▪ I gat planti wei bilong stori long bilip bilong God Triwan, na wanpela wei em olsem: “I gat tripela Man i olsem god, (Papa, Pikinini, na Holi Spirit), tripela wantaim i stap oltaim, na tripela wantaim i gat olgeta strong, na narapela i no winim o aninit long narapela, na olgeta wan wan i God, tasol tripela wantaim ol i wanpela God tasol.” Yu ting Baibel i as bilong dispela bilip?

Planti taim ol man i save kolim tok bilong Matyu 28:19 bilong strongim bilip bilong God Triwan. Buk Baibel i kamapim dispela tok bilong Jisas, olsem: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit.” Tru dispela ves i kolim Papa, Pikinini, na holi spirit, tasol i no gat wanpela tok i makim olsem olgeta i wanpela God. Jisas i tokim ol disaipel bilong em bilong lain Juda long skulim ol man na baptaisim ol long nem bilong Papa, Pikinini, na holi spirit. Orait, ol Juda olsem wanpela lain olgeta, ol i gat wanem bilip?

Taim lain Israel i kisim kontrak bilong Lo em tok bilong en i stap long Baibel, God i tokim ol olsem: “Yupela i no ken lotu long narapela god. Yupela i mas lotuim mi wanpela tasol.” (Lo 5:7) Long dispela ves, hamas man i mekim tok? Tok bilong Lo 6:4 i tokaut klia olsem: “Yupela Israel, harim gut. Bikpela, em wanpela tasol em i God bilong yumi”—i no tripela man insait long wanpela man. Lain Israel i bin lusim Isip, em ples we ol man i lotuim Osairis, Aisis, na Horas (piksa long han kais), em wanpela bilong planti god triwan. Olsem na lain Israel i kisim tok long ol i mas lotuim wanpela God tasol. Em i bikpela samting long ol manmeri i mas kliagut long dispela tok. Rabai J. H. Hertz i tok: “Dispela tokaut bilong lotuim wanpela God tasol i makim olsem i tambu tru long ol i lotuim ol kain kain god . . . Beten Sema i no kolim bilip bilong god triwan olsem i stap long tokaut bilong ol Kristen, long wanem, dispela i kalapim lo olsem God i Wanpela Tasol.” a

Jisas i kamap long lain Juda, olsem na ol i skulim em long bihainim dispela wankain tok. Bihain long baptais bilong em, Satan i traim em na Jisas i tok: “Satan, yu klia! Rait Holi i tok: ‘Yu mas lotu long Jehova, God bilong yu, na yu mas mekim wok bilong em wanpela tasol.’” (Matyu 4:10; Lo 6:13) Yumi inap kisim 2-pela skul long dispela stori. Namba 1, Satan i laik pulim Jisas long lusim Jehova na lotuim narapela, tasol dispela samting bai i no stret sapos Jisas em i hap bilong wanpela God. Namba 2, Jisas i kamapim klia olsem i gat wanpela God tasol em ol man i mas lotuim taim em i tok “em [God] wanpela tasol.” Ating em bai tok “mipela,” sapos em i hap bilong God Triwan.

Taim ol man i kisim stretpela save long God na ol i laik lotuim em, ol i save kisim baptais “long nem bilong Papa na bilong Pikinini na bilong holi spirit.” (Matyu 28:19) Dispela i makim olsem ol i kliagut na daun long wok bos bilong Jehova, na luksave long wok Jisas i mekim bilong kamapim ol samting em Jehova i tingting pinis long mekim. (Song 83:18; Matyu 28:18) Na tu, ol i kliagut long wok em holi spirit i mekim, em strong bilong God.—Stat 1:2; Galesia 5:22, 23; 2 Pita 1:21.

Bilip bilong God Triwan i bin paulim ol man inap planti handret yia pinis. Tasol Jisas i bin skulim gut ol disaipel bilong em na stiaim ol i go long Jehova, em “wanpela tasol [em i] God tru.”—Jon 17:3.

[Futnot]

[Piksa Kredit Lain long pes 23]

Musée du Louvre, Paris