Baibel i Save Senisim i Stap Bilong Man

WANEM samting i bin helpim wanpela meri long Filipins long lusim pasin bilong dring planti na nau famili bilong em i stap amamas? Bilong wanem wanpela man Australia husat i save laikim tru pait karate i kamap wokman bilong lotu? Ritim tok ol dispela manmeri i mekim.

“I hatwok tru long mi mekim ol dispela senis.”—CARMEN ALEGRE

YIA MI BON: 1949

KANTRI: FILIPINS

BIPO: MI SAVE DRING OLTAIM

LAIP BILONG MI LONG BIPO: Mama i karim mi long San Fernando, em wanpela taun i stap long provins Camarines Sur. Taim mi kamap bikpela pinis, mi go stap long taun Antipolo inap planti yia, long provins Rizal. Antipolo i stap long ples maunten i gat gras na planti diwai, na dispela taun i bin liklik taim mi go sindaun long en. I no gat planti man i save wokabaut raun long nait. Tasol nau Antipolo i kamap bikpela siti na i gat planti manmeri long en.

Bihain long mi kam sindaun long Antipolo, mi bungim wanpela man nem bilong em Benjamin, na mitupela i marit. Mi lukim olsem laip bilong ol marit i gat planti hatwok tru, em samting we bipo mi no bin ting bai kamap. Bilong lusim tingting long ol hevi bilong mi, mi save dring planti. Mi kisim hatpela pasin na dispela i kamap klia long pasin mi mekim long man na ol pikinini bilong mi. Mi no gat pasin isi o pasin bilong bosim bel, na mi no rispektim man bilong mi. Dispela i mekim na famili bilong mipela i no stap amamas.

BAIBEL I SENISIM I STAP BILONG MI: Editha, em susa bilong man bilong mi, em i wanpela Witnes Bilong Jehova na em i tok i gutpela mitupela Benjamin i stadi long Baibel wantaim ol Witnes. Mipela i orait long dispela, long wanem, mipela i ting dispela bai helpim sindaun bilong famili bilong mipela.

Taim mipela i stadi long Baibel, mipela i kisim planti gutpela save. Mi pilim tru tok bilong Revelesen 21:4. Ol manmeri husat bai kisim laip long Paradais long graun aninit long Kingdom Bilong God, dispela ves i tok God “bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen.” Mi tu mi laik kamap wanpela bilong dispela lain husat bai kisim ol dispela blesing.

Mi luksave olsem mi mas mekim sampela bikpela senis long tingting na pasin bilong mi. I hatwok tru long mi mekim ol dispela senis, tasol isi isi mi wok strong na mi lusim pasin bilong dring oltaim. Mi lain long mekim gutpela pasin na pasin isi long famili bilong mi. Na moa yet, mi lain long rispektim man bilong mi na wok gut wantaim em taim em i mekim wok bilong em olsem het bilong famili.

 Taim mitupela Benjamin i stat long i go long ol miting bilong ol Witnes Bilong Jehova, mipela i amamas tru long samting mipela i lukim. Ol Witnes i no gat pasin bilong pilai laki, dring planti, na bel nogut long ol man bilong narapela lain o skin. Ol i tingim gut olgeta man na soim rispek long ol. Mipela i bilip olsem mipela i painim pinis lotu i tru.—Jon 13:34, 35.

GUTPELA SAMTING I PAINIM MI: Sindaun bilong famili bilong mipela i kamap gutpela moa. Marit bilong mitupela Benjamin i stap gut, na mipela i amamas long skulim ol narapela long tok bilong Baibel. Tupela bikpela pikinini man bilong mipela na meri bilong ol i kirap pinis long stadi long Baibel. Mipela i laik bai ol tu i joinim mipela long mekim wok bilong Jehova. Dispela em i nambawan gutpela rot bilong bihainim.

