wanem kain Papa. I gat 3-pela samting Jehova i tokim Pikinini bilong em long en.
Namba wan, taim Jehova i tok “dispela em i Pikinini bilong mi,” i olsem Jehova i tok, ‘Mi amamas long i stap Papa bilong yu.’ Ol pikinini i laik bai papamama i tok amamas long ol samting ol i mekim na tingim ol, na ol papa i gat savetingting bai mekim ol samting bilong inapim dispela laik. Ol papamama i mas tokim ol pikinini olsem ol i laikim na tingim ol wan wan. Maski Jisas em i bikpela pinis, taim Papa bilong em i mekim dispela tok amamas long em, yumi ken ting olsem Jisas i amamas tru!
Namba tu, taim Jehova i tok “mi laikim em tumas,” em i kamapim long ples klia olsem em i laikim tru Jisas. Gutpela papa i save tokim ol pikinini olsem em i laikim ol tumas. Ol kain tok olsem wantaim ol stretpela pasin bilong kamapim pasin sori, dispela i save helpim ol pikinini long i stap amamas na kamap gutpela tru. Jisas i mas pilim amamas tru taim em i harim Papa bilong em i tokaut olsem Em i laikim em tumas!
Namba tri, long rot bilong dispela tok “bel bilong mi em i amamas long em,” Jehova i tokaut olsem em i orait long Pikinini. I olsem Jehova i tok, ‘Pikinini, mi amamas long wok yu bin mekim.’ Ol gutpela papa i laik painim rot long tokaut long ol pikinini bilong ol olsem ol i amamas long ol gutpela tok na ol gutpela pasin ol i mekim. Taim ol papamama i tokaut olsem ol i amamas long ol pikinini, dispela i save strongim bel bilong ol pikinini. Yumi ken ting olsem taim Jisas i harim Papa i tok amamas long em, dispela i bin strongim tru bel bilong em!
Tru tumas, Jehova em nambawan gutpela Papa. Olsem wanem? Yu laik i gat kain papa olsem? Sapos olsem, orait bel bilong yu i ken i stap isi, long wanem, yu inap pas gut wantaim Jehova. Sapos yu bilip na kisim save long em na wok strong long mekim laik bilong em, em bai kam klostu long yu. Baibel i tok: “Go klostu tru long God, na em bai i kam klostu tru long yupela.” (Jems 4:8) Bai yu pilim bel isi tru taim yu pas gut wantaim God Jehova, em nambawan gutpela Papa tru!
[Futnot]
^ par. 5 Gutnius Luk i Raitim i tok Jehova i bin yusim dispela tok “yu,” em i tok: “Yu Pikinini bilong mi. Mi laikim yu tumas. Bel bilong mi em i amamas long yu.”—Luk 3:22.