▪ Olsem wanem? Yu lukim pinis ol pilai o piksa bilong 3-pela king i go lukim bebi Jisas taim em i slip long bokis kaikai bilong ol animal? Stori i tok, God i bin yusim wanpela sta bilong stiaim ol dispela king i go long wanpela haus bilong ol animal long Betlehem. Long sampela kantri, ol pikinini i lain long tingim nem bilong dispela 3-pela king, em Melkior, Kaspar, na Baltasar. Tasol yu ting dispela stori i stret wantaim tok bilong Baibel? Nogat. Planti samting long dispela stori i no stret.

Namba 1, ol dispela man ol i husat? Long tok Grik bilong bipo, Baibel i no kolim ol olsem ol king o ol saveman. Ol i glasman bilong ol sta. Ol i bihainim pasin haiden we ol i save glasim raun bilong ol sta bilong kisim sampela save. Baibel i no kolim nem o namba bilong ol dispela man.

Namba 2, wanem taim ol dispela man i go lukim Jisas? Ol i no kam lukim Jisas taim em i bebi na slip long bokis kaikai bilong ol animal. Olsem wanem yumi save long dispela? Matyu, man bilong raitim Gutnius, i tok: “Taim ol i kam insait long haus, ol i lukim dispela yangpela pikinini wantaim Maria, mama bilong En.” (Matyu 2:11, King Jems Nupela Testamen) Yumi lukim olsem Jisas i no moa nupela bebi, nogat, em i “yangpela pikinini.” Na tu, Maria na Josep i no stap long wanpela haus bilong ol animal, nogat, long dispela taim ol i stap long wanpela haus tru.

Namba 3, husat i salim “sta” bilong soim rot long ol glasman? Ol tisa bilong lotu i skulim ol man olsem God i bin salim dispela “sta.” Yu ting dispela i tru? Tingim, pastaim dispela “sta” i no stiaim ol glasman i go long Betlehem, nogat, em i stiaim ol i go long King Herot long Jerusalem. Ol i tokaut long Herot—em man bilong jeles na kilim man i dai—long Jisas i kamap pinis, na ol i stori long samting we i kirapim king long heitim tru dispela pikinini husat bai kamap “king bilong ol Juda.” (Matyu 2:2) Herot i gat tingting hait na em i tokim ol long kam bek na tokim em long Jisas i stap long wanem hap stret, na em i tok em tu i laik givim ona long Jisas. Orait, nau “sta” i stiaim ol glasman i go long Josep na Maria. Samting ol dispela man i mekim inap bagarapim laip bilong pikinini sapos God i no bin mekim sampela samting. Tasol gutpela tru, God i bin mekim samting. Herot i belhat nogut tru taim ol glasman i no bringim tok i kam bek long em, olsem na em i givim oda long ol i mas kilim i dai olgeta pikinini man aninit long 2-pela krismas long Betlehem na ol ples i stap klostu.—Matyu 2:16.

Bihain Jehova i kolim Jisas olsem “Pikinini bilong mi, mi laikim em tumas na mi amamas long em.” (Matyu 3:17) Skelim: Yu ting dispela gutpela Papa i gat stretpela pasin bai makim ol glasman bilong ol sta—em ol i save mekim pasin we Lo bilong Em i tambuim—olsem ol mausman bilong em? (Lo 18:10) Yu ting em bai yusim wanpela sta bilong stiaim ol i go long man nogut tru husat i gat strong bilong kilim i dai ol man, na larim ol i kamapim tok bilong sikirapim bel bilong Herot na mekim em i belhat nogut tru? Yu ting God bai yusim dispela wankain sta na ol wankain man long tokaut long wanem hap stret em liklik pikinini bilong em i stap long en?

Yumi ken tok piksa olsem: Wanpela gutpela komanda bilong ami i salim nambawan strongpela soldia bilong em i go mekim wok long hap bilong ol birua. Yu ting dispela komanda bai tokim ol birua long hap stret we ol inap painim dispela soldia? Nogat tru! Olsem tasol, Jehova i salim Pikinini bilong em i kam long dispela graun we em inap kisim bagarap. Olsem na yu ting Jehova bai tokaut long King Herot long hap we Pikinini bilong Em i stap long en? Nogat tru!

Orait husat tru i salim dispela “sta” o samting i luk olsem sta? Tingim, husat i gat laik tru long lukim ol man i kilim i dai Jisas, bambai Jisas i no ken kamap bikpela na inapim wok bilong em long graun? Husat i save wok strong long giamanim ol man, strongim pasin giaman, pasin pait, na pasin bilong kilim man i dai? Jisas yet i kamapim klia dispela “man bilong giaman na papa bilong pasin giaman,” em long pastaim tru “em i man bilong kilim man i dai”—em Satan.—Jon 8:44.