“Mi pilim olsem i no gat wanpela samting inap daunim mi.”—MICHAEL BLUNSDEN

YIA MI BON: 1967

KANTRI: AUSTRALIA

BIPO: LAIKIM TRU KARATE

LAIP BILONG MI LONG BIPO: Mi kamap bikpela long Albury, wanpela naispela taun i gat planti wok bisnis long New South Wales. Wankain olsem ol narapela taun, dispela taun tu i gat sampela pasin raskol. Tasol planti man i ting olsem Albury em i seif long ol manmeri i ken sindaun long en.

Ol samting long laip bilong mi i gutpela taim mi wok long kamap bikpela. Maski papamama bilong mi ol i katim marit taim mi gat 7-pela krismas, ol i save lukautim gut mi, bikbrata, na tupela susa bilong mi, na mipela i no sot long wanpela samting. Mi kisim gutpela skul long nambawan praivet skul long dispela hap. Papa bilong mi i laik bai mi mas skul gut long pasin bilong wok bisnis taim mi pinisim skul. Tasol mi amamas moa long insait long ol spot, na mi save gut tru long ronim baisikol na mekim pait karate. Mi kisim wok long wanpela woksop bilong stretim kar, olsem na mi gat bikpela haptaim long mekim ol samting i helpim mi long sait bilong spot.

Mi amamas long lukautim gut bodi na mekim ol eksasais bilong stap fit tru. Sampela taim mi pilim olsem i no gat wanpela samting inap daunim mi. Sapos mi laik, mi inap yusim strong bilong mi long fosim ol narapela long mekim ol samting bilong helpim mi yet. Tasol mi wok strong long daunim dispela laik bilong mi, na karate tisa i luksave long dispela na em i kirapim na strongim mi long bosim mi yet na bihainim stretpela pasin. Oltaim em i tokim mi olsem em i bikpela samting long mi mas bihainim tok na stap gut long ol narapela.

BAIBEL I SENISIM I STAP BILONG MI: Taim mi kirap stadi long Baibel, mi kisim save olsem Jehova i no laikim tru pasin bilong pait. (Song 11:5) Pastaim mi ting karate em i no wanpela pait, em i wanpela spot we i no inap bagarapim man. Mi pilim olsem karate i kirapim man long mekim gutpela pasin na bihainim ol stretpela lo na dispela i stret wantaim tok bilong Baibel. Tupela marit Witnes em ol i bin stadi wantaim mi, ol i mekim pasin isi na i no les kwik long mi. Ol i no tokim mi olsem mi mas lusim pait karate, nogat, ol i wok yet long skulim mi long ol tok i tru bilong Baibel.

 Taim save bilong mi long Baibel i kamap bikpela moa na mi pas gut moa wantaim Jehova, mi kliagut moa long ol samting. Mi amamas tru taim mi kisim save long gutpela pasin bilong Jisas, em Pikinini Bilong Jehova. Maski Jisas i gat bikpela strong, em i no save yusim strong bilong em long nogutim ol man. Mi pilim tru tok bilong em long Matyu 26:52, olsem: “Ol man i yusim bainat, ol bai dai long rot bilong bainat.”

Taim mi wok long kisim sampela save moa long Jehova, mi laikim em tru na mi gat bikpela rispek moa long em. Man Bilong Wokim yumi i gat bikpela savetingting na olgeta strong, tasol em i tingim mi tru na mi pilim tru dispela gutpela pasin bilong em. Mi amamas tru long kisim save olsem maski mi mekim Jehova i bel hevi o mi pilim olsem i hatwok tumas na mi laik givap, tasol taim mi no givap na mi wok strong yet, Jehova i no lusim mi. Tok promis bilong em i mekim gut tru bel bilong mi, em i tok: “Mi God, Bikpela bilong yupela. Mi save sambai long yupela na mi tokim yupela olsem, yupela i no ken pret. Bai mi helpim yupela.” (Aisaia 41:13) Taim mi luksave long dispela pasin laikim, mi no laik larim wanpela samting i tekewe dispela samting long mi.

