Helpim Yumi Long Nau

“Tok bilong yu i olsem lam bilong helpim mi long wokabaut stret, na i olsem lait bilong soim rot long mi.”—SONG 119:105.

OLSEM WANEM BAIBEL I NARAPELA KAIN? Ol man i tingim sampela buk olsem ol i gutpela buk tru, tasol tok bilong ol i no inap long stiaim gut ol man. Na oltaim ol man i mas stretim na raitim gen ol buk bilong nau em ol i bilong givim save. Tasol Baibel i tok “olgeta tok ol i bin raitim long bipo, ol i bin raitim bilong skulim yumi.”—Rom 15:4.

EKSAMPEL: Maski Baibel em i no wanpela buk bilong helt, em i gat ol skultok long ol samting man i mas mekim bilong lukautim gut bel na tingting na helt bilong em. Olsem, Baibel i tok: “Sapos man i stap bel isi, orait bodi bilong en bai i stap gut.” (Sindaun 14:30) Na tu, Baibel i tok lukaut olsem: “Man i save stap wanpis, em i save tingting long em yet tasol. Maski sapos ol arapela man i gat gutpela tingting, dispela man i no laikim tingting bilong ol.” (Sindaun 18:1) Tasol Baibel i tok tu olsem “amamas bilong givim samting i winim amamas bilong kisim samting.”—Aposel 20:35.

TOK BILONG OL SAVEMAN: Pasin bilong i stap bel isi, stap gutpela pren tru, na pasin bilong givim ol samting, dispela inap helpim helt bilong yu. Buk The Journal of the American Medical Association i tok: “Ol man husat i save belhat kwik, em isi tru long ol i kisim sik strok, winim ol man husat i save daunim belhat.” Ol i mekim wanpela wok painimaut long Australia inap 10-pela yia na ol i painimaut olsem ol lapun husat i “pas gut wantaim ol pren na ol narapela,” ol i stap laip inap longpela taim moa. Long 2008, ol man bilong mekim wok painimaut long Kanada na Amerika i kisim save olsem “taim man i yusim mani bilong helpim ol narapela, em i kisim bikpela amamas moa, winim amamas em i kisim taim em i yusim mani bilong helpim em yet.”

YU GAT WANEM TINGTING? Yu ting yu inap trastim skultok bilong lukautim helt i kam long wanpela buk ol i bin raitim klostu 2,000 yia i go pinis? O yu ting Baibel i narapela kain?

[Rait long pes 8]

“Mi laikim tru ol tok bilong Baibel . . . long wanem, em i gat ol gutpela tok tru long sait bilong helt.”—HOWARD KELLY, M.D., MEMBA BILONG THE JOHNS HOPKINS UNIVERSITY SCHOOL OF MEDICINE