Olsem Wanem Yumi Inap i Stap Gutpela Bilipman na Gutpela Sitisen?

I GAT wanem tupela samting Jisas i laik mekim taim em i autim tok? Namba 1, Jisas i laik senisim tingting na bel bilong ol man, na i no senisim ol gavman. Olsem: Tingim samting Jisas i kamapim long Bikpela Tok Long Maunten. Paslain long em i tokim ol manmeri long ol i mas i stap olsem sol na lait, em i tokim ol olsem ol man inap i stap amamas tru sapos ol i “hangre long kisim save long God.” Em i tok moa: “Ol man i bihainim pasin isi, . . . bel bilong ol i stap klin, . . . [na] mekim i dai kros, ol i ken amamas.” (Matyu 5:1-11) Jisas i helpim ol disaipel long save olsem em i bikpela samting long stretim tingting na bel bilong ol na bai i stret wantaim ol lo bilong God long wanem samting i gutpela na wanem samting i nogut, na i bikpela samting long givim bel olgeta long mekim wok bilong God.

Namba 2, taim Jisas i lukim ol manmeri i karim pen na hevi, em i sori long ol na dispela i kirapim em long helpim ol. Tasol em i no ting wok bilong pinisim olgeta pen na hevi i nambawan wok bilong em. (Matyu 20:30-34) Em i oraitim ol sikman, tasol em i no pinisim sik olgeta. (Luk 6:17-19) Em i helpim ol man em narapela i daunim ol, tasol pasin i no stret i stap yet na i wok long givim hevi long ol man. Em i givim kaikai long ol man i hangre, tasol bikpela hangre i stap yet na i wok long kilim i dai ol man.—Mak 6:41-44.

Senisim Tingting na Helpim Man Long Karim Hevi

Bilong wanem Jisas i tingting strong long senisim tingting bilong ol man na helpim ol man i stap bel hevi, tasol em i no senisim gavman o pinisim ol hevi? Jisas i save olsem God i tingting pinis olsem long bihain em bai yusim Kingdom Bilong Em long pinisim olgeta gavman bilong graun na pinisim as bilong olgeta pen na hevi. (Luk 4:43; 8:1) Olsem na taim ol disaipel i bin tokim Jisas long lusim bikpela haptaim moa bilong oraitim ol sikman, Jisas i tokim ol: “Yumi go long narapela hap, long ol taun i stap klostu, na bai mi ken autim tok long ol dispela hap tu, long wanem, em long dispela as na mi kam.” (Mak 1:32-38) Jisas i bin oraitim planti sikman, tasol wok bilong autim tok na skulim ol man long tok bilong God i olsem nambawan wok bilong em.

Long nau ol Witnes Bilong Jehova i wok strong long bihainim pasin bilong Jisas long mekim wok autim tok. Ol i laik helpim ol man husat i karim pen na hevi, olsem na ol i mekim ol samting bilong helpim ol. Tasol ol Witnes i no mekim ol samting bilong pinisim ol pasin i no stret long graun. Ol i bilip olsem Kingdom Bilong God bai pinisim as bilong olgeta pen na hevi. (Matyu 6:10) Olsem Jisas, ol i laik helpim ol man long senisim tingting bilong ol, tasol i no long senisim ol gavman. Em i stret long mekim olsem, long wanem, as bilong ol hevi bilong ol man i no wok politik, em pasin bilong ol man.

Gutpela Sitisen

Ol Witnes Bilong Jehova i bilip olsem em wok bilong ol olsem Kristen long daun long gavman. Olsem na ol i rispektim ol bikman bilong gavman. Long rot bilong ol buk, ol nius, na wok autim tok bilong ol, ol i kirapim ol man long bihainim ol lo bilong gavman. Tasol sapos gavman i tok ol i mas mekim wanpela samting i pait wantaim lo bilong God, ol Witnes  i no save bihainim tok bilong gavman. Ol ‘i mas bihainim tok bilong God tasol, na ol i no ken bihainim tok bilong ol man.’—Aposel 5:29; Rom 13:1-7.

Ol Witnes Bilong Jehova i save visitim olgeta man long komiuniti bilong ol bilong kirapim ol long kisim save long ol tok bilong Baibel, no gat pe. Long dispela rot, planti milion manmeri i bin senisim tingting bilong ol. Long olgeta yia, ol i save helpim planti handret tausen manmeri long lusim ol pasin nogut olsem smok, dring planti, kisim drak, pilai laki, na pamuk. Ol dispela manmeri i kamap gutpela sitisen, long wanem, ol i bin lain long bihainim ol stiatok bilong Baibel long laip bilong ol.—Lukim stori “Baibel i Save Senisim i Stap Bilong Man,” long pes 18 bilong dispela nius.

Na tu, Baibel i skulim ol famili long rispektim narapela narapela na mekim pasin bilong toktok gut wantaim i kamap gutpela moa—olsem namel long tupela marit, papamama na ol pikinini, na namel long ol pikinini yet. Pasin bilong toktok gut wantaim i save strongim olgeta insait long famili. Na taim famili i pas gut wantaim, dispela i strongim tu ol komiuniti.

Taim yu skelim pinis ol tok long ol dispela stori, yu kisim wanem tingting? Yu ting Baibel i orait long ol lotu i insait long wok politik? Bekim i klia tru; tupela i no inap wok bung wantaim. Tasol olsem wanem? Yu ting ol Kristen i mas i stap olsem gutpela sitisen? Yes. Olsem wanem ol inap i stap olsem? Long rot bilong bihainim tok bilong Jisas long i stap olsem sol na lait long dispela graun.

Taim ol man i wok strong long bihainim ol dispela gutpela tok bilong Krais, dispela bai helpim ol yet, famili bilong ol, na helpim tu komiuniti bilong ol. Ol Witnes Bilong Jehova bai amamas long stori moa long yu long wanpela program bilong skulim ol man long Baibel, we i save kamap long komiuniti bilong yu. a

[Futnot]

[Rait long pes 10]

Jisas i laik helpim ol man long senisim tingting, em i no senisim gavman

[Rait long pes 11]

Ol Witnes Bilong Jehova i save olsem ol i gat wok long stap gutpela sitisen