Baibel i Save Senisim i Stap Bilong Man

WANEM samting i kirapim wanpela fama bilong groim tabak long senisim wok na ol bilip bilong lotu em i bin holim strong? Olsem wanem wanpela meri husat i bin kalabus long dring alkohol, em i gat strong long senisim pasin bilong em? Ritim stori bilong ol.

“Mi amamas tru long stap insait long dispela bikpela famili.”—DINO ALI

YIA MI BON: 1949

KANTRI: AUSTRALIA

BIPO: FAMA BILONG GROIM TABAK

LAIP BILONG MI LONG BIPO: Long 1939, papamama bilong mi i bin lusim Albenia na kam sindaun long Mareeba, wanpela liklik taun long Queensland, Australia. Planti manmeri bilong Bosnia, Grik, Itali, Serbia, na sampela narapela kantri, ol tu i kam sindaun long dispela hap na ol i bringim ol pasin, kastam, na kalsa bilong ol i kam wantaim ol. Mareeba em ples we ol fama i save groim tabak, olsem na papamama bilong mi tu i groim tabak.

I no longtaim na mama i karim biksusa bilong mi, bihain tupela bikbrata, na bihain em i karim mi. Sori tru, papa i dai long hat atek taim mi gat 1-pela krismas tasol. Mama i marit gen na em i karim 4-pela moa pikinini man. Mipela olgeta i kamap bikpela long fam bilong waspapa bilong mi.

Mi lusim famili taim mi tineja. Taim mi gat 20 krismas samting mi maritim Saime long wanpela haus lotu bilong ol Muslim, long wanem, mitupela wantaim i bilong dispela lotu. Olgeta ankol, anti, na ol kasen ol i bilong lotu Muslim. Mi ritim buk Koran na wanpela buk i stori long laip bilong profet Mohamet. Na tu, mi ritim wanpela liklik Baibel. Buk Koran i stori long ol profet em Baibel i stori long ol, na taim mi ritim Baibel, dispela i helpim mi long kliagut long ol dispela profet i bin stap long wanem taim.

Ol Witnes Bilong Jehova i save kam long haus bilong mi na lusim ol buk na nius, na mitupela Saime i save amamas long ritim. Planti taim mipela i save paitim toktok i go i kam wantaim ol Witnes long kain kain tok bilong lotu. Long olgeta taim, ol i save bekim ol askim bilong mi long rot bilong Baibel, na ol i no kamapim tingting bilong ol yet. Mi pilim tru dispela pasin bilong ol.

Ol Witnes i tokim mi olsem ol i laik stadi long  Baibel wantaim mi na ol i singautim mi i go long ol miting bilong ol, tasol olgeta taim mi save tok nogat. Nambawan samting mi laikim em wanpela fam bilong mi yet na bikpela famili. Tru, mi no kisim wanpela fam bilong mi yet, tasol bihain mi amamas long kamap papa bilong 5-pela pikinini.

BAIBEL I SENISIM I STAP BILONG MI: Inap 9-pela yia bihain long mi bungim ol Witnes Bilong Jehova long namba 1 taim, mi holim yet ol bilip bilong lotu bilong mi na mi no senisim. Tasol mi save amamas long kisim na ritim ol buk na nius ol Witnes i wokim. Olgeta Sande, mitupela Saime i save lusim sampela haptaim bilong ritim ol dispela buk na nius. Mipela i holim yet olgeta nius mipela i bin kisim insait long ol yia i go pinis. Ol dispela nius i bin helpim mi tru taim ol narapela i sutim tok long nupela bilip bilong mi.

Olsem, mi bungim wanpela evanjelikal pasto husat i strong long mi mas kisim Jisas olsem Seivia bilong mi. Em i bin pulim tingting bilong brata bilong Saime na wanpela brata bilong mi na ol i bihainim em. I no longtaim na sampela pren bilong mi long kain kain lotu i laik kirapim mi long go lotu wantaim ol. Sampela i givim mi ol buk na nius i sutim tok long ol Witnes Bilong Jehova. Mi askim ol dispela man long yusim Baibel long soim mi long as bilong bilip bilong ol, tasol ol i no inap long bekim ol askim bilong mi.

