Dispela atikol i kamapim sampela askim em ating yu laik save long en, na i soim yu wanem hap bilong Baibel yu inap ritim bilong painim bekim. Ol Witnes Bilong Jehova bai amamas long toktok wantaim yu long ol dispela bekim.

1. Bilong wanem God i gat nem?

Yu laik bai ol man i kolim yu long nem tru bilong yu, na i no wanpela biknem olsem “man,” “mista,” “misis,” o “meri.” Olgeta wan wan man i gat nem bilong ol yet na yu tu i gat nem bilong yu yet. Baibel i kolim God long ol kain biknem olsem ‘God Bikpela,’ “God I Gat Olgeta Strong” na Bikpela Man Bilong Wokim yumi. (Stat 15:2; 17:1; Saveman 12:1) Tasol em i gat nem tru bilong em yet, na dispela i bilong helpim yumi long kamap pren bilong em. Long Tok Pisin, nem bilong God em Jehova.—Ritim Rom 10:13.

Planti trensleta bilong Baibel i senisim nem bilong God na putim kain tok olsem “God” na “Bikpela,” tasol nem bilong God i bin stap winim 7,000 taim long ol manuskrip bilong Baibel long tok Hibru bilong bipo. Dispela i kamapim klia olsem God i laik bai ol man i save long nem bilong em.—Ritim Rom 15:11.

2. Bilong wanem em i bikpela samting long yumi mas save long nem bilong God?

Bilong save long nem bilong God, i no olsem man i save long wei bilong kolim dispela nem na em tasol, nogat, em i mas mekim sampela samting moa. Em i mas save gut long ol pasin bilong God na pas gut wantaim em. Mining bilong dispela nem Jehova em olsem, “Em i Mekim i Kamap.” Dispela i kirapim yumi long bilip tru olsem God bai mekim olgeta kain samting bilong inapim samting em i tingting pinis long mekim. Olsem na taim man i tok em i save long nem bilong God, dispela i makim olsem em i bilip olsem God bai truim ol tok promis bilong em. (Song 9:10) Ol manmeri husat i save long nem bilong God na ol i yusim, bilip bilong ol i kirapim ol long putim God i stap namba 1 long laip bilong ol. God Jehova bai lukautim kain lain olsem.—Ritim Song 91:14.

 3. Bilong wanem God i laik bai ol man i save long nem bilong em?

God i laik bai ol manmeri i save long nem bilong em, long wanem, dispela bai helpim ol. Ol inap kamap pren bilong God na kisim laip oltaim. Em as na Jehova i laik yumi mas autim nem bilong em!—Ritim Jon 17:3; Rom 10:13, 14.

Jisas i kamapim klia nem bilong God long rot bilong skulim ol man long ol pasin bilong God, ol lo bilong Em, na ol promis bilong Em. Long nau ol disaipel bilong Jisas i mekim yet wok bilong autim nem bilong God long olgeta hap. Ol i wok bung wantaim olsem ‘wanpela lain em nem bilong God i stap long ol.’—Ritim Aposel 15:14; Jon 17:26.

4. Olsem wanem God bai litimapim nem bilong em?

God Jehova i laik litimapim nem bilong em, long wanem, ol man i bin krungutim gutnem bilong em. Olsem: Sampela man i tok em i no bin wokim ol samting na i no gat wok long yumi bihainim tok bilong em. Sampela narapela i tok em i no save tingim yumi na em i as bilong ol pen na hevi i painim yumi. Ol kain man olsem i bagarapim nem bilong God. Tasol ol i no inap mekim olsem i go inap oltaim, nogat. God bai bagarapim ol man husat i no rispek long nem bilong em.—Ritim Song 83:17, 18.

Jehova bai litimapim nem bilong em taim Kingdom bilong em i pinisim olgeta gavman bilong dispela graun na kamapim bel isi na gutpela sindaun long olgeta hap. (Daniel 2:44) Bihain, olgeta man bai save olsem Jehova em i God tru.—Ritim Esekiel 36:23; Matyu 6:9.

Yu mas mekim wanem? Go klostu long God long rot bilong stadi long Tok bilong em na bung wantaim ol lain husat i laikim em. Taim Jehova i litimapim nem bilong em, em bai tingim ol gutpela wokboi bilong em.—Malakai 3:16.

Bilong kisim sampela save moa, lukim sapta 1 bilong dispela buk em ol Witnes Bilong Jehova i wokim. Tru Tru Baibel i Tok Wanem?

[Piksa long pes 16]

Nem bilong God long wanpela Hibru manuskrip bilong bipo