▪ Sampela man i bin ting olsem graun bai pinis long Oktoba 21, 2011. Tasol dispela samting i no bin kamap. Olsem na tok profet bilong Harold Camping, em wanpela niusman long Amerika, i no kamap tru. Em i tok olsem De Bilong Kot bai kamap long Me 21, 2011—bikpela guria bai kamap long olgeta hap bilong graun, na 5-pela mun bihain, long Oktoba 21, graun bai pinis olgeta.

Tasol graun bai i no inap pinis, nogat tru. Man Bilong Wokim graun i no inap larim dispela samting i kamap. Baibel i tok: “Yu putim graun i stap long ples bilong en, na i stap olsem na i no save surik.”—Song 119:90.

Tasol ating sampela man bilong ritim Baibel bai tok olsem paia bai bagarapim graun. Ol i kamapim tok bilong 2 Pita 3:7, 10 bilong sapotim tingting bilong ol, em i tok: “Long wankain tok skai na graun bilong nau i wetim paia i kamap. Na skai na graun i wetim de bilong bikpela kot, na ol man i sakim tok bilong God, ol bai bagarap olgeta. . . . De bilong Jehova bai kamap olsem stilman i save kam. Skai bai pairap bikpela na pinis kwiktaim tru, na ol samting bilong skai na graun bai kamap hat nogut tru na pinis, na graun wantaim ol samting i stap long en bai paia.” Yu ting tok bilong aposel Pita i makim olsem graun tru na skai tru bai bagarap?

Nogat, dispela tok i no makim samting tru tru. Bilong kliagut long ol dispela ves, yu mas skelim tok bilong Pita long dispela pas bilong em wantaim ol narapela tok bilong Baibel. Sapos graun tru na skai tru bai bagarap, dispela bai makim olsem paia bai bagarapim planti bilion sta na olgeta samting bilong yunives, long wanem, wanpela liklik hap tasol bilong yunives i gat ol man nogut long en. Yu ting yu bai bagarapim naispela longpela nambis sapos wanpela liklik wesan tasol i no luk gut long ai bilong yu? Yu no inap mekim olsem, a? Olsem tasol, pasin bikhet i stap long wanpela hap tasol bilong yunives, olsem na Jehova bai i no inap bagarapim olgeta samting em i wokim.

Na tu, dispela tingting i pait wantaim tok bilong Jisas Krais, em i tok: “Ol man i bihainim pasin isi, ol i ken amamas, long wanem, ol bai kisim graun olgeta.” (Matyu 5:5; Song 37:29) Yu ting wanpela gutpela papa bai wokim wanpela naispela haus bilong famili bilong em na bihain em bai kukim long paia? (Song 115:16) Nogat tru! Jehova em i Man Bilong Wokim olgeta samting, na tu, em i wanpela gutpela Papa.—Song 103:13; 1 Jon 4:8.

Pita i yusim dispela tok “graun” bilong makim ol manmeri—long dispela ves em i makim ol manmeri nogut. Pita i tok wankain samting olsem i bin kamap long Bikpela Tait long taim bilong Noa. (2 Pita 3:5, 6) Long dispela taim, ol man nogut tasol i bagarap, graun yet wantaim stretpela man Noa na famili bilong em ol i abrusim bagarap. Olsem tasol, taim Pita i yusim dispela tok “heven,” dispela tu em i wanpela tok piksa. Dispela tok “heven” hia i makim ol gavman bilong ol man i bosim ol manmeri nogut. Olsem na ol gavman nogut na ol man nogut em ol i no laik senisim pasin bilong ol, ol bai pinis, na Kingdom Bilong God long heven bai bosim dispela graun.—Daniel 2:44.

So yu ting graun bai pinis olgeta? Nogat. Samting bai pinis em ol man nogut bilong dispela graun. Tasol graun yet na ol stretpela man bai i stap oltaim oltaim.—Sindaun 2:21, 22.