Yu Save Long Dispela?

Wanem insait bilong tok bilong Jisas olsem go inap 2-pela kilomita?

▪ Long Bikpela Tok Long Maunten, Jisas i tok: “Sapos wanpela bikman i givim wok long yu long go wantaim em inap wanpela kilomita, orait go wantaim em inap 2-pela kilomita.” (Matyu 5:41) Ol man husat i putim yau long tok bilong Jisas, ol i luksave olsem dispela tok i makim wok em man i mas mekim, olsem ol wok i stret long gavman i tokim ol sitisen long mekim.

Long taim bilong ol aposel, ol Rom i bosim Israel. Ol Rom i bin subim strong ol man o ol animal long mekim wok bilong ol, o bosim strong ol samting em ol i ting i bikpela samting bilong karimaut wok bilong gavman. Olsem: Ol soldia bilong Rom i bin subim Saimon bilong taun Sairini long karim diwai pos bilong nilim Jisas long en. (Matyu 27:32) Ol kain wok olsem i daunim ol Juda na ol i nolaik tru long mekim.

Baibel i no stori long ol sitisen i mas bihainim tok bilong ol Rom inap long wanem mak. Yumi ken ting ol Juda i bihainim ol samting em ol Rom i tok ol i mas mekim, na ol i no laik mekim sampela samting moa. Olsem na taim Jisas i tokim ol man i harim tok bilong em long ol i mas i go inap 2-pela kilomita, i olsem em i tokim ol long mekim ol samting gavman i askim long mekim, na ol i no ken bel nogut long dispela.—Mak 12:17.

Husat dispela Anas em Gutnius i stori long em?

▪ Long taim ol i kotim Jisas, ol i tok long Anas (Ananus) olsem em i wanpela “bikpris.” (Luk 3:2; Jon 18:13; Aposel 4:6) Em i tambu papa bilong hetpris bilong Israel, Kaiafas, na em yet i bin mekim wok hetpris kirap long 6 o 7 C.E. i go inap long 15 C.E. taim gavana Valerius Gratus bilong Rom i bin rausim em long dispela wok. Maski i olsem, em i gat bikpela strong yet long bosim ol samitng long Israel, long wanem, bipo em i bin mekim wok hetpris. Faivpela pikinini man na tambu pikinini bilong em ol tu i bin mekim wok hetpris.

Long taim ol Israel i bin bosim kantri bilong ol yet, ol man i holim wok hetpris ol i save mekim dispela wok long laip olgeta bilong ol. (Namba 35:25) Tasol taim ol Rom i bosim Israel, ol king na ol gavana bilong Rom i makim olsem hetpris bai holim yet wok bilong ol o nogat, na ol i gat rait long rausim namba bilong hetpris. Saveman Flavius Josifas i tok Kwirinius, em gavana bilong Rom husat i bosim Sisaria, em i bin rausim wanpela man nem bilong em Joasa long wok bilong em olsem hetpris long 6 o 7 C.E. na makim Anas long holim dispela wok. Tasol i luk olsem ol dispela bosman haiden i lukaut gut na makim ol nupela hetpris namel long ol lain pris tasol.

Famili bilong Anas i gridi tru na ol i gat planti mani. I luk olsem ol i kamap maniman, long wanem, ol i save kontrolim tru wok bilong salim ol samting ol man i nidim bilong mekim ofa insait long banis bilong tempel, olsem ol pisin balus, sipsip, oil, na wain. Josifas i tok Ananus (Ananias), em pikinini bilong Anas, em i gat “ol wokman em ol i raskol nogut tru na ol i save strong long kisim namba 10 hap bilong ol samting bilong pris na ol i save paitim ol man i no laik givim samting.”