I Gat Wanpela Man i As Bilong Olgeta Pasin Nogut?

“MI SEKAN wantaim devil.” Em tok bilong komanda bilong ami bilong Yunaitet Nesen long Ruanda, taim em i tingim bek olsem ol i no bin mekim wanpela samting bilong stopim pait we i bin kilim i dai planti handret tausen man long dispela kantri long 1994. Narapela man husat i skelim ol pasin nogut tru i bin kamap long dispela taim, em i tok: “Sapos wanpela man i tokaut yet olsem Satan i no stap tru, orait bungim mi long wanpela bilong ol traipela hul long Ruanda we ol i bin tromoi bodi bilong planti tausen man long en.” Tru tru ol dispela pasin nogut em wok bilong Devil?

Planti man i no ting pasin bilong mekim nogut tru na bagarapim man em wok bilong wanpela spirit nogut, nogat. Planti i ting ol dispela kain pasin i kamap, long wanem, pasin nogut i stap long skin bilong man, na as tru bilong en em ol laik nogut i stap long bel bilong ol man. Sampela narapela i tok olsem inap planti yia pinis wanpela lain i gat planti mani kago na bikpela strong ol i mekim wanpela kain wok hait bilong stiaim ol man bambai ol i ken bosim graun. Na i gat ol man husat i sutim tok long ol gavman na ol hetman long ol pasin i no stret na pen na hevi ol i lukim.

Yu gat wanem tingting? I gat wanem as na ol pasin nogut tru, pasin bilong bagarapim man, na pen na hevi i pulap tru long graun long nau, maski ol man i bin traim kain kain rot bilong stretim? Bilong wanem ol man i wok long bagarapim ol yet na ol i no putim yau long ol tok lukaut? I gat wanpela man i as bilong ol dispela pasin nogut? Husat tru i bosim dispela graun? Ating bai yu kirap nogut long bekim bilong ol dispela askim.