“Em i Pas Tru Long Bikpela”
Skulim Ol Pikinini Bilong Yu
“Em i Pas Tru Long Bikpela”
OLSEM WANEM? Sampela i bin tokim yu long pas tru long wanpela samting?— a Ol papamama na ol tisa i save tokim ol pikinini long stadi oltaim na no ken lusim. Ol i mas tingim stadi olsem bikpela samting. Yumi laik stori long wanpela man em Baibel i tok “em i pas tru long Bikpela,” olsem Jehova, em i God tru. Nem bilong dispela man em Hesekia. Yumi ken skelim wanem skul yumi inap kisim long pasin bilong em.
Taim Hesekia i pikinini yet, i stap bilong em i no gat amamas long en. Papa bilong em Ahas, king bilong Juda, i bin lusim pasin bilong lotuim Jehova. Ahas i go pas long pasin bilong lotuim ol god giaman taim Hesekia i mangi yet. Na Ahas i bin givim wanpela pikinini bilong em yet—brata tru bilong Hesekia—bilong kilim na ofaim long wanpela god em i lotuim!
Maski Ahas i wok long mekim ol pasin nogut, Hesekia i bihainim yet tok bilong Jehova. Yu ting i hatwok long em i mekim olsem?— Yes, em i hatwok tru. Tasol Hesekia i no les na lusim dispela pasin! Orait nau yumi ken kisim save long olsem wanem em i bin pas tru long Jehova, na olsem wanem yumi tu inap mekim olsem.
Hesekia i kisim save long sampela man em ol i bin pas tru long Jehova. Wanpela man olsem em Devit. Tru Devit i bin stap sampela handret yia paslain long Hesekia, tasol Hesekia inap kisim save long em long rot bilong Baibel. Devit i tok: “Maski papa na mama i givim baksait long mi, Bikpela bai i lukautim mi.”
Yu luksave long samting i helpim Devit long bihainim tok bilong Jehova?— Bilip bilong em i bin helpim em! Devit i save olsem sapos em i bihainim tok bilong Jehova, orait Jehova bai helpim em. Devit i bilip tru long dispela! Hesekia i tingim pasin bilong Devit, na dispela i helpim em long pas tru long Jehova na bihainim tok bilong Em. Yu tu yu inap bilip olsem Jehova bai helpim yu sapos yu bihainim tok bilong em na pas tru long em oltaim.
Tasol olsem wanem sapos papa o mama bilong yu i no save lotuim Jehova?— God i tok ol pikinini i mas bihainim tok bilong papamama. Olsem na yu mas bihainim tok bilong papamama bilong yu. Tasol sapos ol i tokim yu long mekim samting em God i tok yu no ken mekim, yu ken tokim ol long as na yu no inap mekim olsem. Yu no ken giaman, stil, o mekim ol narapela samting em God i tok i no stret, maski husat i tokim yu long mekim. I stret yu bihainim tok bilong God!
I gat sampela man i bin i stap olsem gutpela piksa yumi ken bihainim. Devit na Jotam, em bubu man bilong Hesekia, ol i stap olsem gutpela piksa Hesekia i ken bihainim. Tru, Jotam i dai long taim mama i no karim yet Hesekia, tasol Hesekia i gat rot bilong kisim save long em, olsem yumi long nau inap mekim long rot bilong Baibel. Yu inap tingim sampela man moa em ol i bin stap olsem gutpela piksa yumi ken bihainim?—
Tru, long Baibel yu inap kisim save long sampela popaia em Hesekia, Devit, Jotam, na sampela moa i bin mekim, long wanem, ol i sinman. Tasol ol dispela man i laikim tru Jehova, ol i tokaut long ol popaia bilong ol, na ol i wok strong long mekim ol samting i stret. Tingim, Jisas, Pikinini Bilong God, em wanpela tasol i gutpela olgeta. Olsem na i gutpela yumi kisim save long em na wok strong long bihainim pasin bilong em.
Ritim long Baibel bilong yu
Song 27:10; Efesus 6:1; Kolosi 3:20
[Futnot]
a Sapos yu ritim wantaim pikinini, des (—) bai helpim yu long tingim olsem yu mas malolo na kirapim pikinini long kamapim tingting bilong em.
Ating Yu Bai Laikim Tu
WASTAUA
Jisas Krais—Yumi Mas Tingim Em Olsem Wanem?
Yu ting yumi mas tingim Jisas olsem wanpela bebi? Husat dispela ol saveman i kam lukim em? Jisas i mekim wanem nau?
WASTAUA
God Inap Bel Hevi—Olsem Wanem Yumi Inap Amamasim Em
Yu bin save tu olsem yu inap mekim Jehova amamas o bel hevi? Kisim skul long olsem wanem pasin bilong Adam na Iv i mekim Jehova i bel hevi.
WASTAUA
Yumi Inap Kisim Wanem Skul Long Wanpela Man Nogut?
Klostu long Jisas i dai, em i promisim man nogut olsem em bai kisim laip long Paradais. Em i minim wanem, na dispela Paradais bai wanem kain ples?
