Save Long Nem Bilong God​—⁠Wanem Samting i Insait Long En?

NEM bilong yu i gat mining bilong en? Long sampela hap, ol i save givim wanpela nem long pikinini i gat bikpela mining bilong en. Dispela nem inap kamapim bilip bilong papamama o sampela mak ol i laik bai pikinini i winim long bihain.

Em i no nupela samting long givim nem long pikinini i gat mining bilong en. Long taim bilong ol man i bin raitim Baibel, ol i save givim wanpela nem long pikinini i gat wanpela kain mining bilong en. Nem em inap makim pasin o wok samting ol i laik bai pikinini i holim long bihain. Olsem: Taim Jehova i tokim Devit long wok em pikinini bilong em Solomon bai holim, Em i tok: “Bai yu kolim em long nem Solomon [mining bilong en, “Bel Isi”], long wanem, mi bai givim gutpela sindaun na bel isi long ol manmeri bilong Israel long taim em i stap king.”​—⁠1 Stori 22:⁠9.

Sampela taim Jehova i bin givim nupela nem long man husat bai holim nupela wok. Meri bilong Abraham i no inap karim pikinini, na Jehova i givim nem Sara long em, mining bilong en “Prinses.” Bilong wanem Jehova i mekim olsem? Em i tok: “Bai mi mekim gut long Sara, na bai em i karim wanpela pikinini man bilong yu . . . na bai em i kamap tumbuna bilong planti lain manmeri, na sampela bai i kamap king.” (Stat 17:16) Em nau, bilong save long as na Sara i kisim nupela nem, yumi mas save long nupela wok em bai holim.

Olsem wanem long nem i winim tru olgeta narapela nem​—⁠Jehova? Wanem mining bilong en? Taim Moses i askim God long nem bilong Em, Jehova i tok: “Mi bai kamap wanem wanem kain mi laikim.” (Kisim Bek 3:​14, NW ) Nem bilong Jehova i kamapim olsem em i wanpela God i save mekim kain kain wok. Yumi ken mekim tok piksa olsem: Wanpela mama i mas mekim kain kain wok long olgeta de bilong lukautim ol pikinini bilong em​—⁠olsem wok nes, kukim kaikai, na wok tisa⁠—​taim i gat nid long mekim ol dispela wok. Na i wankain tu long Jehova, tasol ol wok bilong em i bikpela moa, winim bilong yumi. Bilong mekim tru ol samting em i tingting pinis long mekim bilong helpim gut ol man, em inap kamap wanem wanem kain em i laikim, bilong inapim wanpela wok bilong em. Olsem na bilong save gut long Jehova na nem bilong em, yumi mas kliagut long olgeta kain wok em i holim na pilim tru.

Sori tru, ol gutpela pasin bilong Jehova i hait tru long ol man i no save long nem bilong em. Tasol sapos yu stadi long Baibel, yu inap pilim tru ol wok Jehova i holim, olsem Man Bilong Givim Skultok, strongpela Man Bilong Kisim Bek yumi, na Man Bilong Givim ol samting. Tru tumas, yumi kirap nogut long planti mining bilong nem bilong Jehova.

Tasol sampela taim em i no isi long kisim save long God na nem bilong em na bai yumi ken save gut long em. Stori i kamap bihain long dispela bai kamapim as bilong en.