Skulim Ol Pikinini Bilong Yu

Long Ol Taim We Yumi No Ken Aislip

ATING yu wanbel olsem em i bikpela samting long yu no ken aislip long skul. Planti i save aislip long klasrum, tasol bilong lainim samting, ai bilong yu i mas op i stap. Na tu, yu no ken aislip taim yu go long miting bilong stadi long Baibel.

Yu mas mekim wanem bambai yu no ken aislip?​— a Wanpela samting em yu mas slip hariap long nait. Ating yu ken slip liklik long apinun, dispela bai helpim yu. Nau yumi laik skelim wanem skul yumi ken kisim long samting i bin painim wanpela yangpela husat i bin aislip long biknait taim aposel Pol i givim tok. Ritim Baibel long Aposel sapta 20, ves 7 i go 12, na lukim samting i bin kamap.

Pol i bin raun lukim kongrigesen i stap long nambis bilong taun Troas. Baibel i tok Pol “bai lusim ol long neks de” na kalap long sip. Olsem na “em i pulim toktok i go inap long biknait.” Baibel i tok: “Wanpela yangpela man, nem bilong en Yutikus, em i sindaun long windo long namba 3 plua bilong haus. Taim Pol i toktok i go, ai bilong Yutikus i hevi na em i slip i dai.” Wanem samting i kamap bihain?​—

Yutikus i pundaun long windo long “namba 3 plua bilong haus.” Pol na ol narapela i ran hariap tru i go daun long lata. Yutikus i slip long graun​—em i dai pinis! Yu inap tingim bikpela bel hevi ol manmeri i bin pilim?​— Baibel i tok Pol i kisim Yutikus na holim em. Bihain Pol i amamas na i tok: ‘No ken wari, em i orait!’ God i kirapim bek Yutikus!

Yumi kisim wanem save long pasin bilong God long samting i bin painim Yutikus?​— Wanpela  samting em olsem, Jehova, Papa bilong yumi long heven inap kirapim bek ol man i dai pinis na ol yangpela tu. Jehova i save pilim tru hevi bilong yu na laikim yu tru, winim pasin bilong papamama long laikim yu. Taim Jisas i stap long graun, em i kamapim pasin bilong Papa bilong em long rot bilong holim ol liklik pikinini na mekim gut long ol. Em i bin kirapim bek wanpela gel i gat 12-pela krismas na sampela narapela.

Yu pilim olsem wanem taim yu save olsem Papa bilong yu long heven i laikim yu tru?​— Yes, dispela i mekim na yumi laikim tru Jehova na yumi laik bihainim ol tok bilong Em. Yu save long olsem wanem yumi ken soim olsem yumi laikim Em?​— Wanpela rot em long tok olsem yumi laikim em tru. Jisas i tok: “Mi laikim Papa.” Tasol Jisas i mekim sampela samting moa bilong kamapim olsem em i laikim tru God. Em i kamapim klia dispela samting long pasin em i mekim.

Jisas i bihainim tok bilong God. Em i tok: “Oltaim mi save mekim ol samting em i laikim.” Sapos yumi tu i mekim olsem na yumi traim bes long stap ai op long taim yumi gat wok long mekim olsem, dispela bai amamasim Jehova na Pikinini bilong em, Jisas.

Ritim long Baibel bilong yu

Aposel 20:​7-12

Luk 8:​49-56

Jon 8:29; 14:31

[Futnot]