“Pasin Laikim i Stap Namel Long Yupela”

“Mi givim nupela lo long yupela, olsem narapela i mas laikim narapela. Yupela i mas laikim narapela narapela olsem mi bin laikim yupela. Sapos pasin laikim i stap namel long yupela, orait olgeta bai save olsem yupela i disaipel bilong mi.”—JON 13:34, 35.

Mining Bilong En: Krais i tokim ol disaipel bilong em olsem narapela i mas laikim narapela olsem em i laikim ol. Jisas i laikim ol inap long wanem mak? Long taim bilong em, ol man i gat tingting nogut long ol man bilong ol narapela lain na long ol meri, tasol Jisas i bin laikim tru olgeta manmeri. (Jon 4:7-10) Pasin laikim i kirapim Jisas long daunim laik bilong em yet na givim taim na strong bilong em long helpim ol narapela. (Mak 6:30-34) Na Krais i mekim bikpela samting moa bilong kamapim pasin laikim bilong em. Em i tok: “Mi gutpela wasman bilong sipsip. Gutpela wasman i save lusim laip bilong en bilong helpim ol sipsip.”—Jon 10:11.

Pasin Bilong Ol Kristen Bilong Pastaim: Long taim bilong ol aposel, ol Kristen i kolim narapela narapela olsem “brata” o “susa.” (Filemon 1, 2) Ol i welkamim ol manmeri bilong olgeta lain i kam insait long kongrigesen Kristen. Ol i bilip olsem “ol Juda na ol Grik ol i wankain, long wanem, Bikpela em i Bikpela bilong olgeta wantaim.” (Rom 10:11, 12) Bihain long Pentikos 33 C.E., ol disaipel long Jerusalem “i salim ol hap graun na kago bilong ol, na mani ol i kisim ol i tilim long olgeta, long husat husat man i sot long ol samting.” Bilong wanem ol i mekim olsem? Ol i laik helpim ol manmeri i baptais nupela, bambai ol inap stap yet long Jerusalem na “wok yet long putim tingting bilong ol i go long ol tok bilong ol aposel.” (Aposel 2:41-45) Wanem samting i kirapim ol long mekim olsem? Inap olsem 200 yia bihain long indai bilong ol aposel, Tertullian i kamapim tok em sampela man i bin mekim long ol Kristen, ol i tok: “Ol i laikim tru narapela narapela . . . na ol i redi tu long i dai bilong helpim narapela narapela.”

Husat Long Nau i Bihainim Dispela Pasin?: Buk The History of the Decline and Fall of the Roman Empire (yia 1837) i kamapim olsem insait long planti handret yia ol man i tok ol i Kristen “ol i mekim nogut tru long narapela narapela, winim pasin nogut ol man i [no bilip] i bin mekim long ol.” Wanpela wok painimaut long Amerika long nau i soim olsem planti lotuman—planti bilong ol i tok ol i Kristen—i nolaik tru long ol man bilong narapela skin kala. Planti taim ol lotuman i no save pas gut wantaim ol wanlotu bilong ol i stap long narapela kantri, olsem na taim ol wanbilip i nidim helpim, ol i no save redi long helpim ol.

Long 2004, taim 4-pela saiklon i bagarapim Florida insait long 2-pela mun, siaman bilong lain Emergency Operations Committee i skelim ol helpim ol i bin givim long ol lain i kisim bagarap bambai em i ken save olsem ol i bin yusim gut ol samting ol i bin kisim, o nogat. Em i tok i no gat narapela grup i stretim gut wok olsem ol Witnes Bilong Jehova, na em i amamas long givim wanem wanem samting ol Witnes i nidim. Paslain long dispela, long 1997, sampela Witnes Bilong Jehova i bringim marasin, kaikai, na klos i go long Ripablik Demokratik Bilong Kongo bilong helpim ol brata Kristen na sampela narapela long dispela hap. Ol wanbilip Witnes long Yurop i bin givim planti samting, pe bilong en inap olsem 1 milion dola.