Ol Man i Askim . . .

Yu Ting God i Stap Long Wanpela Ples Tasol?

▪ Planti lotu i tok God i save stap long olgeta hap long wankain taim. Olsem, buk New Catholic Encyclopedia i tok long God olsem em i wanpela man “husat i stap long olgeta hap na em i insait long olgeta samting em i bin wokim.” Na tu, John Wesley, man i kirapim Lotu Metodis i raitim wanpela tok, nem bilong en “God i Stap Long Olgeta Hap.” Long dispela tok em i kamapim olsem “God i stap long olgeta hap, maski em insait o ausait long mak bilong olgeta samting em i bin wokim.”

Baibel i tok wanem? Tru God i stap long olgeta hap long wankain taim, olsem long heven, long graun, na insait long ol manmeri?

Baibel i tok, God i gat wanpela ples stret we em i stap long en​—em long heven. Na tu, Baibel i kamapim wanpela beten bilong King Solomon taim em i singaut long God olsem: “Bikpela, yu stap long ples bilong yu long heven na yu ken harim beten.” (1 King 8:43) Taim Jisas i skulim ol disaipel bilong em long beten, em i tokim ol long ol i mas beten olsem “Papa bilong mipela long heven.” (Matyu 6:9) Baibel i tok, bihain long Krais i kirap bek “em i go insait long heven stret, bai em i ken i go sanap long ai bilong God.”​—Hibru 9:24.

Ol dispela ves i kamapim klia olsem God Jehova i stap long ples bilong em long heven, na em i no stap long olgeta hap. Dispela tok “heven” i stap long ol dispela ves i no makim skai i raunim graun o bikpela hap spes bilong yunives, nogat. Ples antap i no bikpela inap long Man Bilong Wokim yunives i ken i stap long en. (1 King 8:27) Baibel i tokim yumi olsem “God em i wanpela Spirit.” (Jon 4:24) Em i stap long ples spirit bilong em, na i no long skai we ol sta samting i stap long en.​—1 Korin 15:44.

Tasol olsem wanem long ol dispela ves long Baibel we i givim tingting olsem God i stap long olgeta hap? Olsem, long Song 139:​7-10, Devit i tok long God olsem: “Bai mi go we na mi ken lusim spirit bilong yu? Na bai mi ranawe i go long wanem hap na mi ken hait long yu? Sapos mi go antap na mi stap long heven, yu stap long heven. Sapos mi go i stap long ples bilong ol man i dai pinis, yu stap long dispela ples tu. Sapos mi flai i go longwe long hap bilong sankamap, o sapos mi go i stap long wanpela ples i stap longwe tumas long hap bilong san i go daun, bai yu stap long dispela ples tu bilong stiaim lek bilong mi.” Olsem wanem? Ol dispela ves i kamapim olsem God i stap long olgeta dispela ples?

Tingim, pastaim Devit i askim olsem: “Bai mi go we na mi ken lusim spirit bilong yu?” a Long rot bilong holi spirit bilong em, God i ken lukim olgeta samting na kamapim strong bilong em long olgeta hap, na i no olsem em yet i mas i go o em yet i mas i stap long dispela hap. Yumi ken tok piksa olsem: Inap sampela yia nau ol saientis inap skelim graun i stap long planet Mars, em planet i stap planti milion kilomita longwe long planet bilong yumi, em Earth. Olsem wanem ol inap skelim graun bilong Mars? Ol saientis yet i no gat wok long go long Mars, nogat, tasol ol i skelim ol poto na ol narapela save ol i kisim long rot bilong ol roket em ol i salim i go antap, na ol dispela roket i salim ol poto na tok i kam bek long graun.

Olsem tasol, i no gat wok long God Jehova i mas i go o stap long olgeta hap bambai em i ken save long ol samting i kamap. Baibel i tok: “I no gat wanpela samting God i wokim i stap hait na em i no inap lukim, nogat.” (Hibru 4:13) Tru tumas, strong bilong Jehova, olsem holi spirit, inap i go long olgeta hap, na God inap lukim olgeta samting na em inap kamapim laik bilong em maski em i stap long wanpela hap stret, em “gutpela ples” bilong em long heven.​—Lo 26:15.

[Futnot]

[Picture Credit Line on page 27]

IAC/RGO/David Malin Images