Bekim Bilong En i Bikpela Samting?

“Mi kirap long prenim ol mangi taim mi gat 10-pela krismas. Pastaim mipela i save holim han na kis. I no longtaim, mipela i holim skin bilong narapela narapela na mipela i traim ol kain kain pasin bilong mekim maritpasin. Taim mi gat 15 krismas, mi kirap long mekim wok mani na ol man long ples wok i kam tokim mi long ol i laik slip wantaim mi. Mi laik soim olsem mi gat strong na mi kirap bihainim ol wanwok long mekim olgeta samting ol i save mekim. Mi laik bai ol poroman bilong mi i orait long mi, olsem na dispela i pulim mi long insait moa yet long slip wantaim ol man.”—SARAH, a AUSTRALIA.

ATING yu bai kirap nogut long save olsem Sarah i kamap bikpela insait long famili i save tingim tru lotu. Papamama bilong em i traim long skulim em long bihainim ol stretpela lo bilong Baibel. Tasol Sarah i bihainim narapela rot.

Ating planti man bai wanbel long samting Sarah i mekim. Ol i ting olsem tok bilong Baibel long maritpasin em bilong bipo tasol. Sampela narapela i pilim olsem i no gat rong long man o meri bilong lotu i mekim maritpasin wantaim husat husat em i laikim.

Yu ting em i bikpela samting long yu save na bihainim tok bilong Baibel long maritpasin? Baibel i tok: “God em i as bilong olgeta tok i stap long Rait Holi, na ol i gutpela long skulim man.” (2 Timoti 3:16) Sapos yu bilip olsem God i wokim ol man na em yet i kamapim ol tok i stap long Baibel, orait mobeta yu save long tok em Baibel i mekim long maritpasin.

Tasol sori tru, planti man i paul yet long tok Baibel i mekim long maritpasin. Ol hetman bilong lotu i givim kain kain skul long ol man long sait bilong maritpasin na ol i tok Baibel i as bilong ol dispela tok. Dispela i mekim na ol bikpela lotu i bruk nabaut.

Olsem na bilong kisim stretpela save long dispela, mobeta yu yet i mekim wok painimaut. Atikol i kamap bihain long dispela bai stori gut long 10-pela askim em planti man i save kamapim long tok bilong Baibel long maritpasin. Long dispela atikol yu bai kisim gut ol bekim em Baibel i as bilong en. Laspela atikol i stori long maritpasin bai skelim olsem wanem ol disisen bilong yumi i bikpela samting.

[Futnot]