Ol Boda i No Pasim Rot

Ol Witnes Bilong Jehova i wok strong long daunim ol samting i brukim lain. Ol i bihainim stiatok em Jisas i mekim long ol disaipel, olsem: “Yupela olgeta i stap brata brata.” (Matyu 23:8) Dispela samting i stap ples klia long tupela hap we ol Witnes i save bung bilong mekim lotu—long Potugal na Spen.

TAUN Valença do Minho long noten Potugal i gat banis i raunim. Ol i bin wokim dispela taun long taim nogut. Banis bilong en i stap long sait bilong maunten na i lukluk i go daun long wara Minho, em boda bilong Spen na Potugal. Taun Tui bilong Spen i stap long hapsait bilong wara, na i gat wanpela traipela haus lotu i luk olsem wanpela bikpela ples hait. Ol i bin wokim ol bikpela banis bilong taun Tui na Valença bihain long yia 1600 C.E., taim pait i kamap namel long Spen na Potugal.

Long 1995, ol i pinisim wok bilong kastam na boda sekiuriti bilong dispela tupela kantri bilong Yuropian yunion. Tasol bilong ol man i ken stap wanbel, ol i mas mekim sampela samting moa. Ol i mas mekim ol samting bilong senisim bel na tingting bilong ol manmeri. Long Valença, i gat wanpela naispela liklik haus i stap bilong soim olsem ol lain man inap i stap wanbel, maski ol i bilong narapela narapela kantri. Em wanpela haus we ol man i save bung bilong mekim lotu—em Haus Kingdom bilong ol Witnes Bilong Jehova—na ol Witnes bilong Spen na Potugal i save bung long en.

Long 2001, ol Witnes long Tui i luksave olsem ol i mas i gat wanpela nupela Haus Kingdom. Ol i mas lusim haus ol i save rentim bilong mekim lotu, tasol ol i sot long mani bilong wokim wanpela nupela Haus Kingdom. Na tu, kongrigesen bilong ol i gat liklik lain tasol, olsem na mani bilong ol i no inap long rentim wanpela haus bilong mekim lotu. Olsem na ol Witnes long Spen i askim ol wanbilip long Potugal, sapos ol tu inap yusim Haus Kingdom bilong ol i stap klostu liklik long taun Tui.

Eduardo Vila bilong Kongrigesen Tui long Spen, i tok: “Mipela i toktok long dispela samting long wanpela miting long Disemba 2001. Taim mipela i pinis long miting, mi luksave olsem Jehova i bin kirapim tru bel bilong ol brata long Potugal. Ol i bin givim planti samting bilong ol yet bilong wokim dispela naispela Haus  Kingdom, na em i strongim tru bilip bilong mi long lukim olsem ol i redi long serim Haus Kingdom wantaim mipela.”

Américo Almeida, wanpela Witnes long Potugal husat i bin stap tu long dispela miting, em i tok: “Mipela i welkamim ol brata bilong Spen long Haus Kingdom bilong mipela. Mipela i bilip tru olsem Jehova bai blesim dispela samting, na mipela olgeta i wanbel long en.” Ol Witnes long tupela sait bilong boda, ol i stap wanbel wantaim. Paolo, wanpela Witnes i stap long Valença, em i tok: “Mipela i bilong narapela narapela kantri, tasol mipela i no gat dispela tingting, nogat. Mipela i stap olsem brata brata long ol samting bilong lotu.”

Taim ol visita i kam long Haus Kingdom, namba 1 samting ol i lukim em tupela klok i stap long wol, tasol taim bilong tupela i no wankain. Taim bilong Spen em 1 aua paslain long taim bilong Potugal. Dispela tasol em samting i narapela narapela long dispela tupela lain i save yusim Haus Kingdom. Taim i gat sampela wok ol i mas mekim long Haus Kingdom, Komiti Bilong Wokim Ol Haus Kingdom i stap long Spen i supavaisim wok bilong ol volantia i kam long tupela kongrigesen wantaim. Paolo i tok: “Planti bratasista long Spen i gat save long mekim gut wok na ol i kam helpim mipela. Sampela i stap longwe winim 160 kilomita. Dispela wok i strongim pasin laikim namel long tupela kongrigesen.”

Orait, nau yumi ken stori long narapela eksampel long olsem wanem ol brata i stap wanbel maski ol i bilong tupela kantri.

 Pasin Wanbel Namel Long Tupela Lain

Puigcerdá em i wanpela taun bilong Spen i stap klostu long boda bilong Frans. Em i stap long ples daun i gat gutpela graun na ol maunten Pyrenees i raunim. Bipo dispela ples daun Cerdaña olgeta i stap aninit long Spen. Tasol long 1659, long wanpela kontrak ol i kolim Treaty of the Pyrenees, Spen i orait long Frans i ken kisim hap bilong dispela ples daun.

