SAN i lait gut long dispela de bilong mun Me long Ripablik Altay—em naispela hap tru long saut-wes bilong Saibiria. Taim mipela i lukluk i go ausait long windo bilong kar, mipela i lukim bikbus i gat ol diwai pain na baksait long en i gat ol traipela maunten em ais i karamapim het bilong ol. Dispela hap i stap longwe tru na em ples bilong ol Altay—em wanpela lain Esia i gat tokples bilong ol yet. Ol i amamas long stap long ol maunten Altai, em wanpela nem i kam long tokples Turkic-Mongolia, mining bilong en “kala olsem gol.”

Inap sampela yia i go pinis, mitupela meri bilong mi i lainim tokples Sain Bilong Rasia, na mipela i go visitim ol tokples Sain kongrigesen na ol liklik grup bilong ol Witnes Bilong Jehova em ol i yaupas. Long dispela kantri, ol manmeri bilong winim 100 lain na 70 narapela narapela kalsa ol i mekim wanpela tokples tasol, em tokples Rasia. Na tu, i gat ol yaupas, na ol i mekim narapela tokples, em tokples Sain Bilong Rasia. Ol yaupas i save pas gut wantaim, na planti em mipela i bungim ol i amamas long stori long sindaun na famili bilong ol, na ol i mekim gut long mipela. Ol yaupas long Altay tu i mekim wankain pasin olsem.

Long taun Gorno-Altaysk, mipela i painimaut olsem sampela yaupas i stap long wanpela liklik ples em longwe olsem 250 kilomita. Mipela i save olsem i gat sampela Witnes long dispela hap, tasol ol i no save long tokples Sain. Mipela i tingim ol dispela yaupas bilong Altay na mipela i laik go painim ol. Mipela i amamas tru, olsem na Yury na Tatyana, em tupela yaupas marit, ol i laik kam wantaim mipela. Long liklik bas, mipela i putim wanpela DVD pleia na ol DVD i gat ol buk samting long tokples Sain. Mipela i putim tu bikpela temos, ol sanwis wantaim sosis ol i smokim, na wanpela kain kaikai bilong Rasia, em liklik pai i gat kabis na poteto long en. Na laspela samting, mipela i spreim marasin long skin, klos, na ol su bilong mipela bilong sakim ol liklik binatang bilong dispela hap em ol i save kamapim wanpela kain sik bilong kru, em ensefalaitis.

Mipela i bihainim rot i ron namel long ol naispela maunten. Win bilong maunten i gat switpela smel bilong plaua jasmin na lailak, na dispela i givim nupela strong long mipela! Mipela i amamas long lukim sampela dia bilong Saibiria i stap isi na kaikai gras. Ol viles bilong ol Altay i gat ol haus ol i wokim long plang na rup bilong en long kapa. Klostu long planti haus i gat ol haus plang ol i kolim ayyl. Ol dispela haus i gat 6-pela kona na rup bilong en i raunpela olsem kon. Sampela i luk olsem ol haus tipi bilong ol Indian em ol i karamapim  long skin bilong diwai. Planti famili Altay i save stap long ol haus ayyl kirap long mun Me i go inap Septemba, na ol i save muv i go long haus tru long taim bilong kol.

Ol Witnes bilong ples i welkamim mipela na ol i bringim mipela i go long haus bilong tupela marit yaupas. Ol i amamas long lukim mipela na ol i laik save, mipela i kam long we na mipela i mekim wanem wok. Ol i gat kompiuta, olsem na taim mipela i kamautim wanpela DVD i kam ausait, ol i strong long pilaim na lukim. Wantu olgeta toktok i stop, i olsem mipela i no stap. Ai bilong ol i pas tru long kompiuta, na sampela taim ol i mekim tokples Sain ol i lukim long DVD na ol i soim olsem ol i amamas. Mipela i hatwok long pulim ai bilong ol i kam long mipela na bai mipela i ken putim DVD i go long kirap bilong en we i gat piksa bilong naispela ples paradais long graun. Long wanpela piksa, mipela i stopim DVD na stori long ol samting God bai mekim bilong helpim ol man, na wanem kain ol manmeri bai stap laip oltaim na kisim dispela gutpela sindaun ol i lukim long piksa. Mipela i amamas taim mipela i lukim olsem ol i laikim tru tok mipela i autim. Taim mipela i laik lusim ol, ol i tokim mipela olsem i gat tupela marit yaupas long wanpela ples i stap longwe olsem tupela aua.

Mipela i draiv gen long rot ol i katim long maunten na i gat planti ston, na mipela i bihainim rot i baut baut na kamap long wanpela liklik ples. Long hap mipela i bungim wanpela famili yaupas—man, meri bilong em, mama bilong meri, na liklik pikinini man bilong tupela marit, na ol i amamas long mipela i kam lukim ol. Mipela i go insait long liklik dua bilong haus ayyl bilong ol, na i gat naispela smel bilong paiawut na wanpela kain milk. Rup bilong haus i sap na i gat hul bilong larim lait i kam insait. Long wanpela kona bilong haus i gat stov na waitpela aven ol i wokim long brik, na ol retpela mat i bilasim ol wol. Ol i givim mipela sampela kaikai bilong ples—ol liklik donat ol i fraim na ti ol i sevim long ol liklik kap bilong ol Esia. Mipela i askim ol, sapos ol i tingting pinis olsem ol inap i stap pren bilong God. Ol i skelim dispela askim. Mama bilong meri i tok, taim em i liklik yet, wanpela taim em i kisim sampela kaikai i go long wanpela hap bilong maunten bilong ofaim long ol god. Em i smail na i tok: “Mi no save long as bilong dispela pasin. Em kastam bilong mipela.”

Mipela i soim ol DVD i stori long dispela samting, na pes bilong ol i lait. Ol i amamas long kisim sampela save moa, tasol olsem wanem bai mipela i helpim ol? Tru, em bai gutpela long salim teks mesis long ol yaupas, tasol dispela hap i no gat antena bilong mobail fon. Olsem na mipela i tok promis long salim pas long ol.

San i wok long i go daun na mipela i tok gutbai long ol na draiv i go bek long Gorno-Altaysk. Maski mipela i taiet, mipela i amamas. Sampela taim bihain, mipela i askim ol Witnes bilong dispela ples long dispela famili yaupas na mipela i kisim save olsem long olgeta 2-pela wik, papa bilong dispela famili i save go long wanpela biktaun na stadi long Baibel na go long miting, na wanpela sista i save long tokples Sain i save helpim em. Mipela i amamas tru olsem wok bilong mipela i karim kaikai!

Wok bilong painim ol yaupas i gat gutpela bel i kain olsem wok bilong painim ol gutpela samting i stap hait insait tru long ol maunten. Mipela i mas wok planti aua long painim wanpela gutpela man o meri olsem. Long mipela, ol maunten Altay bai stap olsem gutpela samting tru long olgeta taim, na em bai kirapim mipela long tingim gen ol manmeri i gat gutpela bel em mipela i bin bungim namel long ol dispela maunten.