Jisas Bai Bekim Olsem Wanem?

Planti manmeri husat i daun long God ol i ting olsem ol lotu i mas insait long wok politik. Ol i ting lotu inap mekim bikpela wok bilong stretim ol hevi bilong ol man. Tasol sampela bilipman i ting ol lotu i no ken wok bung wantaim politik. Yu yet i gat wanem tingting long wok bilong ol lotu insait long politik? Yu ting lotu na politik i mas wok bung wantaim?

WANPELA buk i tok long Jisas Krais olsem em i bin “stiaim tingting bilong planti manmeri moa yet, winim olgeta narapela man bilong lotu.” Olsem na tingim sapos yumi inap askim em olsem, Yu ting lotu i mas insait long wok politik? Em bai tok wanem? Taim em i stap long graun, em i bekim dispela askim long rot bilong ol tok na pasin bilong em. Olsem, long Bikpela Tok Long Maunten, Jisas i kamapim ol tok bilong stiaim ol disaipel bilong em long save long wanem wok ol i mas mekim insait long komiuniti bilong ol. Orait nau yumi ken skelim sampela tok bilong em.

Mekim Samting Bilong Helpim Ol Narapela

Jisas i stori long tingting ol disaipel bilong em i mas holim long ol  manmeri bilong dispela graun. Em i tok: “Yupela i olsem sol bilong graun, tasol sapos sol i lusim strong bilong en, orait olsem wanem bai em inap kamap gutpela gen? I no gat wok long kain sol olsem, olsem na ol bai tromoi i go ausait na ol man bai krungutim tasol. Yupela i olsem lait bilong graun. . . . Lait bilong yupela i mas stap ples klia long ai bilong ol man, na bai ol inap lukim ol gutpela wok bilong yupela na givim glori long Papa bilong yupela long heven.” (Matyu 5:13-16) Bilong wanem Jisas i tok ol disaipel bilong em i olsem sol na lait?

Tok bilong Jisas i makim olsem ol disaipel i olsem sol bilong helpim olgeta manmeri, na i no bilong helpim liklik lain tasol. Na ol i olsem lait long olgeta manmeri i laik kisim gut save, na i no long liklik lain tasol. Long rot bilong ol dispela tok piksa, Jisas i kamapim klia olsem em i no laik bai ol disaipel bilong em i stap longwe long ol narapela man. Bilong wanem i olsem?

Tingim dispela: Sol i mas miks wantaim kaikai na bai kaikai i no ken bagarap. Lam i no inap givim lait long rum i tudak sapos man i no putim lam insait long dispela rum. Olsem na yumi ken save Jisas i no tokim ol disaipel bilong em long go sindaun longwe long ol narapela na kamapim komiuniti bilong ol yet, nogat. Na tu, em i no kirapim ol long sindaun long wanpela ples lotu na stap longwe long ol man. Nogat. Sol i mas miks wantaim kaikai, na lait i mas givim lait long rum i tudak, na olsem tasol, ol Kristen i mas stap wantaim ol narapela man na helpim ol.

“Ol i No Bilong Dispela Graun”

Tasol tok bilong Jisas olsem ol disaipel bilong em i mas bung wantaim ol narapela, dispela i kamapim wanpela bikpela askim long ol Kristen i mas i gat wanem tingting long wok politik. Bilong wanem? Paslain liklik long Jisas i dai, em i beten long God i helpim ol disaipel bilong em, olsem: “Mi no askim yu long tekewe ol long dispela graun, nogat, mi ting long dispela man nogut na mi askim yu long lukautim ol. Ol i no bilong dispela graun, olsem mi tu mi no bilong dispela graun.” (Jon 17:15, 16) Orait, olsem wanem ol Kristen i no bilong dispela graun, tasol long wankain taim ol i insait long ol wok bilong komiuniti? Bilong kisim save long dispela, yumi ken skelim 3-pela askim moa, olsem:

• Jisas i gat wanem tingting long politik?

• Ol Kristen long nau i mas mekim wanem?

• Ol bilip Kristen i mekim wanem long ol komiuniti?

[Rait long pes 4]

Jisas i kamapim klia olsem em i no laik bai ol disaipel bilong em i go stap longwe long ol narapela