OLSEM WANEM? Wanpela taim yu bin bikhet na yu no laik bihainim tok?— a Ating yu bin lukim wanpela program bilong TV em papa o mama bilong yu i bin tambuim yu long lukim. Bihain yu tingim dispela pasin bilong yu na yu sori olsem yu no bin bihainim tok. Wanpela man husat i no laik bihainim tok em Naman. Yumi ken stori long olsem wanem ol narapela i helpim em long bihainim tok.

Tingim olsem yumi tu i bin stap inap 3,000 yia i go pinis. Naman em i nambawan komanda long ami bilong Siria. Em i save tokim ol soldia bilong em long samting ol i mas mekim na ol i save bihainim tok bilong em. Tasol Naman i kisim wanpela sik nogut bilong skin em ol i kolim lepra. Dispela sik i mekim em i luk nogut tru, na i givim bikpela pen long em.

Wanpela liklik meri Israel i stap olsem wokmeri bilong meri bilong Naman. Wanpela taim dispela liklik meri i tokim bosmeri bilong em long wanpela man i stap long Israel, nem bilong em Elisa. Em i tok dispela man inap oraitim Naman. Taim Naman i harim dispela tok, kwiktaim em i laik i go lukim Elisa. Em i kisim planti presen na i go wantaim ol soldia bilong em long Israel. Em i go lukim king bilong Israel bilong tokim em long as na em i kam.

Elisa i kisim save long dispela samting na em i salim tok long king bai salim Naman i kam lukim em. Taim Naman i go kamap long haus bilong Elisa, Elisa i salim wanpela wokman i go tokim Naman long waswas 7-pela taim long wara Jordan. Elisa i tok Naman i mas mekim olsem na bai em i  kamap orait. Yu ting Naman i pilim olsem wanem long dispela tok?—

Em i belhat. Olsem na em i bikhet na i no laik bihainim tok i kam long profet bilong God. Em i tokim ol soldia bilong em olsem: ‘Ol wara long ples bilong mi i gutpela moa bilong mi ken waswas long en.’ Naman i laik lusim dispela hap. Tasol yu save ol soldia bilong em i tok wanem?—‘Sapos profet i bin tokim yu long mekim wanpela hatpela samting, bai yu mekim. Tasol em i no mekim kain tok olsem. Olsem na i gutpela sapos yu bihainim tok bilong em.’

Naman i harim tok bilong ol soldia na bihainim. Sikspela taim em i go insait long wara na kam ausait. Taim Naman i go insait long wara namba 7 taim na i kam ausait, em i kirap nogut tru long lukim olsem sik lepra bilong em i pinis olgeta! Em i kamap orait gen! Kwiktaim em i go bek long haus bilong Elisa we i stap longwe inap 48 kilomita, bilong tok tenkyu long em. Em i laik givim Elisa ol presen i gat bikpela pe tru, tasol dispela profet i no laik kisim wanpela samting.

Olsem na Naman i askim Elisa long wanpela samting. Yu save long samting em i askim long en?— ‘Larim mi kisim sampela graun inap long skel bilong tupela donki i ken karim.’ Yu save long as na em i laik kisim dispela graun?— Naman i tok em i laik mekim ofa long God antap long alta em i wokim long graun em i kisim long Israel, em ples bilong ol manmeri bilong God. Naman i tok promis olsem em i no inap lotuim moa ol narapela god, nau em bai lotuim Jehova wanpela tasol! Pastaim em i no laik bihainim tok, tasol nau em i redi long bihainim tok bilong God tru.

Nau yu save long olsem wanem yu inap bihainim pasin bilong Naman?— Sapos yu save bikhet olsem Naman, yu inap senis. Yu ken kisim helpim bambai yu no bikhet moa.