“Bilong Kisim Laip Oltaim”
“Bilong Kisim Laip Oltaim”
“Bilong kisim laip oltaim, ol i mas kisim save long yu, yu wanpela tasol yu God tru, na ol i mas kisim save long man yu bin salim i kam, em Jisas Krais.”—JON 17:3.
SAVE inap seivim laip. Wanpela bebi nem bilong em Nouhou i bin sik taim em i gat 10-pela mun. Mama bilong en em wanpela komiuniti helt woka long Naija na em i save pinis long samting em i mas mekim. Em i wokim suga wara na givim long pikinini. Lain UNICEF i tok mama “i gat save long marasin na em i mekim kwik ol samting, olsem na em i helpim pikinini bilong em long kamap orait gen.”
Save i kam long Baibel tu inap seivim laip. Namba 1 man bilong raitim Baibel, Moses, i tok: “Dispela tok bilong God i no toktok nating. Nogat. Em i as tru bilong yupela i ken i stap gut. Yupela i mas bihainim gut na bai yupela i stap longpela taim long graun.” (Lo 32:47) Yu ting Baibel inap helpim yumi long i stap laip longpela taim moa? Olsem wanem em inap helpim yumi long mekim olsem?
Faivpela stori i kamap paslain long dispela i soim klia olsem Baibel i narapela kain buk. Ol tok profet bilong en i kamap tru, i stret wantaim ol stori bilong ol samting i bin kamap bipo, i stret wantaim saiens, na olgeta tok bilong en i stret wantaim, na inap helpim man. Dispela i mekim na Baibel em i narapela kain buk. Olsem na taim Baibel i kolim samting yumi mas mekim bilong i stap laip longpela taim moa—laip oltaim—i gutpela yumi skelim gut ol tok i stap long ol atikol i kamap paslain long dispela, a?
Mipela i laik kirapim yu long kisim save long olsem wanem stretpela save bilong Baibel inap helpim yu long stap bel isi long nau na stap amamas long bihain. Ol Witnes Bilong Jehova bai amamas long soim yu long olsem wanem yu inap kisim dispela save.
[Blok/Piksa long pes 9]
Na tu, Baibel i narapela kain, long wanem, em tasol i bekim gut ol bikpela askim olsem:
• Yumi stap bilong mekim wanem?
• Bilong wanem i gat planti pen na hevi?
• Gutpela samting bai painim ol pren na famili bilong mi i dai pinis?
Yu inap kisim bekim bilong ol dispela askim long dispela buk em ol Witnes Bilong Jehova i wokim. Tru Tru Baibel i Tok Wanem?