Mi save olsem bai mi hatwok tru long lusim pait karate. Tasol mi save tu olsem sapos mi lusim, dispela bai amamasim Jehova, olsem na mi redi long lusim olgeta narapela samting bambai mi ken mekim wok bilong Em. Samting i senisim tru tingting bilong mi em tok bilong Jisas long Matyu 6:24, olsem: “I no gat wanpela man inap stap wokboi bilong tupela bosman.” Mi luksave olsem mi no inap stap wokman bilong Jehova na long wankain taim insait long karate. Sapos mi mekim olsem, isi isi bai mi insait gen long pait karate. Taim i kamap long mi mas makim husat bai stap bosman bilong mi.

Em i no isi long lusim karate. Mi gat kain kain tingting. Mi amamas long save olsem mi mekim Jehova i amamas. Tasol mi pilim tu olsem mi givim baksait long karate tisa bilong mi. Ol man i insait long ol kain pait olsem karate, ol i tingim olsem pasin bilong givim baksait long narapela em i bikpela sin tru. Sampela bai i laik suasaid bambai ol i no ken kisim sem.

Mi pilim hatwok tru long tokim karate tisa bilong mi long as na mi lusim karate. Mi lusim tasol na mi no mekim wanpela tok, na mi no moa ring o toktok wantaim karate tisa na ol narapela pren bilong mi long pait karate. Mi save olsem mi mekim stretpela pasin long lusim karate. Tasol bel bilong mi i gat tok, long wanem, rot i op long mi inap tokim ol narapela long nupela bilip bilong mi, tasol mi no bin mekim olsem. Mi pilim olsem mi mekim Jehova i bel hevi maski mi no kirap yet long mekim wok bilong em. Olgeta dispela samting i bagarapim tru bel bilong mi. Planti taim mi traim long beten long Jehova, tasol bel hevi i save mekim na mi krai tasol.

Ating Jehova i lukim sampela gutpela pasin long mi na em i kirapim ol brata na sista long kongrigesen long helpim mi. Ol i soim pasin laikim, mekim gut bel bilong mi, na mekim gutpela pasin pren, na dispela i bin helpim mi tru. Stori bilong Baibel long Devit na Batseba i bin mekim gut bel bilong mi. Maski Devit i bin mekim ol bikpela rong, Jehova i fogivim em taim em i tanim bel tru. Taim mi tingim dispela stori, dispela i helpim mi long kisim stretpela tingting long ol rong bilong mi yet.

GUTPELA SAMTING I PAINIM MI: Paslain long mi stadi long Baibel, mi no save wari liklik long ol narapela man, mi save tingim mi yet tasol. Tasol nau mi kisim helpim long Jehova na long naispela meri bilong mi—em mipela i marit inap 7-pela yia—na long dispela rot mi kisim pasin bilong tingim tru ol narapela na sori long ol. Mipela i bin amamas tru long stadi long Baibel wantaim planti narapela, em sampela bilong ol i bin i gat ol bikpela hevi long sindaun bilong ol. Mi lukim olsem pasin laikim bilong Jehova i bin helpim ol manmeri, na dispela i givim bikpela amamas moa long mi, winim amamas mi inap kisim olsem man i save gut long karate.

[Rait long pes 14]

“Man Bilong Wokim yumi i gat bikpela savetingting na olgeta strong, tasol em i tingim mi tru na mi pilim tru dispela gutpela pasin bilong em”

 [Blok/Piksa long pes 15]

“Tenkyu Tru Long Ol Dispela Gutpela Atikol!”

Olsem wanem? Yu bin amamas long ritim ol dispela ekspiriens? Dispela em 2-pela bilong winim 50 ekspiriens olsem i bin kamap long nius Wastaua kirap long Ogas 2008. Planti man i laikim tru ol ekspiriens aninit long dispela het tok, “Baibel i Save Senisim i Stap Bilong Man.” Bilong wanem ol i laikim tru ol dispela stori?

Ol manmeri em stori bilong ol i kamap long ol dispela atikol, ol i bilong kain kain sindaun. Taim ol i no kisim save yet long God Jehova, sampela i bin i gat gutpela sindaun, tasol laip bilong ol i no gat as bilong en. Sampela i bin wok strong long lusim pasin nogut bilong ol, olsem pasin bilong kros pait, kisim drak, o dring spak. Sampela narapela i kamap bikpela insait long famili i lotuim Jehova, tasol ol yet i lusim pasin bilong lotuim Jehova. Olgeta dispela ekspiriens i soim olsem ol man inap senisim pasin bilong ol bambai ol i ken amamasim God. Na taim ol i mekim olsem, dispela i save helpim ol. Orait ol man i pilim olsem wanem taim ol i ritim ol dispela ekspiriens?