Dispela pasin birua i kirapim mi long stadi gut moa long Baibel na mekim sampela moa wok painimaut long ol buk na nius mi bin kisim long ol Witnes. Orait, nau mi luksave olsem mi mas mekim sampela senis long laip bilong mi na bihainim ol tok mi kisim save long en.

Tru, mi no stadi long Baibel wantaim ol Witnes, tasol mi kirap go long ol miting bilong ol. Pastaim mi pret na sem, tasol mi bungim planti gutpela manmeri long ol dispela miting, na mi amamas long ol samting mi kisim save long en. Mi wokim disisen olsem mi bai kamap wanpela Witnes Bilong Jehova, na long 1981 mi kisim baptais bilong makim olsem mi dediket pinis long God.

Meri bilong mi i no birua long mi, tasol sampela taim em i pilim olsem ol Witnes i bin giamanim mi. Maski i olsem, em i bin kam lukim baptais bilong mi. Mi save tokim em long planti tok i tru mi wok long lainim. Wanpela yia bihain long mi baptais, mitupela Saime i draiv i kam bek long haus bihain long wanpela holide, na em i tokim mi olsem em i laik kamap wanpela Witnes. Man! Mi kirap nogut tru long dispela! Em i kisim baptais long 1982.

I no isi long mekim ol senis long sindaun bilong mipela. Mi no groim moa tabak, long wanem, Baibel i no orait long dispela pasin. (2 Korin 7:1; Jems 2:8) Sampela haptaim i lus na mipela i kisim wok mani bilong lukautim mipela. Na tu, inap planti yia bihain long dispela, sampela wanblut i no laik tru long kam visitim mipela. Mipela i bihainim ol stiatok bilong Baibel na soim pasin laikim long ol. Na isi isi ol wanblut i lusim pasin birua na ol i stat gen long kam visitim mipela.

GUTPELA SAMTING I PAINIM MI: Mi bin karim kain kain hevi olsem hevi bilong mani,  famili i birua, daunim pasin bilong sem, na ol dispela samting i bin skulim mi olsem God Jehova i no les kwik long helpim mi long karim ol dispela hevi. Olsem: Nau mi wanpela elda bilong kongrigesen na planti taim mi mas sanap long pletfom na skulim ol man. Dispela i hatwok long mi, long wanem, pasin bilong sem i mekim na maus bilong mi i hevi long toktok. Tasol mi save beten oltaim, na Jehova i helpim mi na mi inap mekim dispela gutpela wok.

Mitupela meri bilong mi i pas gut moa wantaim, na dispela pasin pren i wanpela gutpela samting tru. Mipela i bin mekim sampela popaia taim mipela i mekim bikpela long ol pikinini, tasol mipela i traim bes long putim tok i tru bilong Baibel i go daun long bel bilong ol. (Lo 6:6-9) Mipela i amamas olsem namba 1 pikinini man bilong mipela na meri bilong em ol i mekim wok misineri.

Mi tingim yet wanpela taim bihain liklik long mipela famili olgeta i kirap go long ol miting bilong ol Witnes. Mi pakim kar na lukluk i go insait long Haus Kingdom we ol manmeri i bung. Mi askim famili bilong mi: “Yupela i lukim wanem samting?” Insait long Haus Kingdom i gat ol man bilong kain kain lain, sindaun, na tokples—ol man bilong Aborijini, Albenia, Australia, na Kroesia—tasol ol i amamas long bung wantaim. Mi amamas tru long stap insait long dispela bikpela famili bilong lain bratasista em ol i stap long Australia na long olgeta hap bilong graun.—1 Pita 5:9.

“Susa bilong mi i no les kwik long helpim mi.”—YELENA VLADIMIROVNA SYOMINA

YIA MI BON: 1952

KANTRI: RASIA

BIPO: KALABUS LONG ALKOHOL, TRAIM LONG SUASAID

LAIP BILONG MI LONG BIPO: Mama i karim mi long Krasnogorsk, wanpela naispela liklik taun klostu long Moscow. Planti long famili bilong mi ol i mekim wok tisa. Mi wanpela gutpela sumatin na mi skul long musik. I luk olsem ol gutpela samting bai painim mi long bihain.

