Laip long Taim Ol Man i Bin Raitim Baibel​—Fama

“[Jisas] i tokim ol disaipel bilong en: ‘Tru tumas, planti kaikai i mau pinis long gaden, tasol i no gat planti wokman. Olsem na askim Bosman bilong bungim kaikai long salim ol wokman i go bungim kaikai bilong em.’”—MATYU 9:37, 38.

PLANTI taim Jisas i bin mekim tok piksa long ol tul na long pasin bilong wokim gaden bilong skulim ol man long sampela bikpela samting. (Matyu 11:28-30; Mak 4:3-9; Luk 13:6-9) Bilong wanem? Long wanem, em i bin stap namel long ol lain bilong mekim wok gaden. Planti man i harim ol tok bilong em ol i bin bihainim wankain pasin bilong wokim gaden olsem ol tumbuna i bin mekim inap planti handret yia pinis. Ol i kisimgut ol tok bilong Jisas taim em i stori long ol wok ol i save mekim long olgeta de. Jisas i save long i stap bilong ol, na em i save ol i gat wanem tingting long ol samting, olsem na ol i pilim tru ol tok em i skulim ol long en.—Matyu 7:28.

Yumi inap pilim gut ol tok piksa bilong Jisas na ol narapela stori bilong Baibel sapos yumi save liklik long ol fama long taim bilong ol aposel—olsem ol kaikai ol i bin planim, ol tul ol i bin yusim, na ol hatwok na hevi bilong dispela wok.

Long tingting bilong yu, lukim fama i mekim wok long gaden bilong em. Ritim ol ves bilong Baibel ol i kamapim, na bai yu kisimgut ol tok bilong Jisas.

Taim Bilong Planim Kaikai

Fama i sanap long dua bilong haus na san bilong moningtaim i sutim ai bilong em, na em i smelim win i gat ren long en. San i bin kukim graun na mekim em i kamap strong, tasol ren i mekim graun i kamap malumalum. Nau em i taim bilong brukim graun. Em i kisim tul bilong  brukim graun na putim long sol bilong em na wokabaut i go long gaden.

Em i bungim ol bulmakau na pasim ol wantaim, na em i mekim wok long stik bilong hariapim ol long wok. Graun i gat ston, olsem na tul bilong brukim graun i no brukim gut—em i sikirapim graun antap tasol na wokim ol liklik baret (1). Fama i hatwok long wokabaut na long wokim ol baret i go stret tasol—em i no save lukluk i go long baksait, nogut em i no holim gut samting bilong brukim graun na ol baret i krungut nabaut. (Luk 9:62) Em i mas i stap insait long mak bilong graun bilong em na wokim ol baret i go stret na inapim tru liklik hap graun bilong em.

Orait fama i wokim olgeta baret pinis na nau em taim bilong planim kaikai. Long wanpela han em i holim bek i gat bali, na long narapela han em i wok long tromoi sid i go long han kais na han sut (2). Insait long gaden i gat ol liklik rot bilong wokabaut na graun i strong tru, olsem na fama i mas was gut na bai ol sid i pundaun tasol long “gutpela graun.”—Luk 8:5, 8.

Taim fama i tromoi pinis ol sid, orait nau em i mas karamapim liklik graun antap long sid. Em i save kisim han bilong diwai na pasim baksait long ol bulmakau na ol i wokabaut na pulim ol dispela han bilong diwai. Planti pisin i kam singaut nabaut na stilim sampela sid taim fama i no karamapim graun yet long en. Bihain, fama i kisim wanpela kain baira (3) na brukim graun i go malumalum na rausim gras nogut i bin kamap, nogut em bai karamapim ol lip bilong bali taim em i no redi yet.—Matyu 13:7.

Taim Bilong Kisim Kaikai

Ol mun i kam i go pinis. Ren i pundaun. Het bilong bali i kamap pinis na i redi long katim, na san i holim na gaden i luk olsem waitpela.—Jon 4:35.

Long taim bilong bungim kaikai, fama na famili bilong em i gat bikpela wok tru. Wokman i holim ol stik bilong bali long han kais, na long han sut em i holim naip na katim (4). Ol narapela wokman i bungim bali na pasim olsem mekpas (5), na putim antap long ol donki o wilka (6) na bringim i go long ples bilong rausim ol pipia bilong bali.

San i lait strong antap long skai. Famili i malolo liklik long ples kol aninit long diwai fik. Ol i lap na toktok na kisim kaikai olsem bret, bali ol i kukim pinis long paia, oliv, na fik, na grep ol i draim  pinis. Ol i kaikai pinis, na dring wara i save kamap long graun.—Lo 8:7.

Long gaden klostu, wanpela lain i wok long bungim bali ol wokman i bin lusim i stap long graun (7). Sampela man i stap rabis na ol i no gat graun bilong ol.—Lo 24:19-21.

Bihain, long ples bilong rausim ol lip na skin bilong bali, fama i kisim bali i stap yet wantaim stik bilong en na tromoi long graun i strong pinis na ol i wokim olsem plua. Ol bulmakau i pulim plang bilong krungutim bali i go i kam (8). (Lo 25:4) Ol ston i gat sap na ol liklik hap ain samting i pas aninit long plang na ol i katkatim ol stik bilong bali.

Fama i wetim win bilong apinun i kamap. (Rut 3:2) Long nait em i holim savol bilong rausim pipia long bali (9) na em i subim i go aninit long bali i stap yet long stik, na tromoi i go antap. (Matyu 3:12) Bali i pundaun long plua, na win i rausim ol pipia i go. Fama i mekim olsem i go inap long olgeta pipia i pinis.

Tulait i bruk na meri na ol pikinini meri bilong fama ol i kirap sipim bali (10). Bali i pundaun insait long ol basket, na ol i rausim pipia i go. Long dispela yia ol i kisim planti bali tru long gaden. Ol wokman i pulimapim hap bali long ol sospen (11). Na ol bai putim bikpela hap bali long bakstua.

Fama i sanap long plua na stretim baksait na taitim ol masol bilong han lek, na em i lukluk i go long gaden i stap long arere bilong ples. Em i amamas long lukim ol stik nating bilong bali—em mak bilong bikpela wok em i bin mekim long dispela de. Em i lukim ol wokman i mekim wok long ol gaden wain na ol diwai oliv, pomigranet, na fik. Wanpela neiba klostu i wok i stap long liklik hap graun bilong em na em i tromoi han bilong tok gude. Em bai planim kukamba, ol kain kain bin, anian, na ol samting olsem. Fama i lukluk i go antap na i mekim sotpela beten bilong tenkyu long God husat i save givim ol gutpela presen long ol man.—Song 65:9-11.

[Ol Piksa long pes 28-30]

(Lukim buk o magasin)