Long nau, ol manmeri bilong Frans i save go raun na baim ol samting long Puigcerdá, em biktaun i stap long dispela ples daun. Na kirap long 1997 na i kam, ol Witnes Bilong Jehova long Puigcerdá i orait long ol Witnes bilong Frans i ken yusim Haus Kingdom bilong ol. Long dispela yia, ol Witnes long Frans i mas lusim haus ol i save rentim bilong mekim miting. Sapos ol i laik yusim Haus Kingdom i stap long Frans yet, ol i mas draiv inap 1 aua bilong i go kamap, na long taim bilong kol, sno i save karamapim tru rot i stap namel long ol maunten.

Taim ol Witnes bilong Frans i stori olsem ol i nidim tru wanpela haus bilong mekim lotu, kwiktaim ol Witnes bilong Spen i tokaut olsem ol i amamas long serim Haus Kingdom bilong ol. Prem, wanpela Witnes long Spen, em i tok: “Mipela olgeta bratasista long Spen i amamas tru long serim Haus Kingdom bilong mipela. Ol tok bilong Baibel em mipela i bin lainim insait long ol yia i go pinis i bin kirapim mipela long mekim dispela gutpela pasin. Sampela wik bihain, mipela i stat long serim Haus Kingdom bilong mipela, na mipela i bin mekim olsem inap 13 yia.”

Eric, wanpela wasman long kongrigesen bilong tok Frans, em i tok: “Puigcerdá em gutpela hap bilong mipela long go long ol miting. Na mi inap tingim yet gutpela pasin bilong ol bratasista bilong Spen long welkamim mipela. Ol i bilasim gut Haus Kingdom wantaim ol plaua na wanpela sain i tok, ‘Ol gutpela brata na sista bilong mipela, yupela i welkam.’”

Eric i tok moa olsem: “Taim mipela i pasim Haus Kingdom long Frans, ol man i ting mipela i no gat moa kongrigesen. Tasol mipela i autim tok planti taim long dispela hap, na tu, mipela i tilim ol invatesen pepa bilong singautim ol man i kam miting long Spen, olsem na ol i luksave mipela i save mekim yet ol miting. Ol manmeri i gat gutpela bel ol i amamas long kam long miting long Spen. Na tu, mipela i serim Haus Kingdom wantaim ol bratasista bilong Spen na dispela i mekim mipela i pas gut wantaim. Bipo mipela i save olsem i gat wanpela kongrigesen long tokples Spen long hapsait bilong boda, tasol mipela i no bung tumas wantaim ol. Nau mipela i save lukim narapela narapela planti taim, na mipela i no pilim olsem mipela i stap wanpis long dispela ples daun namel long ol maunten.”

Olsem wanem? Mipela i bilong tupela kantri na dispela i mekim na mipela i no pas gut wantaim? Wanpela Witnes bilong Frans husat i winim  pinis 80 krismas, i tok: “Taim mi kisim save olsem ol miting bilong mipela bai stap long hapsait bilong boda long Spen, mi tingting planti. Tasol mipela i tenkyu long gutpela pasin pren bilong ol brata long Puigcerdá, na dispela senis i no kamapim wanpela hevi, nogat. Dispela i opim rot bilong kamapim klia pasin wanbel i stap namel long lain bilong Jehova long olgeta hap.”

As na Ol i Pas Gut Wantaim

Ol lain i kamapim Yuropian yunion i tok ol kantri i stap memba bilong en “ol i tingting strong long mekim samting bilong helpim ol manmeri long Yurop long pas gut wantaim.” Ol i pinisim wok bilong kastam na boda sekiuriti long ol yia bihain long 1980 na 1990 bilong hariapim dispela samting. Tasol dispela i no inap, ol man i mas senisim tu tingting bilong ol.

Ol Witnes Bilong Jehova i wok strong long pinisim pasin bilong bel nogut long ol man bilong ol narapela lain. Ol i save olsem em i gutpela samting long bung wantaim ol brata i kam long kain kain sindaun, na ol i save tu olsem “God i save mekim wankain pasin long olgeta man.” (Aposel 10:34) Long ol kibung intenesenel na long ol Haus Kingdom, ol i lukim olsem ‘em i gutpela tumas long ol manmeri bilong God i sindaun gut wantaim na i stap wanbel olsem ol brata tru, na ol i stap belgut’! (Song 133:1) Pasin bilong ol Witnes long Valença na Puigcerdá long pas gut wantaim ol brata bilong ol kantri i stap klostu i kamapim klia dispela samting.

[Rait long pes 13]

“Mipela i bilong narapela narapela kantri, tasol mipela i no gat dispela tingting, nogat. Mipela i stap olsem brata brata long ol samting bilong lotu”

[Rait long pes 14]

“Dispela wok i strongim pasin laikim namel long tupela kongrigesen”

[Rait long pes 15]

‘Em i gutpela tumas long ol manmeri bilong God i sindaun gut wantaim na i stap wanbel olsem ol brata tru, na ol i stap belgut’! SONG 133:1

[Piksa long pes 13]

Piksa bilong Tui na wara Minho ol i kisim long taun Valença do Minho

[Piksa long pes 14]

Stretim Haus Kingdom

[Piksa long pes 15]

Ol maunten Pyrenees na ples daun bilong Cerdaña

[Piksa long pes 15]

Tupela elda bilong tupela kongrigesen—bilong Spen na bilong Frans—em ol i bung long Haus Kingdom long Puigcerdá