Ol Kristen Long Nau i Mas Mekim Wanem?

OL Kristen tru long nau i no insait long wok politik. Bilong wanem? Long wanem, ol i bihainim pasin bilong Jisas. Jisas i tok long em yet olsem: “Mi no bilong dispela graun.” Na em i tok long ol disaipel bilong em: “Yupela i no insait long ol samting bilong dispela graun.” (Jon 15:19; 17:14) Skelim sampela as na ol Kristen i no ken insait long ol wok politik.

1. Ol man i sot long save. Baibel i tok ol man i no gat save na i no gat rait long bosim ol yet. Profet Jeremaia i tok: “Mipela man i no inap bosim wokabaut bilong mipela yet na bihainim ol rot mipela i laikim.”—Jeremaia 10:23.

God i no wokim ol man bambai ol inap flai long strong bilong ol yet, na olsem tasol, em i no wokim ol bambai ol inap bosim gut ol yet, nogat. Saveman David Fromkin i stori olsem ol gavman i sot long save bilong bosim ol man, na em i tok: “Ol man tasol i kamapim ol gavman, olsem na ol i save popaia na ol i no save long wanem samting bai kamap bihain. Ol i gat strong long mekim sampela samting, tasol ol i no gat strong long mekim olgeta samting.” (Buk The Question of Government) Olsem na Baibel i givim tok lukaut olsem yumi no ken bilip long ol man bilong graun!—Song 146:3.

2. Ol spirit nogut i save stiaim tingting bilong ol man. Taim Satan i laik givim strong long Jisas long bosim dispela graun, Jisas i no tok olsem Satan i no gat namba long givim olgeta kingdom bilong graun long em. Long narapela taim, Jisas i kolim Satan olsem “hetman bilong dispela graun.” Na sampela yia bihain aposel Pol i kolim Satan olsem “god bilong dispela graun.” (Jon 14:30; 2 Korin 4:4) Pol i tokim ol wanwok Kristen: “Yumi pait wantaim . . . ol hetman i bosim tudak bilong dispela graun, na ol spirit nogut i stap antap.” (Efesus 6:12) Planti man i no save olsem ol spirit nogut i bosim graun. Dispela save i mas mekim wanem long tingting yumi gat long wok politik?

Tingim dispela tok piksa: Tait bilong solwara i gat strong long karim ol liklik bot i go, na olsem tasol ol spirit nogut i gat strong long stiaim wok politik bilong ol man. Na wankain olsem ol boskru long ol dispela liklik bot i no inap mekim wanpela samting bilong senisim  strong bilong tait, ol bikman bilong politik i no inap mekim wanpela samting bilong senisim strong bilong ol spirit nogut long stiaim ol. Ol dispela spirit nogut i wok strong long bagarapim tingting bilong ol man na dispela i kamapim ol bikpela hevi long graun. (Revelesen 12:12) Olsem na bilong kamapim ol senis tru long graun, i mas i gat wanpela man em strong bilong em i winim tru strong bilong Satan na ol spirit nogut. Dispela Man em God Jehova.—Song 83:18, NW; Jeremaia 10:7, 10.

3. Ol Kristen tru i sapotim Kingdom Bilong God tasol. Jisas na ol disaipel bilong em i save olsem long taim stret em God i makim, God yet bai kamapim wanpela gavman long heven bilong bosim graun olgeta. Baibel i kolim dispela gavman olsem Kingdom Bilong God, na i kamapim klia olsem God i bin makim Jisas Krais olsem King bilong dispela gavman. (Revelesen 11:15) Kingdom bai helpim gut olgeta manmeri, olsem na “gutnius bilong Kingdom bilong God” em bikpela tok Jisas i autim. (Luk 4:43) Na tu, em i skulim ol disaipel long beten olsem: “Kingdom bilong yu i mas i kam.” Bilong wanem em i skulim ol olsem? Long wanem, Kingdom bai kamapim laik bilong God long heven na long graun.—Matyu 6:9, 10.

Orait, wanem samting bai painim ol gavman bilong graun? Baibel i tok ol gavman “bilong olgeta hap graun” bai bagarap. (Revelesen 16:14; 19:19-21) Sapos wanpela man i bilip tru olsem Kingdom Bilong God bai pinisim ol gavman bilong graun, ating i stret em i no sapotim ol dispela gavman, a? Sapos em i traim long sapotim ol dispela gavman, i kain olsem em i birua long God.

Ol Kristen tru i no insait long wok politik, tasol yu ting dispela i makim olsem ol i no laik helpim wok bilong ol komiuniti we ol i sindaun long en? Skelim bekim bilong dispela askim long stori i kamap bihain long dispela.

[Rait long pes 7]

Ol Witnes Bilong Jehova i sapotim Kingdom Bilong God, na i no wok politik