Abraham​—Man i Gat Pasin Daun

San i hat nogut tru, na Abraham i sindaun na malolo long gutpela ples kol insait long haus sel bilong em. Taim em i tromoi ai i go longwe liklik, em i lukim 3-pela man i wokabaut i kam. a Wantu em i kirap na ran i go bungim ol, na em i strong long ol i mas malolo liklik na kaikai wantaim em. Em i tok long “givim sampela kaikai” tasol long ol, tasol em i go na redim bikpela kaikai tru we i gat ol bret ol i kukim nau tasol, bata, milk, na gutpela abus tru. Taim Abraham i givim kaikai long ol dispela man, em i soim pasin bilong mekim gut long ol arapela, na tu, em i gat pasin daun tru.—Stat 18:1-8.

PASIN DAUN EM WANEM SAMTING? Man i gat dispela pasin em i no save mekim pasin antap o pasin hambak, nogat tru. Em i amamas olsem sampela taim save bilong ol narapela i winim save bilong em. (Filipai 2:3) Em i save putim yau long tingting bilong ol narapela, na em i redi long mekim wok bilong ol narapela.

OLSEM WANEM ABRAHAM I SOIM OLSEM EM I GAT PASIN DAUN? Abraham i amamas long mekim gut long ol narapela. Olsem yumi stori pinis, taim Abraham i lukim 3-pela visita, wantu em i redim ol samting ol visita i mas kisim. Meri bilong em Sara, em tu i hariap long redim kaikai. Tasol yumi ken luksave long man i mekim bikpela wok moa, em Abraham. Abraham i ran i go bungim ol visita, em i tokim ol long stap na kaikai, em i ran i go makim animal ol wokman i mas kilim, na em i bringim olgeta kaikai samting i kam putim bilong ol visita i ken kaikai. Em i no givim olgeta wok long ol wokboi tasol long mekim, nogat, dispela man i gat pasin daun, em yet i mekim ol dispela wok i no gat nem. Em i no sem long mekim kain wok olsem bilong mekim gut long ol narapela.

Abraham i putim yau long tingting bilong ol narapela i stap aninit long wok bos bilong em. Baibel i no stori planti long toktok i kamap namel long Abraham na Sara. Tasol inap tupela taim yumi ritim long Baibel olsem Abraham i putim yau long tingting bilong Sara na em i  bihainim. (Stat 16:2; 21:8-14) Long wanpela bilong ol dispela taim, tok bilong Sara “i mekim Abraham i bel hevi.” Tasol Jehova i toktok wantaim Abraham na kamapim olsem tingting bilong Sara i stret, olsem na long pasin daun Abraham i bihainim tingting bilong Sara.

YUMI KISIM WANEM SKUL LONG DISPELA? Sapos tru tru yumi gat pasin daun, yumi bai amamas long mekim gut long ol narapela. Yumi bai amamas long mekim olgeta samting yumi inap long mekim bilong helpim ol narapela long stap gut.

Yumi inap soim pasin daun tu long rot bilong putim gut yau long tok ol narapela i kamapim. Yumi no ken sakim wanpela tingting, long wanem, em i tingting bilong narapela, nogat, i gutpela yumi amamas long harim tingting bilong narapela. (Sindaun 15:22) Dispela kain pasin bai helpim tru ol man i mekim wok bos. Wanpela supavaisa, nem bilong em John, i tok: “Mi luksave olsem gutpela bos i save mekim pasin we i kirapim olgeta wokman na ol i no pret long kamapim tingting bilong ol.” Em i tok moa olsem: “Sapos yu gat pasin daun, bai yu luksave olsem man i wok aninit long yu em inap save gut long mekim wanpela samting, winim save bilong yu. Tasol yumi mas save olsem i no gat wanpela man, o bos tu, i gat olgeta save bilong mekim samting i kamap gutpela moa.”

Taim yumi bihainim pasin bilong Abraham na putim yau taim ol narapela i kamapim tingting bilong ol na mekim ol wok i no gat nem bilong helpim ol, Jehova bai orait long yumi. Baibel i tok: “God i save sakim ol man i mekim pasin antap. Tasol em i save kamapim bikpela pasin helpim long ol man i gat pasin daun.”—1 Pita 5:5.

[Futnot]