Kisim Skul Long Tok Bilong God

Ol Lo Bilong God i Helpim Yumi Olsem Wanem?

Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. Bilong wanem yumi mas bihainim tok bilong God?

I stret tru long yumi mas bihainim tok bilong God, long wanem, em i bin wokim yumi. Jisas tu i save bihainim tok bilong God long olgeta taim. (Jon 6:38; Revelesen 4:11) Ol lo bilong God i opim rot long yumi ken kamapim klia olsem yumi laikim tru God.​—⁠Ritim 1 Jon 5:⁠3.

Olgeta lo bilong Jehova i gutpela bilong helpim yumi. Ol dispela lo i skulim yumi long nambawan gutpela rot bilong bihainim long nau, na i soim yumi long rot bilong kisim ol gutpela blesing bilong i stap oltaim oltaim.​—⁠Ritim Song 19:​7, 11; Aisaia 48:​17, 18.

2. Olsem wanem ol lo bilong God i helpim yumi long sait bilong helt?

Lo bilong God i tambuim pasin bilong dring spak, na dispela i helpim yumi long abrusim ol sik nogut bilong kilim man na ol eksiden. Pasin bilong dring planti inap kalabusim man na pulim em long mekim pasin i no stret. (Sindaun 23:​20, 29, 30) Jehova i orait long yumi ken dring liklik alkohol tasol.​—⁠Ritim Song 104:15; 1 Korin 6:⁠10.

Na tu, Jehova i givim tok lukaut long yumi mas abrusim ol pasin nogut, olsem pasin bilong jeles na i no bosim belhat. Sapos yumi bihainim ol dispela skultok, yumi bai lukautim gut helt bilong yumi.​—⁠Ritim Sindaun 14:30; 22:​24, 25.

3. Olsem wanem ol lo bilong God inap lukautim yumi?

Lo bilong God i tambuim pasin bilong slip wantaim wanpela man o meri em i no poroman marit bilong yu. (Hibru 13:⁠4) Ol marit husat i bihainim dispela lo, ol i save stap belgut na ol pikinini bilong ol i save stap amamas. Tasol taim ol marit i no bihainim dispela lo, ol i save karim hevi bilong ol sik nogut, marit i bruk, pait na bagarapim poroman marit, bikpela bel hevi, na famili i gat papa o mama tasol long en.​—⁠Ritim Sindaun 5:​1-9.

Taim yumi abrusim ol samting we inap pulim yumi long slip wantaim narapela, yumi bai lukautim pasin bilong yumi long i stap pren bilong God. Na tu, yumi no inap givim hevi long ol narapela.​—⁠Ritim 1 Tesalonaika 4:​3-6.

 4. Taim yumi soim rispek long laip, dispela inap helpim yumi olsem wanem?

Laip em i olsem presen em God i givim long yumi, olsem na taim ol man i soim rispek long laip na lusim smok na ol narapela samting we inap nogutim man, dispela i save lukautim helt bilong ol. (2 Korin 7:⁠1) Na God i save tingim tu laip bilong bebi i stap insait long bel bilong mama. (Kisim Bek 21:​22, 23) Olsem na yumi no ken kilim i dai bebi i stap insait long bel bilong mama. Na tu, ol man husat i pilim tru tingting bilong God long laip, ol i save skelim gut ol samting long ples wok, long haus, na long kar bambai i no gat wanpela samting i bagarapim man. (Lo 22:⁠8) Na ol i no save insait long ol spot we inap bagarapim laip bilong man, long wanem, laip em i presen i kam long God.​—⁠Ritim Song 36:⁠9.

5. Blut em i holi na dispela i helpim yumi olsem wanem?

Lo bilong God i tok blut em i holi, long wanem, blut i makim laip bilong man na animal. (Stat 9:​3, 4) Dispela lo bilong God i save helpim yumi. Em i helpim yumi olsem wanem? Em i opim rot long God inap lusim ol sin bilong yumi.​—⁠Ritim Wok Pris 17:​11-13; Hibru 9:⁠22.

Blut bilong Jisas em i dia tumas, long wanem, Jisas i gutpela olgeta na em i no gat sin. Jisas i givim blut bilong em long God​—⁠dispela blut i makim laip bilong em. (Hibru 9:12) Jisas i bin kapsaitim blut bilong em na dispela i opim rot long yumi inap kisim laip oltaim.​—⁠Ritim Matyu 26:28; Jon 3:⁠16.

Bilong kisim sampela save moa, lukim sapta 12 na 13 bilong dispela buk, em ol Witnes Bilong Jehova i wokim. Tru Tru Baibel i Tok Wanem?