Wanpela meri i tok atikol i stap long Februeri 1, 2009 i bin helpim sampela kalabusmeri long wanpela haus kalabus.

◼ Em i tok: “Planti kalabusmeri i pilim tingting bilong ol manmeri em stori bilong ol i stap long dispela atikol. Ol piksa i soim laip bilong ol dispela manmeri ‘paslain’ na ‘bihain’ long ol i kisim save long Baibel, na stori bilong ol long ol samting i bin painim ol bipo, dispela i bin helpim tru ol kalabusmeri. Planti kalabusmeri i bin kam long wankain sindaun. Tupela kalabusmeri i kirap stadi long Baibel taim ol i ritim ol dispela stori.”—C. W.

Sampela man i bin pilim tru ol ekspiriens long ol dispela atikol. Olsem, atikol long Epril 1, 2011 i kamapim ekspiriens bilong Guadalupe Villarreal, em i bin lusim gei pasin bambai em inap mekim wok bilong Jehova. Planti man i bin salim pas long mipela taim ol i ritim ekspiriens bilong em, na yumi ken skelim 2-pela bilong ol dispela pas.

◼ “Mi pilim tru ekspiriens bilong Guadalupe. Mi amamas tru long lukim olsem pasin bilong laikim tru Jehova na tok bilong Baibel inap senisim tru pasin bilong man!”—L. F.

◼ “Bipo mi traim long autim tok long olgeta man, na long ol gei tu. Tasol nau mi no save tingim ol moa na mi save abrusim ol. Dispela atikol i stret tru long mi. Em i helpim mi long kisim tingting bilong Jehova long ol kain man olsem—ol tu inap kamap wokman bilong Jehova.”—M. K.

Narapela ekspiriens em planti man i pilim tru em stori bilong Victoria Tong, long Ogas 1, 2011. Victoria i tok laip bilong em i bin nogut tru taim em i liklik. Em i tok em i save taitim bun long mekim ol samting bambai em i ken pilim olsem Jehova i laikim em, maski em i lotuim Jehova inap planti yia pinis. Na em i stori long samting i helpim em na isi isi em i pilim olsem Jehova i laikim em. Skelim ol tok em sampela manmeri i mekim taim ol i ritim stori bilong em.

◼ “Ekspiriens bilong Victoria i stret tru long mi. Mi bin bungim planti hevi tru long laip bilong mi. Oltaim mi save wok strong long daunim ol tingting kranki—maski mi bin baptais na stap Witnes inap planti yia pinis. Tasol ekspiriens bilong Victoria i kirapim mi long wok strong moa long tingim olsem Jehova i lukim sampela gutpela pasin bilong mi na mi mas i gat wankain tingting olsem em.”—M. M.

◼ “Taim mi yangpela, mi bin kalabus long pasin bilong lukim ponografi, na mi bin wok strong long lusim dispela pasin. Tasol i no longtaim i go pinis, mi insait gen long dispela pasin. Mi go long ol elda Kristen long kisim helpim, na mi wok long daunim dispela hevi. Ol elda i strongim mi olsem God i laikim mi tru na em i marimari long mi. Maski i olsem, sampela taim mi save pilim olsem mi samting nating tasol, i olsem Jehova i no inap laikim mi. Tasol mi kisim bikpela helpim tru taim mi ritim ekspiriens bilong Victoria. Nau mi luksave olsem taim mi bin tingim olsem God i no inap lusim rong bilong mi, i olsem mi tok ofa bilong Pikinini bilong em i no inap long karamapim sin bilong mi. Mi putim gut dispela atikol bambai mi ken ritim na tingim tingim long bel taim mi pilim olsem mi samting nating tasol. Tenkyu tru long ol dispela gutpela atikol!”—L. K.