Taim mi marit, mitupela man bilong mi i go sindaun long wanpela ples we planti taim ol man i save tok swea, dring alkohol, na smok. Long dispela taim mi no luksave olsem ol dispela pasin i wok long bagarapim pasin bilong mi. Pastaim mi go long ol pati tasol bilong singsing na pilai gita. Tasol taim mi stap pinis long pati, ol manmeri i save invaitim mi long smok na dring wantaim ol. I no longtaim na mi kalabus long dring alkohol.

Dispela pasin i wok long bagarapim laip bilong mi. Bihain long sampela haptaim mi bagarap olgeta na mi pilim olsem mi no inap kaikai wanpela samting. Mi laik dai tasol, olsem na mi traim long suasaid. Mi tenkyu olsem mi no bin dai.

Insait long dispela haptaim, susa bilong mi i save kam lukim mi long olgeta taim. Em i bin kamap wanpela Witnes Bilong Jehova, na em i traim long tokim mi long olsem wanem Baibel inap helpim mi. Pastaim mi no gat laik long save long Baibel, olsem na mi traim long pasim em long kam lukim mi. Tasol susa bilong mi i no les kwik long helpim mi. Em i mekim  gutpela pasin isi na soim pasin laikim long mi, na dispela i mekim na mi orait long stadi long Baibel.

BAIBEL I SENISIM I STAP BILONG MI: Taim mi kirap long stadi long Baibel, mi pasim tok long bel olsem mi mas lusim pasin bilong dring. Long dispela taim, wanpela neiba i spak na i paitim mi nogut tru. Mi kisim bikpela bagarap na mi go slip long haus sik. Fopela bun bilong banis bilong mi i bruk, na wanpela ai bilong mi i bagarap. Tasol i stap bilong mi long haus sik i helpim mi long winim hevi i save painim man i wok long lusim kalabus bilong dring alkohol.

Insait long dispela haptaim mi save beten oltaim. Wanpela tok bilong Baibel i mekim gut bel bilong mi em tok bilong Krai 3:55, 56, em i tok: “Bikpela, mi stap nogut tru na i olsem mi bin stap long ples bilong ol man i dai pinis. Na mi singaut long yu long helpim mi. Mi bin singaut olsem, ‘Plis Bikpela, yu ken harim krai bilong mi. Yu no ken pasim yau.’ Na yu bin harim dispela singaut bilong mi.”

Mi bilip tru olsem Jehova i harim beten bilong mi. Em i givim strong long mi bambai mi no ken i go bek long olpela pasin bilong mi. Sampela taim mi gat laik long kirap gen long dring. Tasol mi amamas long tok olsem mi no bin larim dispela laik i pundaunim mi.

Taim mi wok yet long stadi long Baibel, mi kisim save olsem mi mas sapotim wok bos bilong man bilong mi olsem het bilong famili. (1 Pita 3:1, 2) I no isi long mi mekim olsem, long wanem, mi save bosim tumas man bilong mi. Mi beten long Jehova i ken helpim mi. Sampela haptaim i lus na isi isi mi senisim pasin bilong mi na mi helpim gut man bilong mi.

Man bilong mi i kirap nogut long ol senis mi mekim. I kam inap long dispela taim em i no gat laik long kisim save long ol tok bilong Baibel. Tasol taim mi mekim disisen olsem mi bai lusim smok, em i tok: “Sapos yu lusim smok, mi bai kirap stadi long Baibel!” Mitupela wantaim i lusim smok long wankain taim.

GUTPELA SAMTING I PAINIM MI: Man bilong mi i bihainim tok promis bilong em na em i kirap stadi long Baibel. Nau mitupela wantaim i save ritim Baibel long olgeta de, tingim tingim ol tok bilong en, na traim long bihainim long laip bilong mipela.

Sindaun bilong famili bilong mi i kamap gutpela tru—na mi tu i kisim planti gutpela samting. Mi tenkyu long Jehova i kirapim mi long go klostu long em. (Jon 6:44) Na tu, mi tenkyu long susa bilong mi long em i no bin les kwik long helpim mi. Dispela i mekim na mi luksave olsem tru tru Baibel i save senisim i stap bilong ol man.

[Rait long pes 11]

Mi luksave olsem mi mas mekim sampela senis

[Rait long pes 13]

Susa bilong mi i mekim pasin isi na pasin laikim long mi, na mi orait long stadi long Baibel